1-2. Izulukutu yebhi ya madiwanu yabhiti mu Pendekoxi ya 33 K.K.?

KYEXILE kya Lumingu mu kamene, mu Pendekoxi ya muvu wa 33 K.K., 120 a maxibulu adyongekele mu dibhata dya muthu, mu mbanza ya Jeluzaleme. (Ika. 1:13-15; 2:1) Izuwa kudima, Jezú wa tendelesele maxibulu mê, phala ka tunde mu Jeluzaleme, mukonda eji tambula ujitu wakatunda. (Ika. 1:4, 5) Ihi yabhiti?

² “Anga a tukumuka ku dyulu kwa d’ivisa kala kitembu kyaswina kyala mu tuluka ni kwona.” O jibuya anga ajivwa mu inzo yoso. Mukusuluka “madimi ma di wanununa kala túbhya” a moneka ku thandu dya mitwe ya maxibulu, enyoso anga “ezala ni nzumbi ikôla.” (Ika. 2:2-4) Mu ukexilu yú wa madiwanu, Jihova wa tula o nzumbi yê ikôla ku thandu dya kibuka kiki. (Ika. 1:8) Ene a dyanga ku a unda ni nzumbi ikôla * ni kutambula o kidyelelu kya kutumina ni Jezú ku dyulu.

3. Mukonda dyahi oso exile mu Pendekoxi kexile ni phata ya kwila a a undu ni nzumbi ikôla?

³ Se wa kexile bhu kaxi maxibulu akexile mu inzo ya thandu, ki weji jimba o kizuwa kyenyókyo. Ku mutwe we kwamoneka kima kya difu ni mulengu wa túbhya. Jihova wa kubhana kutena kwa kuzwela mu madimi engi! (Ika. 2:5-12) Ki wala ni phata kwila, a ku undu ni nzumbi ikôla. Maji o kwila, o athu a  undu ni nzumbi ikôla, atambula o kijimbwete mu ukexilu wa difu ni mu kithangana kimoxi ku mwenyu? Kana. Mukonda dyahi tu zwela kiki?

4. O kwila mu hama yadyanga o Jikidistá joso a a undu mu kithangana kimoxi ku myenyu yâ? Jimbulula.

⁴ Tu mone se kithangana kyebhi muthu kya tena ku mu unda ni nzumbi ikôla. O 120 dya maxibhulu a undu mu inzo ya thandu, ki ene ngó a undu mu Pendekoxi ya 33 K.K. Mukusuluka, a undu dingi 3.000 ja maxibulu engi. Ene a a undu ni nzumbi ni ikôla, mu kithangana kya a batizala. (Ika. 2:37, 38, 41) Maji mu mivu ya kayela, ko kwila Jikidistá joso a a undu mu kithangana kya a batizala. Akwa Samádya a a undu mu kubhita kithangana kyoso kya a batizala. (Ika. 8:14-17) Maji Kolonelyu ni athu akexile ku bhata dyê, a a undu ande dya ku a batizala. Kiki kya bhiti ngó lumoxi.—Ika. 10:44-48.

5. Kala kilondekesa 2 Kolindu 1:21, 22, ihi i bhita ni muthu kyoso kya mu unda?

⁵ Kindala tu mone se ihi ibhita kyoso muthu kya mu unda bhu kaxi ka nzumbi ikola. Sayi athu, kyoso kya a unda, kya abhonza kuxikina kwila, Jihova wa asolo. Ene atena kudibhwidisa, ‘Mukonda dyahi Jihova wa ngi solo eme?’ Amukwá nange ka divu kiki. Kikale se adibhwidisa kiki mba kana, poxolo Phawulu wajimbulula ibhita kyoso muthu kya mu unda: “O Nzambi yú wa mi te kidimbu * kyê kya nzumbi ikôla, a mu tangele o kwiza. O nzumbi ikôla kifwa dyene o dixikina dya tu bhana dya kwila hinu twa kà tambula kwa Nzambi kyokyo kya kanena o mundu wê.” (Efe. 1:13, 14) Kyenyiki-phe, bhu kaxi ka nzumbi ikôla, Jihova ulondekesa ku Jikidistá jiji kwila, wa a solo. Mu ukexilu yú, o nzumbi ikôla yene o “dixikina [kidyelelesu mba kikanenu],” kya alondekesa kwila, a-nda tunga ku dyulu katé ku hádya ni hádya, kana mu ixi.—Tanga 2 Kolindu 1:21, 22.

6. Ihi ya tokala kubhanga o Kidistá a mu undu phala kutambula o futu yê ku dyulu?

⁶ Kyoso o muthu kya mu unda, o kwila kiki  kilombolola kuma, mwéne wanda tambula o futu yê? Kana. Mwene wejiya ni kidi kyoso kwila, a musolo phala kuya ku dyulu. Mwene wa tokala kulembelala o kidimwinu kiki kya Phetele: “Wila kiki, enu mu akwetu, phange jami, sotenu izuwa yoso kukala ni muxima wa kolo mu kwijiya kuma Nzambi kidi kyene, mwène wa m’ixana yú wa mi solo. Mbata se kyene ki mu bhanga, ki mwa-nda kudibhala dingi.” (2 Phe. 1:10) Mu kiki, sumbala o Kidistá a mu undu a musolo, mba amwixana, phala kuya ku dyulu, mwene wanda tambula ngó o futu yê se ukolokota mu ufiyele.—Fil. 3:12-14; Jihe. 3:1; Dij. 2:10.

7. Kyebhi o muthu kyeijiya se amwixana phala kuya ku dyulu?

⁷ Maji kyebhi o muthu kyejiya kwila amwixana phala kuya ku dyulu? O kitambwijilu tu kisanga mu izwelu ya Phawulu ku jiphange ku Loma, akexile mu a exana “mundu” wa Nzambi. Mwéne wa a tangela: ‘Mbata enu ki mu tambula Nzumbi ya ubhika, kwila mu kala dingi ni wôma. Maji mwa tambula nzumbi ya wana i mi bhangesa kukala mu an’a Nzambi, o mu nguzu ya tu bhana o nzumbi, ki tu bhana kudikola kwa Nzambi: Abha, Tata! O nzumbi ya Nzambi yene ibhana umbangi ni nzumbi yetu, kuma twala tu an’a Nzambi.’ (Loma 1:7; 8:15, 16) Kyenyi-phe, twila twixi bhu kaxi ka nzumbi yê ikôla, Nzambi ulondekesa ku athu a a undu, kwila a asolo mba a exana phala kuya ku dyulu.—1 Tes. 2:12.

8. Kala kilondekesa 1 Nzwá 2:20, 27, o kwila o Kidistá a mu undu wa bhingi muthu u mu tangela kwila a mu undu mwene?

⁸ Kyoso Jihova kya sola muthu phala kuya ku dyulu, Mwene kehela kusubhuka phata mu kixinganeku ni mu muxima wa muthu yú. (Tanga 1 Nzwá 2:20, 27.) Mu kidi, o Jikidistá a a undu a bhingi we ku a longa kwala Jihova, bhu kaxi ka kilunga kála kyene mu longa o athu a mukwá. Maji ene ka bhingi muthu wa tangela kwila, a a undu mwene. Bhu kaxi ka nzumbi ikôla, o nguzu ya beta-kota mu ngôngo yoso, Jihova u a londekesa ni kidi kyoso kwila, wa a undu!

9. Kala kijimbulula Efezu 1:18, ihi ibhita ni muthu kyoso kya mu unda?

⁹ Avulu mu kilunga kya Nzambi lelu, kitena ku abhonza kutendela yoso ibhita, kyoso muthu kya mu unda kwala Nzambi. Mukonda dyahi? Mukonda ene ka undu phala kuya ku dyulu. Nzambi ka bhange o athu phala kuya ku dyulu, maji wa a bhange phala kutunga mwene mu ngôngo mumu. (Dim. 1:28; Jisá. 37:29) Maji Jihova wasolo amoxi phala kuya ku dyulu. Kyenyiki-phe, kyoso Nzambi kya sola muthu, mwéne ulungulula o ibanzelu ni kidyelelu kyê, o muthu u mateka kuxinganeka kya ngó kuya ku dyulu.—Tanga Efezu 1:18.

10. Kyebhi kikala o muthu a mu “vwala lwa mukwá”? (Tala we o nota kulwiji.)

¹⁰ Kyoso Jikidistá kya a unda ni nzumbi ikôla, ene a a “vwala lwa mukwá.” * Jezú walondekesa kwila, o muthu né mwene ka mu undu, utena kutendela kyebhi kikala o muthu a mu “vwala lwa mukwá.”—Nzwá 3:3-8.

11. Jimbulula kyebhi ki lunguluka o ibanzelu ya muthu kyoso kya mu unda.

¹¹ Kixinganeku kyahi kya ubhe kiza ku muxima wa Kidistá kyoso kya mu unda? Ande dya Jihova ku unda o Jikidistá jiji, ene exile ni kidyelelu kya kutambula mwenyu wa kalelaku mu ixi. Ene exile mu kinga ni hanji yoso o kithangana kyoso Jihova kyanda kuzubha o kuyibha  kwoso ni kukitula o ixi palayízu. Sayi bhabha exile mu xinganeka o kizuwa kyeji tambulula o jindandu ni makamba-mâ a anda kwa fukununa ku mundu wobhe. Maji kyoso kya unda, ene a mateka kuxinganeka kyengi. Kiki kibhita mukonda dyahi? Ene ka lungulula o kidyelelu mukonda dya kubanza kwila, o mwenyu mu ngôngo ki wa soko dingi, kana. Kidyelelu kyâ ki ki lunguluka we mukonda dya kutoloka o muxima mba kutala hadi yavulu, kana. Mu veji dya kiki, Jihova ulungulula o kidyelelu ni ixinganeku yâ bhu kaxi ka nzumbi ikôla, sumbala a wabhelele kyavulu o kidyelelu kya kutunga mu ixi.

12. Kala kilondekesa 1 Phetele 1:3, 4, kyebhi kidivwa o Jikidistá a undu yalungu ni kidyelelu kyá?

¹² Amoxi a undu, a divwa kwila, ka tokala kutambula o ujitu yú wa katunda. Maji ene ka kala ni phata ya kwila, Jihova wa a solo. Ene a sanguluka kyavulu, a sakidila Jihova kyoso kya xinganeka o kidyelelu kya kuya ku dyulu.—Tanga 1 Phetele 1:3, 4.

13. Kyebhi o Jikidistá a undu kya tala o mwenyu wâ kindala mu ixi?

¹³ O kwila kiki kilombolola kuma o Jikidistá a undu amesena kyá kufwa? O poxolo Phawulu wa tambwijila o kibhwidisu kiki. Mwene wasokesa o mukutu wê ni fundu, yú wambe: “Kuma kidi kyene, etu kyoso ki twala mu fund’umu ya mukutu wetu, tu kema mukonda dya kinemenu kya tu xina. Ki mukonda tu andala a tu zula o mukutu wetu yú wa bhoxi, mbata twa mu kwinda ku tu zwika ni mukutu wa dyulu, phala o mwenyu u jikinise kiki kya xikamena o kufwa.” (2 Kol. 5:4) Ko kwila o Jikidistá jiji o mwenyu mu ixi wa akumu, anga a mesena kufwa, kana. Mu veji dya kiki, ene a sanguluka ku mwenyu, a mesena kusidivila jinga Jihova izuwa yoso, kumoxi ni jindandu ni makamba mâ. Né kiki, kabasa kikalakalu kya bhanga, ithangana yoso ene a lembalala o kidyelelu kya katunda kyala nakyu.—1 Kol. 15:53; 2 Phe. 1:4; 1 Nzwá 3:2, 3; Dij. 20:6.

14. Ihi ki ilondekesa kwila o muthu a mu undu ni nzumbi ikôla?

¹⁴ Nange wa mu dibhwidisa se Jihova wa kusolo phala kuya ku dyulu mba kana. Se kyene, xinganeka mu ibhwidisu yiyi: O kwila muxima u ku fulujuka mu kubhanga o vondadi ya Jihova? O kwila wene mu boka ni kuswína kwoso? Wa wabhela kudilonga o Bibidya, ni kutokwesa o ‘ima ya zongo ya Nzambi?’ (1 Kol. 2:10) U divwa kwila Jihova wa kubhangesa ku ditunda kyambote mu sidivisu ya kuboka? O kwila wazolo kyavulu o athu, anga u mona kwila wa tokala kubhanga yoso phala ku akwatekesa kusidivila Jihova? O kwila wa monene kyá o lukwaku lwa Jihova mu kima ki wa bhindamene ku mwenyu wê? Se wa tambwijila kyene, mu ibhwidisu yoso yiyi, o kwila ki kilombolola kwila a kusolo kwala Nzambi phala kuya ku dyulu? Kana, mukonda kiki ki kilombolola kima. Mukonda dyahi tu zwela kiki? Mukonda o jiselevende joso ja Nzambi a tena ku divwa kiki, kikale se a a undu mba kana. Bhu kaxi ka nzumbi yê ikôla, Jihova u tena kubhana we o nguzu yiyi ku jiselevende jê, kikale se anda tunga ku dyulu mba mu ixi. Mu kidi, se wala hanji ni phata, kilombolola kwila ka kusolo phala kuya ku dyulu. O athu a a solo kwala Jihova kala ni phata yalungu ni kidyelelu kyâ! Ene a kijiya!

15. Kyebhi ki twejiya kwila, ko athu oso a tambula o nzumbi ikôla ya Nzambi, a a solo phala kuya ku dyulu?

¹⁵ Mu Bibidya tu sanga-mu phangu ya athu avulu, a tambula o nzumbi ikôla, maji kexile ni kidyelelu kya kuya kudyulu. Davidi a mwendesa bhu kaxi ka nzumbi ikôla. (1 Sam. 16:13) O nzumbi ikôla ya mu kwatekesa kutendela milongi ya zongo yalungu ni Jihova, ni  kusoneka mbandu ya Bibidya. (Mál. 12:36) Né kiki, poxolo Phetele wambe kwila, Davidi “ku dyulu ka bandele-ku.” (Ika. 2:34) Ande dya ku mu vwala, o Bibidya yambele kwila, Nzwá dya Batizu “wa-nda kwizala ni nzumbi ikôla.” (Luka 1:13-16) Jezú wambe we kwila, ki kwexile muthu wa tûndu Nzwá. Maji mu kusuluka, Jezú wambe wé kwila, Nzwá keji bhanga mbandu ya Utuminu wa dyulu. (Mat. 11:10, 11) Bhu kaxi ka nzumbi yê ikôla, Jihova wa kwatekesa o mayala yâ kubhanga ima ya madiwanu, maji ka a solo ni nzumbi phala kuya ku dyulu. O kwila kiki kilombolola kuma, ene kexile mu sidivila Nzambi ni ufiyele woso, kala yó anda tumina kumoxi ni Jezú ku dyulu? Kana. Jihova wa-nda ku a bheka dingi ku mwenyu phala kukala mu Palayízu mu ixi.—Nzwá 5:28, 29; Ika. 24:15.

16. Kidyelelu kyahi kyala nakyu jiseleve javulu ja Nzambi lelu?

¹⁶ Mazunda ni mazunda a jiselevende ja Nzambi lelu, kala ni kidyelelu kya kuya ku dyulu. Kala Mbalahamu, Sala, Davidi, Nzwá dya Batizu ni jiselevende ja mukwá jo’kulu, ene a dyelela, a mu kingila kutunga mu ixi, kyoso o Utuminu wa Nzambi ki wanda tumina o ixi yoso.—Jihe. 11:10.

17. Ibhwidisu yebhi i twa-nda dilonga mu milongi ya kayela?

¹⁷ Lelu, bhu kaxi ketu bhwala hanji Jikidistá a a undu. Kyenyiki, sayi bhabha kumoneka ibhwidisu. (Dij. 12:17) Mu kifika, kyebhi o muthu a mu undu wa tokala kuditala? Se mu kilunga kyê mukala muthu u mateka kudya o mbolo, ni kúnwa o vinyu mu Lembalasa, kyebhi ki wa tokala ku mu mona? Abha se o athu a zwela kwila a a undu, a di bandekesa jinga dingi? O kwila wa tokala kutandanganya ni maka yá? Twa-nda tambwijila o ibhwidisu yiyi mu milongi ya kayela.