1-2. Sayi ya ala ni phata yalungu ni ihi?

 O KWILA eye wexile kya ni phata se Jihova wamutambwijila o misambu ye mba kana? Se kiki kyabhiti kya n’eye, ejiya kwila k’eye ngo. Jiphange javulu ene mubhita mu maka enya, bengebenge kyoso kya mudibhana ni ibhidi yavulu ku myenyu yâ. Kyoso kitwamudibhana ni ibhidi, kitena kubhonza kwijiya se Jihova wamutambwijila o misambu yetu.

² Mu milongi yiyi twandamona se mukonda dyahi tutena kudyelela kwila Jihova utambwijila o misambu ya jiselevende je. (1 Nz. 5:15) Twanda tambwijila we o ibhwidisu yiyi: Mukonda dyahi sayi bhabha tubanza kwila Jihova ka mutambwijila o misambu yetu? Lelu Jihova utambwijila o misamba yetu mu maukexilu ebhi?

3. Mukonda dyahi Jihova wamesena kwila tusamba kwa mwene?

³ O Bibidya itudyelelesa kwila Jihova watuzolo, ni kwila twala ni valolo yavulu phala mwene. (Aje. 2:7; 1 Nz. 4:10) Mwene wamesena kwila tumuzukama bhukaxi ka musambu. (1 Ph. 5:6, 7) Jihova wamesena kyavulu kutukwatekesa kusuluka mu kumuzukama, sumbala ni ibhidi itudibhana nayu ku mwenyu wetu.

4. Kyebhi kitwejiya kwila Jihova utambwijila o misambu ya jiselevende je? (Tala we ofoto.)

⁴ Mu Bibidya tusangamu phangu javulu ja jiselevende ja Jihova, jilondekesa kyebhi mwene kya tambwijila o misambu ya mu ukulu. Utena kuxinganeka mu phangu imoxi? Phangu imoxi ya Sobha Davidi. Mwene wadibhele ni ibhidi yavulu ku mwenyu wé, yu wexile mubhinga o kikwatekesu kya Jihova bhukaxi ka musambu. Sayi kizuwa mwene wadyondo kwa Jihova:  “Ngivwe musambu wami, eye u Jihova; bhetama dítwi, ngivwe o kudikola kwami, u ngi vutwile mu kukumbidila kwé ni kidi kyé.” (Jisá. 143:1) Jihova watambwijila o musambu wa Davidi mu kumubhulula ku jinguma je. (1 Sam. 19:10, 18-20; 2 Sam. 5:17-25) Kiki kyene kya bhangesa Davidi kuzwela: “Jihova wa zukama kwa yo a dikola kwa mwene.” Etu we tutena kukala ni kidyelelu kiki.—Jisá. 145:18.

5. O kwila Jihova wexile mutambwijila o misambu ya jiselevende je mu ukulu kala kyakexile mukinga ene? Bhana phangu. (Tala we ofoto.)

⁵ Jihova nange katambwijila o misambu yetu kala ki twa xinganekene. Kiki kyene kyabhiti ni poxolo Phawulu. Mwene wabhingi kwa Jihova phala ku mukatula o kibhidi kyedile kala “minya mu xitu.” Mu veji jitatu Phawulu wasambe kwa Jihova yalungu ni maka enya. O kwila Jihova watambwijila o misambu yiyi? Kyene watambwijila. Maji ka kibhange mu ukexilu wamesenene Phawulu. Muveji dya kuzubha o maka oso akexile mudibhana nawu Phawulu, Jihova wamubhana o kutena kwa bhindamene phala kusuluka mu kumusidivila ni ufiyele woso.—2 Ko. 12:7-10.

6. Mukonda dyahi sayi bhabha tumona kala Jihova kamutambwijila o misambu yetu?

⁶ Sayi bhabha, Jihova katambwijila o misambu yetu kala kitwexile mu kingila. Maji tutena kudyelela ni kidi kyoso kwila, Jihova wejiya o ukexilu watokala wa kutukwatekesa. Mwene “utena kubhanga dingi, o ima itumubhinga ni ituxinganeka ndenge.” (Efe. 3:20) Mukonda dya kiki, o kitambwijilu kya Jihova ku misambu yetu, kitena kubhixila mu kithangana mba mu ukexilu ki twexile mu ukingila.

7. Mukonda dyahi sayi ithangana twabhingi kulungulula o ukexilu wetu wa kusamba? Bhana phangu.

⁷ Nange twabhingi kulungulula o ukexilu wetu wa kusamba, mu kuxinganeka yebhi o vondadi ya Jihova phala etu. Tala yabhiti ni phange ya dyala amwixana Martin Poetzinger. Mu kubhita mivu kyoso kya kazala, phange Martin amwambata ku kaleya ku kibhela kya Jinazí. Ku dimatekenu mwene wasambe kwa Jihova phala na mukatule bhu kididi kyokyo, phala n’aye mulanga o kazola ke ni kuboka. Maji kupholo dya kwenda, mwene wamono kwila yiyi ki yene yexile o vondadi ya Jihova. Kyenyiki mwene wamateka kusamba: “Jihova, ngakudyondo, ngilondekese ihi iwamesena kwila ngi ibhanga.” Mu kusuluka wamateka kuxinganeka mu yoso yexile mubhita ni jiphange jamukwa exile we bhu kididi kyokyo. Avulu mudya a thandanganyele ni ahatu’a ni twana twa. Mu  kiki phange Martin wasambe: “Jihova ngakusakidila mu ujitu yu wa ubhe u ngala nawu. Ngikwatekese phala ngitene kuswinisa ni kukwatekesa o jiphange jami.” Mwene wabhiti divwa dya mivu mukubhanga o kikalakalu kiki!

8. Ihi itwatokala kulembalala kyoso kitubhanga o misambu yetu?

⁸ Twatokala kulembalala kwila Jihova wanda kumbidila o ima ya kanena mu kithangana kya xindi. O kikanenu kiki kyalungu ni kubwika o ima yoso yene mubhekela hadi ku athu oso, kala o mavuwa, o mawhaxi ni kalunga. Jihova wanda kumbidila o kikanenu kye bhukaxi ka Utuminu we. (Dan. 2:44; Dij. 21:3, 4) Kuma o kizuwa kiki ki kyabhixila hanji, Jihova wamukwehela Satanaji kutumina o ngongo. b (Nzw. 12:31; Dij. 12:9) Se Jihova wexile mubatula o maka mu ngongo kindala, kiki kyeji londekesa kwila Satanaji wamutumina kyambote. Sumbala twabhingi kukingila kwa Jihova phala na kumbidila o ikanenu yamukwa, o kiki ki kilombolola kwila mwene utwehela kutala hadi se kutukwatekesa. Twandamona maukexilu amukwa alondekesa kyebhi Jihova kyene mutukwatekesa lelu.

9. Kyebhi Jihova kya tukwatekesa kyoso kitubhinga ku sola mba kubatula maka? Jimbulula.

⁹ Jihova utubhana kwijiya. Jihova wakanena kutubhana kwijiya phala ni tusole kyambote o ima. Etu twabhindamena o unjimu wa Nzambi phala tutene kusola kyambote bengebenge mu ima itena kulungulula o mwenyu wetu, kala mu kusola se twanda kazala mba kana. (Tiy. 1:5) Tala o phangu ya muhatu dikudi, amwixana Madiya. c Mwene wexile mukalakala kala muboki wathembu yoso, mu kusuluka weza mukwijiya phange ya diyala. Mwene wambe: “Etu twakituka tu makamba, kupholo dya kwenda twamateka kudiwabhela. Ngejidile kwila ngatokalele kusola kyambote. Kyenyiki ngasambe kyavulu kwa Jihova. Ngamesenene kwila mwene ungendesa, maji ngejidile we kwila ki mwene weji ngisolelela bhu kididi.” Phange Madiya wadivu kuma Jihova watambwijila o misambu ye. Kyebhi? Watokwesa mu madivulu metu yu wasange milongi yalungu ni maka enya, yamukwatekesa kukatula o phata yexile nayu. Mwene we wabelesela o itendelesu yamubhana manya. O kiki kyamukwatekesa kutonginina o ixinganeku ye. Kudisukilu, mwene watena kubatula kyambote o maka.

10. Kala kilondekesa Filipe 4:13, Jihova ubhanga ihi phala kukwatekesa o jiselevende jê? Bhana phangu. (Tala we ofoto.)

¹⁰ Jihova utubhana nguzu phala kukolokota. Kala kyabhiti ni poxolo Phawulu, Jihova wanda tubhana o nguzu itwabhindamena phala tukolokote mu ibhidi yetu. (Tanga Filipe 4:13.) Tala kyebhi Jihova kyakwatekesa phange  yadiyala amwixana Benjamin. Mu mivu yavulu ya unzangala we, phange Benjamin ni jindandu je, atungile bhu kididi bhwexile mu bhongolokela o athu alenge o ita, ku ixi ya África. Mwene wambe: “Ithangana yoso ngexile musamba kwa Jihova mu kumubhinga nguzu phala ngitene kubhanga ima yambote imusangulukisa. Jihova watambwijila o misambu yami mu kungibhana kutululuka kwa muxima, kuswina phala kusuluka mu kuboka, ni madivulu phala ngitene kukala ni kixikanu kyakolo.” Mwene wambe dingi: “O kutanga o misoso ya jiphange ja mukwa, ni kumona kyebhi Jihova kya akwatekesa kukolokota, kyangikwatekesa we kukala fiyele kwa mwene.”

11-12. Kyebhi Jihova kyatena kutambwijila o misambu yetu bhukaxi ka jiphange jetu? (Tala we ofoto.)

¹¹ Jihova utukwatekesa bhukaxi ka jiphange jetu mu nzumbi. Mu usuku ande dya kufwa, Jezú wasambe ni kuswina kwoso. Mwene wadyondo kwa Jihova phala kehele kwila o athu a banza kuma wa bhukumukina Nzambi ni kumubalakala mukonda dya kikuma kyokyo. Mu veji dya kubhanga o kima kyamubhingi Jezú, Jihova wamukwatekesa mu kutumikisa anju phala kumuswinisa. (Luk. 22:42, 43) Jihova utena kubhangesa kwila phang’yetu mu nzumbi utuxinda mba utukunda phala kutukwatekesa. Mu kidi, etwenyoso tutena kusota kithangana phala kutumbula izwelu yambote itena kuswinisa o jiphange jetu.—Jisa. 12:25.

¹² Tala o musoso wa phang’yetu ya muhatu amwixana Miriam. Mu kubhita tusemana kyoso mwadi we kyafu, Miriam wexile ubheka ku bhata, wexile ni kikote ku muxima, yu waluwalele kyavulu. Mwene wexile mu dila ithangana yoso, wa bhindamene muthu phala kuzwela ne. Mwene wambe: “Ki ngatenene kuxinda muthu wosowoso, kyenyiki nga sambe kwa Jihova. Kyoso kingexile mudila hanji ni kusamba, mutelembe wami waxiki. Kafunga, wexile kamba dyami.” Miriam wadivu kyambote mu kikwatekesu kyatambula ku kafunga ni muhatu we. Mwene uxikina kwila Jihova wabhangesa o kafunga kaka ku muxinda.

13. Bhana phangu ilondekesa kyebhi Jihova utena kubhangesa kwila o athu kene mu mubheza akwatekesa o jiselevende je.

¹³ Jihova utena kubhangesa o athu kene mu mubheza kutukwatekesa. (Jisa. 21:1) Sayi  ithangana, Jihova utambwijila o misambu yetu mukubhangesa kwila o athu kene mu mubheza atukwtekesa. Mu kifika, o Sobha Artaxexe wehela Nehemiya kuvutuka ku Jeluzaleme phala kukwatekesa kutunga o tembulu. (Neh. 2:3-6) Kyene kimoxi we, lelu Jihova utena kubhangesa kwila o athu kene mu mubheza atukwatekesa.

14. Kyebhi o musoso wa phange Soo Hing’ wa kukwatekesa? (Tala we ofoto.)

¹⁴ Sayi phange ya muhatu amwixana Soo Hing, wazwela kyebhi Jihova kya mukwatekesa bhukaxi ka dotolo ye. Mon’e wa diyala wala ni uhaxi wabhonzo kyavulu wa kilunji. Kyoso mon’e kyabhiti ni kilwezu kyadikota, mwene ni mwadi we axisa o salu phala n’atene kulanga kyambote o mona. Mukonda dya kiki, exile mu dibhana ni ibhidi ya kukamba kitadi. Phange Soo Hing wambe kwila, mwenyu we wabhonzele kyavulu, kejidile se weji kolokota dingi kumwenyu. Mu kusuluka mwene wajikula o muxima kwa Jihova bhukaxi ka musambu phala ku mukwatekesa. O dotolo wexile musaka o mona, wambe kwila weji kwa kwatekesa. Mukonda dya kiki phange Soo Hing ni mwadi we atambula kikwatekesu kya jinguvulu, a abhana we inzo phala kukalamu. Mu kusukaku, mwene wambe: “Etu twamono o kikwatekesu kya Jihova mu maka enya.” Se phata Jihova ‘mukwa kwivwa o misambu.’—Jisá. 65:2.

15. Ihi ya kwatekesa phange yamuhatu kumona kwila Jihova wexile mu tambwijila o misambu ye?

¹⁵ Mu ithangana yavulu Jihova kene mutambwijila o misambu yetu mu ukexilu utubhangesa kudiwana. Maji o itambwijilu ibhana Jihova ku misambu yetu, yene itwabhindamena phala kumukala fiyele. Mu kyenyiki, tonginina kyambote kyebhi Jihova kya tambwijila o misambu ye. Sayi phange yamuhatu amwixana Yoko, wexile mubanza kwila Jihova kexile mutambwijila misambu ye. Kyenyiki mwene wakwata mukanda yu wasoneka o ima yoso yabhingi kwa Jihova. Kupholo dya kwenda, mukutonginina o mukanda, wamono kwila Jihova watambwijila kya ima yavulu kate mwene o ima yabhingi kya ukulu. Sayi ithangana, twabhingi kwimana bhofele ni kuxinganeka kyebhi Jihova kya mu tambwijila o misambu yetu.—Jisá. 66:19, 20.

16. Mu maukexilu ebhi dingi utulondekesa kwila twala ni kixikanu? (Jihebelewu 11:6)

¹⁶ Tulondekesa kwila twala ni kixikanu kana  ngo kyoso ki tu samba kwa Jihova, maji we kyoso kituxikina o kitambwijilu kye ku misambu yetu, kabasa o ukexilu ututambwijila mwene. (Tanga Jihebelewu 11:6.) Tala o musoso wa phange ya diyala amwixana Mike ni muhatu we Chrissy. Ene exile ni mbambe ya kusidivila ku Betele. Ene ambe: “Twasoneka petisá mu mivu yavulu, twexile musamba jinga kwa Jihova yalungu ni maka enya, maji nuka atwixanene.” Phange Mike ni Chrissy a dyelele kwila Jihova wejiya se kwebhi kweji ditunda dingi kyambote. Ene asuluka mukubhanga dingi, mu kusidivila kala aboki a thembu yoso, kusidivila mu ididi mwabhindamena dingi aboki, ni kukwatekesa mu kikalakalu kya kutunga. Lelu ene ala mu kikalakalu kya kukunda o ilunga. Phange Mike wambe dingi: “Sayi bhabha Jihova kexile mu tambwijila o misambu yetu mu ukexilu utwamesenene, maji mwene nuka wa kambele ku itambwijila, ni kwila wexile mu tambwijila mu ukexilu wabeta dingi kota o utwamesenene ndenge.”

17-18. Kala kilondekesa Jisálamu 86:6, 7, kidyelelu kyahi ki twatokala kukala nakyu?

¹⁷ Tanga Jisálamu 86:6, 7. O mukwa Jisálamu Sobha Davidi, kexile ni phata kwila Jihova wexile mu tambwijila o misambu ye. Eye we utena kukala ni kidyelelu kiki. Kala kitwamono mu milongi yiyi, Jihova utena kutubhana unjimu ni nguzu itwabhindamena phala kukolokota fiyele. Mwene utena kubhangesa kwila o jiphange jetu mu nzumbi ni yo kene mu mubheza a tukwatekesa.

¹⁸ Sayi bhabha Jihova kanda tambwijila o misambu yetu mu ukexilu utwamesenene, maji tutena kudyelela kwila mwene wanda itambwijila. Mwene wanda tubhana o ima itwabhindamena mukithangana kyatokala. Kyenyiki suluka mu kusamba ni kixikanu, ni kudyelela kwila Jihova wanda kulanga kindala. O ku hádya, mwene wandabhana o ima yabhindamena o athu oso mu ngongo.—Jisá. 145:16.