ATHU avulu ejiya kwila, mu ukulu, o athu ku Ijitu, exile musonekena mumadivulu obhange ni madibu. Akwa Ngelesya ni akwa Loma, exile musoneka mumadivulu obhange ni madibu. * Maji athu ofele ejiya kwila, omadibu exile mubhanganawu we mawulungu, kana ngo madivulu.

Mu 2.500 amivu kudima, polofeta Izaya wambele kwila, o athu atungu “ku masâmbwa ma jihonga ja jingiji ja Itiyopya” eji tumikisa “ilôlo yendela ku musanza, mu jinaviyo ja jixiya, kulu dya menya.” Mukubhita mivu, polofeta Jelemiya wambe kwila, kyoso akwa Medu ni Pelesa kyeji kwiza mubwika ombanza ya Babilonya, ene eji kwoha ‘o maulungu mâ amadibu’ phala ka lenge.—Iza. 18:1, 2; Jel. 51:32.

O Bibidya a ibhusu kwala Nzambi. Kyenyiki, o adilongi a Bibidya kadiwana dingi kyoso akwa kukanda o ima yokulu alondekesa kwila, m’ukulu, o athu exile mwene mubhanga maulungu adibu. (2 Tim. 3:16) Ihi yasange o athu? Akwa kukanda o ima yokulu, asange ima ilondekesa kwila, akwa Ijitu exile mwene mubhanga maulungu adibu.

Akwa kukanda, asange jifikula kujiphalelu ja jimbila, ku ixi ya Ijitu, jilondekesa kyebhi o athu kyexile mubatula odibu phala kubhanga maulungu. Omayala exile mubatula odibu, anga a ikuta mu ita, mukusuluka akuta o ita kumoxi. Kyoso kyexile mubatula ni kukuta odibu mu ita ni ita, yene yexile mudisokejeka ni kukola kyambote, mukonda dya ukexilu we wafwama. Sayi divulu dijimbulula omusoso wa akwa Ijitu, dyambe kwila, omaulungu adibu, mukulebha exile mutenesa 17 ajimetulu, kumbandu imoxi kwexile mukala 10 mba 12 dya jihandu mba jileme.

Omadibu kabhonzele kwasanga, mukonda mungiji ya Nilu avudile. Okumbandu yengi, omaulungu adibu kabhonzele ku abhanga. Ne mwene kyoso o athu kyamateka kubhanga omaulungu amabaya, mumivu yavulu, o atambi ni manyanga, exile hanji mubhanga maulungu adibu, ofele ni onene.

Kifwa, mumivu yavulu, o athu exile hanji mubhanga mwene maulungu adibu. Sayi musoneki wa Ngelesya amwixana Plutarch, wexile kumwenyu mukithangana kya Jikidistá ja dyanga, wambe kwila, mukithangana kyê, sayi athu exile mubhanga hanji maulungu adibu.