1. Jihova wamesena kwila o jiselevende jê abhanga ihi? (Tala we ojifoto.)

 KYOSO ki tubhindamena itendelesu ni kiximbakatesu tubhinga kwa nanyi? Twejiya o kitambwijilu kya kibhwidisu kiki. Tutena kusamba kwa Jihova. O Bibidya i tutendelesa ‘kukolokota mu kusamba,’ kiki kilondekesa kwila mwene wamesena kuma tu samba ithangana yoso. (1 Te. 5:17) Etu twala ni ufolo wa kusamba kwa Jihova ni kubhinga o itendelesu i twabhindamena ku mwenyu wetu. (Jisa. 3:5, 6) Mu kidi Jihova, Nzambi ya henda mwene, twamba kiki mukonda tutena kuzwela né bhukaxi ka musambu, ithangana yoso itwamesena.

2. Ihi itwandadilonga mu milongi yiyi?

² O musambu ujitu wadikota utwala nawu. Mukonda dya ibhidi ya kizuwa ni kizuwa, sayi bhabha kubhonza kusanga kithangana phala kusamba. Nange tumona kwila twabhingi kulungulula o ukexilu wetu wa kusamba. Mu kidi o Bibidya itena kutukwatekesa mu ukexilu yu. Mu milongi yiyi, twandamona kyebhi kitutena kukatula kithangana phala kusamba mukukayela o phangu ya Jezú. Twandadilonga we ima itanu itutena kutumbula mu misambu yetu, phala yene ni ifwame dingi.

3. Ihi yejidile Jezú yalungu ni misambu?

³ Jezú wejidile kwila Jihova ubhana valolo yavulu ku misambu. Ande dya kwiza mu ixi, mwene wexile mumona kyebhi Tat’ê kyexile mu tambwijila o misambu ya mala ni ahatu a fiyele. Mu kifika, Jezú wexile ku mbandu ya Tat’ê kyoso Mwene kyexile mu tambwijila o misambu ya yo exile mu samba ni muxima woso kala, Ana, Davidi, ni Elija. (1 Sam. 1:10, 11, 20;  1 Jis. 19:4-6; Jisá. 32:5) Kiki kyene kyabhangesa Jezú kulonga o maxibulu me kusamba ithangana yoso, ni kudyelela kwila Jihova weji tambwijila o misambu yâ!—Mat. 7:7-11.

4. Phangu yebhi yatuxila Jezú?

⁴ Yalungu ni misambu yetu kwa Jihova, Jezú watuxila phangu yambote phala ku ikayela. Mu kithangana kya ukunji we, mwene wexile musamba ithangana yoso. Jezú wexile ni kikalakalu kyavulu kya kulonga, ni kwila o athu exile muya kwa mwene avudile. Ne kiki, mwene wexile mukatula kithangana phala kukala ubheka phala kusambe. (Mál. 6:31, 45, 46) Mu kamenemene, kyoso kuma kwa vundile hanji, mwene wexile mu balumuka phala kukala ubheka n’a sambe. (Mál. 1:35) Sayi kizuwa, Jezú wabhiti usuku woso ni kusamba phala kusola kima kyakatunda. (Luk. 6:12, 13) Mu usuku ande dya kufwa, kuma wejidile kwila weji tala hadi yavulu, mwene wasambe veji javulu.—Mat. 26:39, 42, 44.

5. Kyebhi kitutena kukayela o phangu ya Jezú kyoso kitusamba?

⁵ O phangu ya Jezú itulonga kwila, ne mwene se twala ni ima yavulu phala kubhanga, twabhingi kukatula kithangana phala kusamba. Kala kyabhange Jezú, etu tutena kukatula kithangana phala kusamba, nange mu kamenemene, mba ande dya kuya mu zeka. Kyoso kitubhanga kiki, tulondekesa kwa Jihova kwila tubhana valolo yavulu ku ujitu wa kusamba. Mu kulembalala kyebhi kyadivu yalungu ni misambu, sayi phange ya muhatu amwixana Lynne wambe: “Kyoso kingadilongo kwila ngitena kuzwela ni Jihova kabasa kithangana, kiki kyangikwatekesa kumona Jihova kala Kamba dyami dya kazola. Kyenyiki ngamesenene kulungulula o ukexilu wami wa kusamba.” Sé phata etwenyoso twadivu kya kiki. Kindala twandamona ima itanu itutena kutumbula mu misambu yetu.

6. Kala kilondekesa Dijingunwinu 4:10, 11, ihi yatokala kutambula Jihova?

⁶ Ximana Jihova. Bhukaxi ka kisumwa, poxolo Nzwá wamono 24 a tufunga ku dyulu exile mubheza Jihova. Ene a ximana Nzambi mukuzwela kwila kyamufwama o “kutambula o fuma, o kijingu ni kutena.” (Tanga Dijingunwinu 4:10, 11.) Ima yavulu ibhangesa  we o jianju kubheza ni kubhana kijingu kwa Jihova. Ene ala ku dyulu kumoxi ni Jihova, ni kwila amwijiya kyambote. Ene amona o idifwa ya Jihova bhukaxi ka ima yoso ibhanga mwene. Kyoso ene kyamona o ukexilu wa Jihova wa kukalakala, akala dingi ni nguzu ya kumubheza.—Jobe 38:4-7.

7. Ima yahi itubhangesa kuximana Jihova?

⁷ Etu we twamesena kuximana Jihova bhukaxi ka misambu yetu, mu kumutangela se ihi itwawabhela kwa mwene ni mukonda dyahi tu muxila. Kyoso ki uya ni kutanga ni kudilonga o Bibidya, xinganeka se idifwa yebhi ya Jihova iwawabhela dingi. (Jobe 37:23; Lom. 11:33) Mu kusuluka, tangela kwa Jihova se mukonda dyahi wawabhela o idifwa yiyi. Tuximana we Jihova mukonda dya kikwatekesu kyene mubhana kokwetu, ni ku jiphange jetu ku mundu woso. Jihova wamusuluka mukutulanga ni kutukwatekesa.—1 Sam. 1:27; 2:1, 2.

8. Ima yebhi itubhangesa kusakidila Jihova? (1 Tesalonika 5:18)

⁸ Sakidila Jihova. Twala ni ima yavulu itubhnagesa kumusakidila bhukaxi ka misambu yetu. (Tanga 1 Tesalonika 5:18.) Tutena kusakidila Jihova mu ima yambote itwala nayu, mukonda o maujitu moso atunda kwa mwene. (Tiy. 1:17) Mu kifika, tutena kumusakidila mukutubhana o ixi ni ima yoso yambote yabhange mwene. Tutena we kumutangela kwila tusakidila kyavulu mukutubhana o mwenyu, o jindandu jetu, o makamba metu, ni kidyelelu kya ima yanda bhita ku hadya. Tusakidila we Jihova mukutubhana o ujitu wakukala tu makamba mê.

9. Mukonda dyahi ki tutokala kujimba kusakidila Jihova?

⁹ Nange kubhinga nguzu phala kuxinganeka mu ima yoso itubhangesa kusakidila Jihova. Mu izuwa ya lelu athu avulu kene mulondekesa kisakidilu. Ene abhita ithangana yavulu mu kusota o ima yamesena, muveji dya kulondekesa o kisadilu mu ima yala nayu kya. Se atufunyisa ku ukexilu yu, o misambu yetu yandakala yakubhinga ngo ima. Phala kiki ki kibhite, twabhingi kulembalala ni kusakidila Jihova mu ima yoso yene mubhanga phala etu.—Luk. 6:45.

10. Kyebhi o kukala mukwa kusakidila kwakwatekesa phang’yetu ya muhatu kukolokota? (Tala we ofoto.)

¹⁰ Se tukala tu akwa kusakukidila, twanda tena kukolokota mu ibhidi. Tala o phangu ya phange ya muhatu amwixana Kyung-sook, mu Mulangidi wa 15 wa mbeji ya Katatu ya 2015. O jidotolo amwambela kuma wexile ni uhaxi ku izavu awixana câncer. Mwene wambe: “Mu kithangana kyokyo, kyedile kala o mwenyu wami wabhu kya, ngexile ni woma wavulu”. Maji ihi yamukwatekesa? Mwene wambe kwila, mu mausuku moso ande dya kuya mu zeka, wexile mubanda ku thandu dya inzo, yu wexile musamba ni dízwi dyaswina kwa Jihova, mu kumusakidila mu ima itanu yambote yabhiti ku mwenyu we mu kizuwa kyenyokyo. Kyoso kyexile mubhanga kiki,  wexile mu divwa kyambote, mukonda dya kiki, ki kyexile mu mubhonza kuzwela kwa Jihova kwila wamuzolele kyavulu. Mwene wamono kuma Jihova ukwatekesa o jiselevende je ja fiyele kyoso kyadibhana ni ibhidi, ni kwila tutambula dingi mabesá avulu o ibhidi yetu ndenge. Kala kyabhiti ni phange Kyung-sook, etu twala ni ima yavulu phala kusakidila Jihova, ne mwene se twamudibhana ni ibhidi yabhonzo kyavulu mu kithangana kiki. O kusamba kwa Jihova ni kumwambela kwila twamuzolo kyavulu, kitena kutukwatekesa kukolokota ni kutululuka.

11. Mukonda dyahi o maxibulu a Jezú abhingile kuswina?

¹¹ Bhinga kuswina kwa jihova phala kuboka. Mu kubhita kithangana ande dya kuvutuka ku dyulu, Jezú walembalala ku maxibulu mê kwila eji bhana umbangi wa lungu ni mwene, “mu Jeluzaleme, mu Judeya yoso, mu Samadiya, katé ni ku maxokololo a jixi.” (Ika. 1:8; Luk. 24:46-48) Kupholo dyakwenda, o atwameni a jingeleja akutu o jipoxolo Phetele ni Nzwá, ya a ambata mu Inzo ya Kufundisa, kwenyoko a atendelesa phala kaboke dingi, kate a akusu. (Ika. 4:18, 21) Kyebhi Phetele ni Nzwá kyadivu?

12. Kala kilondekesa Ikalakalu 4:29, 31, o maxibulu a Jezú abhange ihi?

¹² Kyoso kya akusu kwala o atwameni a jingeleja, Phetele ni Nzwá ambe: “Se mwaxinganeka kwila, bhu pholo ya Nzambi kyafwama ku mi belesela muveji dya kubelesela Nzambi, énu kyá mwakijiya. Maji etu, kitutena kudixibha mu kuzwela o ima itwamono ni ima itwevu.” (Ika. 4:19, 20) Ene kyatundu mu kaleya, o maxibulu asambe kwa Jihova mu kubhinga o kikwatekesu kyê phala atene kusuluka mukubhanga o vondadi yê. Ene asambe: “Kwatekesa o jiselevende jé n’a suluke kuzwela o maka mé sé wôma.” Jihova watambwijila o musambu yu wabhange ni muxima woso.—Tanga Ikalakalu 4:29, 31.

13. Ihi itwadilongo mu phangu ya phange Jin-hyuk?

¹³ Tutena kukayela o phangu ya jipoxolo mu kusuluka mu kuboka ne mwene kyoso o jinguvulu ja ngongo a sota kutufidisa. Kiki kyene kyabhiti ni phange yadiyala amwixana Jin-hyuk, amutele mu kaleya mukonda dya ufiyele wê. Amubhele o kikalakalu kya kulanga o jipelezu jamukwa exile mukaleya ka ubheka, maji a mutendelesa kwila watokalele kuzwela nawu ngo se abhindamene kima. Ka tokalele kuzwela nawu yalungu ni Bibidya. Kyenyiki, mwene wasambe kwa Jihova mu kubhinga o kuswina ni unjimu phala atene kuboka kabasa kithangana kimoneka. (Ika. 5:29) Phange Jin-hyuk wambe: “Jihova watambwijila o musambu wami mu kungibhana o kuswina ni unjimu. Eme ngamateka kulonga o Bibidya bhu mabhitu a jikaleya, kala dibhitu ngexile mubhangabhu ngo ithangana itanu. Mu usuku, ngexile musoneka mikanda phala ku ibhana ku jipelezu jamukwa mu kizuwa kya kayela.” Etu we tutena kudyelela kwila Jihova wanda tukwatekesa mu kikalakalu kyetu kya kuboka. Kala kyabhiti ni phange Jin-hyuk, tutena kusamba mu kubhinga kuswina ni unjimu.

14. Ihi itena kutukwatekesa kudibhana ni ibhidi? (Jisálamu 37:3, 5)

¹⁴ Bhinga o kikwatekesu kya Jihova phala utene kudibhana kyambote ni ibhidi. Avulu mudyetu amudibhana ni ibhidi ya bhonzo kikale mu xitu mba mu kilunji. Amoxi afundu ndandu, akamukwa amudibhana ni maka ku mwiji, izukutisu, mba ibhidi yakamukwa yabhonzo kyavulu. Katuku o ima yiyi, o mabhebhu, ni ita, yene mu bhonzesa dingi o mwenyu wa athu. Mu kiki jikula o muxima wé kwa Jihova. Zwela ne kala wamuzwela ni dikamba  dye dya kazola. Dyelela kwila Jihova “wanda bhanga-bhu kyoso kya tokala.”—Tanga Jisálamu 37:3, 5.

15. Kyebhi o misambu itena kutukwatekesa kukolokota mu ibhidi? Bhana phangu.

¹⁵ O kusamba kwanda tukwatekesa ‘kulokota kyoso ki tu dibhana ni ibhidi.’ (Lom. 12:12) Jihova wejiya yoso ibhita ni jiselevende jê, mwene “wivwa nzongo yâ, ya kudikola.” (Jisá. 145:18, 19) Sayi phange ya muhatu amwixana Kristie, muboki wa thembu yoso wala ni 29 amivu, wamono kuma kiki kidi. Mwene wamateka kudibhana ni ibhidi yalungu ni uhaxi. Mukonda dya kiki wexile muluwala kyavulu. Kupholo dya kwenda, mwene weza mu kwijiya kuma manya wexile ni uhaxi wabhonzo kinene. Phange Kristie wambe: “Eme ngexile musamba kwa Jihova ni muxima woso mu kumubhinga nguzu phala ngitene kubhita kyambote o kizuwa. Kumbandu yamukwa ngasuluka mu kuya mu yonge ni kudilonga ubheka wami.” Mwene wambe dingi: “O misambu yene yangikwatekesa kuditunda kyambote mu kithangana kyokyo kyabhonzo. Eme ngejidile kwila Jihova wexile jinga n’eme, o kuxinganeka mu ima yiyi kyexile mu ngitululukisa. O maka alungu ni uhaxi wami kabhwile luwa mu kithangana kyokyo. Maji o kumona kwila Jihova wexile mu tambwijila o misambu yami, kyene kyexile mu ngibhana o kutululuka.” Ki twatokala kujimba kwila “Jihova wejiya kubhulula mu ibhidi yó amukala ni wôma.”—2 Ph. 2:9.

16. Mukonda dyahi twabhingi o kikwatekesu kya Jihova phala kulenga o jitendasá?

¹⁶ Bhinga o kikwatekesu kya Jihova phala kulenga o jitendasá. Etu twakwa ituxi, mu kiki twatokala kubhanga nguzu phala ki tubhange o ima ya ibha. Maji Satanaji wanda bhanga yoso ni yoso phala kubhonzesa o mwenyu wetu. Ukexilu umoxi wa Satanaji kututendala, o itonokenu ya undumbu mba ya ufusa. O itonokenu kala yiyi itena kwizalesa o kilunji  kyetu ni ixinganeku yayibha, itena we kutubhangesa kuta kituxi ni kudibotesa o ukamba wetu ni Jihova.—Mál. 7:21-23; Tiy. 1:14, 15.

17. Kyoso kitusamba mu kubhinga o kikwatekesu kya Jihova, ihi itwatokala kubhanga? (Tala we ojifoto.)

¹⁷ Se twamesena kutolola o jitendasá, twabhingi o kikwatekesu kya Jihova. Jezú watumbula o izwelu yiyi mu musambu wê: “Ku twehele kudibhala mu jitendasá, maji tu bhulule kwa kadya-phemba.” (Mat. 6:13) Jihova wamesena kutukwatekesa, maji etu twatokala ku mubhinga o kikwatekesu kiki. Twatokala we kukumbidila o ima itwabhingi mu misambu yetu. Twatokala kubhanga yoso itutena phala kulenga o ibanzelu yayibha ya mundu yu wa Satanaji. (Jisá. 97:10) Kyoso kitutanga ni kudilonga o Bibidya, twizalesa o kilunji kyetu ni ixinganeku yayuka. O kuya mu yonge ni kubhanga o sidivisu ya kuboka kwanda tena we kutukwatekesa kwizalesa o kilunji kyetu ni ima yambote. Jihova watukanena kwila kanda twehela ku tutendala kate bhwa suku o nguzu yetu.—1 Ko. 10:12, 13.

18. Etwenyoso twabhingi kubhanga ihi?

¹⁸ Lelu, kala muthu mudyetu wabhingi kusamba ithangana yoso phala kukolokota fiyele kwa Jihova mu izuwa yiyi isukidilaku. Kyenyiki, Katula kithangana phala kusamba ni muxima woso. Jihova wamesena kwila tu ‘lundulula o mixima yetu kwa mwene” bhukaxi ka musambu. (Jisá. 62:8) Sakidila Jihova, mu ximane ni muxima woso mu yoso yene mubhanga. Mu bhinge o kikwatekesu phala uswine mu kikalakalu kya kuboka. Samba ithangana yoso mukubhinga kikwatekesu phala kudibhana kyambote ni ibhidi ni kulenga kabasa tendasá imoneka. Kana kwehela muthu wosowoso mba kima kyosokyoso kukufidisa kusamba. Maji kyebhi Jihova kya tambwijila o misambu yetu? Twandamona o kitambwijilu kya kibhwidisu kiki mu milongi ya kayela.