1. Nange ihi yakubhangesa kudiwana kyoso kiwamateka kutudila onjimbu yambote ku athu engi?

OKWILA eye udilembalala okizuwa kyadyanga kiwasange okidi? Omilongi ya Bibidya i wayi ni kudilonga, yakutetulukila kyambote, anga yakuxikinisa. Eye wadivu kwila oso ejisanguluka dingi se adilonga o ima iwaxikina. Eye waxikina kwila omilongi ya Bibidya yeji kusangulukisa kindala ni kukubhana okidyelelu kyalungu ni hádya. (Jisá. 119:105) Kyenyiki eye wamateka kutangela kumakamba ni kujindandu okidi kiwexile mudilonga ni kusanguluka kwoso. Maji ihi yabhiti? Eye wadiwana mukumona kwila athu kaxikina onjimbu i wa atudila.

2-3. Kyebhi o athu kyexile mutala Jezú mu izuwa yê?

² Etu kitudiwane dingi kyoso athu kyadituna onjimbu itwabokela. Mu izuwa ya Jezú, athu avulu amuditunu, ne mwene ni madiwanu exile mulondekesa kwila, Nzambi wamutumikisa. Mukifika, Jezú wafukununa Lazalu, omadiwanu yâ kate mwene ojinguma jê katenene kudituna. Maji ne kiki o atwameni a Jijude kaxikina Jezú kala o Mexiya amukanene. Kate mwene amesenene kujibha kikale Jezú kikale Lazalu!—Nzwá 11:47, 48, 53; 12:9-11.

³ Jezú wejidile kwila athu avulu kejimuxikina kwila mwene wexile o Mexiya. (Nzwá 5:39-44) Mwene wambela kukibuka kya maxibulu a Nzwá dya Batizu wixi: “Wazediwa yó woso ka di bhukana mukonda dya kima kya mono kokwami!” (Mat. 11:2, 3, 6) Mukonda dyahi athu avulu aditunu Jezú?

4. Ihi twandamona mumilongi yiyi?

⁴ Mumilongi yiyi ni mumilongi yakayela twandamona ima yabhangesa athu avulu muhama yadyanga kukamba kuxikina Jezú. Twandamona we se mukonda dyahi lelu athu avulu kaxikina  onjimbu itwatudila. Okyabeta dingi kota twandadilonga se mukonda dyahi twatokala kukolesa okixikanu kyetu kwa Jezú phala kitudibhukane.

5. Mukonda dyahi sayi athu axinganekene kwila Jezú katokalele kukala o Mexiya amukanene?

⁵ Athu avulu adibhukana mukonda dyakididi kwakudila Jezú. Ene ejidile kwila Jezú wexile mulongexi wakatunda, wexile mubhanga madiwanu avulu. Maji mukixinganeku kyâ Jezú wexile ngo mona akulupindelu kahatu. Mwene wexile mukwa Nazalé, athu avulu exile mumona kwila ombanza yiyi kiyexile ni valolo. Kate mwene Nataniyele, kupholo wakituka dixibulu dya Jezú, muveji yadyanga mwene wambe: “Ku Nazalé, ku tena we kutunda kima kyambote?” (Nzwá 1:46) Nataniyele nange wazwela kiki mukonda kyexile ni kixinganeku kyambote kyalungu ni kididi kwatungile Jezú. Nange mwene wexile muxinganeka mupolofesiya itusanga mudivulu dya Mikeya 5:2 dizwela kwila o Mexiya ejimuvwalela ku Beleme, kana mu Nazalé.

6. Ihi yeji kwatekesa o athu kwijiya kwila Jezú mwene o Mexiya amukanene?

⁶ Ihi izwela o Mikanda Ikôla? Opolofeta Izaya wazwelele kwila ojinguma ja Jezú ejitondala mukukamba kusuwa mba kwijiya kyambote yalungu ni “mwenyu [wa Mexiya].” (Iza. 53:8) Ojipolofesiya jazwelele kya ima yavulu yalungu ni mwene. Se athu akatwile kithangana kyakutala ihi izwela o Mikanda Ikola yalungu ni Mexiya ejitonginina kwila Jezú ejimuvwalela ku Beleme ni kwila wejikwijila kumbutu ya Sobha Davidi. (Luka 2:4-7) Kyenyiki Jezú amuvwala mukididi kyotumbule mu polofesiya ya Mikeya 5:2. Maji bhebhi bhwexile omaka? O athu exile mumufundisa se kwijiya o ima yoso. Ene kejidile kima kyalungu ni mwene. Kiki kyene kya abhangesa kudituna Jezú.

7. Mukonda dyahi lelu athu avulu adituna omundu wa Jihova?

⁷ Okwila etu we twamudibhana ni maka yá lelu? Xe. Avulu bhukaxi ka mundu wa Jihova k’avwalela mukididi kyakatunda; kyenyiki athu amona kala ‘athu akwa-tutu mba oso oso, kazubha kudilonga.’ (Ika. 4:13) Sayi athu abanza kwila o mundu wa Nzambi katokala kulonga o Bibidya mukonda ene kadilongo mujixikola ja jingeleja jakatunda mba jafumana. Amukwa hanji amba kwila o Jimbangi ja Jihova “ngeleja ya akwa America,” maji mukidi mu sambwadi dya jimbangi ja Jihova muthu umoxi ngó watungu ku Estados Unidos. O akamukwa hanji amba kuma o Jimbangi ja Jihova kaxikina Jezú. Mumivu yavulu o mundu wa Jihova enemwatatela kwila “alondi akwa America” ni kwila “akwa kubhanga kavwanza phala kubhinganesa ojinguvulu.” Kyenyiki, athu avulu kamesena kubhanga mbandu ya mundu wa Jihova mukonda dya kwivwa omisoso yiyi ya makutu. Ene abhanga kiki mukonda kejiya okidi kyalungu ni mundu wa Jihova.

8. Kala kilondekesa Ikalakalu 17:11, ihi yatokala kubhanga o athu se ene amesena kwijiya se ananyi ojiselevende ja Nzambi lelu?

⁸ Ihi itena kubhanga o muthu phala kadibhukane? O muthu wabhingi kutokwesa phala kwijiya okidi. Kiki kyene kyabhange omusoneki wa divulu dya Luka. Mwene wabhange ngunzu phala kutokwesa o ima “tunde ku ya tundile.” Mwene wamesenene kwila o atangi ‘ejiye o kidi kya ima yoso’ yalungu ni Jezú. (Luka 1:1-4) O Jijudé atungile mumbanza ya Beleya exile kala Luka. Kyoso kyevu onjimbu yambote yalungu ni Jezú ene exile mutokwesa mu Mikanda Ikola, exile musokesa o ima yalungu ni Mikanda Ikola phala kumona se yamwalonga yene mwene o kidi. (Tanga Ikalakalu 17:11.) Kyene kimoxi we, o athu abhingi  kutonginina omaka. Ene atokala kusokesa o ilongesu ya mundu wa Nzambi ni ihi izwela o Mikanda Ikola. Ene abhingi we kudilonga phala kwijiya se ihi yenemubhanga omundu wa Jihova. Se ene “asota kwijiya omusoso” wa mundu wa Nzambi o katombo ni ima izwela o athu kiyanda ku abhangesa kudibhukana.

9. Ihi yabhiti kyoso Jezú kyaditunu kubhana kijimbwete kudyulu?

⁹ Sayi athu mu izuwa ya Jezú kasangulukile ni uhete wê wakulonga. Ene amesenene dingi. Ene ajijidika Jezú phala kwalondekesa “kijimbwete kudyulu” phala ene axikine kwila mwene wexile o Mexiya amukanene. (Mat. 16:1) Ene nange kejidile kyambote o izwelu yala mudivulu dya Daniyele 7:13, 14. Maji okithangana kya Jihova kukumbidila opolofesiya yiyi ki kyabhixidile luwa. O uhete wakulonga wa Jezú hinu wasokele phala o athu yó kumona kwila mwene wexile o Mexiya. Maji kyoso Jezú kyaditunu kwabhana kijibwete, ene adibhukana.—Mat. 16:4.

10. Kyebhi Jezú kyakumbidila o ima yasoneka polofeta Izaya yalungu ni Mexiya?

¹⁰ Ihi izwela o Mikanda Ikôla? Opolofeta Izaya wasoneka yalungu ni Mexiya, yú wambe: “Mwene ka kà dikola, mba u di zangeleka, né o dízwi dyê ka d’ivwa mu nzunga.” (Iza. 42:1, 2) Jezú wabhange o ukunji wê se kusota kudifumanesa. Mwene katungu tembulu, kate izwatu yakatunda kala ya atwameni ajingeleja, ne kubhinga ku athu phala kumwixana majina a ujitu phala kudilondekesa kwila wexile muthu wabeta kota. Ne mwene kyoso omwenyu wê wexile bhu maku a Sobha Helode, Jezú waditunu kubhana kijimbwete phala kudifumanesa. (Luka 23:8-11) Jezú wabhange madiwanu, maji kuboka onjimbu yambote kyene kyexile okikalakalu kyabetele kota phala mwene. Mwene wambela kumaxibulu mê, kiki “kyene kyangibheka.”—Mál. 1:38.

11. Kixinganeku kyahi kyayibha kyala nakyu o athu lelu?

¹¹ Okwila etu we twamudibhana ni maka yá lelu? Xe. O ima ibhangesa o athu avulu kudinanza, o ifwamesu ni jixikola jakatunda jala mu jingeleja lelu. Atwameni ajingeleja ala ni  majina a maujitu ni jifesa kejiya se jene jamatekena kwebhi. Maji mu ima yoso yiyi ihi yene mudilonga yalungu ni Nzambi ni vondadi yê? O yó adyongeka kumoxi n’etu adilonga se ihi yamesena Jihova kokwetu. O Ididi yetu ya Ubhezelu yazele, kitutemu ima mba jifikula jate kalu yavulu phala kujifwamesa. O yó ala kupholo dya kilunga kate izwatu yakatunda ne kutambula majina a ujitu adifu kyengi. O ilongesu yetu itunda mu Maka a Nzambi. Athu avulu adituna onjimbu yambote mukonda amona kwila kitusoto kudifumanesa m’ukexilu utubheza Jihova, ni kwila o ima itulonga kiyene o ima yamesena kwivwa ene.

12. Kala kilondekesa Jihebelewu 11:1, 6, ihi itena kukolesa okixikanu kyetu?

¹² Ihi itutena okubhanga phala kitudibhukane? Poxolo Phawulu wambele o Jikidistá atungile ku Loma wixi: “O kuxikana kwijila mù kwivwa o hundu mba ngolokela, o kwivwa o hundu, kwijila ku Njimbu Yambote ya Kidistu.” (Loma 10:17) Etu tukolesa o kixikanu kyetu bhu kaxi ka Mikanda Ikola, kana mujifesa ja jingeleja jamakutu jakambe kutunda mu Bibidya, ne mwene se jafwama anga jibhangesa kudiwana, jene kijitena kukolesa o kixikanu kyetu. Okima kitukwatekesa kukala ni kixikanu okudilonga o Mak’a Nzambi, mukonda “wa kambe o kuxikana ka tena kuwabhela Nzambi.” (Tanga Jihebelewu 11:1, 6.) Kyenyiki phala kuxikina kwila twasange mwene okidi, kitwabhingi kumona kijimbwete kudyulu kitubhangesa kudiwana. Okutokwesa kyambote omilongi ya Bibidya kukolesa okixikanu kyetu, kutukwatekesa we kuzubha o phata yosoyoso.

13. Ihi yabhangesa athu avulu kudituna Jezú?

¹³ Mu izuwa ya Jezú, omaxibulu a Nzwá dya Batizu adiwana mukonda omaxibulu a Jezú kexile mukayela o kifwa kya kujila. Jezú wajimbulula kwila ene kabhingile kubhanga kiki mukonda mwene wexile hanji kumwenyu. (Mat. 9:14-17) Kyenyiki, Jezú kamuxikina ku Jifalezewu ne kujinguma jamukwa mukonda kexile mukayela o ijila yâ. Omayala yâ afutuluka kyoso Jezú kyasoto kusaka  o jihaxi mukizuwa kya Sabhalu. (Mál. 3:1-6; Nzwá 9:16) Kumbandu yengi exile mudifumanesa kwila amubhaka kyambote o kizuwa kya Sabhalu, maji phala ene kikyexile maka kubhanga wenji muthembulu. Ene afutuluka dingi kyoso Jezú kya atangela kwila ene kexile muxila otembulu. (Mat. 21:12, 13, 15) O athu evu Jezú kuboka mumalombe mu Nazile, asasumuka kyoso Jezú kyate okifika kya akwa Izalayele phala kwalondekesa kwila ene exile akwa lwimbi, akambele kixikanu. (Luka 4:16, 25-30) Athu avulu aditunu Jezú mukonda mwene kexile mubhanga o ima yexile mukingila ene.—Mat. 11:16-19.

14. Mukonda dyahi Jezú wambele kwila o athu mu izuwa yê exile mukayela ijila kiyatundile mu Mikanda Ikola?

¹⁴ Ihi izwela o Mikanda Ikôla? Bhu kaxi ka polofeta Izaya Jihova wambe: “Manyi o mundu yú a ngi zukama, ala ku ngi xila ngó ni dikanu dyâ, ni mizumbu yâ, maji o muxima wâ wa di sandula dikanga kokwami, o woma wâ wa ngi kwatela wala ngó mu ijila ya athu, yejiya mu kilunji.” (Iza. 29:13) Jezú walungile mukutangela o athu kwila ene exile mukayela ijila ya athu kiyatundile mu Mikanda Ikola. O athu exile mukayela o itumu ya athu kala okima kyabetele kota o Mikanda Ikola ndenge. Mukidi ene exile mudituna Jihova ni yó amutumikisa kala Mexiya.

15. Mukonda dyahi lelu athu avulu kawabhela o Jimbangi ja Jihova?

¹⁵ Okwila etu we twamudibhana ni maka yá lelu? Xe. Avulu lelu adizangala ni Jimbangi ja Jihova mukonda ene kabhange ojifesa ni ijila kiyala mu Bibidya, kala o jifesa ja uvwalukilu ni ja Natale. Akamukwa hanji akala ni njinda ya Jimbangi ja Jihova mukonda kabhange mbandu kujifesa ja jinguvulu ni kyoso kyadituna kukayela o ijila yakufunda kiyatundu mu Bibidya. O athu yâ axikina ni kidi kyoso kwila ene amubheza Nzambi mu ukexilu watokala. Maji omuthu usota kukayela o ijila yamundu muveji dyakukayela o ilongesu ya Bibidya, mwene kamusangulukisa Jihova.—Mál. 7:7-9.

16. Kala kilondekesa Jisálamu 119:97, 113, 163-165, Ihi itwatokala kubhanga ni ihi itwatokala kudituna?

¹⁶ Ihi itutena okubhanga phala kitudibhukane? Etu twabhingi kukolesa o henda yetu mu itumu ni mu itendelesu ya Jihova. (Tanga Jisálamu 119:97, 113, 163-165.) Kyoso kituzola Jihova twandadituna o ijila yazembe mwene. Etu kitwanda kwehela kima kyosokyoso kuzozesa ohenda yetu kwa Jihova.

17. Athu avulu mu izuwa ya Jezú exile mukingila kwila Mexiya weji kwa bhana ihi?

¹⁷ Sayi athu mu izuwa ya Jezú amesenene kulungulula o unguvulu ni lusololwoso. Ene exile mukingila ni hanji yoso o Mexiya phala kwabhulula ku unguvulu wa akwa Loma wexile kwazukutisa. Maji kyoso ene kyosoto kubhanga Jezú o sobha yâ, mwene waditunu. (Nzwá 6:14, 15) Akamukwa, kate mwene ni akunji, exile ni maungana ku unguvulu wa akwa Loma. Mukonda dya kiki ene exile ni woma wakwila Jezú weji lungulula o ungana wa akwa Loma. Mukonda dya kuthandanganya ni ungana, Jijude javulu aditunu Jezú.

18. Jipolofesiya jebhi jalungu ni Mexiya jakambele kusuwa o athu?

¹⁸ Ihi izwela o Mikanda Ikôla? Sumbala jipolofesiya javulu jazwelele kya kwila o Mexiya weji kituka Mutolodi wa ita, ojipolofesiya jakamukwa jexile mulondekesa kwila mwene watokalele hanji kufwa mukonda dya ituxi yetu. (Iza. 53:9, 12) Kyenyiki mukonda dyahi o Jijude jexile ni ixinganeku yayibha yalungu ni Mexiya? Mukonda avulu mudya amesenene kwila abatula omaka ni lusololwoso. Kyenyiki, ene kexile dingi musuwa ojipolofesiya jakanene kubatula maka kuhádya.—Nzwá 6:26, 27.

19. Kixinganeku kyebhi kyayibha kibhangesa athu avulu lelu kudibhukana?

 ¹⁹ Okwila etu we twamudibhana ni maka yá lelu? Xe. Athu avulu lelu adibhukana mukonda kitwene mudita mumaka a jinguvulu. Ene axinganeka kwila etu twatokalele kusola muthu mu ola yakuvotala. Maji etu twejiya kwila se tusola muthu muxitu kala nguvulu yetu, twamudituna Jihova. (1 Sam. 8:4-7) Athu axinganeka kwila etu hinu twejitunga jixikola, jinzo jakusaka, ni kubhanga kikalakalu kya kubhana kudya mba kitadi kwa yó abhindama mba jingadyama. Ene adibhukana kyoso kyatumona kuma tuta dingi o unguzu yetu mukikalakalu kya kuboka, kana mukusota jindunge phala kubatula maka ni lusolo ku mundu yu.

20. Kala kya jimbulula Jezú mudivulu dya Matesu 7:21-23, ihi yatokala kubeta kota phala etu?

²⁰ Ihi itutena okubhanga phala kitudibhukane? (Tanga Matesu 7:21-23.) Okima kyabeta kota phala etu, okubhanga okikalakalu kyatutumu Jezú. (Mat. 28:19, 20) Kitwatokala kulanduka ni maka a jinguvulu ni maka amundu yú. Etu twazolo kyavulu o athu, tuthandanganya ni maka mâ. Maji etu twejiya kwila o ukexilu wambote wakwakwatekesa o kwalonga yalungu ni Utuminu wa Nzambi, ni kwa kwatekesa kukituka makamba a Jihova.

21. Ihi iwandasota kubhanga?

²¹ Mumilongi yiyi twamono ima iwana yabhangesa o athu kudibhukana mba kudituna Jezú. Yene we yene mubhangesa amoxi kudituna o akayedi a Jezú lelu. Maji okwila twabhingi ngo kudilanga mu ima yiyi? Kana. Mumilongi yakayela twandamona dingi ima iwana yamukwa ibhangesa o athu kudibhukana. Sota kubhanga yoso phala ki udibhukane, kolesa o kixikanu kyé!