JEZÚ ua kalakala kiavulu phala kuboka o njimbu ia Utuminu. Muéne ua kalakala ué kiavulu phala kulonga o maxibulu mê. Muéne ua a longo kuboka ni kulanga o mundu ua Nzambi. O maxibulu a dilongo kukalakala kála o abhidi a langa o jimbudi jâ. (Matesu 10:5-7) Filipe ua kexile ni kikalakalu kia dikota kia kuboka, maji né kiki, ua soto ué kithangana phala kulonga o tuana tuê kuboka. (Ikalakalu 21:8, 9) Lelu, etu tua bhingi ué kulonga akuetu. Mukonda diahi?

1, 2. Mukonda diahi kima kiambote kulonga o maxibulu?

² Mu kilunga kietu, muene maxibulu avulu a bhingi hanji kua batizala. O athu iá, a bhingi kua longa. Tua tokala kua kuatekesa kumona o valolo ia kutanga ni kudilonga o Bibidia ubheka uâ. Tua tokala ué kua longa kuboka ni kulonga o njimbu iambote. O jiphange a a batizala kindala, a bhingi kua longa kiambote, ku hádia n’a kale akuatekexi a tufunga mba tufunga. O jiphange joso mu kilunga, a tena kubhanga kima phala kukuatekesa o maxibulu iá.—Jisabhu 4:2.

3, 4. (a) Mukonda diahi Phaulu ua tendelesa o jiphange mu kilunga kia Kolose kudilonga o Mikanda Ikola? (b) Ihi i tua tokala kubhanga phala kukuatekesa o maxibulu metu kumona o valolo ia kudilonga o Bibidia?  

³ O jiselevende joso ja Jihova, a bhingi kutanga ni kudilonga o Bibidia, phala kuijiia o vondadi ia Nzambi. Poxolo Phaulu ua jimbulula o kidi kiki ku jiphange jê mu kilunga kia Kolose, mu kuzuela: “Tua kuata kusamba kua Nzambi sé kufula, ni ku mi bhingila enu, tua mu bhinga kua Nzambi, phala enu muizale ni kuijiia kua kutongolola o vondadi iê muene.” Mukonda diahi ene a tokalele kutanga ni kudilonga o Mikanda Ikola? Mukonda o kubhanga kiki, kueji kua kuatekesa kukala ni unjimu ua “kuenda kioso kiandala Ngana, ni kubhanga jinga ioso ia mu uabhela kiambote muène.” Kueji kua kuatekesa ué kubhanga “ikalakalu iambote” ia mesenene Jihova, kala o kikalakalu kia kuboka o njimbu iambote. (Kolose 1:9, 10) Se tua mu longa dixibulu dia Bibidia, tua tokala ku mu kuatekesa kumona kuila, o kutanga ni kudilonga o Bibidia ubheka uê, ku tena ku mu kuatekesa kusidivila kiambote Jihova.

⁴ Ki tu tena kukuatekesa o maxibulu metu kumona o valolo ia ku di longa o Bibidia ubheka uâ, se etu ué ki tuene mu di longa o Bibidia ubheka uetu. Mu kidi, o kutanga o Bibidia izuua ioso, ni kuxinganeka mu maka ala-mu, kua-nda tu kuatekesa ku muenhu, uetu ni mu ukunji uetu. Mu kifika, se mu kuboka, kumoneka muthu u tu bhanga kibhudisu, tua-nda tena ku mu tambuijila bhu kaxi ka Bibidia. O kutanga o musoso ua Jezú, ua Phaulu, ni athu amukuá a kolokota mu ukunji uâ, kua-nda tu suínisa ué kukolokota mu ukunji uetu, né muene mu ithangana ia bhonzo. Kioso ki tu tangela akuetu o milongi i tua di longo mu Bibidia, ni kiebhi kia tu kuatekesa o milongi íii, tu tena kua suínisa kudilonga dingi o Bibidia, n’a katule ué mbote.

5. Jimbulula kiebhi ki u tena kukuatekesa dixibulu, kudilonga o Bibidia izuua ioso.

⁵ Nange u dibhudisa: ‘Kiebhi ki ngi tena kukuatekesa o maxibulu kudilonga o Bibidia izuua ioso?’ Nange u tena ku mu kuatekesa kusokejeka o milongi iala mu divulu dia mu di longa kumoxi n’eie. U tena ué ku mu suínisa kutanga o milongi iala mu kibandekesu kia divulu Mu Kidi Ihi i Longa o Bibidia, ni kutanga ué o ibatulu ioso ia Bibidia ia kambe kujimbulula mu divulu. Mu kusuluka, u tena ku mu longa kudisokejeka phala o iônge, n’a  tambuijile ué mu iônge. Mu suínise kutanga o Mulangidi ni Despertai! ku mbeji joso. U tena ué ku mu kuatekesa kusanga o itambuijilu ia ibhuidisu ia Bibidia ni kikuatekesu kia Watchtower Library (Biblioteca da Torre de Vigia) mba BIBLIOTECA ON-LINE da Torre de Vigia. Kioso kia-nda fikisa o jindunge joso jiji, nange muéne ua-nda mesena kudilonga dingi o Bibidia.

6. (a) Kiebhi ki u tena kukuatekesa o dixibulu ku uabhela dingi o Bibidia? (b) Ihi ia-nda bhita ni dixibulu dié, se muéne u di longa dingi o Bibidia?

⁶ Kioso ki tu longa dixibulu dia Bibidia, tua tokala ku mu kuatekesa kumona kuila, kima kiambote kudilonga o Bibidia, mukonda kua-nda mu kuatekesa kuijiia kiambote Jihova. Mu veji dia ku mu jijidika kudilonga o Bibidia, tua tokala ku mu kuatekesa kukala ni vondadi ia kudilonga o Bibidia. Kioso kia-ndaia ni kudilonga o Bibidia, muéne ua-nda divua kála o mukuá jisalamu uembi: “Kia ngi uabhela o kuzukama kua Nzambi; nga solo Ngana Nzambi, muene u kala kibúta kiami.” (Jisálamu 73:28) Sé phata, o nzumbi ikola ia Jihova, ia-nda mu kuatekesa kuzukama kua Jihova.

7. Kiebhi Jezú kia kuatekesa o maxibulu mê kuboka? (Tala o foto ia dianga.)

⁷ Tu tena kukatula phangu mu ukexilu ua Jezú ua kulonga o maxibulu mê. Muéne ua kexile múia nau mu sidivisu ia kuboka, n’a mone kiebhi kia tokalele kuboka. Jezú ua a tangela ué o ima ia tokalele kuzuela, ni kubhanga mu sidivisu ia kuboka. (Matesu, kibatulu 10) ^[1] (Tala ku disukilu dia milongi.) Sé kulaleka, o maxibulu a di longo kuboka o kidi kia Bibidia. (Matesu 11:1) Tua-nda di longa ima iiadi i tu tena kulonga o maxibulu kubhanga mu sidivisu ia kuboka.

8, 9. (a) Kiebhi Jezú kia kexile mu zuela ni athu mu ukunji? (b) Kiebhi ki tu tena kukuatekesa o maxibulu kukaiela o phangu ia Jezú ia kuboka?

⁸ Zuela ni athu. Jezú ua kexile mu bhanga madiskursu phala athu avulu. Saí ithangana, muéne ua kexile mu zuela ngó ni muthu umoxi. Maji ua kexile mu zuela ni ngalasa ioso. Mu kifika, saí kizuua, muéne ua zuela kiambote ni muhatu ua kexile mu katula o menha mu kixima kia zukamene mu mbanza ia Sikale. (Nzuá 4:5-30) Jezú ua zuela ué ni Matesu dia Levi, mukua kutambula lubhaku, anga u mu bhinga phala kukala dixibulu diê. Matesu ua xikana, mu kubhita kithangana, muéne uexana Jezú ni athu amukuá phala kudia bhu bhata diê. Bhenhobho, Jezú ua zuela ni athu avulu.—Matesu 9:9; Luka 5:27-39.

⁹ Jezú ua zuela ué kiambote ni Natanaiele, sumbala muéne ua longoluele o athu a Nazalé. Mukonda dia kuzuela nê mu  ukexilu uambote, Natanaiele ua mateka kumona Jezú mu ukexilu uambote, sumbala Jezú ua tokalele mu mbanza ia Nazalé. Natanaiele ua mesenene kudilonga dingi ni Jezú. (Nzuá 1:46-51) O phangu ia Jezú i tu longa kuila, se tu zuela kiambote ni athu, nange ene a-nda tuívua. ^[2] [Tala ku disukilu dia milongi.] Se tu longa o maxibulu metu kuzuela mu ukexilu iú, ene a-nda uabhela dingi o sidivisu ia kuboka.

10-12. (a) Ihi ia kexile mu bhanga Jezú phala kukuatekesa o athu kuijiia dingi ia lungu ni Bibidia? (b) Kiebhi ki tu tena kukuatekesa o maxibulu kulonga o athu?

¹⁰ Longa o athu a mesena kuívua. Jezú ua kexile ni ima iavulu phala kubhanga. Maji né kiki, muéne ua kexile mu sota kithangana phala kukala ni athu ni kua longa. Mu kifika, saí kizuua, athu avulu a bhongoloka bhu mbandu a kizanga, phala kuívua Jezú. Jezú ua habe mu ulungu phala kulonga o athu. Mu kusuluka, ua longo disá dia dikota kua Phetele. Jezú ua bhange madiuanu, phala kukuatekesa Phetele kutamba jimbiji. Mu kusuluka, muéne ua tangela Phetele, uixi: ‘Tunde lelu ua-nda kala u mutona ua athu.’ Mu kithangana kieniókio, Phetele ni maiala amukuá a ‘bhixidisa o jibote ku kibumu, a xisa o ima ioso,’ anga a kaiela Jezú.—Luka 5:1-11.

¹¹ Nikodemu ua mesenene ué kudilonga dingi ia lungu ni Jezú. Maji kuma muéne uexile dikota dia Jijudé, ua kexile ni uôma ua ima ieji zuela o athu, se a mu monene kumoxi ni Jezú. Mukonda dia kiki, Nikodemu uai mu sota Jezú m’usuku. Jezú ka mu bhana dikunda, mu veji dia kiki, muéne ua mu tambulula kiambote, iú ua mu jimbuluila o kidi kia lungu ni muéne. (Nzuá 3:1, 2) Ithangana ioso, Jezú ua kexile polondo phala kulonga o athu ni kusuínisa o kixikanu kiâ. Kála kia bhangele Jezú, tua tokala kusota o athu mu kithangana kia tokala. Tua tokala ué kusota kithangana kia soko, phala kua kuatekesa kutendela o kidi kia Bibidia.

¹² Kioso ki tu boka ni maxibulu, tua tokala kua longa kukunda dingi o athu a tu tambulula kiambote. Tu tena kuambata ué o maxibulu metu, kioso ki tuia mu kunda, ni kulonga o maxibulu a mukuâ. Mu kubhanga kiki, ene a-nda kala ni uhete ua kulonga o athu, ni kumona o kisangusangu kijila mu kukuatekesa muthu kuijiia o kidi kia lungu ni Jihova. Kiki, kia-nda kuatekesa o maxibulu iá kukala ni vondadi ia kukunda dingi o athu, ni kua longa o kidi kia Bibidia. Ene a-nda di longa ué kulondekesa o muanhu ni kukolokota, né muene se ka sange o athu bhu bhata.—Ngalásia 5:22; tala o kaxa “ Muéne ka Bhuila.”

13, 14. (a) Kiebhi ki u tena kukaiela o phangu ia athu a tange mu Bibidia? (b) Kiebhi ki u tena kukuatekesa o minzangala ni maxibulu a Bibidia kukuatekesa o jiphange mu kilunga?

¹³ Jihova ua mesena kuila, o jiselevende jê a dizola, a di kuatekesa. (Tanga Luka 22:24-27; 1 Phetele 1:22.) O Bibidia i zuela kuila, Jezú ua bhana o ima ioso, katé muene ni muenhu uê, phala kukuatekesa akuâ. (Matesu 20:28) Tabita ua kexile mu bhanga ima iavulu, phala “kukuatekesa o jingadiama.” (Ikalakalu 9:36, 39)  Madiia ua kalakala kiavulu phala o jiphange jê ku Loma. (Loma 16:6) Kiebhi ki tu tena kukuatekesa o maxibulu kumona kuila, a tokala kubhanga ima iambote phala o jiphange mu kilunga?

¹⁴ Tu tena kua ambata kioso ki tuia mu kunda o adiakimi, mba o jiphange a mu kata. Se ki bhana, o jitata a tena ué kuambata o tuana tuâ. Se o tufunga a múia mu bheka kudia ku adiakimi, mba kusokejeka kima kia zangiua bhu mabhata mâ, ene a tena kuambata o minzangala mba o maxibulu. Se o minzangala ni maxibulu a mona kuila, o jiphange mu kilunga a di kuatekesa, ene a-nda kaiela o phangu iâ. Mu kifika, saí kafunga ka kexile mu kunda o jiphange a tungile mu sanzala mua kexile múia mu boka, phala kumona se akexile kiambote. O munzangala ua kexile múia kumoxi ni muéne, ua mateka ué kuxinganeka kubhanga kima, phala kukuatekesa o jiphange mu kilunga.—Loma 12:10.

15. Mukonda diahi o tufunga a tokala kukuatekesa o jiphange ja maiala mu kilunga?

¹⁵ Jihova ua bhana ku maiala, o kikalakalu kia kulonga o Mak’â Nzambi mu kilunga. Mu kiki, o jiphange jiji a tokala kuijiia kulonga kiambote, phala kubhanga o madiskursu. Se u kafunga, nange u tena kukuatekesa mukuatekexi ua tufunga, mu kuivuidila kiambote o diskursu diê, phala ku mu kuatekesa ande dia muéne kubhanga o diskursu. (Nehemiia 8:8) ^[3]—Tala ku disukilu dia milongi.

16, 17. (a) Kiebhi Phaulu kia londekesa kuila, muéne ua mesenene kukuatekesa Timote? (b) Kiebhi o tufunga kia tena kulonga o jiphange kulanga o ikalakalu mu kilunga?

¹⁶ Kua bhingi kulonga dingi jiphange phala kulanga o ikalakalu mu kilunga. Phaulu ua longo Timote, iú ua mu suínisa kulonga ué akuâ. Phaulu uambe: “Kala u kindanda mu kiadi ki tuene na-kiu mu ukamba ni Kristu Jezú. Ima i uévua jinga ko-kuami bhu pholo ia jimbangi javulu, lûndisa-iu ku athu ala jifiiele, a tena ue kulonga akuâ.” (2 Timote 2:1, 2) Kuma poxolo Phaulu uexile kafunga, Timote ua di longo ima iavulu ni muéne. Muéne ua dilongo kukuatekesa akuâ mu kilunga, ni kulonga kiambote o kidi kia Bibidia.—2 Timote 3:10-12.

¹⁷ Phaulu ua bhiti kithangana kiavulu ni Timote, mukonda muéne ua mesenene ku mu longa kiambote. (Ikalakalu 16:1-5) O tufunga a tena kukaiela o phangu ia  Phaulu mu kuambata o akuatekexi a tufunga, kioso kiaia mu kunda phange bhu bhata. Mu kubhanga kiki, o akuatekexi a-nda mona kiebhi kia tokala kulonga akuâ. Ene a-nda di longa ué kulondekesa muanhu, kuzola o jiphange, ni kudielela kua Jihova kioso kia mu langa o kilunga.—1 Phetele 5:2.

18. Mukonda diahi tua tokala kulonga akuetu kubhanga o sidivisu ia Jihova?

¹⁸ Kuma tuala mu izuua isukidila-ku, kua bhingi kulonga o minzangala ni maxibulu kuboka o kidi kia Bibidia. Kua bhingi ué kulonga o jiphange ja maiala kulanga o ikalakalu mu kilunga. Jihova ua mesena kuila, o jiselevende jê joso ejiia kubhanga kiambote o ikalakalu iâ mu kilunga. Muéne ua mesena ué kuila, tu longa o minzangala ni maxibulu. Mu kiki, tua tokala kubhanga nguzu phala kulonga ué akuetu, kála kia bhangele Jezú ni Phaulu. Tua bhingi kulonga athu avulu, mukonda kuene hanji ikalakalu iavulu, phala kubhanga ande dia kuíza o dizubhilu.

19. Mukonda diahi u tena kudielela kuila, ua-nda di tunda kiambote mu kulonga akuenu kubhanga kiambote o sidivisu ia Jihova?

¹⁹ Phala kulonga akuetu, kubhinga kusota thembu ni kubhanga nguzu. Maji tu tena kudielela kuila, Jihova ni Jezú, a-nda tu kuatekesa kulonga kiambote akuetu. Tua-nda sanguluka kiavulu mu kumona o athu u tua longo, “kukalakala kiavulu” mu ukunji ni mu kilunga. (1 Timote 4:10) Maji tua tokala ué kubhanga dingi mu sidivisu ia Nzambi, kukala ni ídifua iambote, ni kuzukama dingi kua Jihova.