1-2. Ibhidi yebhi yene mudibhananayu ojiphange javulu?

POXOLO Phawulu waswinisa Timote phala kukumbidila kyambote o unguza mba o ukunji wê kwa Nzambi. (2 Tim. 4:5) Etwenyoso twene mubhanga nguzu phala kukumbidila okitendelesu kiki kya Phawulu. Maji sayi ibhidi. Jiphange javulu abhingi kuswina phala kuboka. (2 Tim. 4:2) Xinganeka kujiphange atungu mu jixi jakambe ufolo mba afidisa okikalakalu kyetu. Ene aboka sumbala ejiya kwila kiki kitena kwabhangesa kuya mukaleya!

² Jiphange jetu adibhana ni ibhidi yavulu itena kwaluwalesa. Mukifika, avulu abhingi kukalakala kizuwa kyoso kyamuvimba phala kudikila o ibhindamu ya mwiji wâ, kyatula kudisukilu dyasemana katena kuboka kyavulu mukonda atohoka. Amukwa katena kubhanga dingi ima yavulu mukilunga kya Jihova, mukonda dya uhaxi kiwivu milongo mba okukuka. Phange amwixana Madiya, * wambe: “Ngibhanga nguzu yavulu phala kukatula o ixinganeku yayibha mukilunji kyami. Kiki kingibhagesa kubhwila. Mukusuluka ngiditatela mukonda okukamba onguzu kwene mungifidisa kubhanga dingi mu ukunji.”

3. Ihi itwandamona mumilongi yiyi?

³ Kabasa ibhidi itudibhananayu, Jihova utubhana onguzu itwabhindamena phala kusuluka kumusidivila kate bhwoso bhututena. Mumilongi yiyi twandamona kyebhi Jihova kyatena kutukwatekesa. Maji tumone hanji kyebhi mwene kyakwatekesa poxolo Phawulu ni Timote sumbala ni ibhidi.

4. Ibhidi yebhi yadibhananayu poxolo Phawulu?

⁴ Phawulu wadibhana ni ibhidi yavulu. Mwene wabhindamene dingi kikwatekesu kya Jihova kyoso ojinguma jê kyamubeta,  kyamububa ni matadi, kyamute mukaleya ni kyoso kyasoto kumujibha. (2 Kol. 11:23-25) Phawulu kakexile we ni jisonyi jakwamba kwila sayi ithangana wakexile we muluwala. (Loma 7:18, 19, 24) Kumbandu yengi mwene wakexile mudibhana ni “uhaxi wonéne mu xitu.” Sayi kithangana mwene wadyondela Nzambi phala kumukatula o uhaxi yú.—2 Kol. 12:7, 8.

5. Sumbala ni ibhidi ihi yatena kubhanga poxolo Phawulu?

⁵ Sumbala ni ibhidi yadibhananayu, poxolo Phawulu watambula onguzu ibhana Jihova, kyenyiki mwene watenene kukumbidila o ukunji wê. Tala ngó yabhangele poxolo Phawulu. Mukifika, mwene kakexile mutena kutunda kubhata, mukonda amukutile ni malubhambu kubhata dyê kumbanza ya Loma. Né kiki mwene watena kuzokela onjimbu yambote kupholo dya atwameni a Jijude ni athu akexile ni maungana. (Ika. 28:17; Fil. 4:21, 22) Mwene wabokela we o Alangidi a Palasyu ni yó akexile mumukunda. (Ika. 28:30, 31; Fil. 1:13) Mukithangana kiki Jihova wakwatekesa Phawulu kusoneka mikanda yakwatekesa o Jikidistá mukulu, yene mukwatekesa hanji o Jikidistá lelu. Kumbandu yengi o phangu ya Phawulu yaswinisa okilunga mumbanza ya Loma. Kyenyiki, o jiphange a “swina dingi kyengi ni kutanga o Maka ma Nzambi sé wôma.” (Fil. 1:14) Sumbala Phawulu katenene kubhanga yoso yamesenene, mwene wabhange yoso yatenene. Kiki kyene kyabhangesa Phawulu kwamba: “O ima ya ngi bhiti . . . ya bhekela o Njimbu Yambote kusambuka dingi kyengi.”—Fil. 1:12.

6. Kala kilondekesa omukanda 2 Kolindu 12:9, 10, ihi yakwatekesa poxolo Phawulu kukumbidila o ukunji wê?

⁶ Phawulu wejidile kwila se kikyexile okikwatekesu kya Jihova kejitena kubhanga o ima yoso yabhange. Mwene waxikina ni kidi kyoso kwila onguzu ya Nzambi ya beta “kota mu kutena mu ku bhwila kwé.” (Tanga 2 Kolindu 12:9, 10.) Bhukaxi ka nzumbi Yê ikôla Jihova wabhana kutena kwa poxolo Phawulu phala kukumbidila o ukunji wê, sumbala amuzukutisile, amutele mukaleya, wadibhana ni ibhidi yamukwa.

7. Ibhidi yebhi yadibhananayu Timote yamubhonzesa kukumbidila kyambote o ukunji wê?

⁷ Timote wendele we ni poxolo Phawulu, wabhingile kudyelela mukutena kwa Nzambi phala kukumbidila o ukunji wê. Timote ni Phawulu endele jinjila jamakanga phala kuboka. Kumbandu yengi Phawulu watumikisa  Timote, phala kukunda ni kuswinisa o ilunga. (1 Kol. 4:17) Nange Timote wadivwile kwila mwene kafwamene mba kakexile ni uhete wakubhanga okikalakalu kyokyo. Nange kiki kyene kyabhangesa poxolo Phawulu kumwambela kuma: “Kana kwehela kwila bhu kala muthu u ku tènda mukonda dya undenge.” (1 Tim. 4:12) Mukithangana kiki Timote wexile we ni mwinya muxitu, kifwa mwene wexile ‘mukata muveji javulu.’ (1 Tim. 5:23) Maji Timote wejidile kwila Jihova weji mubhana okutena bhukaxi ka nzumbi ikôla phala kuboka onjimbu yambote ni kusidivila ojiphange jê.—2 Tim. 1:7.

8. Kyebhi Jihova kyabhana onguzu kumundu wê lelu?

⁸ Lelu Jihova ubhana kumundu wê “o nguzu i lenda yoso.” Mukiki atena kumusidivila ni ufiyele woso. (2 Kol. 4:7) Tumone ima iwana yatubhana Jihova, itubhana onguzu, itukwakesa we kumukala fiyele: Omusambu, o Bibidya, ojiphange jetu mukilunga ni ukunji wetu.

9. Omusambu utukwatekesa kyebhi?

⁹ Atukolokotesa bhukaxi kamusambu. Kala kyambe omukanda kwa akwa Efezu 6:18, Phawulu watuswinisa: “Sambenu jinga ithangana yoso.” Se kyene kitubhanga Nzambi wandatukolokotesa. Jonnie watungu ku ixi ya Bolivia wamono okikwatekesu kya Jihova kyoso kyadibhana ni ibhidi yavulu. Kikale o muhatu wê ni jitata jê, enyoso akatele kyavulu mukitangana kimoxi. Kyamubhonzele kyavulu okulanga okitatu kya athu. Omanya wafu, omuhatwê ni tat’ê alaleka kyavulu phala kudisanza. Mukuxinganeka muhadi yadibhananayu Jonnie wambe: “Mukithangana kingexile ni hele yavulu okyangikwatekesa okusamba kwa Jihova ni kumutangela kyebhi kingexile mudivwa.” Jihova wabhana kwa Jonnie okutena kwabhindamene phala kukolokota. Ronald kafunga, watungu ku Bolivia, amutangela kwila manya wala ni cancer. Mukubhita mbeji manya wafu. Ihi yamukwatekesa mukithangana kiki kyabhonzo? Mwene wambe: “Kyoso kingexile musamba kwa Jihova ngexile mumutangela o ima yoso ingexile mudivwa. Ngejiya kwila Jihova ungitendela dingi kyambote omuthu wosowoso ndenge. Mukidi mwene wabeta kungijiya eme ndenge.” Sayi ithangana etu tudivwa kwila kitwandatena kukolokota mu ibhidi yetu, kitwijiya we itwandabhinga mumusambu. Maji Jihova utubhinga phala kusamba kwa mwene ne mwene se kyamutubhonza phala kujimbulula yatukala kumuxima.—Loma 8:26, 27.

10. Kala kilondeleka Jihebelewu 4:12, mukonda dyahi kima kyambote kutanga ni kuxinganeka mu ima itwatange?

¹⁰ Kikolokotesu kitutambula bhukaxi ka Bibidya. Phawulu wadyelele kwila o Mikanda Ikôla yejimukolokotesa ni kumuximbakatesa. Etu we tutena kukala ni kidyelelu kiki. (Loma 15:4) Kyoso kitutanga o Mikanda Ikôla ni kuxinganeka, Jihova utena kutubhana onzumbi ikôla phala kutukwatekesa kutendela kyambote se kyebhi kitutena kukumbidila o Mikanda Ikôla mumaka utwamudibhananawu. (Tanga Jihebelewu 4:12.) Ronald, twamutumbula kudima wambe: “Eme ngisanguluka mukukala ni kifwa kyakutanga kibatulu kya Bibidya mu mausuku oso. Eme ngixinganeka mu idifwa ya Jihova ni ukexilu ulanga ojiselevende jê. Kubhanga kiki kwangikolokotesa.”

11. O Bibidya yakolokotesa kyebhi phange wafundu mwadi wê?

¹¹ Kuxinganeka mu Mak’â Nzambi kutukwatekesa kukala ni ibanzelu yambote yalungu ni maka utwamudibhananawu. Tala kyebhi ophange kyakatula mbote mukutanga o Bibidya  kyoso kyafundu odiyala. Sayi kafunga wamuswinisa phala kutanga omusoso wa Jobe, phala kumona se mbote yahi yejikatulamu. Kyoso mwene kyabhange kiki wamateka kubazela Jobe, mukonda dya ukexilu wê wayibha wakuxinganeka. Mukuxinganeka mwene wakexile muzwela kiki: “Jobe tata! Kana kuxinganeka mu ukexile yú wayibha!” Maji mukusuluka watonginina kwila wakexile we muxinganeka kala Jobe. Kiki kyamukwatekesa kulungulula o ukexilu wê wakuxinganeka, kyamukolokotesa we kudibhana ni ndolo yakufunda mwadi wê.

12. Kyebhi Jihova kyene mutukolokotesa bhukaxi ka jiphange?

¹² Kikolokotesu kitutambula bhukaxi ka jiphange. Ukexilu wamukwa wa Jihova kutukolokotesa, bhukaxi ka jiphange jetu. Phawulu wasoneka kwila wamesenene kyavulu “kudikonda malamba” ni jiphange jê munzumbi. (Loma 1:11, 12) Ophange Madiya, amutumbula kudimatekenu, wamono ovalolo yakukala kumoxi ni jiphange, mwene wambe: “Jihova wangikwatekesa bhukaxi ka jiphange kejidile omaka ungexile mudibhananawu. Ene azwela ima yangikolokotesa mba atumikisa kamukanda kungabhindamene mukithangana kyenyokyo. Okima kyamukwa kyangikwatekesa okudizwelesa ni jiphange adibhana we ni maka ungadibhananawu mukonda ngatena kudilonga ni phangu yâ. Otufunga ene mungitangela we kwila, eme ngala ni valolo mukilunga.”

13. Kyebhi kitutena kukolokotesa ojiphange jetu muyônge?

¹³ Ukexilu wambote wakukoloketesa ojiphange jetu bhukaxi kayônge. Kyoso ki uya muyônge utena kusota kukolokotesa akwenu, mukwatangela kwila eye wazolo, ni ku asakidila mu ima yoso yabhanga. Mukifika, ande dyakumateka okyônge sayi kafunga amwixana Phetele, wambe kuphange yamuhatu, mwadiwe ki Mbangi ya Jihova: “Okumimona mukwiza muyônge kungiswinisa kyavulu. Mu izuwa yoso eye wiza ni kisamanu kya an’ê muyônge, ene adisokejeka we phala kutambwijila.” Ni masoxi mumeso mwene watambwijila: “Eme ngabhindamene kyavulu kwivwa o izwelu yiyi lelu, ngakusakidila.”

14. Kikolokotesu kyebhi kitubhana o ukunji?

¹⁴ Kikolokotesu kitutambula bhukaxi ka ukunji. Kyoso kituzwela ni akwetu yalungu ni Bibidya etu tusanguluka kyavulu, kikale se ene atwivwa mba kana. (Jisa. 11:25) Sayi phange yamuhatu amwixana Stacy, wamono kwila okudibhakula mu ukunji kutena mwene kutukolokotesa. Sayi ndandu yê, amute mukamukonde, kyenyiki kyamuluwalesa kyavulu, mwene wakexile mudibhwidisa: ‘Okwila ngabhange mwene yoso phala kumukwatekesa?’ Mu ithangana yoso Stacy wakexile ngó mubanza mumaka enyá. Ihi yakwatekesa Stacy kudibhana ni maka yá abhonzo? O ukunji! O ithangana yoso yakexile muboka wexile mulunga omuxima wê, mu ibhindamu ya athu mumbambe yê. Mwene wambe: “Mukithangana kyenyokyo Jihova wangibhana dixibulu dya Bibidya dyakulu ni lusololwoso. Okiki kyangisangulukisa dingi kyavulu. Okima kyangikwatekesa dingi kumwenyu, okuboka.”

15. Ihi iwadilongo mu izwelu yaphange Madiya?

¹⁵ Mukonda dya ibhidi kumwenyu, sayi jiphange abanza kwila kamubhanga yoso yatokalele mu ukunji. Se kyene kiwamudivwa, lembalala kwila, Jihova usanguluka se ubhanga yoso i utena. Tala dingi yabhiti ni phange Madiya. Kyoso mwene kyayi musidivila mukilunga kizwela dimi dyengi, mwene kakexile mutena kubhanga yoso yamesenene. Mwene wambe: “Kudimatekenu, muyônge eme ngakexile ngó mutena kutambwijila mu izwelu yofele mba kutanga velusu ya Bibidya. O  mu ukunji ngexile ngó mutena kubhana tumikanda.” Madiya wakexile mudisokesa ni yó azwela kyambote odimi, okiki kyakexile mumuluwalesa kyavulu. Maji mwene walungulula o ukexilu wê wakubanza. Mwene watonginina kwila ni kikwatekesu kya Jihova mwene wejitena kubhanga dingi mukilunga sumbala kejidile kuzwela kyambote odimi. Mwene wambe: “Omilongi ya Bibidya ki ibhonzo ku itendela, yala ni kutena kwakulungulula omyenyu ya athu.”

16. Se kiwamutena kutunda kubhata ihi itena ku kukwatekesa kukolokota?

¹⁶ Nange eye wamesena kuya mu ukunji maji kutena kutunda kubhata. Dyelela kwila Jihova umona, utendela iwamubhitanayu. Mwene utena ku kukwatekesa kubokela yó ene mukulanga, jidotolo ni asaki. Kumbandu yengi kusokese iwene mubhanga lelu ni iwabhange mukulu, mukonda kiki kitena kukuluwalesa. Sota kumona yamubhanga Jihova lelu phala ku kukwatekesa. Se kiki ukibhanga wandakala ni nguzu phala kukolokota ni kisangusangu kabasa maka amoneka.

17. Kala kilondekesa odivulu dya Ndongixi 11:6, mukonda dyahi twatokala kukolokota mu ukunji, ne mwene se o athu kamututambwijila?

¹⁷ Etu tubhanga nguzu yavulu phala kukuna ombutu yakidi, maji kitwijiya se yebhi yandakala ni jindanji ni kukula. (Tanga Ndongixi 11:6.) Mukifika, phange yamuhatu wala ni 80 amivu amwixina Barbara, wene mubhana umbangi bhukaxi kamutelembe ni mikanda. Sayi mukanda mwene watelemu o Mulangidi wa 1 wa mbeji ya Katanu ka 2014, wala ni dyambu “Ihi ia Bhange Nzambi Phala Eie.” Sé kukijiya omukanda watumikisa phange Barbara wabhixila bhu maku adikaza kexile dingi Jimbangi ja Jihova. Ene a utange muveji javulu. Odiyala wadivu kala Jihova wexile muzwela né. Mukubhita 27 amivu odikaza dyamateka dingi kuya muyônge, anga avutuka dingi kukala Jimbangi ja Jihova. Okumona ombote yabheka omukanda kwaswinisa dingi Barbara kwamukolokotesa we!

18. Ihi itwatokala kubhanga phala kutambula okutena kwa Nzambi?

¹⁸ Jihova utubhana okutena kwê mu maukexilu avulu. Kyoso kitukatula mbote mu maukexilu yá kala: Okusamba, o Bibidya, okudilunga ni jiphange o ukunji wetu, twandalondekesa kwila twadyelela mukutena kwa Jihova ni kwila mwene wamesena kutukwatekesa. Mukyenyiki tudyelele jinga kwa Tata yetu yadyulu ‘ulondekesa o kuswína kwê mu ku kudila yó oso ala ni muxima wa tenena kwa mwene.’—2 Mal. 16:9.