1-2. Ihi yambe omusoneki? Ihi itwandadilonga mumbandu yiyi?

LELU mazunda athu amba kuma axikina Jezú, maji kene muxikina o ima yalongo mwene. (2 Tim. 4:3, 4) Sayi musoneki wambe kwila: “Se kumoneka dingi bhukaxi ketu, Jezú yengi, anga ulonga we o ima yalongo o Jezú yakidi muhama yadyanga, okwila tweji dituna omilongi yê kala kitwabhangele 2.000 amivu kudima? . . . Okitambwijilu kyenyiki: Kyene. Kitweji muxikina.”

² Avulu muhama yadyanga, evu o ilongesu ya Jezú, amono omadiwanu abhangele. Ne kiki, kamuxikina. Mukonda dyahi? Mumilongi yatundumu, twamono ima iwana yabhangesa o athu kudibhukana, mu kwivwa ni kumona o ima yabhangele Jezú. Kindala twandadilonga dingi ima iwana yamukwa. Kyoso kitwandaya ni kudilonga, twandamona we se mukonda dyahi o athu lelu adituna we o akayedi a Jezú. Twandamona we se ihi itwatokala kubhanga phala kitudibhukane.

3. Kima kyahi kyambhangele Jezú kyabhangesa amoxi kudibhukana?

³ Kyoso kyexile mu ixi, Jezú wexile mubhita kithangana ni athu a idifwa yoso. Mwene wadi kumoxi ni jingenji, jimvwama ni athu exile ni kutena kwavulu. Maji wabhitile we kithangana ni jingadyama ni yo akambele woso wa akwatekesa. Mwene walondekesa we henda ku athu exile mu amona kala “akwa ituxi.” Sayi yâ exile mudimona kala athu ayuka, adibhukana mukonda dya ima yabhangele Jezú. Ene ebhwidisa kumaxibulu a Jezú: “Phalahi muya ni kúdya ni kúnwa ni akwa kutambula o lubhaku ni akwa ituxi?” Jezú wa atambwijila: “Oso a disanze ka bhindamena (musaki), a mu bhindamena yó a kate. Eme ki  ngeza mù kwixana athu ayuka, ngeza mù kwixana akwa ituxi, n’a dyele ituxi yâ.”—Luka 5:29-32.

4. Kala kyajimbulula polofeta Izaya, ihi yatokalele kwijiya o Jijude yalungu ni Mexiya?

⁴ Ihi izwela o Mikanda Ikola? Mivu yavulu ande dya wijilu wa Mexiya, polofeta Izaya wambele kya kwila, o athu keji muxikina. O polofesiya yambele kiki: “Kya kexi, a mu ditunu, mwene o muthu a beta o ku mu tènda . . . wedi kala yó athu a mu bhana jinga dikunda ni ku mu swekela o pholo; kya kexile a mu ehelela, ki bhwala dingi muthu wa mu suwu.” (Iza. 53:3) O polofesiya yambele kya kuma, o “athu” eji dituna Mexiya, kyenyikiphe, o Jijude muhama yadyanga, atokalele kwijiya kya kwila, o athu eji dituna mwene Jezú.

5. Avulu lelu enemutala kyebhi o akayedi a Jezú?

⁵ Okwila etu we twamudibhana ni maka yá lelu? Xe! Atwameni avulu ajingeleja, axikina mujingeleja jawu athu afumana, ala ni kitadi kyavulu, a atala kala jinjimu mongongo. Ene axikina mujingeleja jâ o athu yâ, sumbala enemubhanga ima yazembe Jihova. O atwameni enya ajingeleja, atala ni lusebhu ojiselevende ja Jihova. Sumbala ene aboka o njimbu yambote, akayela o itumu ya Jihova ku myenyu yâ, enemwatala wila, kala ni valolo. Kala kyambe Phawulu, Nzambi usola yo a “sebuluka.” (1 Kol. 1:26-29) Maji kumesu a Jihova, ojiselevende jê joso ja fiyele, jala ni valolo yavulu.

6. Ihi yazwela Jezú kala kya kisoneka mudivulu dya Matesu 11:25, 26? Kyebhi kitutena kukayela ophangu yê?

⁶ Ihi itutena kubhanga phala kitudibhukane? (Tanga Matesu 11:25, 26.) Kana kwehela kwila, o ukexilu wa athu kutala omundu wa Nzambi ufunyisa okixinganeku kyé. Xikina kwila, Jihova usola ngo o athu alenduka phala kubhanga ovondadi yê. (Jisá. 138:6) Xinganeka ngo! Jihova wabhange kya ima yavulu bhukaxi ka mundu wê, sumbala o athu kumundu atutala kala kitujinjimu, kitwadilongo kyavulu.

7. Mukonda dyahi Jezú wambele kwila, o Jifalizewu exile akwa mangonya? Kyebhi kya divu o Jifalizewu?

⁷ Ni kuswinisa kwoso, Jezú watungununa omakutu exile mulonga o atwameni ajingeleja mu izuwa yê. Mukifika, mwene walondekesa kwila, o Jifalizewu exile akwa mangonya. Mukonda ene athandanganyele dingi ni kitumu kya kusukula omaku, maji kexile musuwa okitumu kya kulanga ojitata. (Mat. 15:1-11) O maxibulu a Jezú nange adiwanene mukwivwa o izwelu yê. Mukidi, ene amwibhwidisa: “Eye wa kijiya kuma jifalizewu ja fatuluka mú kwívwa o mak’ama?” Jezú wa atambwijila: “Kidima kyoso kya bhingi Tata yami mu dyulu ki mwène wa ki phaphe, ki bhinga ku ki vuza. A ehi’enu! Ala atwameneni a ifôfo. Kifôfophe, se ki twamenena kifôfo ni mukwá, kiyadi kyâ anda kudibhala mu dikungu.” (Mat. 15:12-14) Sumbala o atwameni ajingeleja afutulukile kyavulu mukonda dya izwelu ni ibhangelu yê, Jezú kafulu ku atangela okidi.

8. Kyebhi Jezú kyalondekesa kwila, Nzambi kaxikina o maukexilu oso akubheza?

⁸ Jezú watungununa we o ilongesu yamakutu ya jingeleja. Mwene kambe kwila, Nzambi uxikina o maukexilu oso akubheza. Muveji dya kiki, mwene wambe kwila, avulu eji kwendela munjila ya zanze, yambata ku kalunga, maji atolo eji sola kwendela munjila yatolo, yambata kumwenyu. (Mat. 7:13, 14) Mwene wajimbulula kyambote kwila, sayi athu ejidilondekesa kala amusidivila mwene Nzambi, maji mukidi kamumusidivila. Mwene wambe wixi: “Dimukinenu o jipolofeta ja makutu, a mi kana mu izuwatu ya jimbudi, maji moxi dyâphe ala jimbinji jahame. Mu ejidila ku ibundu yâ.”—Mat. 7:15-20.

9. Ilongesu yebhi yajingeleja yalondekesa Jezú kwila yexile yamakutu?

 ⁹ Ihi izwela o Mikanda Ikola? Yalungu ni Mexiya, o jipolofesiya ja Bibidya jambele: Omwanyu mba o henda ya kwatela o inzo ya Jihova yeji kwoha omuxima wê. (Jisá. 69:9; Nzwá 2:14-17) Omwanyu wenyu, wene wabhangesa Jezú kutungununa o milongi ni ibhangelu ya jingeleja jamakutu. Mukifika, o Jifalizewu axikinine kwila, omuthu nzumbi, ki ifu. Maji Jezú walongo kwila, o athu afu edi kala azeka. (Nzwá 11:11) O Jisadusewu kaxikinine kwila, o athu afu eji tena kwa fukununa. Maji Jezú wafukununa kamba dye Lazalu. (Nzwá 11:43, 44; Ika. 23:8) O Jifalizewu axikinine kwila, Nzambi waxindi kya yoso yandabhita n’etu; maji Jezú walongo kwila, o athu atena kusola se anda sidivila Nzambi mba kana.—Mat. 11:28.

10. Mukonda dyahi athu avulu adibhukana mukonda dya ima itulonga?

¹⁰ Okwila etu we twamudibhana ni maka yá lelu? Xe. Avulu adibhukana mukonda tulondekesa mu Bibidya kwila, sayi ilongesu yajingeleja, yamakutu. O atwameni ajingeleja alonga kwila, Nzambi ukaxtikala o athu mu infernu. Ene alonga o ima yiyi yamakutu phala o athu akale bhumaku mâ. Etu twene mubheza Jihova o Nzambi ya henda, tukwatekesa o athu kutendela kwila, yiyi milongi yamakutu. O atwameni ajingeleja alonga we kwila, o muthu wala ni nzumbi ki ifu. Se kiki kyexile kidi, seku muthu weji bhindamena dingi kumufukununa kuhádya. Etu tulondekesa ku athu kwila, yiyi ilongesu yamakutu. Jingeleja javulu jilonga kwila, yoso itubhanga, Nzambi mba nguzu yengi ki imoneka kumesu wa ixindi kya. Maji etu tulonga kwila, o muthu wala ni ujitu wakusola se wanda sidivila Nzambi mba kana. Kyebhi kidivwa o atwameni ajingeleja kyoso kitutungununa o milongi yiyi yamakutu. Muveji javulu, ene afutuluka!

11. Kala kilondekesa o izwelu ya Jezú itusanga mudivulu dya Nzwá 8:45-47, Nzambi wamesena kwila omundu wê ubhanga ihi?

¹¹ Ihi itutena kubhanga phala kitudibhukane? Se tuzola okidi, twandaxikina ni kubelesela yoso izwela Nzambi. (Tanga Nzwá 8:45-47.) Etu nuka twandadituna okidi, kala kyabhangele  Satanaji, Dyabhu. Kitwandabhanga we kima kya kambe kulunga ni ima itwaxikina. (Nzwá 8:44) Nzambi wamesena kwila omundu wê, o ‘yayibha a ilenga, yawabha a inaminina,’ kala kyabhangele Jezú.—Loma 12:9; Jihe. 1:9.

12. Mukonda dyahi o ukexilu wajibha Jezú wabhangesa Jijude javulu kudibhukana?

¹² Kima kyebhi dingi kyabhangesa o Jijude kudituna Jezú? Phawulu wambe: “Etuphe twala mù kola Kidistu, muthu wa fwila kutaka, kya bhingi o Njimbu yê phala Jijudé kima kya a xitisa mu thulu.” (1 Kol. 1:23) Mukonda dyahi o Jijude aditunu Jezú? Mukonda dya kumujibhila kutaka. Phala ene, okufwa kutaka, kwabhangesa Jezú kumoneka kala muthu wate mulonga mba mukwa ituxi, muveji dya kumoneka kala o Mexiya.—Mate. 21:22, 23.

13. Ihi yakambe kutonginina o Jijude jaditunu Jezú?

¹³ O Jijude jaditunu Jezú, mukonda katonginina kwila, Jezú kexile ni kikuma, amutatela umbangi wamakutu, kamufundisa ni kuyuka. O athu afundisa Jezú, kasoto kufundisa ni kidi kyoso. O afundixi mu inzo yadikota yakufundisa ya Jijude, adyongekele ni lusolo, kakayela o ijila yoso yatokalele kukayela ande dya kufundisa muthu. (Luka 22:54; Nzwá 18:24) Muveji dya kwivwa ni kutonginina kyambote o ima yexile mutatela kwa Jezú phala kumufundisa ni kidi ni kuyuka kwoso, ene mwene asotele o athu phala kubhana “umbangi wa makutu wa kwêlesa Jezú ni a mu jibha.” Maji kaditundu kyambote. Kyenyiki, o mukunji wadikota wasoto ndunge phala kubhangesa Jezú kuzwela kima kyayibha, n’a tena kumutatela ni kumufundisa. Mukubhanga kiki, ene abhukumukina okitumu kyalungu ni kufundisa ni kuyuka. (Mat. 26:59; Mál. 14:55-64) Kyoso Jezú kyamufukununa, o afundixi yâ aphulu, afutu “kitadi kya ndumba” kumasoladi a Loma alange ombila, phala kumwanga musoso wamakutu phala kujimbulula se mukonda dyahi o kimbi kya Jezú ki kyexile dingi mu mbila.—Mat. 28:11-15.

14. Yalungu ni kufwa kwa Mexiya, ihi yambele kya o Mikanda Ikola?

¹⁴ Ihi izwela o Mikanda Ikola? Muhama yadyanga, Jijude javulu kejidile kwila o Mexiya  watokalele kufwa. Maji tala ngo yexile muzwela o jipolofesiya: “Wa lundulula o mwenyu wê mu’alunga, a mu bundile kumoxi ni ifumbe; maji mwene wa di twika o ituxi ya athu avulu; yú wala kudyondela akwa ituxi.” (Iza. 53:12) Kyenyikiphe, o kumutatela makutu ni kufwa kutaka, kikima kyeji bhangesa o Jijude kudibhukana mba kudituna Jezú.

15. Ima yahi yamakutu yene mutatela ku Jimbangi ja Jihova yene mubhangesa amoxi kudibhukana?

¹⁵ Okwila etu we twamudibhana ni maka yá lelu? Xe, enemubhita mwene! Jezú amutatela umbangi wamakutu, kamufundisa ni kuyuka. Kiki kyene mubhita we ni Jimbangi ja Jihova lelu. Tala ifika: Mumivu ya 1930 ndu 1940, ku Estados Unidos, omundu wa Nzambi wabhingile kuya mujinzo ja kunfundisa muveji javulu, phala kuzokela o ufolo wâ wa kubheza Nzambi. Sayi afundixi, kexile dingi ni jisonyi ja kulondekesa kwila, atuzembele. Mumbanza ya Quebec, ku ixi ya Canada, o Jingeleja ni jinguvulu akalakala kumoxi phala kufidisa okikalakalu kyetu kya kuboka. Aboki avulu a atele mukaleya. Kikuma kyahi? O kuzwela ngo mwene ni jivizinyu jâ yalungu ni Utuminu wa Nzambi. Ku ixi ya Alemanha, o unguvulu wa Jinazi wajibha minzangala yavulu yafiyele. Mumivu yiyi, jiphange javulu ku Russia a ate mukaleya mukonda dya kulonga o Bibidya. Kwenyoko, ojinguvulu ambe kwila, o kikalakalu kyetu kyakulonga o Bibidya, kyalungu ni kubhukumukina o jinguvulu. Kate mwene o Tradução do Novo Mundo da Bíblia Sagrada mu dimi dya Russo a itula bhukaxi “ka madivulu alungu ni kubhukumukina o maungana.” Kikuma kyahi? Mukonda dya kutumbula odijina dya Nzambi, Jihova.

16. Kala kilondekesa 1 Nzwá 4:1, mukonda dyahi kitwatokala kwehela kutunganala mumakutu atanga o athu yalungu ni mundu wa Jihova?

¹⁶ Ihi itutena kubhanga phala kitudibhukane? Sota kwijiya yoso yabhiti. Mudiskulusu dya bhange kumulundu, Jezú wadimwine ojingivwidi jê kwila, eji kwa “âmba ima yayibha yavulu ya makutu.” (Mat. 5:11) Satanaji mwene wene mufunyisa o athu phala kuzwela o makutu yâ. Mwene ubhangesa o jinguma kumwanga makutu aphulu, alungu ni yo azolo o Bibidya. (Dij. 12:9, 10) Twatokala kudituna omakutu atanga yo atuzembe. Kitutokala kwehela omakutu yâ kutukwatesa woma mba kuzozesa okixikanu kyetu.—Tanga 1 Nzwá 4:1.

17. Mu ukexilu webhi o izulukutu yabhiti ni Jezú mu usuku wamujibha yeji tena kubhangesa amoxi kudibhukana?

¹⁷ Ande dya kufwa, mu 12 dya jipoxolo jê, sayi umoxi weji sumbisa Jezú. Poxolo yamukwa, waditunu Jezú muveji jitatu. Kumbandu yengi, mu usuku wamujibha, o jipoxolo jê joso jamubwazeka. (Mat. 26:14-16, 47, 56, 75) Jezú kadiwana mukumona o ima yiyi, mwene kate wakitangele kya kwila, kiki kyeji bhita. (Nzwá 6:64; 13:21, 26, 38; 16:32) Mukumona o ima yiyi, sayi athu eji tena kudibhukana mukuxinganeka kiki: ‘Se ojipoxolo ja Jezú atena kubhanga kiki, eme tunde lelu kate kuhádya, kingandamesena kubhanga mbandu kukibuka kiki!’

18. Jipolofesiya jebhi jadikumbidila mu izulukutu yabhiti ande dya Jezú kufwa?

¹⁸ Ihi izwela o Mikanda Ikola? Jihama ja mivu ande dya Jezú kwiza mungongo, Jihova wajimbulula mu Maka me kwila, Mexiya eji musumbisa mu 30 a kitadi kya phalata. (Zak. 11:12, 13) Omuthu weji musumbisa, kamba dye mwene. (Jisá. 41:9) Polofeta Zakadiya wasoneka we, wixi: “Mubidi mu kwame, nda o jimbudi ji mwangane.” (Zak. 13:7) O athu awabha o muxima, keji dituna Jezú, mukumona o izulukutu yiyi. Muveji dya kiki, o izulukutu yiyi yeji kolesa dingi okixikanu kyâ kwa Jezú.

19. Ihi yene mutonginina o athu awabha omixima?

¹⁹ Okwila etu we twamudibhana ni maka yá  lelu? Xe. Mu izuwa yetu, sayi Jimbangi ja Jihova, a ejiya kyambote, axisa okilunga, akituka akwa kulungulula okidi, asota kudyangula akwa. Ene atanga makutu, amwanga jihundu jamakutu jalungu ni Jimbangi ja Jihova, bhukaxi ka jijurnale, mitelembe ya izuzumbya ni internete. O athu awabha omixima, kaxikina ku anganala mu ima yiyi. Muveji dya kiki, ene atonginina kuma, o Bibidya yakitangele kya kwila, o ima yiyi yeji bhita.—Mat. 24:24; 2 Phe. 2:18-22.

20. Ihi itwatokala kubhanga phala katunganale ku athu axisa okilunga? (2 Timote 4:4, 5)

²⁰ Ihi itutena kubhanga phala kitudibhukane? Twabhingi kukolesa okixikanu kyetu, mukudilonga jinga o Mak’a Nzambi, kusamba se kufula, ni kudibhakula mu kikalakalu kyatubhana Jihova. (Tanga 2 Timote 4:4, 5.) Se tukala ni kixikanu, kitwandathandanganya se twivwa jihundu jayibha ja lungu ni Jimbangi ja Jihova. (Iza. 28:16) Ohenda yetu kwa Jihova, ohenda ku Maka mê ni kujiphange jetu, yandatukwatekesa kubhanga yoso phala kitwehele o athu axisa okidi kutunganala mba kutubhangesa kudibhukana.

21. Sumbala athu avulu lelu adituna onjimbu yetu, kidyelelu kyahi kitutena kukala nakyu?

²¹ Muhama yadyanga, athu avulu adibhukana ya aditunu Jezú. Maji athu avulu amuxikana. Bhukaxi ka yo amuxikana, mwexile athu atokalele mu inzo yakufundisa, kate mwene ni “kibuka kya dikota kya [akunji].” (Ika. 6:7; Mat. 27:57-60; Mál. 15:43) Kyene kimoxi we lelu. Mazunda ni mazunda a athu kenemudibhukana. Mukonda dyahi? Mukonda ene ejiya okidi kitusanga mu Mikanda Ikola, akizolo. O Bibidya yamba: ‘Kutululúka kwavulu ku kala kwa yó oso a zola o ngonge yé; phala ene, kanaku kima ki tena ku a dyangula mba kwa bhangesa kudibhukana.’—Jisá. 119:165.