1-3. Nange maka ahi a bhitile nau Evodia ni Sindike? Kiebhi ki tu tena ku dilanga mu maka enhá? (Tala o foto ia dianga.)

TU BHANA valolo iavulu ku Bibidia, mukonda tuejiia kuila, Mak’â Nzambi. O Bibidia iala ni itendelesu i tena ku tu kuatekesa kulenga o ibhidi, ni ku tu kuatekesa kioso ki tu bhanga ima ia iibha. Mu kiki, o kuila tuene mu kaiela o itendelesu ia Bibidia? Xinganeka mu phangu ia Evodia ni Sindike ku hama ia dianga. Ene exile Jikidistá a a undu. O Bibidia i tu tangela kuila, ene a zokele, maji ki i jimbulula o kima kia a bhangesa kuzoka. Tu xinganeke mu kima nange kia a bhangesa kuzoka.

² Evodia uexanene jiphange phala kudia bhu bhata diê. Maji muéne k’exanene Sindike. Kioso kievu akuâ kuzuela kuila, ene a uabhela kiavulu o kudia kua dile ku bhata dia Evodia, Sindike ua luuala kiavulu. Nange muene ua xinganeka: ‘Ki bhonza kuxikina kuila, Evodia ka ng’ixana! Nga kexile mu banza kuma, tu makamba a kazola.’ Sindike ua divu kuma,  Evodia ka mu zolele, ni kuila, muene ua kexile ku mu sondolola. Mukonda dia kiki, Sindike uexana ue o jiphange jendele ku bhata dia Evodia, phala kudia ku bhata diê. Maji k’exana Evodia! Nange o maka iá, a bhangesa o jiphange ja mukuá mu kilunga, ku divua kia iibha. O Bibidia ilondekesa kuila, Phaulu ua bazela Evodia ni Sindike, anga ua a suinisa kubatula o maka mudiâ. Nange ene a kaiela o itendelesu iê, anga a kolokota mu ku sidivila Jihova ni kisangusangu.​—Filipe 4:2, 3.

³ Lelu, nange tu di kuata ue ni phange mu kilunga kietu. Maji se tu kaiela o itendelesu ia Bibidia, tu tena kubatula o maka. Mu kidi, se tu bhanga kiki, tu tena kudilanga ku maka. Kioso ki tu kaiela o milongi ia Bibidia, tu londekesa kuila, tu bhana valolo iavulu mu Mak’â Nzambi.​—Jisálamu 27:11.

4, 5. Ihi i tendelelesa o Mak’â Nzambi, phala ku tu kuatekesa kulanga o ibanzelu ietu?

⁴ Sai bhabha, ki bhonza kulanga o ibanzelu ietu. Se muthu u tu zuela kima kiaiibha, mba u tu talatala kiaiibha mukonda dia ijila ietu, kikonda kietu, mba idifua ietu, nange tu luuala kiavulu, mba tu kala ni njinda iavulu. Nange tu divua dingi kiaiibha, se o muthu u tu xonguena, mba u tu talatala kiaiibha, phang’ietu mu kilunga. Kiebhi o Mak’â Nzambi a tena ku tu kuatekesa?

⁵ Jihova uejiia o ima i tena kubhita, se o athu a kamba kulanga o ibanzelu iâ. Kioso ki tu kala ni njinda, tu tena kuzuela mba kubhanga ima, ia-nda tu bhangesa kudiela. Mu Bibidia, Jihova u tu tendelesa kulanga o njinda ietu, mu kuzuela: “Kana kulenguluka ku kala ni njinda.” Kioso ki tu belesela o kitendelesu kiki, tu di langa mu ibhidi iavulu! (Tanga Ndongixi 7:9; Jisabhu 16:32.) O Bibidia i tu tendelesa ué kuloloka akuetu. Mu kidi, Jezú ua zuela kuila, se ki tu loloka akuetu, Jihova ka-nda tu loloka. (Matesu 6:14, 15) O kuila eie ua bhingi kulondekesa dingi muanhu, ni kuloloka dingi akuenu?

6. Ihi i tena kubhita, se tu kamba kulanga o ibanzelu ietu?

⁶ Se ki tu lange o ibanzelu ietu, tu tena kukala ni njinda, mba kuzemba muthu. Tu tena kubhangesa muthu mu kilunga, ku divua ue kiki. Né muene se tu bhanga ioso, phala o athu ka mone kuila tuala ni njinda, mba tua zembe muthu, mu kubhita thembu, ene a-nda mona o kidi kiki. Mu kusuluka, o jiphange jetu a-nda tu lenga. (Jisabhu 26:24-26) O tufunga a-nda tu kuatekesa bhu kaxi ka Bibidia. Ene a-nda fikisa ku tu kuatekesa kuloloka akuetu, ku xisa o njinda, ni unguma. (Ijila 19:17, 18; Loma 3:11-18) Se a bhanga kiki, o kuila tua-nda kaiela o itendelesu ia Mak’â Nzambi?

7, 8. (a) Kiebhi Jihova kiendesa o mundu uê? (b) Itendelesu iahi i tu sanga mu Bibidia, ni mukonda diahi tua tokala ku i kumbidila?

⁷ Lelu, Jihova uendesa o athu a tokala mu kilunga kiê mu ixi. Muene u a longa ue. Kiebhi kia bhanga kiki? Muene ua solo Kristu, phala kukala ku pholo dia kilunga. Kristu ua solo o ‘kimbadi kia fiiele,’ phala kulonga ni kuendesa o mundu ua Nzambi. (Efezo 5:23; Matesu 24:45-47) Kala kia bhangele o kibuka kia utuminu ku hama ia dianga, o kimbadi kiki, ki bhana ue valolo iavulu ku Bibidia  mukonda, Mak’â Nzambi. (Tanga 1 Tesalonika 2:13.) Itendelesu iahi i tu sanga mu Bibidia?

⁸ O Bibidia i tu tendelesa kuia mu iônge, ithangana ioso. (Jihebeleu 10:24, 25) Iene i tu suínisa kuxikina ngó mu milongi imoxi ia Bibidia. (1 Kolindo 1:10) Iene i tu tendelesa ue ‘ku dianga kusota o Utuminu.’ (Matesu 6:33) O Bibidia i tu tendelesa kuboka nzo ni inzo, mu ididi mu bhongoloka o athu, ni mu ididi ioso-ioso mu tu tena kusanga o athu. (Matesu 28:19, 20; Ikalakalu 5:42; 17:17; 20:20) Iene i tendelesa o tufunga kukolokota kulanga o kilunga, ni ki zele. (1 Kolindo 5:1-5, 13; 1 Timote 5:19-21) O Bibidia i tu tumina kukolokota mu kuzelesa o mikutu ietu, ni ku dilanga mu ibanzelu, ni idifua ia zembe Jihova.​—2 Kolindo 7:1.

9. Nanhi a mu solo kua Jezú, phala ku tu kuatekesa kutendela o Mak’â Nzambi?

⁹ Nange sai athu a banza kuila, ka bhingi muthu phala ku a jimbuluila o milongi ia Bibidia. Maji tundé ku muvu ua 1919, Jezú uene mu kuatekesa o athu kutendela o milongi ia Bibidia, bhu kaxi ka ‘kimbadi kia fiiele.’ Kioso ki tu belesela o milongi ia Bibidia, tu kuatekesa o kilunga kuzela, kutululuka, ni ku di bunda kumoxi. Mu kiki, dibhuidise: ‘O kuila nga-nda londekesa o ufiiele uami kua Jezú, mu kukaiela o itendelesu ia kimbadi kia fiiele?’

10. Kiebhi o divulu dia Izekiiele di jimbulula o mbandu ia kilunga kia Jihova ku diulu?

¹⁰ Bhu kaxi ka Bibidia, tua di longo kuila, o jiselevende ja Jihova ku diulu, a di sokejeka ue kiambote. Mu kifika, bhu kaxi ka kisuma, Ezekiiele ua mono Jihova kuendesa dikalu, dia kexile mu kuenda ni lusolo. Maji o dikalu didi, dia kexile mu bhiluka ué ni lusolo, phala kuia bhu kididi kioso-kioso bhua mesenene. (Izekiiele 1:4-28) O dikalu, di lombolola o mbandu ia kilunga kia Nzambi ku diulu, mukonda ki belesela o itendelelu iê ni lusolo luoso. Kiki kikuatekesa o mbandu ia mukuá ia kilunga kiê mu ixi, kubelesela ue. Xinganeka o ima iavulu ia lunguluka mu kilunga kia Nzambi, mu kuinhi dia mivu ia bhiti. Lembalala kuila, Jihova muéne ua mu lungulula o ima. Kua kambe ngó, Kristu ni ji-anju, a-nda buika o mundu iú ua iibha. Sé-ku muthu ua-nda bhukumukina dingi Jihova ni dijina diê, mba o ungana uê!

11, 12. Ihi iene mu bhanga o kilunga kia Jihova, mu izuua íii isukidila-ku?

¹¹ Xinganeka o ima iene mu bhanga o kilunga kia Jihova, mu izuua íii isukidila-ku. Kutunga. Jiphange javulu ene mu kalakala kiavulu, phala kutunga o mbonge ia Jimbangi ja Jihova mu mbanza ia Warwick, ku Nova York, Estados Unidos. Midi ni jimidi ja jiphange ja mukuá ku mundu uoso, a dibhakula ué phala kutunga Ididi ia Ubhezelu, ni jifiliiale. O jiphange jiji, a  kaiela o itendelesu ia Kibuka Kia Kutunga. Tu sakidila kiavulu o jiphange jiji, ja mu kalakala kiavulu, phala kutunga o ididi íii! O jiselevende ja Jihova ku mundu uoso, a sangela kima mu vondadi iâ, phala ku kuatekesa kutunga o ididi íii. Jihova u besoala o mundu uê, mukonda dia kulenduka kuâ, ni ufiiele uene mu londekesa.​—Luka 21:1-4.

¹² Kulonga. Jihova ua uabhela kulonga o mundu uê. (Izaia 2:2, 3) Xinganeka o jixikola javulu ji tuala na-ju. Kuene o Xikola ia Aboki a Thembu Ioso, o Xikola ia Akunji a Utuminu, o Xikola ia Ngiliiade, Xikola ia jiphange a mateka ku kalakala ku betele, Xikola Phala o Tufunga Tua Ilunga ni Ahatu’â, o Xikola ia Tufunga Tua Kilunga, o Xikola ia Tufunga ni Akuatekexi a Tufunga, ni Xikola Phala o Kibuka Kia Filiiale ni Ahatu’â. Mu kijimbuete kietu jw.org, tu sanga-mu ue jibibidia, ni madivulu a Bibidia o lungulule mu madimi avulu. Mu kijimbuete kiki, tu sanga-mu ue mbandu phala o tuana ni miji, ni mbandu phala o ima ia ubhe. O kuila uene mu kalakala ni kijimbuete kietu jw.org, mu ukunji ni mu ubhezelu ué ku muiji?

13. Ihi ia tokala kubhanga o mundu ua Jihova?

¹³ Ujitu ua dikota kubhanga mbandu ia kilunga kia Jihova, ni kuijiia o ima i kingila Nzambi ko kuetu! Kuma tuejiia o ima i sangulukisa Nzambi, tua tokala ku mu belesela, ni kubhanga o kima kia tokala. Né muene se athu avulu a zola kubhanga ima iaiibha, tua tokala ‘kuzemba o kituxi,’ kala ki bhanga Jihova. (Jisálamu 97:10) Ki tu tokala kubhanga kala o athu a banza kuma, ‘o kiaiibha, kiambote, o kiambote, kiaiiba.’ (Izaia 5:20) Tua mesena kusangulukisa Jihova. Mu kiki, tua tokala kubhanga ioso, phala kuzela mu maukexilu oso. (1 Kolindo 6:9-11) O ima i tu tangela Jihova mu Bibidia, phala o mbote ietu. Etu tua mu zolo. Mu kiki, tua mesena ku mu londekesa o ufiiele uetu. O henda i tu bhangesa ku mu belesela, ki kale bhu bhata, mu kilunga, ku salu, bhu xikola, mba mu ididi ioso mu tu bhita. (Jisabhu 15:3) Xinganeka o maukexilu mu tu tena kulondekesa o ufiiele uetu kua Nzambi.

14. Kiebhi o jitata kia tena kulondekesa o ufiiele uâ kua Jihova?

¹⁴ O ukexilu u tu longa o tuana tuetu. Mu Bibidia, Jihova u tangela o jitata, kiebhi kia tokala kulonga o tuana tuâ. O Jikidistá a tokala ku di langa, phala ka banze kala ki banza o athu ku mundu. (Efezo 2:2) Mu kifika, mu ididi ia mukuá, nange o tata u banza: ‘Mu ixi ietu, o ahatu ene a langa o tuana.’ Maji tu tena kumona ni kidi kioso kuila, o Bibidia i tendelesa o jitata kulonga o tuana tuâ kuzola Jihova. (Efezo 6:4) O jitata a zolo Jihova, a mesena kuila, o tuana tuâ a kala ni ukamba uambote ni Jihova, kala o ukamba ua kexile nau Samuuele, kioso kiexile munzangala.​—1 Samuuele 3:19.

15. Kiebhi ki tu tena kulondekesa o ufiiele uetu kua Jihova, kioso ki tu sola ima ia makota ku muenhu uetu?

¹⁵ O ukexilu uetu ua kusola o ima. Ande dia kusola ima ia dikota ku muenhu uetu, tua tokala kusota kuijiia ihi i banza Jihova, phala kukolokota mu ufiiele uetu. Tu tena kutambula kikuatekesu bhu kaxi ka Bibidia, ni kilunga kiê. Mu kifika, sai jitata, a xisa o jixi jâ phala ku tunga mu ixi iengi. Kioso kia vuala an’a, ene a sola kutumikisa o tubuetele ku bhata, phala kua sasa kuala o jindandu jâ. Mu kubhanga kiki, o jitata a tena kusuluka mu kukalakala, phala kunganhala kitadi. Mu kidi, muthu ni muthu uala ni ufolo ua kusola o ima ku muenhu uê. Maji o dikaza dia tokala ku dibhuidisa: ‘Kiebhi kia-nda divua Jihova, mu kima ki tua solo?’ (Tanga Loma 14:12.) Ande dia kusola ima ia makota ia lungu ni muiji uetu, mba kikalakalu kietu, kima kiambote ku dianga kusota o kikuatekesu kia Bibidia. Tua bhingi o kikuatekesu kia Tata ietu, mukonda ki tuala ni kutena kua kuendesa o makanda metu.​—Jelemiia 10:23.

16. Ihi ia mesenene kusola o mama, kioso kia vuala o mon’ê? Ihi ia mu kuatekesa kubhanga o kima kia tokala?

 ¹⁶ Sai dikaza, diai mu tunga mu ixi iengi. Kioso kia vuala o mona, ene a mesenene ku mu tumikisa ku bhata, phala ku mu sasa kuala o jikuku jâ. Maji mu kithangana kienhókio, o muhatu ua mateka ku di longa o Bibidia ni Mbangi ia Jihova. Muene ua di longo kuila, ua kexile ni kikalakalu kia kulonga mon’ê kuzola Jihova. (Jisálamu 127:3; Jisabhu 22:6) Kala ki tendelelsa o Bibidia, o muhatu iú ua sambe kua Jihova, iú ua diondo phala ku mu kuatekesa kubhanga o kima kia tokala. (Jisálamu 62:7, 8) Muene ua zuela ue o maka oso akexile mu bhita nau, kua phange ua kexile ku mu longa o Bibidia, ni jiphange ja mukuá mu kilunga. Sumbala o jindandu jê ni makamba mê akexile ku mu jijidika kutumikisa o kabuetele ku jikuku jê, muene ka xikina. O muadi uê ua mono o kikuatekesu kia kexile mu bhana o jiphange ku muhatu’ê, ni mon’ê. Muene ua diuana! Mukonda dia kiki, ua mateka ku di longa o Bibidia, ni kuia mu iônge kumoxi ni muiji uê. Xinganeka o kisangusangu kia kexile na-kiu o muhatu iú, kioso kia mono kuila, Jihova ua tambuijila o musambu uê!

17. Itendelesu iebhi i tua tokala kukaiela, kioso ki tu longa dixibulu dia Bibidia?

¹⁷ O itendelesu i tua tokala kukaiela. Se tua mesena kulondekesa o ufiiele uetu kua Nzambi, tua tokala kukaiela o itendelesu i tu bhana o kilunga kiê. Mu kifika, xinganeka mu kima ki tua tokala kubhanga, kioso ki tu mateka ku longa o divulu Ihi i Longa o Bibidia? ku muthu. A tu tendelesa kuila, kioso ki tuia mu longa o dixibulu, tua tokala kukatula kithangana, phala ku mu kuatekesa kuijiia dingi ia lungu ni kilunga kia Jihova. Tu tena kukalakala ni vidiu, Ihi Iene mu Bhanga Bhu Kididi Kia Ubhezelu? ni kadivulu, A Nanhi a mu Bhanga o Vondadi ia Jihova Lelu? Kioso ki tu zubha o divulu Bibidia i longa, tu tena kukuatekesa dingi o dixibulu ‘kukolesa o kuxikanu’ kiê, mu ku mu longa o divulu ‘Kala Mu Henda ia Nzambi,’ né muéne se a mu batizala kindala. (Kolose 2:7) O kuila ua mu kaiela o itendelesu íii ia kilunga kia Jihova?

18, 19. Ima iahi ia tokala ku tu bhangesa kusakidila Jihova?

¹⁸ Kuene ima iavulu ia tokala ku tu bhangesa kusakidila Jihova! Mu kifika, “mua muène ngó mu tu muena o kulâia ni kuzamba.” (Ikalakalu 17:27, 28) Muene ua tu bhana ue o Maka mê, o Bibidia. Kala kia bhangele o Jikidistá akua Tesalonika, tu bhana valolo ku ujitu iú, mukonda muene ua soneka-mu njimbu phala etu.​—1 Tesalonika 2:13.

¹⁹ O Bibidia iene mu tu kuatekesa kuzukama dingi kua Jihova. Mukonda dia kiki, muene u tu zukama ue. (Tiiaku 4:8) Tu sakidila kiavulu Tat’etu, mukonda muene ua tuixana phala kukala mu kilunga kiê! Tu divua kala o mukua jisalamu, ua soneka: “Sakidilenu Jihova o mbote iê; kuma kulenduka kuê ki kuene kúbhua.” (Jisálamu 136:1) Mu jivelusu joso ja sálamu íii, o mukua jisalamu ua tumbula o izuelu, o “kulenduka kuê ki kuene kúbhua.” Sé phata, se tu londekesa o ufiiele uetu kua Jihova, ni kukaiela o itendelesu ia tu bhana bhu kaxi ka kilunga kiê, muene ua-nda tu bhana o muenhu ua kalela-ku. Muene ua-nda tu londekesa ue o ufiiele uê, katé ku hádia ni hádia!