XINGANEKA kuila, eie ua mu kuenda m’usuku. Anga u mona kuila, saí muthu ua mu ku kaiela. Kioso ki uimana, o muthu uimana ué. Kioso ki uenda dingi ni lusolo, muéne uenda ué ni lusolo. Mukonda dia kiki, eie u mateka kulenga phala kubhixila kubhata dia kamba diê dia zukama. Kioso kamba diê kia jikula o dibhitu, anga u ku bokuesa, eie u divua kiambote, mukonda uejiia kuila o kiluezu kia bhiti.

Nange eie nuka ua bhitile ni maka iâ. Maji nange saí ima ia mukuá ku muenhu ué, i kubhangesa kuthandanganha. Mu kifika, o kuila ua mu bhanga nguzu phala kueha kifua kia iibha, maji saí ithangana uene mu tondala hanji? O kuila uala kiá thembu iavulu sé kukalakala, né muene ni nguzu ioso i u bhanga phala kusanga salu? O kuila eie ua thandanganha ni mauhaxi ejila mu ku kuka? Mba saí kima kiéngi ki ku thandanganhesa?

Maka oso-oso u kala nau, kima kiambote kukala ni dikamba di kuívua, diala polondo phala ku kukuatekesa. O kuila eie uala ni dikamba dia kidi? Uala muéne! Jihova muéne o dikamba diê dia kidi. O ukamba uê n’eie, ua difu ni ukamba uexile nau ni Mbalahamu, kala kilondekesa o divulu dia Izaia 41:8-13. Mu velusu ia 10 ni 13, Jihova u tu kanena: ‘Kana kukala ni uôma, kuma eme ngala bhuamoxi n’eie; kana kubhuuama, mbata eme ngala ngi Nzambi ié; eme ngi ku suinisa, hé ngi ku kuatekesa, anga ngi ku fikidila ni lukuaku luami lua kadilu, lua kuiuka kuami. Mbata eme, ngi Jihova Nzambi ié, ngi ku kuata mu lukuaku lué lua dilu; hé ngi ku ambela, ngixi: Ku kale ni uôma, Eme nga-nda ku kuatekesa.’

O izuelu íii ia Jihova, i tu tululukisa. Xinganeka o ima ia mu tu kanena Jihova. O velusu ki i zuela kuila, Jihova ua ku kuata ku maku, iú ua mu kuendesa, kana. Se uexile mu kuendesa, hinu o lukuaku lua kadilu lua Jihova, lueji kuata o lukuaku lué lua kiasu. Maji mu veji dia kiki, Jihova u sununa o ‘lukuaku luê lua kadilu lua kuiuka,’ anga u kuata o “lukuaku lué lua dilu,” kala ua mu kusunga phala u bhuluke ku kiluezu kia dikota. Kioso Jihova kia kuata o lukuaku lué lua kadilu, muéne u kusuínisa mu ku kutangela: ‘Ku kale ni uôma, eme nga-nda ku kuatekesa.’

O kuila eie u mona Jihova kala Tat’ê ia henda, ni dikamba diê dia kazola? O kuila eie u xikina kuila, kioso ki ua-nda dibhana ni ibhidi ku muenhu, muéne ua-nda kukuatekesa? Mu kidi, Jihova ua kuzolo, muéne ua mesena ku kukuatekesa. Mu ku dibhana ni ibhidi, Jihova u kingila kuila, eie u dielela mu kikuatekesu kiê. Mukonda diahi? Mukonda muéne ua kuzolo kiavulu. Mu kidi, muéne “kota dia dikuatekesu dia zukama mu jiphaxi.”—Jisálamu 46:1.

Saí athu, ene mu xinganeka hanji mu ituxi ia tele m’ukulu, anga a dibhuidisa se Nzambi ua loloka, inga kana. Se uene mu divua ué kiki, xinganeka mu phangu ia diiala dia fiiele a mu ixanene Jobe. Muéne uambe kuila, kioso kiexile munzangala, ua tele kituxi. (Jobe 13:26) O mukuá jisalamu Davidi, kiene ué kia divu. Mukonda dia kiki, muéne ua diondela Jihova uixi: “Kana kuxinganeka kuzangata kuami kua undenge; mba u kaiela o itondalu iami.” (Jisálamu 25:7) Kuma tua kambe o kuiuka, etu enioso tuene mu ta ituxi, ‘tua bhondalala, o bhu fuma ia Nzambi, i bhulula, ki tu tena-bhu.’—Loma 3:23.

O izuelu i tu sanga mu divulu dia Izaia mu kibatulu kia 41, io soneke phala kutululukisa o kifuxi kia Izalaiele. Mukonda dia ku ta ituxi ia dikota, Jihova ua zuelele kuila, ueji ku a kaxtikala mu kuehela ku a ambata ku ubhika mu ixi ia Babilonha. (Izaia 39:6, 7) Nzambi ua kanene ué kubhulula o athu eji diela o ituxi iâ, ni kuvutuka kua muéne! (Izaia 41:8, 9; 49:8) Lelu, Jihova uene ué mu londekesa o henda iê ku athu a diela o ituxi iâ ni muxima uoso, anga a mesena ku mu sangulukisa.—Jisálamu 51:1.

Dilonge o musoso ua Takuya, * uexile mu bhanga nguzu phala kuxisa o kifua kia iibha kia kutala, ni kubhanga o ufusa. Saí ithangana, muéne ua kexile mu zoza, ni kubhanga dingi o ima íii iaibha. Kiebhi kia kexile mu divua muéne? “Eme nga kexile mu divua kuila, ki ngexile ni valolo, maji kioso ki nga kexile mu samba kua Jihova mu ku mu bhinga muloloki, muéne ua kexile mu ngi kuatekesa ni lusolo.” Kiebhi Jihova kia kexile ku mu kuatekesa? O tufunga tua kilunga kia Takuya, a mu tangela kuila, se u zoza mu kutala ufusa mba kubhanga o ima íii ia iibha, ua tokalele kua exana mu mutelembe. Muéne uambe: “Kia bhonzele kiavulu kua exana, maji kioso ki nga kexile kubhanga kiki, ene akexile mu ngi kuatekesa kiavulu.” O tufunga a sokejeka o ima phala o kafunga ka ilunga kukunda Takuya. O kafunga ka ilunga ua mu tangela, uixi: “Ki ngeza ngó. Ngala bhabha mukonda kiene kia mesenene o tufunga. Ene a kusolo phala ku ngi tambula kubhata diê, ni ku kusuínisa.” Takuya uambe: “Eme nga kexile mu ta ituxi, maji né kiki, Jihova ua kexile polondo phala ku ngi kuatekesa bhu kaxi ka tufunga.” Mu kubhita kithangana, Takuya ua xisa o ífua iê ia iibha, anga ua mateka kusidivila kála muboki ua thembu ioso. Lelu, muéne ua mu sidivila ku betele. Se u lueza, Nzambi ua-nda kukuatekesa ué, kála kia kuatekesele phang’ietu.

Saí athu, a kala ni hele mukonda dia kua kaia ku salu, ni kukamba kusanga salu iéngi. Xinganeka kiebhi ki divua o muthu, se mu veji javulu o matenda ka xikina ku mu bhana salu. Saí athu, kioso kia bhita mu ibhidi íii, a divua kala athu a kambe valolo. Kiebhi Jihova kia tena ku kuatekesa? Nange muéne ka-nda kubhana o salu i ua mesena ni lusolo, maji muéne u tena ku kuatekesa kulembalala o izuelu ia Davidi, kioso kiambe: “Tunde mu undenge, o kiki nga kuka; kiluua ngi mona mukua kidi a mu ehelela, mba mbutu iê ienda ni kubhinga jimola.” (Jisálamu 37:25) Eie uala ni valolo iavulu bhu pholo ia Jihova. Muéne u sununa o ‘lukuaku luê lua kadilu lua kuiuka,’ phala u kale ni ioso i ua bhindamena phala ku mu sidivila.

Sara ua tungu mu ixi ia Colombia, ua mono o kikuatekesu kia Jihova. Kioso kia kexile mu kalakala mu ditenda dia dikota, muéne ua kexile mu  nganhala kitadi kiavulu. Maji muéne ua mesenene kubhanga dingi mu sidivisu ia Jihova, mukonda dia kiki, ua xisa o salu iê, iú ua mateka kukalakala kála muboki ua thembu ioso. Maji kia mu bhonzele kiavulu kusanga salu, ia bhingile kukalakala ngó kaxaxi ka kizuua. Muéne ua mateka kusumbisa gelado, maji mu kubhita izuua, o kitadi kiabhu, o uenji ua diboto. Muéne uambe: “Kua bhiti mivu itatu, maji mu ngalasa ia Jihova, eme nga kolokota.” Muéne ua soto kuijiia o ima ia bhindamene, mu veji dia kuthandanganha ni kizuua kia mungu. (Matesu 6:33, 34) Mu kubhita thembu, o xefe iê iokulu, ua muixana dingi phala kubhanga o kikalakalu kia kexile mu bhanga. Muéne uambe kuila, ueji xikina ngó, se u muehela kukalakala kaxaxi ka kizuua, ni ku mu bhana kithangana kia kuia mu iônge mu kilunga, ni mu iônge ia makota. Lelu, Sara ka mu nganhala kitadi kiavulu, kála kiexile mu nganhala m’ukulu, maji muéne ua mu kolokota mu sidivisu ia thembu ioso. Muéne uambe kuila, mu ithangana ia jiphaxi, ua mono o lukuaku lua henda lua Jihova.

Athu avulu a kala ni hele mukonda a mu kuka, ni kuila, ka-nda tena dingi kukalakala. Ene a dibhuidisa se a-nda kala ni kitadi kia soko phala kudikila o ibhindamu iâ ioso. Ene a thandanganha uá mukonda a banza kuila, kioso kia-nda kuka, ene a-nda kata kiavulu. Nange Sobha Davidi muéne ua diondele kua Jihova mu kuzuela: “Kana ku ngi kaia mu thembu iami ia kukuka; kana ku ng’ehelela ki u mona nguzu ií ngi bhua kiá!”—Jisálamu 71:9, 18.

Kiebhi o athu a kuka kia tena kukala ni kidielelu kia lungu ni hádia? Ene a tokala kusuluka ni kukolesa o kixikanu kiâ kua Nzambi, ni ku dielela kuila, muéne ua-nda dikila o ibhindamu iâ ioso. Maji saí amukuá, nange akexile ni kitadi kiavulu, mu kiki, ene a tokala kusosolola o ukexilu ua mienhu iâ, ni kusanguluka ni ima iala na-iu. Nange a mona kuila, o kudia “tumafe,” mu veji dia kudia “o ngombe ianete,” kua-nda ku a kuatekesa kukala ni sauidi iambote. (Jisabhu 15:17) Se u kolokota mu kusidivila Jihova, muéne ua-nda bhanga ioso phala u kale ni ioso i ua-nda bhindamena kioso ki ua-nda kuka.

Xinganeka mu phangu ia José ni Rose, a sidivila Jihova mu 65 kia mivu ndenge. Mu ithangana ioso íii, ene a dibhanene ni ibhidi iavulu. Ene a langele o tata ia Rose, ua bhindamene kikuatekesu suku ni muanha. José a mu bhangele ué pelasá, mukonda dia uhaxi ua bhonzo ua mu kuatele. Kiebhi Jihova kia sununa o lukuaku luê lua kadilu ku dikaza didi dia fiiele? Muéne ua bhange kiki bhu kaxi ka Tony ni Wendy. Ene exile ni inzo ia mesenene kubhana ku aboki a thembu ioso. Tony u lembalala kuila, kioso kia kexile mu di longa, ithangana ioso muéne ua kexile mu mona mu njanela José ni Rose mu sidivisu ia kuboka. Tony ua diuanene kiavulu mu kumona o kusuína kua dikaza didi mu sidivisu ia kuboka. Kuma ku muenhu uá uoso, José ni Rose a di bhakuile mu sidivisu ia Jihova, Tony ni Wendy, a a bhana o inzo. Mu 15 kia mivu, ene mu kuatekesa José ni Rose ala kiá mu kitala kia 85 kia mivu. José ni Rose, a mona Tony ni Wendy kála dibesá dia a bhana Jihova.

Jihova u ku kanena: ‘Ku kale ni uôma, eme nga-nda ku kuatekesa.’ Muéne ua sununa o ‘lukuaku luê lua kadilu lua kuiuka.’ O kuila eie ua-nda sununa ué o lukuaku lué phala ku mu kuata?