1, 2. (a) Ibhidi iebhi iene mu dibhana na-iu o asonhi? (Tala o foto ia dianga.) (b) Kitendelesu kiebhi kia bhanene poxolo Phaulu, ni ibhuidisu iebhi i tua-nda dilonga?

MU 30 A MIVU ku dima, Osei ua tundu mu ixi ia Gana, phala kuia mu tunga ku Europa. Mu kithangana kieniókio, muéne kexile luua Mbangi ia Jihova. ^[1] (Tala kudisukilu dia milongi.) Muéne uambe: “Nga mono kuila, o athu ka kexile mu ngi suua. Kia bhonzele ué, mukonda kuexile mbambi iavulu. Kioso ki nga tuluka, nga mono kuila kua kexile mu bhusa kiavulu, nga mateka kudila mukonda dia mbambi.” Kuma kia bhonzele phala Osei kudilonga dimi diéngi, muéne ua bhiti muvu umoxi ndenge mu kusota salu iambote. Mukonda dia kukala dikanga, muéne ua kexile ni ngunzu iavulu ia muiji uê. Ua kexile ué mu divua ubheka.

² Se ua kexile mu dibhana ni maka a difu ni a Osei, kiebhi ki ueji mesena kuila o athu a ku talatala? Mu kidi, eie ueji sanguluka kiavulu, se o jiphange a ku tambuluile kiambote bhu Kididi Kia Ubhezelu. Ueji sanguluka ué mu kuijiia kuila, ene  kala ni kathombo ka ixi ié mba kikonda kié, maji a ku zolo. Mu kidi, o Bibidia izuela kuila, o Jikidistá ja kidi ka tokala “kufula kutambulula asonhi.” (Jihebeleu 13:2) Mu kiki, tua-nda dilonga o ibhuidisu ia kaiela: Kiebhi Jihova kia mona o athu akua ixi iéngi? O kuila tua bhingi kulungulula o ukexilu uetu ua kumona o athu akua jixi jengi? Ni kiebhi ki tu tena kukuatekesa o asonhi kudivua kiambote mu kilunga kietu?

3, 4. Kála kilondekesa o divulu dia Makatukilu 23:9, kiebhi o akua Izalaiele kia tokalele kutalatala o asonhi, ni mukonda diahi?

³ Kioso Jihova kia bhulula o mundu uê ku ubhika mu ixi ia Ijitu, muéne ua a bhana itumu ia londekesele kiebhi kia tokalele kulondekesa o henda ku athu akua jixi jengi, a ile kumoxi ni ene. (Makatukilu 12:38, 49; 22:21) Jihova uejidile kuila, kibhonza kutunga mu ixi iéngi. Mukonda dia kiki, Jihova ua a londekesa o henda. Mu kifika, o akua jixi jengi, a tenene kubhongolola o kudia kua subhukile ku mábhia a akua Izalaiele.​—Ijila 19:9, 10.

⁴ Jihova ua mesenene kuila, o mundu uê u xila o asonhi. Muéne ua mesenene kuila, ene a di lembalala kiebhi kia kexile mu divua kioso kia tungile mu ixi iéngi. (Tanga Makatukilu 23:9.) Né muene ande dia akua Izalaiele kukala abhika mu ixi ia Ijitu, o akua Ijitu a a zembele, mukonda ka difuile ni ene. (Dimatekenu 43:32; 46:34; Makatukilu 1:11-14) O akua Izalaiele a tale hadi iavulu mu ixi ia Ijitu. Jihova ua mesenene kuila, ene a di lembalala o ima íii, ni kulondekesa o henda ku asonhi a tungile mu ixi iâ.​—Ijila 19:33, 34.

5. Ihi ia-nda tu kuatekesa kulondekesa henda ku asonhi, kála ki bhanga Jihova?

⁵ Jihova ka lunguluka. Mu kiki, kioso ki tu tambula o athu akuâ jixi jengi mu kilunga kietu, tua tokala kulembalala kuila, Jihova ua zolo o athu enhá. (Matendelelu 10:17-19; Malakiia 3:5, 6) Tua tokala kuxinganeka mu ibhidi i tena kubhita na-iu o asonhi. Mu kifika, nange ene ka tendela kiambote o dimi dia ubhe, mukonda dia kiki, nange a a talatala kiaiibha. Mu kiki, tu bhange ioso, phala ku a kuatekesa, ni ku a londekesa o henda.​—1 Phetele 3:8.

6, 7. Ihi ilondekesa kuila, o Jikidistá mu Judá, a tolola o kathombo?

⁶ Mu izuua ia jipoxolo, o Jijudé akexile ni kathombo ka athu akuâ jixi jengi. Maji o Jikidistá a bhange ioso phala kutolola o kathombo. Mu kizuua kia Pendekoxi kia muvu ua 33, o Jikidistá a tungile mu mbanza ia Jeluzaleme, a zalela o athu a jixi jengi. (Ikalakalu 2:5, 44-47) Kiki kia londekesa kuila, o Jikidistá a tendela kiambote se ihi ilombolola o “kutambulula asonhi.” O kutambulula o asonhi, kilombolola kulondekesa o henda ku asonhi.

⁷ Maji mu kubhita thembu, kua moneka maka. O Jijudé akexile mu zuela o dimi dia Ngeleku, a zuela kuila, kexile mu talatala  kiambote o atudi’â. (Ikalakalu 6:1) Phala kubatula o maka enhá, o jipoxolo a solo sambuadi dia maiala, phala kulanga kiambote o sidivisu íii. O maiala enhá, exile ni majina a Ngeleku. Ene a bhange kiki, mukonda a mesenene kuila, o atudi a divua kiambote.​—Ikalakalu 6:2-6.

8, 9. (a) Ibhuidisu iebhi ia-nda tu kuatekesa kumona, se tuala ni kathombo ka athu mba kana? (b) Ihi i tua tokala kuxisa? (1 Phetele 1:22)

⁸ O ijila ia ixi ietu, nange i tena ku tu funhisa. (Loma 12:2) Nange tu tena kuívua o jivizinhu jetu, jikoleka ja xikola, mba ja salu, kuzuela ima iaiibha ia lungu ni athu akua jixi jengi, akua diembu diéngi, mba ia lungu ni athu a kikonda kiéngi. O kuila tuehela o ixinganeku iaiibha ia athu enhá ku tu fuinhisa? Kiebhi ki tu divua kioso muthu kia zuela ima iaiibha ia lungu ni ijila ia ixi ietu?

⁹ Saí kithangana, poxolo Phetele uexile ni kathombo ka athu akuâ jixi jengi. Maji mu kubhita thembu, muéne ua tolola o kidifua kiki kiaiibha. (Ikalakalu 10:28, 34, 35; Ngalásia 2:11-14) Kiene kimoxi ué, se tu mona kuila tuala ni kathombo ka athu, tua tokala kubhanga ioso phala kutolola o kidifua kiki kia iibha. (Tanga 1 Phetele 1:22.) Ihi i tena ku tu kuatekesa kubhanga kiki? Tua tokala kulembalala kuila, etu enioso tu akua ituxi, ni kuila, sé-ku muthu ua fuama kubhuluka. (Loma 3:9, 10, 21-24) Mu kiki, sé-ku kima ki tena ku tu bhangesa kudivua kuila, etu tua beta-o-kota, akuetu ndenge! (1 Kolindo 4:7) Tua tokala kukaiela o phangu ia poxolo Phaulu. Muéne ua tangela o jiphange jê kuila, ene kexile dingi ‘asonhi,’ maji ‘a tokalele ku muiji ua Nzambi.’ (Efezo 2:19) Etu enioso tua tokala kubhanga ioso, phala kutolola o kathombo, ni kukala ni idifua ia ubhe.​—Kolose 3:10, 11.

10, 11. Kiebhi Bouaji kia kaiela o ukexilu ua Jihova ua kumona o asonhi?

¹⁰ Bouaji, o diiala dia fiiele, ua kaiela o phangu ia Jihova ia kumona o asonhi. Kiebhi kia bhange kiki? Kioso Bouaji kiai mu mona o idima ku mábhia mê, ua mono o muhatu a mu ixanene Lute. Lute uexile musonhi, mukonda uexile mukua Mouabhe. Muéne ua kexile mu kalakala ni kusuína kuoso, mu ku bhongolola o idima ia subhukile ku mábhia. O Kitumu Kia Mozé kia londekesele kuila, o asonhi akexile ni ufolo ua kubhongolola o ima ia subhukile ku mábhia. Maji kioso Bouaji kiévu kuma, Lute ua bhingile phala kubhongolola mu mábhia mê, muéne ua diuana kiavulu. Mukonda dia kiki, Bouaji ua mu ehela kubhongolola katé muene ni idima io bhakele phala muéne.​—Tanga Lute 2:5-7, 15, 16.

¹¹ O ima ia bhiti ku pholo, ia londekesa kuila, Bouaji ua mesenene kukuatekesa Lute, mukonda uejiidile kuila o kutunga mu ixi iéngi, kubhonza kiavulu. Muéne uexana Lute, phala kukalakala kumoxi ni ilumba. Bouaji ua bhange kiki, phala ku mu langa. Muéne ka mesenene kuila, a mu bhanga kiaiibha ku maiala akexile mu kalakala mu mábhia. Muéne ua mu bhana ué menha ni kudia kua soko, kála kiexile mu bhanga ni akalakadi’ê. Bouaji ua kexile mu xila Lute, sumbala muéne uexile ngadiama  ni kuila, ua tokalele mu ixi iéngi. Muéne ua mu suínisa ué.​—Lute 2:8-10, 13, 14.

12. Ihi i tena kubhita se tu londekesa o henda ku akuetu?

¹² Bouaji ka londekesa ngó o henda iê kua Lute mukonda dia muene kuzola ukouê Nouemi, maji ua ki bhange mukonda dia Lute kusola kubheza Jihova, ni kusota kikuatekesu Kiê. Mukonda dia kulondekesa o henda iê kua Lute, Bouaji ua kexile mu kaiela o phangu ia henda ia Jihova. (Lute 2:12, 20; Jisabhu 19:17) Lelu, se tu londekesa o henda ietu ku akuetu, tua-nda tena kukuatekesa o “athu oso” kuijiia o kidi, ni kumona o henda ia Jihova.​—1 Timote 2:3, 4.

13, 14. (a) Mukonda diahi kima kiambote kutambulula o asonhi mu iônge ietu? (b) Ihi i tena ku ku kuatekesa kuzuela ni muthu uala ni ijila iengi?

¹³ Tu tena kulondekesa o henda ietu ku akua jixi jengi, mu ku a tambulula kiambote mu iônge ietu. O akuâ jixi jengi, ku dimatekenu nange a kala ni jisonhi. Mukonda dia kiki, a kala ubheka uâ. Mukonda dia ijila iâ ni uadiama, nange ene a divua sé valolo bhu kaxi ka athu akuâ ixi. Mu kiki-phe, etu tua tokala ku dianga kua londekesa o henda. Se o kijimbuete JW Language kiala kiá mu dimi dié, kiene ki tena ku ku kuatekesa kuijiia o ku menekena o musonhi mu dimi diê dia uvualukilu.​—Tanga Filipe 2:3, 4.

¹⁴ Nange u divua kiaiibha, kioso ki u zuela ni muthu uala ni ijila iengi. Phala kutolola o kidifua kiki, mu tangele kima kia lungu n’eie. Nange eie ua-nda diuana mu kumona kuila, saí ijila i muala na-iu, iene imoxi. Lembalala kuila, o ijila ia jixi joso, iala ni ima iauabha, ni ima iaiibha.

15. Ihi ia-nda tu kuatekesa kutendela kiambote o athu akuâ jixi jengi?

¹⁵ Phala kukuatekesa akuetu kudivua kiambote mu kilunga, dibhuidise: ‘Ihi i ngeji kingila ku athu se nga tungile mu ixi iéngi?’ (Matesu 7:12) Londekesa muanhu ku athu a mu bhanga nguzu, phala ku ijiidila o ijila ia ixi. Ku dimatekenu, nange ki tua-nda tendela kiambote o ukexilu uâ ua kumona ni kubhanga o ima. Mu veji dia kumesena kuila, ene a mona ni kubhanga o ima kála ki tu bhanga mu ixi ietu, ki kima kiambote kusota kutendela o ukexilu uâ?​—Tanga Loma 15:7.

16, 17. (a) Ihi i tu tena kubhanga phala kuijiia kiambote o athu akuâ jixi jengi? (b) Ihi i tu tena kubhanga phala kukuatekesa o asonhi mu kilunga kietu?

¹⁶ Se tu sota kudilonga ia lungu ni ijila ia asonhi ala mu kilunga, nange ki kua-nda tu bhonza kubhanga na-u o ukamba. Mu kizuua kia ubhezelu ku muiji, nange tu tena kutokuesa o ijila ia athu akua jixi jengi a tungu mu diembu dietu. Mba nange tu tena kuixana o athu enhá, phala kudia kama koso-koso kubhata dietu. Jihova ua ‘jikula o njila ia ku xikana,’ mu kiki, etu tu tena kujikula o mabhitu metu phala kuzalela o asonhi a tundu mu jixi jengi, mukonda ene “a tokala mu dianda dia  kuxikana.”​—Ikalakalu 14:27; Ngalásia 6:10; Jobe 31:32.

¹⁷ O kubhita kithangana kia soko ni athu akuâ jixi jengi, kua-nda tu kuatekesa kutendela ni kubhana valolo mu nguzu ia bhanga, phala kuijiia o ijila ia ixi ietu. Nange ene a bhindamena kikuatekesu, phala kuijiia kiambote o dimi dietu. Kima kiambote ku a kuatekesa kusanga salu iambote, mba inzo iambote. O kikuatekesu kiki, ki tena kusuínisa kiavulu o jiphange jetu.​—Jisabhu 3:27.

18. Phangu iebhi i tena kukaiela o asonhi?

¹⁸ O muthu ua tundu mu ixi iéngi, nange ua-nda bhanga ioso phala kuijiia kiambote o ijila ia ixi. Lute ua xisa phangu iambote mu maka enhá. Kia dianga, muéne ua xila o ijila ia ixi ia ubhe, mu kubhinga ku athu ande dia kumateka kubhongolola mu díbhia. (Lute 2:7) Muéne ka banzele kuila, ua tokalele ngó kubhongolola bhuoso bhua mesenene. Lute kexile mu banza ué kuila, o athu oso a tokalele ku mu kuatekesa. Kaiadi, muéne ua sakidila o athu oso a mu londekesele o henda. (Lute 2:13) Se o athu a tokala ixi iéngi, a londekesa o ukexilu ua Lute, o jiphange jâ ni athu a mukuá a-nda ku a xila dingi.

19. Mukonda diahi tua tokala kutambulula kiambote o asonhi?

¹⁹ Tu sanguluka kiavulu mu kuijiia kuila, Jihova uene mu londekesa o henda iê, ni kuehela athu a jixi joso kuívua o njimbu iambote. Nange mu jixi jâ, ene kexile mu dilonga o Bibidia, mba kuia mu iônge ia Jimbangi ja Jihova. Kuma tua ejiia kindala, kima kiambote kua kuatekesa kudivua kubhata. Nange ki tuala ni kitadi phala kukuatekesa kiavulu, maji kioso ki tu londekesa o henda ku asonhi, ene a mona kuila, Jihova ua a zolo. Kuma tu ‘akaiedi a Nzambi,’ tua tokala kubhanga ioso phala kutambulula kiambote o athu a tundu mu jixi jengi.​—Efezo 5:1, 2.