Luzia uambe, “Nga kexile mu banza kiavulu mu ima ia bhiti kiá, kiki kia kexile mu ngi bhangesa kumona o ima íii kala ia bhonzele kiavulu.” Ibatulu iebhi ia mu kuatekesa? O kibatulu ki tu sanga mu divulu dia Matesu 6:34: “Uila kiki, ni kizuua kia mungu, kana ku ki kuatela hele. Mukonda o kizuua kia mungu kia di kalela ni hele íê. O hadi ia lelu ia soko ni kizuua kiê.” Luzia uambe kuila o izuelu íii ia Jezú ia mu kuatekesa kumona kuila, ka tokalele kuthandanganha ni kizuua kia mungu. Muene uambe dingi, “Nga kexile kia ni ibhidi iavulu, sé kuta-ku o jihele ja maka a kambele kubhita, ni kuila nange keji bhita uá.”

Sesá ua kexile ue mu banza kiavulu. “Ku semana nga kexile mu bhita izuua iiadi ni ku dila, sai mausuku ki ngi tenene kuzeka. Nga divuile kuila o ibanzelu íii ia iibha ieji ngi tolola.” Kibatulu kiebhi kia mu kuatekesa? Muene uambe kuila, o mukanda ua 1 Phetele 5:7: “Héle ienu ioso xilenu-iu Nzambi, kuma muène ua mi kuatela muanu.” Sesá uambe: “Nga kexile mu samba kua Jihova ithangana ioso, muene ua tambuijila o misambu iami. Nga divuile kala a ngi katula kimbamba kia n’eme ku mutué. Sai bhabha ngi kala hanji ni ibanzelu iaiibha, maji ngejiia kiá se kiebhi ki ngi tena ku dibhana na-iu.”

Sai kilumba a mu ixana Nzebele, uambe: “O kifua kiki ukexilu kiá ua muiji. Ka kexile mu ta kupholo o ima ia beta kota, phala kukala ni kithangana kia kunhoha ni kutala mutelembe ua izuzumbia. Iú ki ukexilu uambote kana, mukonda u bhangesa o muthu kukala ni hele ni kukamba kubhanga kiambote o ikalakalu.” O kibatulu kia mu kuatekesa, o mukanda ua 2 Timote 2:15, uambe: “Kala ni muanu ua ku d’idikiza kua Nzambi u muthu a ku lola, a ku mono kuiuka; u mukalakadi kua bhange kima kia tena ku ku kuatesa jisonhi.” Nzebele uambe, “Ki ngi mesenene kuila Jihova u dituna o ikalakalu iami mukonda dia ukexilu iú.” Muene ua kulu mu nzumbi.

Kiene ue kia bhite ni Ngalaxi, muene uambe: “Né muene ni ikalakalu iavulu nga kexile mu i bhaka phala ku i bhanga mu kithangana kia sukina. Nga kexile mu dila, kukamba kuzeka, ni kubanza kiavulu. Ki nga kexile mu divua kiambote.” Ngalaxi ua sange o kikuatekesu mu divulu dia Jisabhu 13:16: “Muthu uadimuka, o ima ia bhanga u i endesa kiambote; maji o semenhi-phe, uaneka o usemenhi uê.” Muene ua jimbulula kiebhi o kuxinganeka mu kibatulu kiki kia mu kuatekesa: “Unjimu o kubelesela ni ku disokejeka ande dia kizuua kubhixila. Kindala ngala ni programa ia ikalakalu phala ku ngi kuatekesa mu ikalakalu iami, kiki ki ngi kuatekesa kubhanga o ima mu kithangana kia tokala.”

Tina uambe, “Muadi uami ua ngi xisa ni tuana tu uana.” Kibatulu kiebhi kia mu kuatekesa? Jisabhu 17:17 kiambe: “Dikamba u zola mu thembu joso; o ndandu u di monekena mu jiphaxi.” Tina ua soto o kikuatekesu ku jiphange mu kilunga. Ihi ia sange muene? “O makamb’ami a ngi kuatekesele mu maukexilu avulu! Sai ia akexile mu ngi xila makúdia ni jifololo bhu dibhitu diami. Mu veji jitatu athu avulu a ngi kuatekesa ni tuana tuami kioso ki tua ile mu tunga mu inzo iengi. Sai muthu ua ngi kuatekesa kusanga salu. O makamb’ami akexile mu ngi kuatekesa mu ithangana ioso.”

O Fina tua mu tange kudima, ua dibhanene ue ni maka iá, a kudivua ubheka. Muene ua dilembalala kioso kia bhiti ni ibhidi: “Nga divuile kala o muenhu uami ki u kexile ni valolo. Nga divuile kuila ngala ubheka.” O kibatulu kimoxi kia mu kuatekesa kia Jisálamu 68:6: “Phulungu [mba muthu] ua xala ubheka, Nzambi u bhanga dibhata.” Muene uambe: “Ngejidile kuila o kibatulu kiki ki kia kexile mu lombolola dibhata mu tunga o muthu. Maji ngeza mu ku tendela kuila, Nzambi u bhana dibhata mu nzumbi, o kididi kia ku kondama kua kidi ki tu zukamesa dingi ni ió a zolo ue Jihova. Maji ngejiia kuila ki ngi tena kuzukama ku jiphange jami sé kuzukama kua Nzambi. Mu kiki o divulu dia Jisálamu 37:4 dia ngi kuatekesa: ‘Ngalasa ié i tunde mu ku di tuma ni Jihova; muene u ku bhana ki ua solo mu muxima.’”

Muene ua suku mu kuzuela kuila: “Nga mono kuila nga bhingile kuzukama dingi kua Jihova. Muéne o muthu ua beta dingi o kota mu ku uabha. Mu kiki nga soneka ima mu kamukanda i ngeji uabhela kubhanga ni akuetu, phala ngi tene kukala ni makamba a zolo ue Jihova. Nga dilongo ku tonginina ngó o idifua iambote ia akuetu ni kua talatala kiambote.”

Mu kidi o makamb’ami a mu sidivila Jihova ki athu akua ituxi hanji. O Jimbangi ja Jihova ene ue mu dibhana ni maka kala o athu ku mundu uoso. Maji o milongi ia Bibidia i a bhangesa kukuatekesa akua mu ithangana ia tokala. Kima kiambote kukala ni makamba kala iá. O kuila o itendelesu ia Bibidia i tena ue ku tu kuatekesa mu ku dibhana ni maka ki tu tena kua batula lelu kala, uhaxi ki u xikina milongo ni kuluuala kiavulu?