1. Phangu yahi yaxisa Jezú ku akayedyê ni ihi yabhange ene? (Tala ofoto yakapa.)

JEZÚ wexile ni ibanzelu yambote yalungu ni ukunji wê mu ixi, mwene wamesena kwila o akayedyê abhanga we kiki. (Nzwá 4:35, 36) Kyoso Jezú kyakexile ni maxibulu mê, ene abokele ni kuswina kwoso. (Luka 10: 1, 5-11, 17) Maji kyoso Jezú kyamukutu, ya amujibha, mukithangana kiki, ovondadi yâ yakuboka yazozele bhofele. (Nzwá 16:32) Kyoso Jezú kyamufukununa, mwene waswinisa omaxibulu mê kulunga omixima yâ, mukikalakalu kyakuboka. Mukonda dyakiki kyoso Jezú kyavutuka kudyulu omaxibulu mê amateka kuboka ni nguzu yoso, kate mwene ojinguma jâ adikalangaza: “Talesaphe, kyoso ki mwa bhange! Mu ezalesa Jeluzaleme yoso ni kulonga kwenu.”—Ika. 5:28.

2. Kyebhi Jihova kyakwatekesa okikalakalu kyakuboka?

² Jezú wendesa okikalakalu kya Jikidistá kuhama yadyanga, Jihova wa akwatekesa. Kyenyikiphe, avulu axikina onjimbu yaboko. Mukifika, ku Pendekoxi yamuvu wa 33 K.K., 3.000 a abatizala. (Ika. 2:41) Okibuka kyamaxibulu kyasuluka ni kukula kyavulu. (Ika. 26:7) Jezú wakanene kya kwila athu avulu eji xikina onjimbu yambote mu izuwa yiyi yasukidilaku.—Nzwá 14:12; Ika. 1:8.

3-4. Mukonda dyahi sayi yá abanza kwila kyabhonza kuboka, maji ihi itwandamona mumilongi yiyi?

³ Etwenyoso twene musota kukala ni ibanzelu yambote yalungu ni ukunji. Sayi ididi kikibhonzo kubhanga kiki. Mukonda dyahi? Mukonda athu avulu amesena kudilonga o Bibidya! Kyenyiki, sayi yá abhinga kukingila kate kyoso kikumoneka  muboki wala ni kithangana phala kwalonga; maji sayi jixi kyabhonza dingi okuboka mukonda o athu kene mwasanga kubhata. Se a asanga kene muxikina kudilonga.

⁴ Se watungu mu ixi mwene mubhonza kusanga o athu phala kwabokela, ojindunge jamilongi yiyi, jitena ku kukwatekesa. Twandazwela se ihi yene mubhanga ojiphange phala kusanga dingi athu mu ukunji. Twandamona we se mukonda dyahi twatokala kukala ni ibanzelu yambote yalungu ni ukunji, kikale se athu axikina onjimbu yetu mba kana.

5. Ibhidi yebhi yene mudibhananayu ojiphange javulu?

⁵ Sayi jiphange javulu kyabhonza kusanga o athu mumabhata mâ mba kya abhonza kudizwelesa nawu. Sayi aboki atungu mu ididi mwala ojinzo mba jisabhalalu mwala o alangidi. Sayi bhabha o alangidi kehela muthu wosowoso kubokona se kamwixana kwal’o mukwadibhata. Aboki amukwa aboka se kwafidisa maji kyabhonza kusanga o athu mumabhata mâ. Amukwa aboka mumadyembu mwala ngó athu ofele. Ene abhanga njila yalebha se kwijiya se andasanga mwene omukwa dibhata! Se kiki kyene we mubhita neye, kana kubhwila. Ihi i utena kubhanga phala kutolola o ibhidi yiyi, ni kuditunda kyambote mu ukunji wé?

6. Kyebhi okikalakalu yakuboka kyadifu ni kikalakalu kyakutamba?

⁶ Jezú wasokesa okikalakalu kyakuboka ni kikalakalu kyamutambi. (Mál. 1:17) Sayi atambi atena kubhita izuwa yavulu sé kukwata né ngó mbiji imoxi. Maji ene kabhwila; asota jindunge jamukwa jakutamba. Ene alungulula o ola, okididi ni ndunge yakutamba. Kyene kimoxi we n’etu, tutena kulungulula ojindunge jetu jakuboka. Tumone ojindunge jiji.

7. Se tuboka mu ola ki idifu, mbote yahi itwandakatula?

⁷ Sota kusanga o athu mu ithangana ki idifu. Twandasanga dingi o athu, se twasota mukithangana kyakala dingi kumabhata mâ. Mukidi, kyoso o athu kyatunda, kikale se alaleka mba kana maji avutuka kubhata! Sayi jiphange javulu aboka mungoloxi mba kyoso odikumbi kidiboba, mukonda kyene okithangana o athu kyakala dingi kumabhata mâ. Kumbandu yengi, mukithangana kiki ene atululuka dingi, akala we ni vondadi yakuzwela ni athu. Nange wandawabhela okukayela ondunge yakafunga amwixana Davidi. Mwene wambe kwila kyoso kyaboka, avutukila dingi mujinzo jakambe kusanga o athu. Mwene wambe: “Kisangusangu kyadikota kusanga omukwa dibhata kyoso kituvutuka muveji yakayadi.” *

8. Kyebhi kitutena kukumbidila odivulu dya Ndongixi 11:6, mu ukunji wetu?

⁸ Twatokala kusuluka kusota jindunge jakusanga o athu mumabhata mâ. Ovelusu yamilongi itwamudilonga, yamutuswinisa kubhanga kiki. (Tanga Ndongixi 11:6.) Davidi, twamutange kudima mwene kabhwila. Mukusota o athu muveji javulu sé kwasanga, kudisukilu mwene wasange muthu umoxi kudibhata. Odiyala dyamesenene kyavulu kudilonga o Bibidya, yu wambe: “Ngatungu bhabha mudinake dyamivu, eme nuka angikundile ku Jimbangi ja Jihova.” Davidi wambe: “Ngatonginina kwila kyoso kitusanga o athu kumabhata mâ, muveji javulu ene axikina onjimbu itwatudila.”

9. Sayi aboki ene mubhanga ihi, kyoso kikyabhonza kusanga o athu kumabhata mâ?

⁹ Sota kubokela mu ididi yengi. Phala kusanga o athu abhonza kwasanga mumabhata mâ, sayi aboki alungulula o kididi kyâ kya  kuboka. Mukifika, sayi jiphange aboka mu ididi mubhita athu avulu, aboka ni kadikalu. O ukexilu yú ukwatekesa o jiphange kubokela athu avulu, atungu mu ididi ibhonza kwasanga mukuboka nzo ni inzo. Kyenyiki, enemutena kuzwelanawu pholo ni pholo. Kumbandu yengi aboki avulu atonginina kwila o athu axikina dingi kuzwela ni kutambula omadivulu m’etu, mu ididi yakunyohena, mu ididi yakubhanga wenji mba mu itanda. Floiran, kafunga ka ilunga watungu ku Bolivia, wambe: “Etu tuya muboka bhukitanda mu 13:00 ndu 15:00 kya ola, kyoso o athu amesena okusumba asosoloka hanji. Twene mutena kudizwelesanawu, kate mwene tumateka kwalonga o Bibidya.”

10. Ihi dingi i utena kubhanga phala kubokela o athu?

¹⁰ Sota jindunge jengi jakuboka. Xinganeka kwila, wasoto kyá kudizwelesa ni muthu maji kiwamutena. Wayi kubhata dyê mu ithangana ki idifu, maji né kiki kiwamusange. Okwila sayi ndunge yakudizwelesa ni muthu yú? Phange Katarína wambe: “Eme ngene musoneka mikanda phala o athu yó kingene kwasanga kumabhata ni kwatangela kwila eme ngamesena kudizwelesanawu pholo ni pholo.” Mbote yahi itutena kukatula muphangu yiyi? Se kutena kudizwelesa ni athu mu ukexilu umoxi mumbambe yé, sota ukexilu wengi.

11. Mukonda dyahi sayi athu kabhana matwi kunjimbu yetu?

¹¹ Sayi athu kamesena kwivwa onjimbu yetu. Ene amona kwila kabhindamena kudilonga yalungu ni Nzambi ni Bibidya. Ene kaxikina kwila kwene Nzambi, mukonda dya hadi  yene mumona mungongo. Ene adituna kudilonga o Bibidya mukonda dya umbombo kumbodi wa atwameni ajingeleja amba kwila abelesela o itumu ya Bibidya, maji abhanga ima yayibha. Amukwa athandanganya dingi ni salu yá, ni mwiji, ni ibhidi yâ. Mukonda dya kyenyiki katena kumona okikwatekesu kitena kwabhana o Bibidya. Kyebhi kitutena kusuluka ni kisangusangu kyoso o athu utwabokela kabhana matwi kunjimbu yetu?

12. Kyebhi okukumbidila Filipe 2:4, kutukwatekesa mu ukunji?

¹² Londekesa kwila wa aswu. Athu avulu kudimatekenu kamesenene kwivwa onjimbu yambote kupholo amateka kubhana matwi kyoso ene kyamono kwila twasuwa. (Tanga Filipe 2:4.) Mukifika, Davidi twamutange kudima wambe, “Se sayi muthu kamesena kutwivwa, tubhaka o Jibibidya jetu anga tumwibhwidisa: ‘Se kibhana okwila utena kututangela se mukonda dyahi udivwa mu ukexilu yú?’” Omuthu wandatena kumona kwila twamuswu. Mwene nange utena kujimba o ima itwamutangela, maji wandatena kulembalala o ukexilu utwamutalatala. Né mwene se omukwa dibhata katwehela kuzwela, o ukexilu wa pholo yetu utena kulondekesa kwila etu twamuswu.

13. Kyebhi kitutena kulungulula onjimbu yetu kyoso kitwiza mukwijiya o ibhindamu yamukwa dibhata?

¹³ Kyoso kitulungulula onjimbu yetu phala ilunge ni ibhindamu yamukwa dibhata, tulondekesa kwila twamuswu. Mukifika, okwila o ima itumona mu inzo yamukwa dibhata ilondekesa kwila wala ni twana? Ojitata nange awabhela kwivwa itendelesu ya Bibidya yalungu ni kusasa otwana, ni jindunge jalungu se kyebhi kyatena kuzediwa kumwiji. Okwila kumabhitu mâ kwala jikadyadu javulu ni jitilingu? Nange tusola kuzwela né maka alungu ni usweya, ni kyebhi o usweya wene mubhekela wôma ku athu. Mukusuluka nange omukwa dibhata wandawabhela kwijiya kwila o usweya wandabhwa. Kyenyiki kyoso ki usanga muthu wamesena kwivwa, sota kumulondekesa se kyebhi o itendelesu ya Bibidya itena kumukwatekesa. Katarína twamutumbula kudima wambe: “Eme ngilembalala kyebhi okidi kyalungulula omwenyu wami.” Mukyenyiki, Katarína uxikina mu ima yamulonga o athu amwivwa atena kumona okidi kiki.

14. Kala kilondekesa Jisabhu 27:17, kyebhi kitutena kudikwatekesa ni akwetu mu ukunji?

¹⁴ Katula mbote kukikwatekesu kya akwenu. Phawulu walongo Timote, kyebhi kyatokala okuboka ni kulonga, yu waswinisa Timote kukwatekesa akwa kubhanga we kiki. (1 Kol. 4:17) Kala Timote, etu tutena kukatula mbote mumauhete ajiphange jetu mukilunga. (Tanga Jisabhu 27:17.) Tala ophangu  yaphang’etu amwixana Shawn. Phange Shawn wexile musidivila kala muboki wathembu yoso mudyembu mwexile athu asangulukile kya ni ngeleja yâ. Kyebhi mwene kyeji suluka ni kusanguluka mukikalakalu kya kuboka? Mwene wambe: “Se kyabhanene ngakexile mukalakala ni akwetu. Mukithangana kya kukutunda inzo ni kuya inzo yengi, twakexile mudizwelesa se kyebhi kitwandabandekesa o uhete wetu wakulonga. Mukifika, twakexile mubhitulula itwazwela ni mukwa dibhata. Okiki kyakexile mutukwatekesa phala kumona se twabhingile kulungulula ojindunge phala kuzwela ni mukwa dibhata wakayela.”

15. Mukonda dyahi kima kyambote kusamba yalungu ni ukunji wetu?

¹⁵ Samba kwa Jihova phala na kukwatekesa. Ithangana yoso yuboka bhinga kwa Jihova na kukwatekese. Sé okikwatekesu kya nzumbi ikôla, seku muthu mudyetu utena kubhanga kima. (Jisá. 127:1; Luka 11:13) Kyoso ki ubhinga okikwatekesu kya Jihova mumusambu, tumbula o ima iwamesena. Mukifika, bhinga phala kusanga muthu wamesena kudilonga yalungu ni mwene wala polondo phala kwivwa. Kyenyiki bhanga yoso phala kukumbidila omusambu wé mukubokela o athu oso u usanga mu ukunji.

16. Mukonda dyahi okudilonga ubheka kutukwatekesa mu ukunji wetu?

¹⁶ Katula kithangana phala kudilonga ubheka wé. O Mak’â Nzambi amba: “Phala mu tongolole yoso o vondadi ya Nzambi, yawabha, ya ujitu, yatenena, i mu wabhela kyambote.” (Loma 12:2) Kyoso kitudilonga o Bibidya, twijiya dingi kyambote Nzambi. Mukiki kyoso kitulonga, o athu andatena kumona kwila etu tuxikina mu ima itwamulonga. Phange Katarína, twamutumbula kudima wambe: “Mukithangana kyofele, ngamono kwila eme ngabhingile kubandekesa okixikanu kyami mu ilongesu ya Bibidya. Mukiki, ngamateka kudilonga o ima ilondekesa kwila sayi ko Mubhangi, o Bibidya Mak’â Nzambi mwene, Nzambi wala ni kilunga kyê lelu.” Phange Katarína wambe kwila okudilonga ubheka kwakolesa okixikanu kyê ni kwila kwabandekesa okisangusangu kyê mu ukunji.

17. Mukonda dyahi Jezú wasuluka kukala ni ibanzelu yambote yalungu ni ukunji wê?

¹⁷ Jezú wasulukile kukala ni ibanzelu yambote yalungu ni ukunji, sumbala sayi athu kamesenene kwivwa onjimbu yakexile muboka. Mukonda dyahi? Mwene wejidile kwila, o athu abhindamene kwijiya okidi, yu wamesenene kukwatekesa athu avulu kwivwa onjimbu yambote se kyabhanene. Mwene wejidile we kwila, sayi athu kudimatekenu kejixikina onjimbu yambote, maji kupholo ejibhana matwi. Tala yabhiti ni mwiji wa Jezú. Mwene waboko mumivu itatu ni kaxaxi, maji kujiphange jê, seku muthu wakituka dixibulu dyê. (Nzwá 7:5) Maji kyoso Jezú kyamufukununa ene akituka Jikidistá.—Ika. 1:14.

18. Mukonda dyahi twatokala kusuluka ni kuboka?

¹⁸ Etu kitwejiya se ananyi andaxikina kudilonga o Bibidya n’etu. Sayi athu alaleka kyavulu phala kuxikina onjimbu yetu. Ne mwene yó adituna kutwivwa, amona o ukexilu wetu ni wendelu wetu wambote, kudisukilu nange atena kumateka ‘kuximana Nzambi.’—1 Phe. 2:12.

19. Kala kyalondekesa odivulu dya 1 Kolindu 3:6, 7, ihi itwatokala kwijiya yalungu ni ukunji wetu?

¹⁹ Sumbala etu tukuna, tutekela, maji twatokala kulembalala kwila Nzambi mwéne ukudisa. (Tanga 1 Kolindu 3:6, 7.) Getahun, phange wamusidivila ku Itiyópya wambe: “Mu 20 amivu ndenge, eme ngó ngexile o Mbangi ya  Jihova mukididi kingatungile. Maji kindala twala kyá 14 kya aboki. Mu 14 kya aboki yâ, 13 a abatizala kyá. Muhatu wami ni twana twami ala we bhukaxi ka athu yâ a abatizala. Mu kyônge twene mutenesa 32 a athu.” Phange Getahun wasanguluka mukukingila ni mwanyu, kate kyoso Jihova kyakwatekesa o athu kwiza mukilunga Kyê!—Nzwá 6:44.

20. Mukonda dyahi twamba kwila etu twedi kala tukibuka kyakubhulula?

²⁰ Kumesu a Jihova athu oso ala ni valolo. Mwene utubhana o ujitu wakukalakala ni Mon’ê, phala kwongeka o athu akwa ifuxi yoso ande dyadizubhilu dyamundu yú. (Ajewu 2:7) Okikalakalu kyetu kyakuboka kyedi kala okikalakalu kyakubhulula o athu. Etu twedi kala okibuka kyatumikisa phala kubhulula o athu anaminina mudikungu dya kamanga. Nange umoxi ngó utena kubhulula muthu umoxi, maji okikalakalu kyakibuka kyoso kyala ni valolo. Kyene kimoxi we ni kikalakalu kyetu kya kuboka. Etu kitwejiya se nanyi wandatena kubhulula muthu kumundu yu wa Satanaji. Maji okima kitwejiya kyakwila Jihova utena kusola muthu mudyetu phala kwakwatekesa. Andreia watungu ku Bolivia wambe: “Ngimona kwila kala muthu udilonga o Bibidya anga udibatizala, mukonda dya kikalakalu kyakibuka kyoso.” Etu we twatokala kutala o ukunji wetu mu ukexilu yú. Se kyene kitubhanga Jihova wandatubesowala. Okikalakalu kyetu kya ukunji kyandatusangulungisa kyavulu.