1. O Bibidya ijimbulula kyebhi o henda ya kidi?

 O BIBIDYA ijimbulula o henda mu ukexilu wafwama. Yene yamba: ‘O henda yadifwangana ni milengu ya túbhia, o mulengu wa Jihova. Menya né-mbe a vula, ka tena kujima o henda yiyi, né-mbe jingiji ja menya ji kunguluka, ka tena ku i bobesa.’ b (Miku. 8:6, 7) O izwelu yiyi ibhana kidyelelu phala o makaza: Enu mutena kukala ni henda yakidi mudyenu.

2. Ihi yatokala kubhanga o dikaza phala o henda ya ki izoze?

² O dikaza atokala kubhanga nguzu kiyadi kya, phala o henda ya itene kunangenena kate ku hadya ni hadya. Mu kifika, xinganeka ku tubhya twowike ni jihwinyi. Phala twene ki tujime eye watokala kusuluka mu kutabhu o jihwinyi, se ukamba kukibhanga, o tubhya twanda jima. Kyene kimoxi we, o henda ya diyala ni muhatu a kazala, itena kusuluka kate ku hadya, maji kiki kyandabhita ngo se ene asuluka ni ku ikolesa. Sayi bhabha, o makaza atena kudivwa kwila o henda ya yamuzoza, bengebenge kyoso kyadibhana ni maka alungu ni kitadi, uhaxi, mba o ibhidi ya kusasa o twana. Kyenyiki se eye udikaza, ihi i utena kubhanga phala o ‘mulengu wa Jihova’ ki ujime mu ukaza we? Mu milongi yiyi, twandadilonga ima itatu i utena kubhanga phala o ukaza we ukole dingi ni ukale ki kisangusangu. c

3. Kyebhi o ukamba wambote ni Jihova ukwatekesa o diyala ni muhatu kubandekesa o henda ya mu ukaza? (Ndongixi 4:12) (Tala we ofoto.)

³ Phala o ‘mulengu wa Jihova’ mu ukaza ki ujime, o diyala ni muhatu atokala kubhanga nguzu phala kukala ni ukamba wambote  ni Jihova. Mukonda dyahi kima kyambote o dikaza kubhanga kiki? Kyoso o dikaza dibhana valolo ku ukamba wa ni Jihova, ene abelesela o itendelesu Ye, o kiki kyakwatekesa kulenga ni kutolola o ibhidi yejitena kuzozesa o henda ya. (Tanga Ndongixi 4:12.) O muthu wakulu mu nzumbi, ubhanga yoso yatena phala kukayela o idifwa ya Jihova kala o kubhanga o mbote, o mwanyu ni kuloloka. (Efe. 4:32–5:1) Kyoso o dikaza dilondekesa o idifwa yiyi, o henda ya idibandekesa dingi. Sayi phange ya muhatu amwixana Lena, wala kya mu ukaza mu 25 a mivu ndenge, wambe: “Ki kibhonzo kuzola ni kuxila o muthu wakulu mu nzumbi.”

4. Mukonda dyahi Jihova wasolo Zuze ni Madiya phala kuvwala o muthu weji kala o Mexiya?

⁴ Tumone phangu imoxi mu Bibidya. Kyoso Jihova kya mesenene kusola o jitata ejivwala o Mexiya, mwene wasolo Zuze ni Madiya, sumbala kwexile athu avulu amukwa atokalele ku mbutu ya Davidi. Mukonda dyahi mwene wabhange kiki? Mukonda kiyadi kya, exile ni ukamba wambote ni Jihova, Nzambi wejidile kwila ene ejita kupholo o henda ya kwa mwene mu ukaza. Ihi itena kudilonga o makaza ku phangu ya Zuze ni Madiya?

5. Ihi itena kudilonga o anumi mu phangu ya Zuze?

⁵ Zuze kexile mulaleka phala kubelesela o itendelesu ya Jihova, o kiki kyamukwatekesa kukala munumi wambote. Mu veji jitatu jitumbula o Bibidya, mwene watambula itendelesu ya Nzambi yalungile ni mwiji we. Mu ithangana yiyi mwene wabelesela ni lusolo lwoso ne mwene kyoso ima yabhonzele kyavulu phala ku ibhanga. (Mat. 1:20, 24; 2:13-15, 19-21) Mu kubelesela o itendelesu ya Nzambi, Zuze wakwatekesa ni walange Madiya. Se phata, kiki kya bhangesa Madiya kuzola ni kuxila dingi Zuze! Anumi, enu mutena kukayela o phangu ya Zuze mu kusota o itendelesu ya Bibidya mu kulanga o miji yenu. d Kyoso ki ubelesela o itendelesu ya Bibidya ne mwene se kubhinga kulungulula kima ku mwenyu we, eye ulondekesa henda kwa muhatu we ni kukolesa o ukamba wenu mu ukaza. Sayi phange ya muhatu ku ixi ya Vanuatu, wala kya mu ukazala mu 20 a mivu ndenge, wambe: “Kyoso mwadi wami kyasota o itendelesu ya Jihova ni ku ikayela, o kuxila kwami kudibandekesa dingi. Ngidivwa kwila ngala kididi kyakondama anga ngidyelela dingi mu ukexilu we wa kubatula o maka.”

6. Ihi itena kudilonga o ahatu ku phangu ya Madiya?

⁶ Madiya wexile ni ukamba wambote ni Jihova, mwene wexile ni kixikanu kyakolo ki mukonda dya Zuze kana, maji mukonda dya nguzu ye yexile mubhanga phala kukikolesa. Mwene wejidile kyambote o Maka a Nzambi. (Tala o nota de estudo mu divulu dya Luka 1:46. mu Bibidya ya phutu) Mwene we wexile  mukatula kithangana phala kuxinganeka mu ima yexile mudilonga. (Luk. 2:19, 51) Se phata, o ukamba wambote wa Madiya ni Jihova, wamubhangesa kukala muhatu wambote. Mu izuwa yetu, ahatu avulu ene mubhanga nguzu phala kukayela o phangu ya Madiya. Mu kifika, sayi phange ya muhatu amwixana Emiko, wambe: “Kyoso kingexile dikudi, eme ngexile mubhanga o ikalakalu mu nzumbi ubheka wami. Maji kyoso kingakazala, o mwadi wami mwene wexile mu samba ni kukala kupholo mukwendesa o ubhezelu ku mwiji. Kupholo dya kwenda, ngamono kwila ngamateka kukingila kuma o mwadi wami ungibhangela o ima bhu kididi. Eme ngabhingile kukolesa o ukamba wami ni Jihova ubheka. Kindala ngikatula kithangana kyakukala ubheka phala kusamba, kudilonga o Bibidya ni kuxinganeka mu ima i ngidilonga.” (Nga. 6:5) Enu ahatu, kolokotenu mu kukolesa o ukamba wenu ni Jihova, o kiki kyanda bhangesa o anum’enu kumiximana ni kumizola dingi.—Jisa. 31:30.

7. Yalungu ni kubheza Jihova kumoxi, ihi itena kudilonga o makaza ku phangu ya Zuze ni Madiya?

⁷ Zuze ni Madiya, akalakala kumoxi phala kukolesa o ukamba wa ni Jihova. Ene ejidile kwila kima kyambote o mwiji kubheza Jihova kumoxi. (Luk. 2:22-24, 41; 4:16) Nange kiki kya abhonzele kyavulu, bengebenge kyoso kya vwalele dingi twana, maji ene atena kukibhanga. Yiyi phangu yambote phala o makaza lelu! Kala Zuze ni Madiya, se eye wala ni twana, nange kitena kubhonza kuya mu yonge mba kukatula kithangana phala kubhanga o ubhezelu ku mwiji. Nange o kima kitena kubhonza dingi o kusanga kithangana phala kudilonga ni kusamba kumoxi ni kaza dye. Ne kiki, lembalala kwila kyoso kimubheza Jihova kumoxi, enu muzukama kwa mwene ni kudizukama dingi we mudyenu. Kyenyiki tenu o ubhezelu wa Jihova kupholo mu ukaza wenu.

8. Ihi itena kukwatekesa o dikaza amudibhana ni ibhidi yakubhanga o ubhezelu ku mwiji?

⁸ Ihi i utena kubhanga se wamudibhana ni ibhidi mu ukaza we? Nange kate mwene ki mwala ni vondadi ya kubhanga o ubhezelu ku mwiji kumoxi. Se kyene, matekenu mu kuzwela maka k’abhonzo mba phe milongi i mwawabhela kiyadi kyenu. O kubhanga kiki, kwanda bandekesa o henda yenu mu ukaza ni vondadi ya kubheza Jihova kumoxi.

9. Mukonda dyahi o makaza atokala kukatula kithangana phala kukala kumoxi?

⁹ Makaza, enu we mutena kukolesa o ukaza wenu mu kukatula kithangana phala kukala kumoxi. O kubhanga kiki, kwanda mikwatekesa kwijiya o ixinganeku ni kyebhi kya mudivwa kaza dye. (Dim. 2:24) Tala ihi yeza mu kwijiya Lilia ni Ruslan, ala kya makaza mu 15 a mivu ndenge. Phange Lilia wambe: “Twexile muxinganeka kwila twejibhita kithangana kyavulu kumoxi. Maji kikyene kyabhiti, twexile ni ima yavulu phala kubhanga, o salu, ikalakalu kubhata, kupholo dya kwenda o twana twetu. Mu kusuluka twamono kwila twabhingile kukatula kithangana phala kukala kumoxi kiyadi kyetu, se ki twakibhangele o ukamba wetu mu ukaza weji zoza.”

10. Kyebhi o makaza kyatena kukayela o kitendelesu kitusanga mu divulu dya Efezu 5:15, 16?

¹⁰ Ihi itena kubhanga o makaza phala akale ni kithangana kya kukala kumoxi? Nange kiyadi kya, abhingi kubakana o kithangana kyandakala kumoxi. (Tanga Efezu 5:15, 16.) Sayi phange ya diyala ku ixi ya Nigéria amwixana Uzondu, wambe: “Kyoso kingisokejeka o ikalakalu yami, eme ngisota kukatula kithangana kya kukala ni muhatu wami, ki ngehela kima kyosokyoso kungikatula o kithangana  kiki.” (Fil. 1:10) Tala o phangu ya phange Anastasia, muhatu wa kafunga ka ilunga ku ixi ya Moldávia. Mwene wasange ndunge ya kukalakala kyambote ni kithangana kye. Mwene wambe: “Eme ngisota kubhanga o ima i ngatokala kubhanga ubheka, kyoso mwadi wami wamubhanga o ikalakalu ye. O kubhanga kiki, kitukwatekesa kukala ni kithangana kya kukala kumoxi.” Maji ihi itwamba se ki wamutena kusanga kithangana kya kukala ni kaza dye mukonda dya ikalakalu yavulu?

11. Ikalakalu yebhi yexile mubhanga kumoxi Akila ni Pidisila?

¹¹ O makaza atena kudilonga kyavulu ni phangu ya Akila ni Pidisila, exile dikaza a azolele kyavulu ku Jikidistá jadyanga. (Lom. 16:3, 4) O Bibidya ki izwela kyavulu yalungu ni ukaza wa Akila ni Pidisila, maji yene ilondekesa kwila exile mukalakala, kuboka ni kukwatekesa akwa kumoxi. (Ika. 18:2, 3, 24-26) Mu kidi, kyoso o Bibidya izwela yalungu ni Akila ni Pidisila, yene ki itumbula ngo muthu umoxi, maji ene kiyadi.

12. Ihi itena kubhanga o diyala ni muhatu phala akale ni kithangana kya kukala kumoxi? (Tala we ofoto.)

¹² Kyebhi o makaza kyatena kukayela o phangu ya Akila ni Pidisila? Xinganeka yalungu ni ikalakalu yavulu imwabhingi o kubhanga. O kwila sayiku ikalakalu imutena kubhanga kumoxi muveji dya kuyibhanga ubheka? O kwila mwene mukatula kithangana phala kuboka kumoxi? Akila ni Pidisila exile we mukalakala kumoxi ku salu. Nange o salu ye ni ya kaza dye ki yadifu, maji o kwila mutena kubhanga kumoxi o ikalakalu kubhata? (Ndo. 4:9) Kyoso kimudikwatekesa mudyenu mu ikalakalu, mwandadivwa kala mu kibuka kya akalakadi, kiki kyanda mibhana dingi kithangana kya kudizwelesa. Robert ni Linda, tunde kyakazala kwabhiti kya 50 a mivu ndenge. Robert wambe: “Etu ki twala ni kithangana kyavulu phala kukala kumoxi mu itonokenu. Maji kyoso kingisukula o malonga anga muhatu wami wasokejeka, mba kyoso ki ngamukalakala bhu kanga bhu njaludim anga muhatu wami wiza phala kungikwatekesa, ngisanguluka kyavulu. O kukalakala kumoxi kutukwatekesa kudizukama dingi. O henda yetu yamusuluka mu kudibandekesa.”

13. Ihi yatokala kubhanga o diyala ni muhatu phala akale ni ukamba wa kidi mu ukaza wa?

¹³ Lembalala kwila, o kukala kumoxi, ki kulombolola kwila mwala ni ukamba wambote. Sayi muhatu ku ixi ya Brazil, wambe: “Lelu, kwala ima yavulu ilandukisa, yene itena kutubhangesa kubhita mu kilwezu kya kubanza kwila twala ni ukamba wambote mukonda twatungu mu inzo imoxi. Ngadilongo kwila, o kukala ngo kumoxi ki kisoko, ngatokala kubhanga dingi. Ngatokala we kusuwa mwadi wami ni kumubhana kithangana.” Tala ihi yene mubhanga Bruno ni muhatu we Tays, phala kudisuwa mudya. Mwene wambe: “Kyoso kitukala ni kithangana kya kukala kumoxi,  ki twehela kwila o mitelembe ituthandanganyesa.”

14. Se dikaza kawabhela kubhita kithangana kumoxi, ihi yatena kubhanga?

¹⁴ Maji phe, se kiyadi kyenu ki mwawabhela kubhita kithangana kumoxi? Nange mwawabhela ima ki idifu mba mukala ni njinda kyoso kimukala kumoxi. Kyenyiki ihi imutena kubhanga? Xinganeka dingi mu kifika kya tubhya. Twene ki twanda wama ni kudibandekesa mu kingoho. Maji kwabhingi kusuluka mu kubandekesa bhu jihwinyi jamakota. Kala kibhita ni tubhya tuya ni kudibandekesa bhofele bhofele, mukonda dyahi enu ki mumateka mu kukatula tuyithangana twofele kukizuwa phala kukala kumoxi? Sotenu kubhanga ima imwawabhela kiyadi kyenu, muveji dya kubhanga o ima imibhekela njinda. (Tiy. 3:18) Bhofele bhofele enu mwanda tena kumona kwila o henda yenu yamudibandekesa dingi.

15. Mukonda dyahi o makaza atokala kudixila phala o henda ya ki izoze?

¹⁵ O kudixila kwala ni valolo yavulu mu ukaza. Tutena kukusokesa ni phete. Se mu kandeya ki mwala phete, kene kandajima ni lusolo. Kyene kimoxi we, mu ukaza se ki mwala kudixila, o henda yandazoza ni lusoslo. Maji kyoso o dikaza kyabhanga nguzu phala kudixila, o henda ya, ki izoza kana. Nange eye uxinganeka kwila wamuxila kaza dye, maji o kwila mwene we udivwa kwila eye wamumuxila? Penny ni mwadi we Aret, tunde kyakazala kwabhiti kya 25 a mivu ndenge. Panny wambe: “Kuma twene mudixila mudyetu, o inzo yetu kididi kyatululuka kyezala ni henda. Ki twene mukala ni hele ya kuzwela yatukala ku muxima mukonda twejiya kwila, kala muthu ubhana valolo mu ima izwela mukwa.” Kyenyiki, ihi i utena kubhanga phala mwadi we mba muhatu we adivwe kwila wamumuxila? Tala o phangu ya Mbalahamu ni Sala.

16. Ihi itena kudilonga o anumi ku phangu ya Mbalahamu? (1 Phetele 3:7) (Tala we ofoto.)

¹⁶ Mbalahamu wexile mutalatala Sala ni kuxila kwoso. Mwene wexile mukwivwa kyambote kyoso Sala kyexile muzwela ni kubhana valolo mu ima yexile muxinganeka. Sayi kizuwa, Sala wexile ni njinda yu watangela kwa Mbalahamu kyebhi kyexile mudivwa, wambe we kwila Mbalahamu mwene wexile ni kikuma kya maka exile mubhita nawu. O kwila Mbalahamu wamutambwijila ni undanda? Kana. Mukonda mwene wejidile kwila Sala wexile muhatu walenduka ni kwila wexile mu mukwatekesa. Mbalahamu wevu Sala yu wasoto kubatula o maka. (Dim. 16:5, 6) Ihi i tutena kudilonga? Anumi, kidi kwila enu mwala ni ungana wakusola mba wakubatula o maka ku mwiji. (1 Ko. 11:3) Ne kiki, eye wejilondekesa henda se usota kwijiya o kixinganeku kya muhatu we ande dya kusola mba kubhanga kima, bengebenge de o kima kiwanda  sola kyalungu we ni mwene. (1 Ko. 13:4, 5) Sayi ithangana nange o muhatu we ukala ni njinda anga umesena kuzwela yamukala ku muxima. O kwila eye usota kumuxila mu kumwivwa ni mwanyu woso? (Tanga 1 Phetele 3:7.) Angela ni mwadi we Dmitry kwakambe ngo andatenesa 30 a mivu tunde kyakazala. Angela wajimbulula ihi yene mubhanga mwadi we phala mwene adivwe kwila a mumuxila: “Mwadi wami Dmitry ithangana yoso wala polondo phala kungivwa ne mwene kyoso kingikala ni njinda mba kyoso kingimesena ngo kuzwela. Mwene ungilondekesa mwanyu wavulu ne mwene kyoso kingifutuluka.”

17. Ihi itena kudilonga o ahatu ku phangu ya Sala? (1 Phetele 3:5, 6)

¹⁷ Sala wexile muxila Mbalahamu mu kumukwatekesa. (Dim. 12:5) Sayi kizuwa, Mbalahamu wasolo kuzalela ajitu ayile kubhata dya, sumbala kexile mukingila ajitu mu kizuwa kyenyokyo. Mwene watangela Sala phala kuxisa yoso yexile mubhanga n’aye mubhanga jimbolo. (Dim. 18:6) Sala ni lusolo lwoso, wayi mubhanga o kima kyamubhingi Mbalahamu. Ahatu, enu mutena kakayela o phangu ya Sala mu kukwatekesa o anum’enu mu ima yasola. Mukubhanga kiki mwandakolesa o ukaza wenu. (Tanga 1 Phetele 3:5, 6.) Dmitry, twamutumbula kya kudima, wajimbulula kyebhi muhatu we kyene mu mubhangesa kudivwa kwila amumuxila. Mwene wambe: “Eme ngawabhela kyavulu kyoso Angela kyangikwatekesa mu ima i ngisola ne mwene se ibanzelu yetu ki idifu. Se ki ngaditundu kyambote mu ima i ngisola, mwene kene mungitatela.” Tutena kumona kwila kyoso o muthu kyakuxila, ki kibhonzo kumuzola!

18. Ihi yanda bhita se o dikaza abhanga nguzu phala o henda ya ki izoze?

¹⁸ Lelu, Satanaji wamubhanga yoso phala o makaza ehe kudizola. Se o dikaza eha kudizola, ene nange kandazola we dingi Jihova. Maji o henda ya kidi ki yene kubhwa! Kyenyiki, bhanga yoso phala o henda mu ukaza we ikale kala o henda yotumbule mu divulu dya Mukumbi wa Mikumbi. Tenu Jihova kupholo mu ukaza wenu, katulenu kithangana phala kukala kumoxi, xila o ixinganeku ni ibhindamu ya kaza dye. Mu kubhanga kiki, enu mwanda bhana kijingu kwa Jihova, o Fixi ya henda ya kidi. Kala o dijiku dya tubhya twawama kyambote, o henda mu ukaza wenu yanda suluka ni kudibandekesa kate ku hadya ni hadya.