1. Ibhidi yebhi yene mudibhana nayu avulu mudyetu?

 O KWILA eye wexile kya ni mbambe mu nzumbi iwamono kwila kyexile mukubhonza ku ikumbidila? b Se kyene, ejiyakyu kwila k’eye ngo. Mu kifika, phange Filipe wamono kwila wabhingile kulungulula o ukexilu we wa kusamba, maji kyexile mu mubhonza kusanga kithangana phala kubhanga kiki. Phange Erika wexile ni mbambe ya kubhixila selu mu kyonge kya sidivisu ya kuboka; maji ne kiki, mu veji javulu mwene wexile mubhixila tadidi mu yonge. Mu ithangana yavulu, phange Tomaji wafikisa kutanga o Bibidya yoso. Mwene wambe: “Eme ki ngawabhelele kutanga o Bibidya. Ngafikisa kutanga mu veji jitatu, maji ngexile ngo mutena kubhixila kate mu divulu dya Ijila.”

2. Mukonda dyahi ki twatokala kuluwala se ki twatena luwa kukumbidila o jimbambe jetu?

² Se wamubhanga nguzu phala kusuwa mbambe mu nzumbi maji kwatena luwa ku ikumbidila, kana kuluwala ni kubanza kwila nuka wandatena ku ikumbidila. Mu kusuwa mbambe ne mwene se yofele, kubhinga kithangana ni nguzu. O nguzu i wamubhanga ilondekesa kwila eye ubhana valolo yavulu ku ukamba we ni Jihova, ni kwila wamesena kubhana yoso i utena mu sidivisu ye kwa mwene. Ejiya kwila Jihova ubhana valolo yavulu mu nguzu i wene mubhanga. Mwene ka kingila kwila tubhanga kima kyatundu o nguzu yetu. (Jisá. 103:14; Mik. 6:8) Kyenyi phe, mu kusuwa mbambe sola yoyo i wejiya kwila ki yandabhonza ku ikumbidila. Ihi yanda kukwatekesa kukumbidila o mbambe i wasolo? Tumone o jindunge.

3. Mukonda dyahi kima kyambote kukala ni vondadi ya kukumbidila o jimbambe?

³ Se ukala ni vondadi ya kukumbidila o mbambe iwaxindi, wanda bhanga yoso phala utene ku ikumbidila. O vondadi itwamutumbula bhabha, yalungu ni kubhanga nguzu mba kumesena kyavulu kukumbidila o mbambe. Tutena kusokesa o vondadi yiyi, ni mabhuku a menya a ngiji alundula o ulungu kate bhu mbambe ye. Se o mabhuku keza ni nguzu yavulu, o ulungu wanda tena kubhixila bhu kididi kyamesena o muthu wamukwendelamu, sumbala wandalaleka bhofele. Maji se o mabhuku eza ni nguzu yavulu, o ulungu ki wandalaleka kubhixila. Kyene kimoxi we, se tukala ni vondadi yavulu ki kyandabhonza kukumbidila o jimbambe jetu. Phange Davidi watokala mu ixi ya El Salvador, wambe: “Kyoso ki ukala ni vondadi, eye ubhanga dingi nguzu. Ki wehela kwila kima kyosokyoso kikufidisa kukumbidila o jimbambe je.” Ihi i utena kubhanga phala kubhandekesa o vondadi ye?

4. Ihi itutena kubhinga mu misambu yetu? (Filipe 2:13) (Tala we ofoto.)

⁴ Bhinga dingi vondadi bhukaxi ka musambu. Bhukaxi ka nzumbi ye ikola, Jihova utena ku kukwatekesa kukala dingi ni vondadi ya kukumbidila o jimbambe ji waxindi. (Tanga Filipe 2:13.) Sayi ithangana tutena kuxinda mbambe mukonda twejiya kwila kiki kyene o kima kyatokala; ki kyayibha kubhanga kiki. Maji nange ki twala ni vondadi ya kukumbidila o mbambe itwaxindi. Kyene kyabhiti ni phange ya muhatu amwixana Norina, watokala mu ixi ya Uganda. Mwene wexile ni mbambe ya kukala ni dixibulu dya Bibidya, maji kexile ni vondadi yavulu phala kukumbidila o mbambe, mukonda wexile mudivwa kwila kexile mulongexi wambote. Ihi yabhange? Mwene wambe: “Izuwa yoso ngexile musamba kwa Jihova mu kumubhinga n’angikwatekese kubandekesa o vondadi yami ya kulonga o Bibidya. Phala kukumbidila i ngexile mubhinga mu musambu, ngabhange nguzu yavulu mu kubandekesa o uhete wami. Mu kubhita tumbeji, ngamono kwila o vondadi yami ya kulonga o Bibidya yadibandekesa dingi. Ku muvu wenyo mwene, ngamateka kulonga o Bibidya ku kiyadi kya athu.”

5. Phala kubandekesa o vondadi yetu ya kukumbidila o mbambe i twaxindi, twatokala kuxinganeka mu ihi?

⁵ Xinganeka mu yoso yabhange kya Jihova phala eye. (Jisá. 143:5) O poxolo Phawulu wexile mu xinganeka mu ngalasa mba mu mbote yoso yexile mu mubhangela Jihova, kiki kyamubhangesa kukalakela Jihova ni nguzu yoso. (1 Ko. 15:9, 10; 1 Ti. 1:12-14) Kyene kimoxi we, se usuluka mu kuxinganeka mu ima yoso yene mubhanga Jihova phala eye, wandakala ni vondadi yavulu ya kukumbidila o mbambe i waxindi. (Jisá. 116:12) Tala ihi yakwatekesa phang’yetu ya muhatu ku ixi ya Honduras, kukumbidila o mbambe ya kukala moboki wa thembu yoso. Mwene wambe: “Eme ngexile mu xinganeka mu henda ya Jihova kokwami. Mwene wangikwatekesa kusanga o mundu we. Wene mu ngendesa ni kungilanga. Kuxinganeka mu ima yiyi, kwakolesa o henda yami kwa mwene ni kwabhandekesa o vondadi yami ya kukumbidila o mbambe i ngaxindi.”

6. Kima kyahi kyamukwa kyanda tukwatekesa kubandekesa o vondadi yetu ya kukumbidila o mbambe itwaxindi?

 ⁶ Xinganeka mu mbote ijila mu kukumbidila o mbambe ye. Tala ihi yakwatekesa phange Erika, twa mutumbula kudima, kukumbidila o mbambe ya kubhixila selu mu yonge phala o sidivisu ya kuboka. Mwene wambe: “Ngamono kwila ngexile mu dibotesa ima yavulu mu kubhixila tadidi. Kyoso kingexile mubhixila selu, ngexile mutena kumenekena o jiphange ni kubhita nawu dingi kithangana. Ngexile we mutena kwivwa o jindunge jambote jexile mubhana mu kyonge phala o sidivisu ya kuboka.” Phange Erika wadikwatenena mu mbote ijila mu kubhixila selu, yu watena kukumbidila o mbambe ye. O kwila eye waxinganeka kya mu mbote ya kukumbidila o jimbambe je? Mu kifika, se o mbambe ye yalungu ni kutanga o Bibidya, xinganeka kyebhi o mbambe yiyi yanda kolesa o ukamba we ni Jihova. (Jisá. 145:18, 19) Se o mbambe ye yalungu ni kukala ni kidifwa mu nzumbi, xinganeka mu mbote yanda bhekela o kidifwa kiki mu ukamba we ni akwenu. (Kol. 3:14) Soneka o mabesá oso uwanda tena kukala nawu kyoso kiwanda kumbidila o mbambe ye. Mu izuwa kupholo enda ni kutala o ima i wasoneka. Phange Tomaji, twamutumbula kya kudima, wambe: “O kwijiya se mukonda dyahi ngatokala kukumbidila o mbambe, ku ngibhana nguzu ya kukolokota sé kubhwila.”

7. Ihi yakwatekesa phange Julio ni muhatu we kukumbidila o mbambe ya?

⁷ Bhita kithangana ni athu anda kuswinisa kukumbidila o mbambe ye. (Jisa. 13:20) Tala ihi yakwatekesa phange Julio ni muhatu we, kusanzumuna o ukunji wa. Mwene wambe: “Etu twasolo kubhanga ukamba ni jiphange ututena kuzwela nawu yalungu ni jimbambe jetu, ni kwila atukwatekesa kujikumbidila. Avulu mudya, exile we kya ni jimbambe ja difu ni jetu, kyenyiki atubhana jindunge jambote. O makamba metu asota we kwijiya kyebhi kyamukwenda o ima i twaxindi, ni atubhana o kiswinisu kitwabhindamena.”

8. Ihi itena kubhita se tu kingila kate kitukala ni vondadi phala kukumbidila o jimbambe? (Tala we ofoto.)

⁸ Mu kidi, etwenyoso sayi ithangana ki twene mukala ni vondadi yakubhanga o ima. O kwila kiki kilombolola kwila ki twandatena kukumbidila o jimbambe jetu? Kana. Xinganeka dingi mu kifika kya ulungu: O mabhuku a ngiji atena kulundula mba kuxinjika o ulungu ni nguzu yoso kate ku kididi kwamesena kuya o muthu. Maji sayi ithangana, o mabhuku ya, kene mukwiza ni nguzu yavulu, kate mwene sayi bhabha tumona kala o menya a ngiji ka mukunguluka. O kwila kiki kilombolola kuma o ulungu ki wandatena kusuluka mukwenda? Kana, kikyene. O muthu wamukwendesa o ulungu, utena kusuluka mu kuwendesa kate kyandabhixila mu mbambe ye. Kyene kimoxi we, o vondadi yetu yakubhanga o ima, tutena ku isokesa ni mabhuku a ngiji. Sayi izuwa tukala ni vondadi yavulu, mu izuwa yamukwa kana. Kyenyiki, se eye ukingila kate ki ukala ni vondadi phala kukumbidila o jimbambe je, nange kwandatena kukumbidila ne ngo imoxi. Kala kibhita ni ulungu utena kubhixila bhu kididi kye, ne mwene se o mabhuku a ngiji ka mukwiza  ni nguzu yavulu, etu we tutena kukumbidila o jimbambe jetu ji twaxindi ne mwene se ki twala ni vondadi yavulu. Kidi kwila kiki kitena kubhonza, maji se ukumbidila o mbambe i waxindi, wanda sanguluka. Twanda zwela yalungu ni ibhwidisu nange yene mudibhanga amoxi, mu kusuluka twandadilonga jindunge jitena kutukwatekesa.

9. O kwila twatokala kusuluka mu kubhanga nguzu phala kukumbidila o mbambe ne mwene se ki twala ni vondadi ya kukibhanga? Jimbulula.

⁹ Jihova ka mesena kwila tu musidivila kala amutujijidika, maji wamesena tu kibhanga ni muxima woso ni kusanguluka. (Jisá. 100:2; 2 Ko. 9:7) Se kiwala ni vondadi ya kukumbidila o mbambe ye o kwila watokala kubhanga nguzu phala ku ikumbidila? Tala o phangu ya poxolo Phawulu. Mwene wambe: “Mukutu wami ngi ubhana jihuxi, ngi wendesa kala mubhika.” (1 Ko. 9:25-27) Poxolo Phawulu wexile mudijijidika phala kubhanga o ima yatokala, ne mwene se kexile ni vondadi ya ku ibhanga. O kwila Jihova wasangulukile ni yoso yexile mubhanga Phawulu? Kyene mwene! Jihova wabesowala o nguzu yoso yexile mubhanga mwene.—2 Ti. 4:7, 8.

10. Mukonda dyahi kima kyambote kubhanga nguzu phala kukumbidila o mbambe i twaxindi ne mwene se kitwaletu ni vondadi?

¹⁰ Kyene kimoxi we, Jihova usanguluka kyoso kyatumona kubhanga nguzu phala kukumbidila o mbambe ne mwene se ki twala ni vondadi ya kukibhanga. Mwene usanguluka mukonda wejiya kwila etu twa mukibhanga, mukonda dya henda yetu kwa mwene ki mukonda dya kuzola o kikalakalu kitwamubhanga, kana. Kala kyabesowala Phawulu, mwene wanda tubesowala we mukonda dya nguzu i twamubhanga. (Jisá. 126:5) Kyoso kitumona kwila Jihova wa mutubesowala, o vondadi yetu idibandekesa. Sayi phange ya muhatu ku ixi ya Polónia, amwixana Lucyna, wambe: “Sayi ithangana ki ngikalami ni vondadi ya kuya muboka, bengebenge se nga tohoka. Maji o kisangusangu kingikala nakyu kyoso kingivutuka kubhata, ujitu wakatunda wa Jihova phala eme.” Kindala tumone ihi itutena kubhanga kyoso kitukamba vondadi ya kubhanga o ima.

11. Ihi itutena kubhanga phala tukale ni kidifwa kya kuditumina o jihanji?

¹¹ Samba mukubhinga o nguzu ya kuditumina jihanji. O kuditumina o jihanji, o kutena kwa kulanga o ixinganeku ni ibhangelu ye. Mu ithangana yavulu o kuditumina o jihanji kwalungu ni kudilanga phala ki tubhange kima kyayibha. Maji, etu we twabhindamena o kidifwa kiki phala tukale ni vondadi ya kubhanga o ima yambote, bengebenge se kima kyabhonzo mba ki twala ni vondadi ya kukibhanga. Lembalala kwila, o kuditumina jihanji kidifwa kibhanga mbandu ku kibundu kya nzumbi ikola. Kyenyiki, samba kwa Jihova phala akubhane o nzumbi ikola ni utene kukala ni kidifwa kiki kyakatunda. (Luk. 11:13; Nga. 5:22, 23) Davidi, twamutumbula kudima, sayi ithangana kexile ni vondadi ya kudilonga ubheka. Mwene wazwela kyebhi o musambu wamukwatekesa. Mwene wambe: “Ithangana yoso ngexile musamba kwa Jihova phala angikwatekese kukala ni kidifwa kya kuditumina o jihanji. Ni kikwatekesu kye, ngatena kusokejeka kyambote o ithangana yami ya kudilonga ni kukumbidila yoso i ngaxindi.”

12. Kyebhi o kitumu kitusanga mu divulu dya Ndongixi 11:4 kyalungu ni jimbambe mu nzumbi?

¹² Kana kukingila kwila ima yoso ikala kyambote. Ku mundu yu wayibha kutwala, ki kibhana kukingila kwila yoso ikala kyambote mba iyuka. Se tuya ni kukingila kate ima yoso kiyandakala kyambote phala etu, nange nuka twandatena kukumbidila o jimbambe ji twaxindi. (Tanga Ndongixi 11:4.) Sayi phange yadiyala a mwixana Danyele, wambe: “Séku ithangana yayuka ku mwenyu wetu. Mu kiki, ki twatokala kukingila, twatokala kumateka ngo.” Sayi phange yadiyala a mwixana Paul, ku ixi ya Uganda, wazwela se mokonda dyahi ki twatokala  kukala ni kifwa kya kuxisa o ima phala kuyibhanga mu kithangana kyengi. Mwene wambe: “Kyoso kitumateka kubhanga kima ne mwene se mu ithangana yabhonzo, mukubhanga kiki twa mujikula o njila phala Jihova ku tubesowala.”—Mal. 3:10.

13. Mukonda dyahi kima kyambote kukumbidila o mbambe i twaxindi kamwanyu kamwanyu?

¹³ Mateka mukubhanga o ima bhofele bhofele. Nange eye kwala ni vondadi yavulu ya kusuluka mukonda wamumona kala, o mbambe ye yabhonzo kyavulu phala ku ikumbidila. Se kyene ki wamudivwa, ihi i ubanza se umateka kukumbidila o mbambe ye bhofele bhofele? Se o mbambe ye yalungu ni kudilonga kulondekesa kidifwa kimoxi, ihi i ubanza se umateka kukibhanga kamwanyu kamwanyu izuwa yoso? Mba se o mbambe ye o kutanga o Bibidya izwuwa yoso, ihi i ubanza se umateka mukukatula ngo tu ithangana ku kizuwa phala kutanga? Phange Tomaji twamutumbula kya kudima, kyexile ku mubhonza kyavulu kukumbidila o mbambe ye yakutanga o Bibidya yoso mu muvu umoxi. Mwene wambe: “Ngamono kwila ngexile mutanga ima yavulu mu kithangana kimoxi ngo. Kyenyiki nga solo kumateka dingi lwamukwa, maji mu veji yiyi, ngaxindi o mbambe yakutanga jivelusu jofele ku kizuwa, ni kuxinganeka mu ima i ngexile mutanga. Mu kubhanga kiki, ngamateka kuwabhela o kitangelu kyami kya Bibidya.” O kuwabhela kutanga o Bibidya kwabhangesa phange Tomaji kubandekesa o kithangana kye kya kutanga. Mu kusuluka wazubha kutanga o Bibidya yoso. c

14. Ibhidi yebhi itutena kudibhana nayu?

¹⁴ Ne mwene se twala ni vondadi yavulu mba tubhanga nguzu phala kukumbidila o jimbambe jetu, tutena hanji kudibhana ni ibhidi. Mu kifika, kutena kumoneka kima ki twakifikile kitukatula o kithangana kitwabhindamene phala kukumbidila o mbambe yetu. (Ndo. 9:11) Mba phe kutena kumoneka maka atuluwalesa ni kutuzozesa. (Jisa. 24:10) Mukonda dya kukala tu akwa ituxi, tutena kubhanga kima kitubhonzesa kukumbidila o mbambe i twaxindi. (Lom. 7:23) Mba nange  tutena kubhwila. (Mat. 26:43) Ihi itena kutukwatekesa kutolola o ibhidi yiyi?

15. Mukonda dyahi o ibhidi ki yatokala kukufidisa kukumbidila o mbambe ye? Jimbulula. (Jisálamu 145:14)

¹⁵ O ibhidi imoneka mu kukumbidila o jimbambe je, ki yatokala kukufidisa kusuluka. O Bibidya izwela mu veji javulu kwila, twejidibhana ni ibhidi. Maji we ilondekesa ni kidi kyoso kwila tutena ku itolola, bengebenge ni kikwatekesu kya Jihova. (Tanga Jisálamu 145:14.) Phange Filipe, twamutumbula kudima, wambe: “Phala kumona se ngamuditunda kyambote, eme ki ngidikwatenena mu jiveji ji ngakambe kukumbidila o mbambe yami. Muveji dya kiki, ngidikwatenena mu jiveji ji ngabhange o nguzu phala kusuluka ni kujikumbidila.” Phange Davidi, twamutumbula we kudima, wambe: “Eme ki ngimono o ibhidi kala kifidisu, maji ngi imona kala kithangana kya kulondekesa o henda yami kwa Jihova.” Kyoso kitukolokota sumbala ni ibhidi, tulondekesa kwa Jihova kwila twamesena kumusangulukisa. Jihova usanguluka kyavulu kyoso kyamona kwila eye wamubhanga nguzu phala kukumbidila o mbambe i waxindi!

16. O ibhidi itena kutulonga ihi?

¹⁶ Dilonge ni ibhidi imoneka. Dihwidise: ‘Ihi yabhekesa o kibhidi kiki? O kwila ngitena kubhanga kima phala ki kibhite dingi?’ (Jisa. 27:12) Sayi ithangana, o kibhidi kitena kulondekesa kwila, o mbambe i twasuwu ki twandatena ku ikumbidila. Se kyene kiwamudivwa, xinganeka kyambote o mbambe i waxindi ni umone se eye utena mwene ku ikumbidila. d Se ki watena kukumbidila o mbambe i waxindi mukonda yatundu o nguzu ye, Jihova kandakumona kala ki wala dingi ni valolo.—2 Ko. 8:12.

17. Mukonda dyahi kima kyambote kuxinganeka mu jimbambe ji watena kya kukumbidila?

¹⁷ Xinganeka mu jimbambe ji watena kya kukumbidila. O Bibidya yamba kwila “Nzambi wayuka, kyenyiki mwene kanda jimba o kikalakalu kyenu.” (Jih. 6:10) Mu kiki, kana kujimba yoso i wabhange kya—kala o kubhanga ukamba wambote ni Jihova, kubokela akwenu yalungu ni mwene ni kudibatizala. Kala kiwakumbidila o jimbambe mu nzumbi ji waxindile m’ukulu, wandatena we kukumbidila o jimbambe ji wamusuwa kindala.—Fil. 3:16.

18. Ihi i twatokala kulembalala kyoso ki tuya ni kukumbidila o jimbambe jetu? (Tala we ofoto.)

¹⁸ Ni kikwatekesu kya Jihova, eye utena kukumbidila o mbambe i waxindi, kala kibhita ni muthu wamukwendela mu ulungu usanguluka kyoso kyabhixila bhu mbambe ye. Maji phe, kana kujimba kukatula mbote mu njila i wambubhanga. Kifwa, kyoso ki uya ni kudisunga phala kukumbidila o jimbambe je mu nzumbi, sanguluka mukumona kyebhi Jihova kya mukukwatekesa ni kubesowala o nguzu i wamubhanga. (2 Ko. 4:7) Se ukamba kubhwila, wandatambula mabesá avulu.—Nga. 6:9.