Ihi Itena Kulondekesa Kyebhi Kyandakala o Mwenyu wé Kuhádya?
Athu avulu axikina kwila sayi nguzu kitu imono, yendesa ni kulanga o ima ibhita ku mwenyu wâ. Mukonda dya kuxikina mu ilongesu yiyi, ene akayela mukuxinganeka kwila yene yandakwabhekela solote yambote ku mwenyu wâ.
IHI IXIKINA ATHU AVULU?
KUZAMBULA BHUKAXI KA JITHETHEMBWA: Sayi athu axikina kwila o ukexilu ni kididi kwexile o jithethembwa kyoso kya avwala yene ixinda kyebhi kyandakala o mwenyu wâ kuhádya. Ene asota kuzambula mukutanga o jithethembwa [horóscopo] phala kwatangela yalungu ni hádya ni kwa akwatekesa kuditunda kyambote ku mwenyu wâ.
FENG SHUI: Akamukwa axikina mu ukexilu wengi wakuzambula awixana feng shui. Ene abanza kwila se abheka kima kubhata dyâ kyene kitena kubhekela kusanguluka ku mwenyu wâ. Lo Wing, * watungu ku Hong Kong, wambe, “O mesene ya feng shui wangitangela phala kuta Cristali ya katunda mudiloja dyami kyene kyanda ngikwatekesa kunganyala dingi kitadi kyavulu.”
KUBHEZA O JIKUKU: Akamukwa hanji axikina kwila ene atokala kubheza o jikuku jâ jafu kyá ukulu phala kwalanga ni kwa besowala. Van, watungu ku Vietnã, wambe, “eme ngaxikinine kwila se ngibheza o jikuku jami jafu kyá, ngeji kala ni mwenyu wambote kindala ni kukala ni hádya yakondama phala eme ni twana twami.”
KUDIVWALULA: Avulu axikina kwila kyoso o muthu kyafwa, mwene udivwalula dingi mukididi kyengi, o ukexilu yú udibhitulula veji javulu. Ene axikina kwila yoso ibhita ni ene kindala kikale yambote mba yayibha, ibhita mukonda dya ima yabhangele ku mwenyu wengi mba wokulu.
Avulu axikina mu ipheteka mba ubhezelu ni misoso yamakutu. Sumbala athu avulu amba kuma ene mu kidi kaxikina mu ima yiyi, maji ne kiki ene abhanga ima kala o kuzambula bhukaxi kamakanda a mako, matadi, mabaya ni jingela ja ngombe. Ene axinganeka kwila nange o kubhanga o ipheteka yoso yiyi itena kwakwatekesa kwijiya ima yalungu ni hádya yâ.
IHI YENE MUBHITA?
O kwila o yó adyelela mu ima mba mu ipheteka yiyi asanga mwenyu wambote ni kukondama kuhádya?
Tala o musoso wa Hào, watungu ku Vietnã. Mwene wazambula bhukaxi ka jithethembwa [astrologia], feng shui, ni kubheza o jikuku jafwile kyá. O kwila waditundu kyambote? Hào wambe: “Ngatexi kitadi kyavulu, ngate makongo avulu, ngadibhana ni maka ku mwiji, ngexile ni hele yavulu.”
Qiuming, mukwa Taiwan, uxikina na mukuzambula bhukaxi ka jithethembwa, mukudivwalula (reencarnação), mu ima yoxindi kyá (destino), feng shui, ni mu ubhezelu wajikuku jafu kyá ukulu. Mukutonginina kyambote o ixikanu yenyi, mwene wambe: “Ngamono kwila o ilongesu ni ijila yâ, yene ki idixikina mudyâ, kifwa kaditendela, ene mudyâ kwala kavwanza. Ngamono kwila ene muveji javulu exile mulweza mukuzambula kwâ bhukaxi ka jithethembwa. O yalungu ni kudivwalula mu kididi kyengi, se eye kiwejiya kima kyalungu ni mwenyu wokulu, kyebhi ki utena kulungulula ni kuyukisa o mwenyu wakezako?”
“Ngamono kwila o ilongesu ni ijila yâ ki idixikina mudyâ, kifwa kaditendela, ene mudyâ kwala kavwanza.”—QIUMING, TAIWAN
Kikale Hào, Qiuming, ni athu amukwa, atonginina kwila o hádya yetu kiyalungu ni kima kyoxinde kyá ku mwenyu wetu, jithethembwa, o jikuku jetu jafu kyá mba o kudivwalula mu kididi kyengi. O kwila kiki kilombolola kuma etu kitutena dingi kubhanga kima phala kulungulula o ima ku mwenyu wetu kuhádya?
Avulu abanza kuma o ukexilu wakukala ni mwenyu wambote kuhádya, o kusota kubhanga o xikola yakatunda ni kukala ni jimbote. Ihi yene mubhita ni yó asola kubhanga o ima yiyi?
^ kax. 5 Mu milongi yiyi ni mu milongi yakayela sayi majina a alungulula.
^ kax. 16 O izwelu yiyi tu isanga mu Mikanda Ikôla mu mukanda kwa akwa Ngalásya 6:7. Sayi kasabu akazwela ku athu atokala ku Oriente kamba kiki: “Se ukuna melá wandabhongolola melá; se ukuna fejá wandabhongolola fejá.”
Eye Nange Wandawabhela we o Maka Yá
O MULANGIDI
O kwila o azambwidi a jithethembwa ni jinganga a tena kutanga o ima ya-nda bhita ku hadya?
O kwila u tena ku dyelela ku ima yiyi?
O MULANGIDI
Ihi i Longa o Bibidia ia Lungu ni Muenhu ni Kufua
O kuila sai kima moxi dietu ki kala ni muenhu kioso ki tu fua? O kuila tuala ni nzumbi ki i fu? Kuebhi kuala o athu afu?
