1. Kala Sobha Davidi amoxi mudyetu enemubhanga kibhwidisu kyebhi?

ETWENYOSO twamesena kutululuka ni paze kumwenyu. Seku muthu wawabhela kukala ni hele. Maji sayi ithangana tukala we ni hele. Kyenyiki, amoxi mudyetu abhanga o ibhwidisu yabhangele Sobha Davidi kwa Jihova: “Katé bhebhi, Ngana, o nguma yami u di zangeleka ni u ngi tènda?”—Jisá. 13:2.

2. Ihi itwandadilonga mumbandu yiyi?

² Etu kitutena kulenga ohele, maji tutena kubhanga yoso phala kudilanga kyoso kitukala ni hele. Mumilongi yiyi kyadyanga twandatonginina o ima itena kutubhekela ohele kumwenyu. Mukusuluka twandadilonga ndunge jisamanu jandatutululukisa kyoso kitudibhana ni maka kumwenyu.

3. Ima yebhi itwenemudibhana nayu? Okwila tutena ku ifidisa?

³ Sayi ima itubhekela hele kiyala mukutena kwetu. Mukifika etu kitwala ni kutena phala kufidisa okudya, izwatu ni inzo kubanda kumuvu woso; kitutena kulanga ojiveji jandasota kutubhangesa kuzwela makutu mba kubhanga ufusa kujikuleka jetu jaxikola mba jasalu. Kitutena kufidisa o athu kukituka ingulungumba, mba usweya kubhita mudyembu bhu twatungu. O ima yiyi yenemubhita, mukonda mungongo mutwatungu o athu kenemubelesela o itumu ya Bibidya enedingi avulumu. Satanaji mwene wamutumina omundu yu, wejiya kwila, “olwímbi lwa mu ngongophe ni kusênduka kwa jimbongo”  kwandafidisa o athu kusidivila Jihova. (Mat. 13:22; 1 Nzwá 5:19) Etu kitudiwane dingi mukumona okuyibha kwala mungongo mumu!

4. Ihi itena kubhita mukonda dya maka avulu utudibhana nawu?

⁴ Kyoso kitukala ni maka nange tukala ni hele yavulu. Mukifika, nange tutena kudibhwidisa, okwila ngandakala ni kitadi kyasoko phala kudikila o ibhindamu yami se ngikwata uhaxi ungifidisa kukalakala? Tutena we kukala ni hele yakudibhala kutendasa ni kuluwalesa Nzambi. Kwakambe ngo, Satanaji wandabhangesa o akayedi yê kuzukutisa omundu wa Nzambi. Kukamba kwijiya kyebhi kitwandadibhana ni izukutisu yiyi kutena we kutubhekela hele. Okwila ‘kima kyayibha kubanza o ima yiyi?’

5. Ihi ilombolola o izwelu ya Jezú kyoso kyambe: “Kana kuvula hele ya mwenyu wenu”?

⁵ Etu twejiya kwila Jezú watendelesa omaxibulu mê: “Kana kuvula hele ya mwenyu wenu.” (Mat. 6:25) Okwila Jezú wamesenene kuzwela kwila kitutokala kukala ni hele ya kima kyosokyoso? Kana! Tuzwela kiki, mukonda mukulu sayi jiselevende javulu jafiyele ja Jihova exile we ni hele, maji né kiki Jihova wa axikina. * (1 Jis. 19:4; Jisá. 6:3) Mukidi Jezú wexile kutuximbakatesa ngo. Mwene kamesena kwila twehela ohele ni ibhindamu yamwenyu kutufidisa kusidivila Nzambi. Kyenyiki ihi itutena kubhanga phala kudilanga kyoso kitukala ni hele?—Tala okaxa “ Kyebhi ki Utena Kubhanga.”

6. Kala kilondekesa Filipe 4:6, 7, ihi yandakutululukisa kyoso kitukala ni hele?

⁶ (1) Samba ithangana yoso. Kyoso ki ukala ni hele yavulu kumuxima bhinga kikwatekesu kwa Jihova bhukaxi kamusambu. (1 Phe. 5:7) Mwene wandakubhana “okutululuka kwa Nzambi kwa somboka okitongolwelu kyoso kya muthu.” (Tanga Filipe 4:6, 7.) Bhukaxi kanzumbi yê ikôla yala ni kutena kwavulu Jihova wandakutululukisa.—Nga. 5:22.

7. Mukusamba ihi itwatokala kulembalala?

⁷ Mukusamba jikula omuxima we kwa Jihova. Tumbula okima kyamukutandanganyesa ni kyebhi kiwamudivwa. Se omakame atena kwabatula bhinga unjimu ni unguzu phala kwijiya kyebhi ki utena kwabatula. Se omakamê ubheka we ki utena kwabatula bhinga kikwatekesu phala ki utandanganye kyavulu ni maka enya. Kyoso ki utumbula o ima yamukutandanganyesa mumusambu utena kutonginina kyambote o itambwijilu ya Jihova. Se o itambwijilu yamusambu we ila kala yamulaleka kana kuzoza. Jihova wamesena kwila eye utumbula jinga o ima yamukutandanganyesa maji we wamesena kwila eye ujiza mukusamba.—Luka 11:8-10.

8. Mukusambu twatokala we kutumbula ihi?

⁸ Kyoso ki utumbula o ima yamukutandangayesa kwa Jihova bhukaxi kamusambu, sota kutumbula izwelu yakisakidilu. Kima kyambote kulunga okixinganeku kyetu ku ima yambote itwala nayu nemwene kyoso kitwamudibhana ni ibhidi yavulu. Se kuthulu kwakuxiti kiwejiya yakuzwela mumusambu, lembalala kwila Jihova utambwijila kate mwene omisambu ya izwelu yofele kala, ‘Ngakudyondo ngikwatekese!’—2 Mal. 18:31; Loma 8:26.

9. Kwebhi kututena kusanga okifikidilu kyatokala?

⁹ (2) Dyelela k’unjimu wa Jihova kana kudyelela k’unjimu wé. Mu izuwa ya polofeta Izaya omundu wa akwa Juda exile kwakusa kwala akwa Sidya. O akwa Juda exile ni  woma wavulu wa akwa Sidya, kate ayikubhiga kikwatekesu kwa akwa Ijitu. (Iza. 30:1, 2) Jihova watangelele omundu we kwila kudyelela akwa Ijitu kwejikwabhekela dilamba. (Iza. 30:7, 12, 13) Bhukaxi ka Izaya Jihova watangela kwebhi kwejisanga okifikidilu kyatokala. Mwene wa adyelelesa: ‘Okudyelela kwa Jihova ni kuximbakata, kwandakumibhekela uzônda.’—Iza. 30:15b.

10. Mumaka ebhi utwabhingi kulondekesa kwila twadyelela kwa Jihova?

¹⁰ Kyebhi kitwatokala kulondekesa kwila twadyelala kwa Jihova? Xinganeka ngo mu ifika yiyi. Xinganeka kwila akubhana salu yandakubhangesa kunganyala kitadi kyavulu, maji kyandakunyana okithangana kyé kyakubhanga o ima munzumbi. Xinganeka kwila sayi koleka yé yasalu ukutangela kwila ngakuwabhela, maji mwene kiselevende ya Jihova amubatizala. Mba ndandu wamuzolo kyavulu ukutangela kwila watokala kusola: “Eme mba Nzambi yé.” Mu ibhidi yoso yiyi nange kukubhonza kubatula omaka, maji ejiya kwila Jihova wandakubhana o itendelesu iwabhindamena. (Mat. 6:33; 10:37; 1 Kol. 7:39) Okwila eye wandadyelela kwa Jihova ni kukumbidila o itendelesu yê?

11. Misoso yebhi ya Bibidya itutena kudilonga itukwatekesa kutululuka ne mwene ni izukutisu?

¹¹ (3) Dilonge ni jiphangu jambote ni jiphangu jayibha. Mu Bibidya tusangamu misoso yavulu itulondekesa ovalolo yakutululuka ni kudyelela kwa Jihova. Mukudilonga omisoso yiyi tonginina kyebhi kyalondekesa kukala athu atululuka ne mwene ni kudibhana ni izukutisu yabhonzo. Mukifika, kyoso o inzo yadikota yakufundisa ya Jijude kyatumu ojipoxolo phala kweha okuboka ene kexile ni woma. Muveji dya kiki ene ambe: “Twa bhingi tu tumaka Nzambi, kana athu.” (Ika. 5:29) Ne mwene kyoso kya abeta woma kiwa akwata. Mukonda dyahi? Mukonda ene ejidile kwila Jihova wexile kumbandu yâ, wasangulukile ni ene. Kyenyiki ene asuluka ni kuboka onjimbu yambote. (Ika. 5:40-42) Xiteva wexile phangu yambote. Kyoso kyexile phala kumujibha mwene watululukile, “o pholo yê yabiluka mukwâ mba yedile kala pholo ya anju.” (Ika. 6:12-15) Mukonda dyahi? Mukonda mwene wejidile kwila Jihova wasangulukile ni mwene.

12. Kala kilondekesa omukanda 1 Phetele 3:14 ni 4:14, mukonda dyahi tutena kusanguluka kyoso kitubhita mu izukutisu?

¹² Ojipoxolo ejidile kwila Jihova wexile kumbandu yâ. Ene atambwile kutena kwa Nzambi phala kubhanga madiwanu. (Ika. 5:12-16; 6:8) Maji lelu Jihova kamubhana dingi kutena phala kubhanga madiwanu. Maji bhukaxi ka maka me Jihova utudyelelesa kwila kyoso kyatutalatala se kuyuka, mwene usanguluka ni ukexilu wetu anga utubhana nzumbi yê ikola. (Tanga 1 Phetele 3:14; 4:14.) Kyenyiki, kana kuya ni kuxinganeka se ihi iwandabhanga kyoso kyandamateka okizukutisu. Muveji dya kiki banza ku ima i utena kubhanga phala kubandekesa okidyelelu kyé kya kwila Jihova utena kutukwatekesa ni kutubhulula. Kala o Jikidistá kuhama yadyanga, dyelela mu ikanenu ya Jezú kya kwila: “Eme ngi mi bhana dikanu dya kuzwela ni kuijiya kwa kwila jinguma jenu joso ki ji tena ku mi lwa phata, mba kumibelesa.” Jezú watukanena kwila: “Mu kolokota kwenu, mwene mu mwa-ndu mwena o myenyu yenu.” (Luka 21:12-19) Kana kujimba kwila né mwene se oselevende ya fiyele ufwa, Jihova wandabhaka o ima yoso iwabhange mukilunji kyê ni kukufukununa.

13. Ihi itutena kudilonga ku jiphangu ja yo akambele kutululuka ni kudyelela kwa Jihova?

¹³ Tutena we kudilonga ku phangu ya  yo akambe kukayela okitendelesu kya kutululuka ni kudyelela kwa Jihova. Kudilonga ojiphangu jiji kwandatukwatekesa kukamba kuta o itondalu yate ene. Mukifika, kyoso Sobha Aza kyamateka kutumina, kifuxi kyadikota kyeza mubhânga ni akwa Juda. Aza wadyela kwa Jihova, kyenyiki Jihova wamukwatekesa kutolola ojinguma. (2 Mal. 14:9-12) Mukubhita kithangana, Bahaza o Sobha ya Izalayele wamateka kutesa woma kwa akwa Juda, sumbala mwene kexile ni masoladi avulu. Muveji dyakudyela kwa Jihova kala kyamudyelele m’ukulu, mwene wafutu kitadi kwa akwa Sídya phala kumukwatekesa. (2 Mal. 16:1-3) Kyoso Aza kyakumbamene, kyexile mwene kya phala kufwa, mwene kadyelela kwa Jihova.—2 Mal. 16:12.

14. Ihi itutena kudilonga ku itondalu ya Aza?

¹⁴ Kudimatekenu kyoso kyexile mubhhita mu ibhidi, Aza wexile musota okikwatekesu kya Jihova. Maji mukubhita thembu mwene kexile dingi musota okikwatekesu kya Nzambi, wexile mudyelela mukilunji kyê phala kubatula omaka mê. Kudimatekenu Aza wamono kwila wexile muditunda kyambote mundunge yê ya kubhinga kikwatekesu kwa Sídya. Okidyelelu kye kikyanangenena. Bhukaxi kapolofeta Jihova wixi: “Kuma eye wa dyelela kwa sobha ya Sídya, o kudyelela Jihova Nzambi yé, kana, kwabhu-phe okifuxi kya masalodi ma sobha ya Sídya kya ku sutunuka bhu maku.” (2 Mal. 16:7) Etu we twabhingi kudilanga phala kitusote kubatula omaka ubheka wetu, sé kusota okikwatekesu kya Jihova bhukaxi ka Bibidya. Ne mwene se wabhingi kubatula omaka ni lusolo, sota kutululuka ni kudyelala kwa Jihova, mwene wandakukwatekesa kuditunda kyambote.

15. Ihi itutena kubhanga kyoso kitwamutanga o Bibidya?

¹⁵ (4) Bhaka jivelusu ja Bibidya mukilunji. Mukutanga o Bibidya eye wandasanga jivelesu jilondekesa ombote yakutululuka ni kudyelela kwa Jihova. Sota kujibhaka mukilunji kyé. Eye utena kutanga ojivelusu jiji ni dizwi dya swina mba kujisoneka mukididi m’utena kujimona ni lusolo. Jihova watumina Josuwé kutanga jinga odivulu dya kitumu. Kiki kyejimukwatekesa kubhanga o ima ni unjimu ni kutolola owoma mu ikalakala yê. (Josu. 1:8, 9) Kyene we kimoxi ni etu lelu. Sayi we jivelesu ja Bibidya jitena kututululukisa kyoso kitukala ni woma mba hele.—Jisá. 27:1-3; Jisa. 3:25, 26.

16. Kyebhi Jihova kyatutululukisa ni kutukwatekesa kumudyelela bhukaxi ka kilunga kyê?

¹⁶ (5) Dilunge jinga ni mundu wa Nzambi. Jihova utukwatekesa kutululuka ni kumudyelela bhukaxi ka jiphange jetu. Mu yônge yetu twenemutambulamu kiswinisu kyadikota kya jiphange jetu bhukaxi ka jimbandu jabhanga, itambwijilu, ni kudizwelesa ni ene kudimatekenu ni kudisukilu dya yônge. (Jihe. 10:24, 25) Tudivwa we kyambote kyoso kituzwela ni makamba metu utwadyelela mukilunga yalungu ni ima yamututanganyeasa. O “mbimbi mba izwelu ya mbote” yadikamba itena kutululukisa omuxima wetu, mumaka utwamudibhana nawu.—Jisa. 12:25.

17. Kala kilondekesa Jihebelewu 6:19, kyebhi okudyelela ku Utuminu wa Nzambi kutuswinisa né mwene mukithangana kyabhonzo?

¹⁷ (6) Kolesa okidyelelu kyé. Okidyelelu kyetu ku Utuminu wa Nzambi kikwatekesa “myenyu yetu mukwa ni ombwa mba kifikidilu kya naviyu.” Okidyelelu kiki kitukwatekesa kuswina mu ithangana yabhonzo mba kyoso kitudibhana ni hele. (Tanga Jihebelewu 6:19.) Kuxinganeka mu ikanenu ya Jihova yalungu ni hádya, kyandabhangesa kujimba o ixinganeku yayibha. (Iza. 65:17) Dixinganeke kumundu wobhe kwatululuka, seku dingi  kima kyandakuthanganyesa. (Mik. 4:4) Eye we utena kukolesa okidyelelu kyé mukuboka ni kulonga akwenu. Bhanga yoso i utena mukikalalu kyakulonga ni kubhanga maxibulu. Mukubhanga kiki eye wanda “dyelela katé kudisukilu.”—Jihe. 6:11.

18. Ihi yandabhita kuhádya ni ihi itutena kubhanga?

¹⁸ Kyoso odisukilu dya mundu yu kidya ni kuzukama, twandabhita mu ibhidi yandatubhekela hele yavulu. Ovelesu yetu ya muvu wa 2021 itena kutukwatekesa kudibhana ni ibhi ni kukala ni kutululuka, kimukonda dya nguzu yetu, kana, maji mukonda dya kudyelela kwa Jihova. Mu muvu yu londekesa okixikanu kyé mu ikanenu ya Jihova bhukaxi ka ibhagelu yé, kwila: ‘Okudyelela ni kuximbakata, kwandakumibhekela uzônda.’—Iza. 30:15.