1. O mimbu i tu kuatekesa kubhanga ihi?

SAI musoneki ua mimbu ua zuela: “O izuelu i ku bhangesa kuxinganeka. O muimbu u ku bhangesa kudivua kiambote. Maji kioso ki uimba, uivua o ixinganeku ié.” O mimbu ietu i ximanesa o Tata ietu ia diulu, Jihova. I tu bhangesa ku mu zukama dingi. Mu kiki, o kuimba kubhanga ue mbandu ia ubhezelu uetu kua Jihova, ki kale se tuala ubheka mba ni jiphange jetu.

2, 3. (a) Sai athu a divua kiebhi mu kuimba ni dízui dia suina mu kilunga? (b) Ibhuidisu iebhi i tua-nda tambuijila mu milongi íii?

² Kiebhi ki u divua kioso ki uimba ni jiphange mu kilunga? O kuila u kala ni jisonhi? Sai jixi, o maiiala kene mu divua kiambote kuimba bhu kididi muala athu avulu. O kibanzelu kiki ki tena kubhangesa ue o jiphange mu kilunga kukala ni jisonhi mu kithangana kia kuimba, benge-benge se o tufunga a kala ni hele mba a bhanga ikalakalu iengi mu kithangana kiki.—Jisálamu 30:12.

³ O mimbu i bhanga mbandu ia ubhezelu uetu kua Jihova.  Mu kiki, ki tua tokala kubhanga ima iéngi mu kithangana kia kuimba. Etu enioso tua bhingi kudibhuidisa: ‘Kiebhi ki ngene mu mona o mimbu ietu? Ihi i nga tokala kubhanga se ngene mu kala ni hele mu kuimba bhu kaxi ka athu avulu? Ni kiebhi ki ngi tena kuimba o mimbu ni muxima uoso?’

4, 5. Kiebhi kia kexile o ibuka ia mimbu mu tembulu mu Izalaiele?

⁴ O musoso ulondekesa kuila, tundé ukulu o jiselevende ja Jihova ene ku mu bheza ni mimbu. Kioso o akuâ Izalaiele kiexile mu bheza Jihova ni ufiiele uoso, ene akexile mu bhana valolo iavulu ku mimbu. Mu kifika, kioso Davidi kia sokejeka o ima phala o thembulu ia Nzambi, muene ua solo 4.000 ja maiala a tokalele ku muiji ua Levi phala kuximana Jihova ni mimbu. Bhu kaxi kâ, kuexile 288 a athu “a dilongo kiambote mu kuimbila Jihova . . . Ene oso jimesene muene ja kuimba.”—1 Malunda 23:5; 25:7.

⁵ Kioso kia zubha kutunga o thembulu, akua Izalaiele a ximana ue Jihova bhu kaxi ka mimbu. O Bibidia i tu tangela: “Ene há a tongesa muene mu kuxikila jikoloneta kumoxi, ni mu kuimba ue, embila mbimbi imoxi ngó i uivua, mu kutumbula o mbote ni kuximana Jihova; o kioso ene kia zangula o mbimbi kumoxi ni jikoloneta ni jingoma ja ngòndo ni ima dingi ia mukuá ia kuxika o mimbu, ni kutumbula Jihova, . . . mbata o kizunda kia Jihova kiezalesa o inzu ia Nzambi.” O ima ia bhiti mu kizuua kienhokio, ia suinisa kiavulu o kixikanu kia akuâ Izalaiele.—2 Malunda 5:13, 14; 7:6.

6. Ihi ia bhange Nehemiia kioso kiexile nguvulu mu mbanza ia Jeluzaleme?

⁶ Kioso Nehemiia kia sokejeka o akua Izalaiele phala kutunga o ilumbu ia Jeluzaleme, muene ua sokejeka ue o akua Levi phala kuxika ni kuimba mimbu. Mu kithangana kienhokio, o athu a sangulukile kiavulu mu kumona o Jilevita akexile mu kuimba ni uhete uoso. Nehemiia ua solele ‘ibuka iiadi ia makota ia ji ngimbidi.’ Kuma kuexile ibuka iiadi, kibuka kimoxi kiai ku mbandu ia kadilu, kia mukuá ku mbandu ia kiasu, anga a mateka ku nhunga o ilumbu, katé kia disanga mu kaxi ka thembulu. Ene akexile mu kuimba ni kusuina kuoso, mukonda dia kiki, katé muene ni ió a tungile dikanga akexile mu kuívua o mazui mâ. (Nehemiia 12:27, 28, 31, 38, 40, 43) Tuejiia ni kidi kioso kuila, Jihova ua sangulukile kiavulu, mu kumona o jiselevende jê ku mu ximana ni kisangusangu kioso.

7. Kiebhi Jezú kia londekesa kuila, o mimbu i bhanga mbandu ia ubhezelu ua kidi?

⁷ Mu izuua ia Jezú, o abhezi a Jihova akexile ue mu kuimba. Kiki, kiene kia bhiti mu usuku ua beta-o-kota phala o athu oso mu ngongo. Kia zubha kubhanga o Fesa ia Lembalasa, Jezú ni maxibulu mê, a ximana Jihova mu kuimba mimbu.—Tanga Matesu 26:30.

8. Kiebhi o Jikidistá ja dianga ja tu bhana phangu ia kuximana Nzambi bhu kaxi ka mimbu?

⁸ O Jikidistá ja dianga, a bhanene phangu iambote, mukonda ene akexile ue mu kuimba, phala kuximana Nzambi. O Jikidistá ku hama ia dianga kexile mu diongeka mu thembulu kala akuâ Izalaiele. Ene akexile mu diongeka mu jinzo ja jiphange. Sumbala o jinzo ki ji fuamene kiavulu kala o thembulu,  maji né kiki, ene akexile mu kuimba ni kusuina kuoso. Poxolo Phaulu ua tangela o jiphange jê uixi: “Mu kala mu ku di longa mudienu, ni ku di bhana phangu ni unjimu uoso. Muimba jinga mu jisalamu, ni mikumbi, ni mimbu ioso ia nzumbi. Muimbila jinga Nzambi ni muxima uezala kisakidilu.” (Kolose 3:16) Tua tokala kuimba o mimbu ietu ni “muxima uezala kisakidilu.” O mimbu, i bhanga mbandu ia ‘kúdia kuetu mu nzumbi,’ ku tu bhana o ‘kimbadi kia fiiele, mu ola joso ja tokala.’—Matesu 24:45.

9. (a) Mukonda diahi sai athu a kala ni hele ia kuimba ni dízui dia suina mu iônge? (b) Kiebhi ki tu tena kuimbila Jihova? A nanhi a tokala kubhana phangu mu kuimba? (Tala o foto ia dianga.)

⁹ Ima iahi i ku bhangesa kukala ni jisonhi mba hele ia kuimba? Nange, ku ua tundu mba ku muiji ué, o athu kene mu kuimba kiavulu. Nange eie uivua ji ngimbidi mu mitelembe. Kioso ki u sokesa o uhete uâ mu kuimba, eie u divua kuila, ku ijiia kuimba. Maji etu enioso tuala ni ujitu ua dikota ua kuximana Jihova, bhu kaxi ka mimbu. Mu kiki, kioso ki uia ni kuimba, kuata kiambote o divulu dié, emanesa o mutué, anga imba ni kusuina kuoso. (Ejidala 3:11; Tanga Jisálamu 147:1.) Mu Ididi ietu ia Ubhezelu, o izuelu ia mimbu ene mu ilondekesa mu mitelembe ia izunzumbia. Kiki, ki tu kuatekesa kuimba kiambote. Kima kiambote kuijiia kuila, o mimbu i bhanga ue mbandu ia Xikola ia tufunga. Kiki kilondekesa kuila, o tufunga a tokala kubhana phangu iambote mu kithangana kia kuimba mu iônge.

10. Ihi i tua bhingi o kulembalala se tuala ni hele ia kuimba ni dízui dia suina?

¹⁰ Avulu a kala ni hele ia kuimba ni dízui dia suina mukonda, a banza kuila, se emba  ni dízui dia suina, a-nda londekesa kuila a mu dizangeleka. A mukuá a banza kuila, ala ni mbimbi iaiibha. Maji, tua bhingi kulembalala kuila, “etu-ene oso, tuene mu [tondala] mu ima iavulu,” kioso ki tu zuela. Maji né kiki, ki tuene mu dixibha. (Tiiaku 3:2) Mu kiki, o kuila tua bhingi muene kukamba kuximana Nzambi ietu, mukonda o dízui dietu ki diambote?

11, 12. Kiebhi ki tu tena kubandekesa o uhete uetu ua kuimba?

¹¹ Sai bhabha, ki tuene mu kuimba mukonda, ki tuejiia kiebhi ki tu tena o kuimba. Maji, sai ima i tu tena kubhanga phala kubandekesa o uhete uetu ua kuimba. *—Tala ku luiji.

¹² Phala kuimba ni dízui dia suina, ua bhingi kubhuima kiambote. Mu kifika, o kandeia phala kumuika kiambote ka bhinga nguzu ia mukengeji. Kiene ue kimoxi, o kubhuima kubhana nguzu ku dízui dietu. Mu kuimba, bhanga kala ki uene mu zuela, maji bandekesa bhofele o nguzu ié. (Tala o jindunge ja ka mukuá mu divulu Beneficie-se da Escola do Ministério Teocrático, mu jimbandu ja 181 ndu 184, mu diambu “Controle Correto da Respiração.”) Mu kidi, o Bibidia i suinisa o abhezi a Jihova kuimba ni kisangusangu, iene iamba: “Sangulukenu kua Jihova.”—Jisálamu 33:1-3.

13. Jimbulula kiebhi ki tu tena o kuimba ni kiambote.

¹³ Kioso ki uia mu bhanga o ubhezelu ku muiji mba kudilonga ubheka, fikisa hanji o ndunge íii: Sola muimbu u ua uabhela kiavulu. Tanga o izuelu iala-mu ni dízui dia suina. Mu kusuluka, tanga o izuelu iiadi mba itatu, mu kithangana kimoxi. Anga, imba o mbandu ioso mu ukexilu umoxi. (Izaia 24:14) Se u bhanga kiki, ua-nda mona kuila, o dízui dié dia-nda suina dingi. O kiki kima kiambote. Ku bhingi kukala ni jisonhi mba hele ia kuimba mu ukexilu iú.

14. (a) Kiebhi o kujikula kiambote o dikanu, ku tena ku tu kuatekesa kuimbila kiambote? (Tala o kaxa “ Bandekesa o Uhete ué ua Kuimba.”) (b) Ndunge jebhi ji tena kubhangesa o dízui dietu kukala kiambote?

¹⁴ Phala kukala ni uhete ua kuimba, ua bhingi ue kujikula kiambote o dikanu. Mu kiki, kioso ki uia ni kuimba, kana kujikula o dikanu kala ua mu zuela. Maji ihi i ua tokala kubhanga se ki uala ni dízui diambote?  Eie u tena kusanga jindunge jambote mu divulu Beneficie-se mu mbandu 184. Momo muala kaxa ni diambu “Como superar problemas específicos.” Ua-nda sanga-mu jindunge jambote phala o athu kala ni dízui diambote.

15. (a) Ngolokela iebhi ia bhana mu kiônge kia muvu ua 2016? (b) Mukonda diahi a bhange divulu dia ubhe dia kuimba?

¹⁵ Mu kiônge kia muvu ua 2016, o Phange Stephen Lett ua tokala mu Kibuka Kia Utuminu, ua bhana ngolokela ia lungu ni divulu dia ubhe dia kuimba ni diambu “Cante de Coração para Jeová.” O divulu didi a di bhange mukonda sai izuelu io lungulule. A bandekesa-ku dingi mimbu izuela ia lungu ni sidivisu ia kuboka, ni ujitu ua kukula. Kuma o mimbu i bhanga mbandu ia ubhezelu uetu kua Jihova, o Kibuka Kia Utuminu, kia mesenene kubhanga divulu dia kuimba dia fuama dingi. O kapa ia divulu dia kuimba, ia difu ngó ni ia Bibidia ia ubhe.

16, 17. Ima iahi dingi io lungulule mu divulu dietu dia kuimba?

¹⁶ Ki kibhonza kukalakala ni divulu dietu dia ubhe dia kuimba. A sokejeka kiambote o mimbu, mu diambu ni diambu. Mu kifika, o 12 ia mimbu ia dianga, i zuela ia lungu ni Jihova, o 8 ia kaiela, izuela ia lungu ni Jezú ni sata ia kukula, ni milongi ia mukuá dingi. Mu dimatekenu, muala diambu  dia mimbu ioso. Kiki ki kuatekesa benge-benge o jiphange a sola mimbu phala o madiskursu.

¹⁷ Phala ku tu kuatekesa kuimba ni muxima uoso, sai mimbu, a i bhebhulukisa dingi. A katula-mu o izuelu ia bhonzo, anga a soneka izuelu i tuene mu tumbula dingi mu izuua ietu. Mu kifika mu phutu, o muimbu ua kexile ni diambu “Longanimidade”, a i lungulula “Seja paciente”. A bhange kiki, mukonda, dia izuelu i moneka mu Bibidia Tradução do Novo Mundo revisada. O muimbu uexile ni diambu “Ore a Deus sem cessar,” a i lungulula “Sempre a Deus vou orar.” Mukonda diahi a lungulula kiki? Mukonda o izuelu ia muimbu iú, iexile kitendelesu phala o athu mu kilunga. Maji mu ilunga ietu sai athu avulu kala ni ujitu ua kubhana itendelesu, kala o minzangala, o maxibulu a Bibidia ni athu a mukuá. Sai athu akexile mu divua kiaiibha kioso kia kexile mu kuimba o muimbu iú.

18. Mukonda diahi tua bhingi kuijiia o mimbu ia divulu dietu dia ubhe?

¹⁸ Sai mimbu iavulu ia divulu dietu dia kuimba, a i soneka kala misambu. O mimbu iii, i tena ku tu kuatekesa kutangela Jihova, kiebhi ki tua mu divua. O mimbu ia mukuá, ia-nda tu suinisa “kubhanga o mbote.” (Jihebeleu 10:24) Tua tokala kusota kuijiia o mikumbi, ni izuelu ia mimbu ioso. Tu tena kubhanga kiki, mu kuívua o mimbu io ngalavale. O mimbu iii, tu i sanga mu kijimbuete jw.org. Se u kala ni kifua kia kuimba o mimbu ku bhata dié, ua-nda tena kuimba ni kisangusangu kioso, sé hele. *—Tala ku luiji.

19. Kiebhi athu oso mu kilunga kia tena o kubheza Jihova?

¹⁹ Lembalala kuila o mimbu, i bhanga mbandu ia ubhezelu uetu kua Jihova. O kuimba, ukexilu ua dikota ua kulondekesa o henda ietu kua Jihova, ni ku sakidila ku ima ioso i tu bhangela muene. (Tanga Izaia 12:5.) Kioso ki uimba ni kisangusangu, u suinisa ue akuenu kubhanga kiki. Etu enioso mu kilunga, kikale o minzangala ni adiakimi, tu tena kuximana Jihova ni kisangusangu. Mu kiki, kana kukala ni hele ia kuimbila Jihova ni muxima uoso. Kaiela o phangu ia mukua jisalamu. Muene uambe: “Imbilenu Jihova.” Kiene muene, imbila Jihova ni muxima uoso!—Jisálamu 96:1.