SAÍ kizuua mu kamene, diiala mukua díbhia dia muvidi, uai mu sota akalakadi. Muéne ua bakana ni maiala oso kua futa valolo imoxi, ene anga a xikina. Kuma muéne ua bhindamene dingi akalakadi, uai dingi mu sota akalakadi. Muéne ua solo kufuta o akalakadi oso o valolo ia soko. Mu ngoloxi, muéne uongeka o akalakadi oso phala kua futa. Kikale ió a kalakala o kizuua kioso, mba ió a kalakala ngó ola imoxi, ene oso a sokele mu kitadi kia tambula. Maji o maiala a kalakala o kizuua kioso, a divu kia iibha, mu kiki, o mukua díbhia uambe: ‘Eme ki ngi mi futu kala ki tua bakana? Kífua ki ngala ni ufolo ua kufuta ku akalakadi ami o valolo i nga mesena? Enu muala ni dixinga, mukonda nga bhange o mbote?’—Matesu 20:1-15.

1, 2. (a) Jimbulula o kifika kia Jezú kia lungu ni diiala mukuá díbhia dia muvidi. (b) Kiebhi o kifika kiki, kilondekesa o ídifua kála o kubhanga o mbote, ni henda?

 ² O musoso iú ua Jezú, u tu longa disá dia dikota, dia lungu ni ‘henda’ ^[1] ia Jihova. (Tanga 2 Kolindo 6:1.) Kiebhi? Saí athu, nange a banza kuila, o maiala a kalakala o kizuua kia muvimba, a tokalele kunganhala dingi kitadi, akuâ ndenge. Maji o mukua díbhia ua londekesa o henda iê ia dikota ku akalakadi a kalakala ngó tu ithangana. Saí diiala mukuá kutokuesa, ua jimbulula o kizuelu ‘henda ia Nzambi,’ kia tumbula mu Bibidia. Muéne uambe: “O kizuelu kiki, kilombolola kubhana ujitu ua katunda ku muthu ka fuamene ku mu bhana. Mba kima kio bhane ku muthu ua kambe o kukalakala.”

3, 4. Mukonda diahi Jihova ua londekesa o henda ku athu oso? Kiebhi muéne kia bhange kiki?

³ O Bibidia izuela kuila, o henda i tu londekesa Nzambi, ujitu ua tu bhana mu ki ngoho. (Efezo 3:7) Kuma ki tu tena kubelesela Jihova ni kuiuka kuoso, etu ki tu fuama ku tu bhanga o mbote, né ku tu londekesa o henda kua Nzambi. Mu kidi, etu tua fuama kufuá. O Sobha Solomá uambe: “Mu ngongo kana-mu muthu ua iuka, u bhanga ngó mbote mu mbote anga u kamba ku ta kituxi.” (Ndongixi 7:20) Mu kubhita thembu, poxolo Phaulu uambe: “Ene oso ituxi a i te, a bhondalala, o bhu fuma ia Nzambi, i bhulula, ka tena-bhu,” ni kuila, “o futu ia ituxi kufua.”—Loma 3:23; 6:23a.

⁴ Kuma Jihova ua tu zolo kiavulu, muéne ua tumikisa “Mon’ê umoxi-èlele,” phala kufua bhu kididi kietu. Kiene o kima kia dikota kia bhange Nzambi, phala kulondekesa o henda iê. (Nzuá 3:16) Phaulu uambe kuila, ‘mu henda ia Nzambi, Jezú ua lola o kalunga mu mulonga ua mundu uoso. Kiki-phe, tua mu mono kuila, mukonda dia phaxi ia bhiti na-iu, a mu zuika kitundu kia fuma ni ujitu.’ (Jihebeleu 2:9) Mu kidi, “o ujitu-phe ua Nzambi muenhu ki uabhua, mua Kristu Jezú, Ngana ietu.”—Loma 6:23b.

5, 6. Ihi i bhita n’etu, kioso kia tu tumina (a) ku ituxi? (b) kua Nzambi?

⁵ Mukonda diahi tu akua ituxi, ni mukonda diahi tuene mu fúa? O Bibidia izuela kuila, “mukonda dia muthu umoxi ngó, ni mukonda dia kituxi kiê, kia bhangesa o kalunga kuenda ni kutumina.” Kuma tu mbutu ia Adá, etu tu akua ituxi, mukonda dia kiki, tuene mu fúa. (Loma 5:12, 14, 17) Maji tu tena hanji kudituna o kituxi. Kiebhi ki tu tena kubhanga kiki? Kioso ki tu londekesa kixikanu mu sata ia Kristu ia kúkula, tu katula mbote mu henda ia tu londekesa Jihova. O Bibidia izuela: ‘Bhuoso bhua vulu o ituxi, o henda ia Nzambi ia somboka dingi mu kusubhajaka kiavulu. Uila kiki, kala kia kexile kutumina o ituxi mu kufuisa, kiene kimoxi ki tumina o henda ia Nzambi, ni ku tu bheka ku muenhu, mua Jezú Kristu.’—Loma 5:20, 21.

⁶ Sumbala tu akua ituxi hanji, ki tu tokala kuehela o kituxi ku tu tumina. Mu kiki, kioso ki tu bhanga kima kiaiibha, tua tokala kubhinga muloloki kua Jihova. Phaulu ua tu tendelesa: ‘O ituxi ki i fuama ku mi tolola dingi, mbata enu ka mi bhake dingi bhoxi dia Kitumu, maji a mi bhake kiá bhoxi ia henda ia Nzambi.’ (Loma 6:14) Kiebhi ki tu tena kukatula mbote mu  henda ia Nzambi? Phaulu uambe: ‘O henda ia Nzambi i tu longa kuma, tu ehe o kubhuma ni jihânji jaiibha ja mundu, phala tuende mu ngongo muenhumu ni kilunji, ni kuiuka, ni kuxila Nzambi.’—Tito 2:11, 12.

7, 8. Kiebhi Jihova kia londekesa o henda iê ‘mu maukexilu avulu’? (Tala o jifoto ja dianga.)

⁷ Poxolo Phetele ua soneka: ‘Muthu uoso uhete uê ua tambula kua Nzambi a u kumbidile mudienu, kala mufunu ua mbote ua henda ia Nzambi ia londekesa mu maukexilu avulu, phala o mbote ia akuâ.’ (1 Phetele 4:10) Kiebhi Jihova kia londekesa o henda iê ‘mu maukexilu avulu?’ Né muene se tu bhita ni maka oso-oso, Jihova ua-nda tu bhana o nguzu i tu bhindamena phala kukolokota. (1 Phetele 1:6) Muéne ua-nda tu bhana o ima i tu bhindamena phala kukolokota mu ibhidi.

⁸ Poxolo Nzuá ua soneka: ‘Ku nzungule ia umvuama ua henda iê, etu oso tua tambula-ku ndumba dia henda iê.’ (Nzuá 1:16) Kuma Jihova ulondekesa o henda iê mu maukexilu avulu, etu tu tambula mabesá avulu. Mabesá ebhi u tu tambula?

9. Kiebhi ki tu katula mbote mu henda ia Jihova? Kiebhi ki tu tena kulondekesa o kisakidilu kietu?

⁹ Jihova u loloka o ituxi ietu. Mukonda dia henda iê, Jihova u loloka o ituxi ietu. Maji muéne u tu loloka ngó se tu diela o ituxi ietu, ni kubhanga ioso phala kutolola o jihanji jetu jaiibha. (Tanga 1 Nzuá 1:8, 9.) Phaulu ua jimbulula ku Jikidistá a a undu mu izuua iê, se kiebhi Jihova kia loloka o ituxi. Muéne uambe: “[Nzambi] ua tu kula mu ubhika ua usuku, iú ua tu bheka mu Utuminu ua Mon’ê ua kazola. Kua muène ku tu tambula o ufôlo ua kujituka ku ungunji. Kua muène ue ku tu tambuila o [muloloke] ua ituxi ietu.” (Kolose 1:13, 14) Tu sakidila kiavulu o henda ia Nzambi, mukonda dia kiki, tu kala ni vondadi ia ku mu ximana. Kuma Jihova u loloka o ituxi ietu, tu tena kutambula ué mabesá a mukuá.

10. Mbote iahi i tu katula mukonda dia henda ia Nzambi?

¹⁰ Tu tena kukala ni ukamba uambote ni Nzambi. Etu tu akua ituxi, a tu vuala tu jinguma ja Nzambi. Maji né kiki, Phaulu uambe: ‘Tua kexile tu jinguma ja Nzambi, maji Muene ua tena ku tu luulula, iú ua tu bhange tu makamba mu kufua kua Mon’ê.’ (Loma 5:10) Mukonda dia ujitu ua kukula, tu tena kukala ni ukamba uambote ni Nzambi, tu tena kukala ku paze ni muéne ni kukala makamba mê. Phaulu ua zuela o maka enhá, iú uambe se kiebhi o ujitu iú ua lungu ni henda ia Nzambi, kioso  muéne kia zuela ni jiphange jê a a undu. Muéne ua a tangela: ‘Kia tu xikina Nzambi’iki mu kuxikana, tuala ku paze ni muène mukonda dia Ngana ietu, Jezú Kristu. Mukonda dia kuxikana, Kristu ua tu bheka dingi mu henda ia Nzambi, mumu mu tuemana mukonda dia kuxikana kuetu.’ (Loma 5:1, 2) Tu sakidila kiavulu Jihova, mukonda tuala ni ukamba uambote ni muéne!

11. Kiebhi o Jikidistá a a undu kia kuatekesa “jimbudi jamukuá” kusota ni kukaiela o kulunga?

¹¹ Tu tena kukala athu a iuka bhu pholo ia Nzambi. Polofeta Daniiele uambe kuila, mu izuua isukidila-ku, ‘oso a dimuka,’ mba o Jikidistá a a undu, eji kuatekesa “o mundu ku sota ni kukaiela o kulunga.” (Tanga Daniiele 12:3.) Kiebhi o Jikidistá a a undu kia bhanga kiki? Ene a boka o njimbu iambote, ni kulonga o itumu ia Jihova ku mundu uavulu ua tokala ku “jimbudi jamukuá.” (Nzuá 10:16) Ene a kuatekesa o jimbudi ja mukuá kukala ni ukamba uambote ni Nzambi. Kiki ki bhita ngó mukonda dia henda i tu londekesa Jihova. Phaulu ua jimbulula: ‘Nzambi mu henda iê u a lungisa, kia vutuka, sé ku a bhinga kima, mukonda dia Jezú Kristu u tena ku a bhulula.’—Loma 3:23, 24.

12. Mu ukexilu uebhi o ujitu ua kusamba, ua lungu ni henda ia tu londekesa Nzambi?

¹² Tu tena kuzukama kua Nzambi bhu kaxi ka musambu. Mukonda dia henda ia tu londekesa, tu tena kusamba kua Jihova. Phaulu uambe kuila, o kiandu kia Jihova ‘kiandu kia henda.’ Mu kiki, muéne u tu suínisa kuzukama ku kiandu kiki, “sé hele.” (Jihebeleu 4:16a) Tu tena kusamba  kua Jihova mu kubhinga kima kioso-kioso mu dijina dia Jezú. Sé phata, iú ujitu ua dikota! Phaulu uambe: “Tua-bhu o uôma, kuma tua tambula disesa dia kubhixila bhu pholo ia Nzambi, mukonda dia ku mu xikana.”—Efezo 3:12.

13. Kiebhi o henda ia Nzambi i tena ‘ku tu bhandulula mu kithangana kia tokala’?

¹³ Tu tena kutambula o kikuatekesu mu kithangana kia tokala. Phaulu ua tu suínisa kusamba kua Nzambi kioso ki tu bhindama, ‘phala Nzambi a tu kuatele henda. Bhenhobho tua kà tambula o henda i tena ku tu bhandulula mu kithangana kia tokala.’ (Jihebeleu 4:16b) Kioso ki tu bhita mu izukutisu mba jitendasá, tu tena kusamba kua Jihova, phala ku mu bhinga kikuatekesu. Sumbala muéne ka tokalele ku tu tambuijila, maji mu henda iê, muéne u tu tambuijila. Mu ithangana iavulu, muéne u tu kuatekesa bhu kaxi ka jiphange jetu. Jihova u tambuijila o misambu ietu, ‘phala tu kolokote ni tu zuele: Ngana muène múkuatekexi uami, eme ki ngi kala ni uôma. Ihi i tena ku ngi bhanga o muthu?’—Jihebeleu 13:6.

14. Kiebhi o henda ia Jihova i tululukisa o mixima ietu?

¹⁴ Tu tena kukala ni kutuluka kua muxima. Ujitu ua dikota kutambula o kikuatekesu kia Jihova, kioso ki tu kala ni muxima ua toloka. (Jisálamu 51:17) Kioso o Jikidistá akuâ Tesalonika kia kexile mu a zukutisa, Phaulu ua a sonekena, uixi: ‘Ngana ietu Jezú Kristu muène, ni Nzambi, Tata ietu ua tu zola, ió ua tu bhana o kubhua uôma ni kukonda o malamba sè kufula, ni kudielela kuambote mu henda iê, a mi izalese o mixima ni kubhua uôma, a mi suinise.’ (2 Tesalonika 2:16, 17) Tu sanguluka kiavulu mu kuijiia kuila, mukonda dia henda iê, Jihova ua tu zolo, ni kuila, muéne u tu langa!

15. Kidielelu kiahi ki tuala na-kiu mukonda dia henda ia Nzambi?

¹⁵ Tuala ni kidielelu kia kutambula o muenhu ua kalela-ku. Kuma tu akuâ ituxi, sé o kikuatekesu kia Jihova, ki tu tena kukala ni kidielelu. (Tanga Jisálamu 49:7, 8.) Jihova ua tu bhana kidielelu kia dikota. Kidielelu kiahi? Jezú uambe: “O vondadi ia Tata iami ienhí’ii: Kuila uoso ua tale ku Mona, iú ua mu xikana, a kale ni muenhu ki úabhua.” (Nzuá 6:40) Mu kiki, etu tuala ni kidielelu kia kukala ni muenhu ua kalela-ku, mukonda dia henda ia tu londekesa Jihova. Phaulu uambe: ‘Nzambi ua tukulula henda iê mu kubhana kubhuluka ku athu oso.’—Tito 2:11.

16. Kiebhi o Jikidistá ja mukuâ m’ukulu kia lokalele o nzumbi ia henda ia Nzambi?

¹⁶ Tu tambula mabesá avulu, mukonda dia henda i tu londekesa Jihova. Maji ki tu tokala kuta ituxi mu luelu, mukonda dia kuijiia kuila, Nzambi mukuâ henda. Saí Jikidistá m’ukulu, ‘o henda ia Nzambi ietu a i kitula uhabhu.’ (Juda 4) O Jikidistá jiji jaiibha, akexile mu banza kuila, né muene se a sulukile ni kuta ituxi, Jihova ueji kua loloka. Ene a mesenene uê ku bhangesa o jiphange ja mukuâ kuta ituxi. Lelu, uoso u bhanga kiki, ua mu ‘lokalala o nzumbi ia henda ia Nzambi.’—Jihebeleu 10:29.

17. Kitendelesu kiebhi kia bhana Phetele?

 ¹⁷ Satanaji uene mu nganala Jikidistá javulu mu kua bhangesa kubanza kuila, ene a tena ku ta ituxi, mukonda Jihova ua-nda ku a loloka ni lusolo. Mu kidi, Jihova uala polondo phala kuloloka oso a diela o ituxi iâ, maji muéne ua mesena kuila, tu bhanga nguzu phala kutolola o jihanji jetu jaiibha. Jihova ua tumina Phetele kusoneka: ‘Enu-phe akuetu nga mi zola, im’iii mua dianga kiá ku ijiia. Kala kiki, dimukinenu o makutu ma athu abhukumuka, phala ki ma mi bhitule, anga mu di bhala bhu ditala dia kolo bhu muemana. Endenu-phe ni ku kula mu henda ia Ngana ietu, Mubhuludi, Jezú Kristu, ni mu kuijiia kuê.’—2 Phetele 3:17, 18.

18. O henda ia tu londekesa Jihova, i tu suínisa kubhanga ihi?

¹⁸ Tu sakidila kiavulu Jihova mu ku tu londekesa o henda iê. Mu kiki, tua tokala kukatula mbote mu ujitu uetu, mu kuximana Jihova ni kukuatekesa akuetu. Kiki kiene o kima ki tua tokala o kubhanga. Ihi i tu tena o kubhanga ni maujitu u tua tambula? Phaulu uambe: ‘Kiene ue, tuala ni mauhete, iú uengi, iú uengi, kioso kiá kia tu uanena mu henda ia Nzambi. Hé unguza, tu xikamene o unguza uene. Se u hete ua ku longa, tu longe-phe. Se ua kubhetula akuetu mixima, tu a bhetule muene. Uoso u kuatekesa akuâ ni ku a bhanga mbote, a i bhange ni ku sanguluka.’ (Loma 12:6-8) Mu kiki, mukonda dia henda ia tu londekesa Jihova, tua tokala kukalakala mu ukunji ni kusuína, phala kulonga o kidi kia Bibidia ku akuetu, ku suínisa o jiphange jetu, ni kuloloka oso a tu xinga.

19. Ihi i tua-nda di longa mu milongi ia-nda kaiela?

¹⁹ Kuma Jihova u tu besoala bhu kaxi ka henda iê, tua tokala tu suína mu ‘kubhana umbangi ua Njimbu Iambote ia henda ia Nzambi.’ (Ikalakalu 20:24) O milongi ia-nda kaiela, ia-nda zuela ia lungu ni kikalakalu kiki.