O Athu Adizembe Mukonda Dyahi?
Mukonda dyahi mu ngongo o athu adizembe? Phala kwijiya o ima ibhangesa o athu kudizemba, twatokala kutendela ihi ilombolola o kudizemba, mukonda dyahi o athu amateka kudizemba, ni mukonda dyahi o kudizemba kwala mu ididi yoso.
O Kuzemba Kulombolola Ihi?
O kuzemba kulombolola kukamba kuwabhela mba ku ibhila kyavulu muthu mba kibuka kya athu. O kiki kikyene kimoxi ni kukala ni njinda ya muthu mu kakithangana kofele.
MUKONDA DYAHI O ATHU AMATEKA KUZEMBA
Ima yavulu ibhangesa o athu kumateka kudizemba. Ene atena kuzemba o athu oso atokala mu kibuka kyengi, né mwene se o athu yá ka abhange kima kyayibha. Atena kuzemba mukonda axinganeka kwila, athu oso atokala mu kibuka kiki athu ayibha, atena kukala kilwezu mba katena kulungulula o ukexilu wâ. Ene atena kwa amona kala akambe valolo, éne amudibhekela o maka. O yó azemba akwa, nange a atalatalele sé kuyuka, adibhana ni usweya, ni ima yamukwa ya abhangesa kukala ni ukexilu yú.
O KUZEMBA KUDIBANDEKESA KYEBHI
O muthu utena kuzemba akwa né mwene se nuka wa amwene. Mukifika, o muthu utena kukayela ngó o kixinganeku kya jindandu mba makamba, kyalungu ni kibuka kyamukwa. Kyenyiki, se kumwiji kukala muthu umoxi ngó uzemba kibuka kyengi kya athu, mu kithangana ni mbandu oso kumwiji yú, atena kumateka kuzemba we o kibuka kiki.
Kyoso ki tutendela kuma o kudizemba kudibandekesa ni lusolo, tutendela we se mukonda dyahi athu avulu azembe akwa. Majiphe, phala kutolola o ukexilu wakudizemba, twatokala kudilonga kyebhi kyamateka o kudizemba. Tutena kudilongakyu mu Bibidya.
O BIBIDYA ILONDEKESA KYEBHI KYAMATEKA O UKEXILU WAKUDIZEMBA
O UKEXILU WAKUZEMBA KIWAMATEKA NI ATHU, KANA. O ukexilu yú wamateka kyoso anju imoxi ku dyulu, yó wakituka Satanaji o Dyabhu, kyabhukumukina Nzambi. O Dyabhu “kijibhangânga tundé ku dimatekenu” kyoso kyabhukumukina Nzambi. Kuma “mwene mukwa makutu, o tata ya makutu,” wamusuluka mukufunyisa o athu phala kudizemba ni kubhanga o usweya. (Nzwá 8:44; 1 Nzwá 3:11, 12) O Bibidya ilondekesa kwila mwene muthu wayibha, mukwa njinda, kisweya.—Jobe 2:7; Dijingunwinu 12:9, 12, 17.
O KUKAMBA O KUYUKA KUBHANGESA WE O ATHU KUDIZEMBA. O diyala dya dyanga, Adá, wakayela o phangu ya Satanaji yakubhukumuka. Mukonda dya kiki, athu oso alundula o kituxi ni kukamba o kuyuka. (Loma 5:12) O mona wa dyanga wa Adá, Kayini, wajibha phang’yê Abele, mukonda dya kumuzemba. (1 Nzwá 3:12) Mukidi, athu avulu ene mulondekesa henda kwa akwa. Maji mukonda dya kituxi ki twalundula, avulu alondekesa lwimbi ni ukumbu—idifwa ibandekesa o ukexilu wakudizemba.—2 Timote 3:1-5.
KYOSO O MUTHU KYAKAMBA O KUXIKINA O UKEXILU WA AKWA, O KUDIZEMBA KUDIBANDEKESA. Mu mundu mutwatungu, o kibandekesa o kudizemba, o ukexilu wayibha wa athu ni kukamba o henda. O kukamba kuxikina o ukexilu wa akwa, katombo, kusebhulula, kulokalala, ni kuzangazanga o ima, kudibandekesa mukonda “o ngongo yoso yala bhu maku a kadya-phemba,” Satanaji o Dyabhu.—1 Nzwá 5:19.
O Bibidya ki ijimbulula ngó kyebhi kyamateka o ukexiluwakudizemba, maji ilondekesa we kyebhi kyanda uzubha.
