1. Ihi yabhiti ni phange munzangala kyoso kyevu odiskulusu mukyonge kyadikota kyabhiti mumuvu wa 1935?

SAYI phangyetu amubatizala mu muvu wa 1926, kyoso kyexile ni 18 dya mivu. Ojitata jê exile adilongi a Bibidya kala kyexile mukwixana o Jimbangi ja Jihova muthembu yoyo. Ene alongo otwana twâ tutatu twamala ni twana tuyadi twa ahatu kusidivila Jihova, ni kukayela ophangu ya Jezú Kidistu. Kuma kyexile kya kifwa kya adilongi a Bibidya muthembu yoyo, lumoxi kumuvu exile mubhanga Olembalasa ya Ngana. Omunzangala yú wafiyele, wexile mudya ombolo ni kunwa ovinyu mukithangana kya Lembalasa. Maji omwenyu we walunguluka kyoso kyevu odiskulusu ni dyambu: “Omundu Wavulu.” phange J. F. Rutherford mwene wabhange odiskulusu didi mukyonge kyadikota mumuvu wa 1935 mumbanza ya Washington, D.C., U.S.A. Ihi yatendela o adilongi a Bibidya mukyonge kiki?

2. Kidi kyahi kyajimbulula phange Rutherford mudiskulusu dya bhange mukyonge kyadikota?

² Mudiskulusu didi, phange Rutherford wajimbulula se ananyi “omundu wavulu” (Versão Rei Jaime), wotumbule mu Dijingunwinu 7:9. Muthembu yoyo, ojiphange exile muxinganeka kwila, “omundu wavulu” wexile kibuka kya kayadi, kifwa, athu ejiya kudyulu, maji kexile ni kixikanu kyakolo kala o Jikidistá a undu. Bhukaxi ka Bibidya, phange Rutherford wajimbulula kwila, “omundu wavulu” ka usolele phala kuya kudyulu. Muveji dya kiki, “omundu wavulu” yatokala kukilunga kya Kidistu *  andabhuluka “kuhadi yadikoya,” anda kala ni mwenyu wakalelaku mu ixi. (Dij. 7:14) Jezú wakanena kiki: “Ngala we ni jimbudi jamukwa kijala mu kibhanga kiki. Jene kibhinga ngijitakana, jene jivwa odizwi dyami, hé akala kilunga kimoxi ni mubhudi umoxi.” (Nzwá 10:16) Ojimbudi jamukwa jiji, kifwa jiselevende jafiyele ala ni kidyelelu kyakukala ni mwenyu wakalelaku mu palayízu mu ixi. (Mat. 25:31-33, 46) Twandamona kyebhi o ukexilu yú wakutendela okidi kya Mak’â Nzambi, walungulula omyenyu ya Jimbangi ja Jihova, katé mwene omunzangala yó utwatumbula kudimatekenu.—Jisá. 97:11; Jisa. 4:18.

3-4. Mukyonge kyadikota kyamuvu wa 1935, ihi yatendela omazunda ajiphange ni mukunda dyahi?

³ Okithangana kyakatunda mukyonge kyokyo kyadikota, kyexile kyoso phange wexile mubhanga odiskulusu kyambele ojingivwidi: “Oso ala ni kidyelelu kya kukala ni mwenyu wakalelaku mu ixi, twamidyondo, emanenu!” Kala kyambe phange wexile mukyonge, ku 20.000 athu, o emanene enedingi abetelekota. Kyenyikiphe, phange Rutherford wambe: “Talenu omundu wavulu!” kyazubha kuzwela kiki, oso exile mukyonge asanguluka kyavulu. Ojiphange emanene atonginina kwila kexile ni kidyelelu kyakuya kudyulu, ni kwila, Nzambi ka exanene phala kuya kudyulu. Mukizuwa kya kayela abatizala 840 a athu. Maji avulu mudyâ atokalele ku jimbudi jamukwa.

⁴ Kyoso kyabhiti odiskulukusu didi, ophange twamutumumbula kudimatekenu, ni mazunda ajiphange jamukwa, eha kunwa ovinyu ni kudya ombolo Mulembalasa ya Ngana. Avulu exile mudivwa kala phange yú wambe kwila: “Oveji yasukina ingadi ombolo ni kunwa ovinyu ya lembalasa, mu muvu wa 1935. Ngatonginina kwila Jihova kangitele kumuxima okidyelelu kyakutunga kudyulu, ngexile ni kidyelelu kyakutunga mungongo, ni kukwatekesa mukikalakalu kyakukitula oxi palayízu.” (Loma 8:16, 17; 2 Kol. 1:21, 22) Tunde okithangana kyokyo, omundu wavulu wene mudibandekesa dingi. Wene mukalakala kumoxi ni jiphange a a undu asubhuka. *

5. Kyebhi Jihova kyatala yo eha kudya ombolo ni kunwa ovinyu Mulembalasa?

⁵ Kyebhi Jihova kyatale yo eha kudya ombolo ni kunwa ovinyu Mulembalasa, kyoso kyabhiti omuvu wa 1935? Abha ihi itwamba se lelu Mbangi ya Jihova weha kudya ombolo ni kunwa ovinyu Mulembalasa mukonda watonginina kwila, Jihova kam’undu? (1 Kol. 11:28) Amoxi exile mudya ombolo ni kunwa ovinyu mukonda kexile mutendela kyambote okidyelelu kyâ. Maji se axikina ni kidi kyoso okitondalu kyâ, eha kudya ombolo ni kunwa ovinyu Mulembalasa, anga asuluka ni ufiyele wâ, Jihova wanda kwa axikina mukibhanga kya jimbudi jamukwa. Né mwene se eha kudya ombolo ni kunwa ovinyu, ene asuluka ni kuya Mulembalasa mukonda dya kisakidilu kya muyoso ya abhangela Jihova ni Jezú.

6. Jezú watumina oji anju kubhanga ihi?

⁶ Kuma ohadi yadikota yazukama, kima kyambote kulembalala izwela Dijingunwinu kibatulu 7 yalungu ni Jikidistá a undu ni  mundu wavulu ja jimbudi jamukwa. Mukizuwa kiki, Jezú utumina ji anju kukwata o itembwe iwana yakibwika. Ene katokala kweha o itembwe kate kyoso Jikidistá joso a a undu kyandatambula okidimbu, kifwa, kwa axikina kwala Jihova. (Dij. 7:1-4) Mukonda dya ufiyele wâ, ojiphange a a undu ja Kidistu atambula ofutu mukukituka jisobha ni akunji kumoxi ni Kidistu kudyulu. (Dij. 20:6) Oso atokala kumwiji wa Nzambi kudyulu, amesena kyavulu kumona okithangana kyoso o 144.000 kyandatambula ofutu yâ kudyulu.

7. Kala kilondekesa Dijingunwinu 7:9, 10, mukisumwa Nzwá wamono ananyi ni ihi yexile mubhanga ene? (Tala ofoto ya kapa.)

⁷ Mukusuluka, Nzwá wazwela kima kyamubhangesa kudiwana: “Omundu wavulu” wabhuluka mu alumajedone. Okibuka kiki kya kayadi kyabeta dingikota, odyalwilu dyê kaditumbula kala o kibuka kyadyanga kya 144.000 kya jisobha ni akunji. (Tanga Dijingunwinu 7:9, 10.) O athu atokala kumundu wavulu ate “izwatu yalebha, yazele.” Kiki kilombolola kwila, ene kehela o mundu wa Satanaji ku ‘akasanesa mba ku axidisa,’ asuluka we ni ufiyele wâ kwa Nzambi ni kwa Kidistu. (Tiya. 1:27) Ene adikola kwila abhuluka ngó mukonda dya yoso yabhange Jihova ni Jezú, okambudi ka Nzambi. Mukithangana kyenyoko, akwata we isalale yamaye. Kiki kilombola kwila, ene axikina Jezú kala o Sobha amusolo kwala Jihova.—Sokesa ni Nzwá 12:12, 13.

8. Kala kilondekesa Dijingunwinu 7:11, 12 kyebhi kyandadivwa omwiji wa Jihova kudyulu kyoso kyandamoneka omundu wavulu?

⁸ Tanga Dijingunwinu 7:11, 12. Kyebhi kyadivu omwiji wa Jihova kudyulu? Nzwá wamono omwiji woso wa Jihova kudyulu, adyongeka ni kusanguluka aximana Nzambi kyoso kyamoneka omundu wavulu. Omwiji wa Jihova kudyulu wandasanguluka dingi mukumona odikumbidilu dya kisumwa kyamono Nzwá, kyoso omundu wavulu kiwanda bhita ni mwenyu mukithangana kya hadi yadikota.

9. Kala kilondekesa Dijingunwinu 7:13-15, ihi yamubhanga omundu wavulu kindala kiki?

⁹ Tanga Dijingunwinu 7:13-15. Yalungu ni athu atokala kumundu wavulu, Nzwá wasoneka: “Asukula izwatu yâ a izelesa mumanyinga ma kambudi.” Kiki kilombolola kuma, ene ala ni kitongolwelu kyazele, a axikina kwala Jihova. (Iza. 1:18) Ene Jikidistá adibhakula, adibatizala, axikina musata yakukula ya Jezú, ala we ni ukamba wambote ni Jihova. (Nzwá 3:36; 1 Phe. 3:21) Kyenyiki ene atena kumusidivila mu kyandu kyê “suku ni mwanya,” mu ixi mumu. Né mwene kindala kiki, ene akalakadi aswina, éne dingi abetakota mukubhanga okikalakalu kyakulonga ni kubhanga maxibulu, ata kupholo okikalakalu kya Utuminu.—Mat. 6:33; 24:14; 28:19, 20.

10. Kidyelelu kyahi kyala nakyu o athu atokala kumundu wavulu? Kikanenu kyahi kyandamona kyoso kyandadikumbidila?

¹⁰ O athu atokala kumundu wavulu, andabhita ni mwenyu mukithangana kya hadi yadikota, adyelela kwila Nzambi wandasuluka ni ku alanga mukonda wakanena “kusanzumuna o balaka yê kwa ene.” Okikanenu kiki kyene mukingila kyavulu ojimbudi jamukwa, kyandadikumbidila: “[Nzambi] wakondona masoxi moso kumesu mâ, kikukala dingi kufwa, néngo mukonda mba kudila, mba kukata.”—Dij. 21:3, 4.

11-12. (a) Kala kilondekesa Dijingunwinu 7:16, 17, mabesá ebhi andatambula omundu wavulu? (b) Ihi itena kubhanga ojimbudi jamukwa mukithangana kyalembalasa ni mukonda dyahi?

¹¹ Tanga Dijingunwinu 7:16, 17. Mukithangana kiki, sayi Jimbangi Jihova jamubhita nzala mukonda dya ibhidi ya kukamb’o kitadi, ni ita. Amukwa a ate mukayela mukonda dya kixikanu kyâ. Maji omundu wavulu andasanguluka mukwijiya kwila, andabhuluka  kyoso kyandabwika omundu yú wayibha, ithangana yoso, andakala ni kudya kwanzungule muxitu ni munzumbi. Kyoso kyandabhita ohadi yadikota, Jezú wandakwendesa oso andabhuluka, kate ‘kufixi yamenya mamwenyu wakalekalu’. Kindala xinganeka: kidyelelu kyahi kyakatunda kyandakala nakyu omundu wavulu. Kumazunda ni mazunda a athu exile kya mungôngo, ene ngó kandalola okalunga mba kufwa!—Nzwá 11:26.

¹² Ojimbudi jamukwa jilondekesa okisakidilu kyâ kwa Jihova ni kwa Jezú, mukwa’bhana okidyelelu kiki kyakatunda! Mukidi, ene ka asolo phala kuya kudyulu, maji kikilombolola kwila, okidyelelu kyâ kyabeta ndenge, kikyala ni valolo kumesu ma Jihova. Kikale yo a undu kikale ojimbudi jamukwa, ene oso ala ni ujitu wakuxima Jihova ni Kidistu. O ukexilu umoxi wakuximana Jihova okuya Mulembalasa yakufwa kwa Kidistu.

13-14. Mukonda dyahi athu oso atokala kuya Mulembalasa ya kufwa kwa Kidistu?

¹³ Tumivu kudima, ku 1.000 dya athu, nange muthu umoxi ngó udya ombolo ni kunwa ovinyu Mulembalasa. Kiki kilombolola kwila ilunga yavulu kala ni muthu udya ombolo ni kunwa ovinyu Mulembalasa. Ku athu ene muya Mulembalasa, o abeta dingi kota yó ala ni kidyelelu kyakukala ni mwenyu wakalelaku mu ixi. Mukonda dyahiphe o athu yâ aya Mulembalasa ya kufwa kwa Kidistu? Okima kyene kimoxi kibhangesa omuthu kuya m’ukaza wakamba dyê. O athu aya mu ukaza amesena kukwatekesa ni kulondekesa ohenda kudikaza. Kyene kimoxi we. Ojimbudi jamukwa aya Mulembalasa mukonda amesena kukwatekesa ni kulondekesa ohenda yâ kwa Kidistu ni ku Jikidistá a undu. Ojimbudi jamukwa amesena kulondekesa kwila, abhana valolo musata yakukula ya Kidistu, yene ya abhana kidyelelu kyakutunga mu ixi katé kuhádya ni hádya.

¹⁴ Okima kyengi kibhangesa ojimbudi jamukwa kuya Mulembalasa, okubelesela okitumu kya Jezú. Kyoso kyabhange Olembalasa yadyanga ni jipoxolo jê jafiyele, Jezú wa abhana okitumu kiki: “Mubhanga jinga kyenyiki mukungilembalala eme.” (1 Kol. 11:23-26) Kyenyiki, ojimbudi jamukwa jandasuluka ni kubhanga Olembalasa ya kufwa kwa Kidistu, mukonda mu ixi mwala hanji Jikidista a  undu. Andasuluka jinga ni kwixana athu amukwa phala kuya Mulembalasa.

15. Kyebhi kitutena kuximana Nzambi ni Kidistu mukithangana kya Lembalasa?

¹⁵ Mukithangana kya Lembalasa twala ni ujitu wakuximana Nzambi ni Kidistu bhukaxi kamimbu ni kusamba kumoxi. Odyambu dya diskulusu dyamuvu yú, dyenyidi: “Sakidila Yoso Ya Bhange Nzambi Ni Kidistu Kokwé!” Odiskulusu didi dyanda bandekesa okisakidilu kyetu kwa Jihova ni kwa Kidistu. Mukithangana kyandabhita ombolo ni vinyu, etwenyoso twandalembalala kwila, yene ilombolola omukutu ni manyinga ma Jezú. Twandalembalala we ohenda yalondekesa Jihova mukwehela mon’ê umoxilele kufwa, phala kutubhulula. (Mat. 20:28) Oso azolo Jihova ni Mon’ê, andabhanga yoso phala kafonge Mulembalasa.

16. Ojikidistá a a undu ni jimbudi jamukwa ala ni ima yahi yadifu?

¹⁶ Ojikidistá a aundu ni jimbudi jamukwa ala ni ima yavulu yadifu. O ibuka iyadi yiyi yala ni valolo yavulu kumesu ma Jihova. Mukonda Jihova wasumbu o ibuka iyadi yiyi mu suwilu mba pelesu imoxi ngó, wafutu ni mwenyu wamon’ê wakazola. Okima ngó kyakambe kudifwa mu ibuka iyadi yiyi okidyelelu kyala nakyu. Maji o ibuka iyadi yabhingi kukala fiyele kwa Nzambi ni kwa Kidistu. (Jisá. 31:23) Jihova kavudisa dingi onzumbi ikôla ku kibuka kyamukwa, anga utolesa okibuka kyamukwa, kana. Mukidi, mwene ubhana onzumbi ikôla mukutonginina o ibhindamu ya muthu ni muthu.

17. Ihi yamukingila kutambula o Jikidistá a a undu ala hanji mu ixi?

¹⁷ Ojikidistá a undu ka avwala ni kidyelelu kya kuya kudyulu, kana. Nzambi mwene utula okidyelelu kiki mumixima yâ. Ene axinganeka ni kubhanga misambu yalungu ni kidyelelu kyâ. Amesena kyavulu kutambula ofutu yawu kudyulu. Ene kejiya kyebhi kyandakala omikutu yâ kyoso kyandaya kudyulu. (Fil. 3:20, 21; 1 Nzwá 3:2) Né kiki, amukingila ni hanji yoso, okithangana kyandakala kumoxi ni Jihova, Jezú ni ji anju, ni kutambula o ikalakalu yawu mu Utuminu, kumoxi ni Jikidistá jamukwa jala kya kudyulu.

18. Ihi yamukingila kutambula ojimbudi jamukwa?

¹⁸ Ojimbudi jamukwa jamukingila ni hanji yoso kutambula omwenyu wakalelaku mu ixi. Athu oso avwala kya ni hanji yiyi. (Ndo. 3:11) Ene amukingila ni hanji yoso okizuwa kyanda kitula o ixi palayízu. Ene amesena kyavulu kutunga ojinzo jâ, kukuna jinjaludi ni kusasa otwana twâ ni sawidi yayuka. (Iza. 65:21-23) Ene amesena we kyavulu kwenda mu ixi yoso phala kwijiya omilundu, mixitu, ni menya akalunga, ni kwijiya we o ima yamukwa  yabhange Jihova. Okyabeta dingi kota, ene asanguluka mukwijiya kwila, hádya, o ukamba wâ ni Jihova wandaya ni kudibandekesa, wandakala dingi kyambote mukubhita kizuwa ni kizuwa.

19. Olembalasa itubhana kithangana kyakubhanga ihi? Muvu yú Olembalasa yandabhita kizuwa kyahi?

¹⁹ Jihova wabhana kujiselevende jê joso kidyelelu kyakatunda: Okukala ni mwenyu wakalelaku. (Jel. 29:11) Olembalasa yakufwa kwa Kidistu kitubhana kithangana kyakusakidila Nzambi ni Kidistu, mu ima yoso yabhange phala tukale ni kidyelelu kya mwenyu wakalelaku. Séphata, Olembalasa yene mwene okyonge kyabetakota phala o Jikidista jakidi, mumivu yoso. Olembalasa yandabhita Kyasabhalu 27 ya mbeji ya Katanu, 2021. Avulu ala ni ujitu wakuya mutala okyonge kiki. Amukwa anda itala sumbala ni izukutisu. Amukwa hanji anda ibhanga mukaleya. Kala Jihova, Jezú ni mwiji wa Jihova kudyulu, Twamesena kwila, o ilunga yoso, ibuka, athu atungu ubheka, abhanga Lembalasa yambote mumuvu yú!