1. Ihi i tua tokala kubhanga, mukonda dia kixikanu kietu?

KO ATHU oso ala ni kixikanu. (2 Tesalonika 3:2) Maji Jihova u bhana kixikanu ku athu oso a mu bheza. (Loma 12:3; Ngalásia 5:22) Tu sakidila Jihova, mukonda dia ku tu bhana kixikanu!

2, 3. (a) Mbote iahi i tu katula, kioso ki tu kala ni kixikanu? (b) Ibhuidisu iebhi i tua-nda tambuijila?

² Jihova ua bhana Mon’ê ua kazola Jezú, phala uoso u mu xikana, a mu bhulule ku ituxi. O sata íii, i kuatekesa o athu kubhanga o ukamba ni Jihova, ni kutambula o muenhu ua kalela-ku. (Nzuá 6:44, 65; Loma 6:23) Jihova ua tu zolo kiavulu! Sumbala tu akua ituxi, ni kuila tua fuama kufua, Jihova ua mono kuila, tu tena kubhanga ima iambote. (Jisálamu 103:10) Muéne ua tu kuatekesa kuijiia o njimbu iambote ia lungu ni Jezú, ni sata ia kukula ia bhana. Kioso ki tua mateka kuxikina kua Jezú ni ku mu kaiela, tua mateka ué kukingila o muenhu ua kalela-ku!​—Tanga 1 Nzuá 4:9, 10.

³ Maji ihi dingi i tu tena kudilonga ia lungu ni kixikanu? O kuila o kuijiia ngó o ima ia bhange Nzambi, ni ima ia-nda  bhanga ku hádia, kulombolola kuila tuala ni kixikanu? Tua-nda dilonga o ima ia mukuá i tu tena kubhanga.

4. Kioso ki tu kala ni kixikanu, kiebhi ki tu divua?

⁴ Kioso ki tu xikina Jihova ni Jezú, ki tuijiia ngó o ima iene mu bhanga, ni ima ia-nda bhanga phala etu. Maji tu kala ué ni vondadi ia kubelesela o ima ia tu longa. Tu mesena ué kukuatekesa akuetu kua ejiia. Poxolo Phaulu uambe: “Se u fisala ni dikanu dié kuma Jezú muene Ngana, anga u xikana mu muxima ué kuma Nzambi ua mu fukununa mu’alunga, eie u bhuluka. Kuma muthu u xikana ni muxima, n’a mone o kulunga; u fisala ni dikanu n’ a bhuluke.”​—Loma 10:9, 10; 2 Kolindo 4:13.

5. Mukonda diahi o kixikanu kima kia dikota, ni ihi i tua tokala kubhanga phala kubandekesa o kixikanu kietu? Bhana phangu.

⁵ Sé phata, phala kutambula o muenhu ua kalelaku ku mundu uobhe ua Nzambi, tua tokala kukala ni kixikanu, ni kukolokota mu kukolesa o kixikanu kietu. O kixikanu kia difu ni mbutu i sabhuka. Phala kukula kiambote, tua tokala ku i tekela. Se ki tu i tekela, iene ia-nda lela, ni kufuá. Kiene ué ki bhita n’etu. Tua tokala kubhanga ioso, phala o kixikanu kietu ku ‘di sanza’ ni ‘kukula.’​—Tito 2:2; 2 Tesalonika 1:3; Luka 22:32; Jihebeleu 3:12.

6. Kiebhi o divulu dia Jihebeleu 11:1, dijimbulula o kixikanu?

⁶ Mu divulu dia Jihebeleu 11:1, o Bibidia ijimbulula se ihi ilombolola o kixikanu. (Tanga.) (1) O kixikanu, ‘kilondkesa ima i tua dielela.’ O ima i tua “dielela,” ia lungu ué ni ikanenu ia Nzambi. Mu kifika, tuejiia ni kidi kioso kuila, o kuiibha kua-nda bhua, ni kuila, kua-nda kuíza o mundu uobhe. (2) O kixikanu, ‘ku idikisa ima kiluua i moneka.’ Sumbala ki tu tena kumona Jihova Nzambi, Jezú Kristu, ni ji-anju, tuejiia kuila, ene athu a kidi. Tuejiia ué kuila, o Utuminu ua Nzambi ku diulu, kidi. (Jihebeleu 11:3) Kiebhi ki tu tena kulondekesa kuila, tu xikina mu ikanenu ia Nzambi, ni mu ima ia kambe kumoneka ku mesu? O ukexilu ua muenhu uetu, o ima i tu zuela ni i tu bhanga, iene ia-nda londekesa se tu xikina mba kana.

7. Kiebhi o phangu ia Noué i tu kuatekesa kutendela se ihi ilombolola kukala ni kixikanu? (Tala o foto ia dianga.)

⁷ Ihi i tu longa o phangu ia Noué? Poxolo Phaulu ua zuela kuila, Noué “kia mu dimuna kuala Nzambi, ku ima [ia-nda] kubhita, o iene kiluua i moneka. Noué anga u tumaka Nzambi, hé u tunga álaka, ia mu bhulula muène ni akua bhata diê.” (Jihebeleu 11:7) Kuma Noué ua dielele mu ima ia mu tangele Jihova, muéne ua tungu álaka ia dikota. Nange o jivizinhu jê a muibhudisa se mukonda diahi ua kexile mu tunga o álaka. Tu tena kuxikina ni kidi kioso kuila, Noué ka dixibha. O Bibidia i zuela kuila, Noué uexile “mujimbuidi ua maka maiuka.” (2 Phetele 2:5) Muéne ua dimuna o athu kuila, Jihova ueji bheka o dilúviu, phala kubuika o athu aiibha. Nange muéne ua tangela o ima ia mu tangele Jihova: “Dizubhilu dieza dia xitu ioso; kia ngi tetulukila muene; kuma ixi ioso iezala usuéia mukonda dia athu . . . nga-nda kulundulula dilúviu dia menha mu ngongo, phala ku buidisa o xitu ioso iala ni muenhu bhoxi dia  diulu; ima ioso mu ngongo ia kà buika.” Mu kusuluka, nange Noué ua zuela o ima ia tokalele kubhanga o athu, phala kubhuluka. Jihova ua mu tendelesa: “Ua kà bokona mu álaka.”​—Dimatekenu 6:13, 17, 18.

8. Ihi ia zuela Tiiaku ia lungu ni kixikanu?

⁸ Tiiaku ua zuela ué ia lungu ni kixikanu. Nange muéne ua bhange kiki mu kubhita kithangana, kioso Phaulu kia sonekene akua Hebeleu. Tiiaku ua soneka: ‘Ng’idikisa-phe o kuxikana kué kua di kalela sè ima i u bhanga, eme-phe mu ima i ngi bhanga, muene mu ngi ku idikisa o kuxikana kuami.’ (Tiiaku 2:18) Tiiaku ua jimbulula kuila, phala kukala ni kixikanu, ki tu tokala ngó kuijiia kuila, kuene Nzambi. O madimonho ejiia kuila, kuene Nzambi. Maji ene ka londekesa kixikanu kua Jihova. Mu veji dia kiki, ene a mu bhukumukina. (Tiiaku 2:19, 20) O muthu uala ni kixikanu, u sangulukisa Nzambi, mu kubhanga ima iambote. Kiene kia bhangele Mbalahamu. Tiiaku ua soneka: “Mukonda diahi o Mbalahamu dia kukululu’etu, Nzambi ua mu tanesene? Mukonda dia ima ia bhangele, kia satele mon’ê Izake bhu kalatodio. Mua mono kuma, o kuxikana kuê kua kalakala kumoxi ni ima ia bhangele. O mu ima ia bhangele, kuxikana kuê kua tenena.” Mu kusuluka, Tiiaku ua londekesa kuila, o kixikanu kia kambe o kikalakalu ki, ki kiala ni valolo. muene uambe: “Uila ki ala o mukutu, se ua di kalela sè nzumbi, uafu; kiene ué o kuxikana, kua di kalela sè ima ia kubhanga, kuafu.”​—Tiiaku 2:21-23, 26.

9, 10. Ihi ilombolola kuxikina o Mona?

⁹ Mu kubhita 30 a mivu ndenge, Nzuá ua soneka o divulu diê, ni mikanda itatu. Kala o asoneki amukuá a Bibidia, Nzuá uejiidile ihi ilombolola o kixikanu. Mu madivulu a soneka, Nzuá ua tumbula kizuelu mu dimi dia Ngeleku. Mu ku i lungulula mu dimi dia Kingileji, kilombolola “kulondekesa kixikanu.” Muéne ua tumbula o kizuelu kiki mu veji javulu.

¹⁰ Mu kifika, Nzuá ua zuela: “Kala kiki, uoso ua xikana o Mona, uala ni muenhu ki uábhua. Maji uoso ka xikana o Mona, ka kà mona muenhu, kikale o njinda ia Nzambi i xala ku thandu diê katé ku hádia ni hádia.” (Nzuá 3:36) Phala kuxikina o Mon’a, tua tokala kubelesela Jezú. Mu kidi, mu madivulu a soneka Nzuá, tu mona kuila, Jezú ua zuela mu veji javulu kuila, phala kutambula o muenhu ua kalela-ku, tua tokala ku mu xikina ni kuxikina Tat’ê.​—Nzuá 3:16; 6:29, 40; 11:25, 26; 14:1, 12.

11. Kiebhi ki tu tena kulondekesa o kisakidilu kietu kua Jihova, mukonda dia ku tu kuatekesa kuijiia o kidi?

¹¹ Bhu kaxi ka nzumbi iê ikola, Jihova ua tu kuatekesa kutendela o kidi kia lungu ni muéne, ni Mon’ê. Ua tu kuatekesa ué kua dielela. (Tanga Luka 10:21.) Kiebhi ki tu tena kulondekesa o kisakidilu kietu kua Jihova, mukonda dia ima ioso iene mu bhanga phala etu? Ithangana ioso tua tokala kulembalala kuila, bhu kaxi ka Jezú, “o musonguedi ua kuxikana kuetu,” Nzambi ua tu kuatekesa kukala ni ukamba ni muéne.  (Jihebeleu 12:2) Tua tokala ué kukolokota mu kusuínisa o kixikanu kietu, mu kusamba kua Jihova, ni kutanga o Maka mê, ithangana ioso.​—Efezo 6:18; 1 Phetele 2:2.

12. Se tu kala ni kixikanu, ihi i tua-nda bhanga?

¹² Tua tokala kukolokota mu kubhanga ima ilondekesa kuila, tua dielela mu ikanenu ia Jihova. Mu kifika, tu kolokota mu kuboka o Utuminu ua Nzambi ku athu, ni kua kuatekesa kukituka maxibulu a Jezú. Tu kolokota ué mu kubhanga o ‘mbote ku athu oso, kota-kota-phe ió a tokala mu dianda dia kuxikana.’ (Ngalásia 6:10) Tu bhanga ué nguzu, phala ‘kuzula o muthu uokulu ni ifua iê,’ mukonda ki tu mesena kuehela kima kioso-kioso kuzanga o ukamba uetu ni Jihova.​—Kolose 3:5, 8-10.

13. Mukonda diahi tua tokala “kuxikana Nzambi?” Kiebhi o Bibidia i jimbulula o kixikanu, ni mukonda diahi?

¹³ O Bibidia izuela: ‘Muthu-phe ua kambe o kuxikana Nzambi, ka tena ku mu uabhela. Kuma uoso uiza kua Nzambi, ki kala u xikana kuila sai-ku Nzambi, kuma muène mukua kubhandulula oso a mu sota ni muanu.’ (Jihebeleu 11:6) O Bibidia ilondekesa ué kuila, o kima kia dianga kia tokala kubhanga o Jikidistá, o “kuxikana Nzambi.” O kixikanu ki tu fikidila ué. (Jihebeleu 6:1) Maji phala kukala ni ukamba uambote ni Jihova, ni kukolokota mu ukamba iú, tua tokala kukala ni idifua ia ubhe.​—Tanga 2 Phetele 1:5-7; Juda 20, 21.

14, 15. Mu veji dia kukala ngó ni kixikanu, mukonda diahi tua tokala kukala ué ni henda?

¹⁴ O asoneki a Bibidia a beta-o-kota kuzuela ia lungu ni kixikanu, o idifua ia mukuá ndenge. O kuila, kiki kilombolola kuila, o kixikanu kiene o kidifua kia beta-o-kota ki tua tokala kulondekesa?

¹⁵ Phaulu ua sokesa o kixikanu ni henda. Muéne ua soneka: “Se ngi kala ni kuxikana kuoso, katé ngi tena kusondolola o milundu bhu ididi iê, maji ngi kamba o henda, ki ngi kala ngi kima.” (1 Kolindo 13:2) Jezú ua zuela kuila, “o kijila kia dikota mu Kitumu,” o kuzola Nzambi. (Matesu 22:35-40) O henda i tu kuatekesa kukala ni idifua ia mukuá, i tu bhangesa kusangulukisa Nzambi. Mu kifika, o Bibidia i zuela kuila, o henda  “i xididika mu ima ioso ni kuxikana.”​—1 Kolindo 13:4, 7.

16, 17. Ihi i zuela o Bibidia ia lungu ni kixikanu ni henda? Kidifua kiebhi kia beta-o-kota, ni mukonda diahi?

¹⁶ Ki kale o kixikanu mba o henda, idifua ia dikota. O asoneki a Bibidia a tumbula o idifua íii kumoxi. Phaulu ua suínisa o jiphange jê kuzuata o “kivunga-thulu kia . . .o kuxikana ni henda.” (1 Tesalonika 5:8) Ia lungu ni Jezú, Phetele ua soneka: “Sumbala Kristu muene kiluua mu mu mona, maji mua mu zola. Sumbala kiki ki mua mu mono, maji mua mu xikana.” (1 Phetele 1:8) Tiiaku ua tendelesa o jiphange jê a a undu, uixi: “Nzambi ua solo jingadiama mu ngong’umu phala ku kala jimvuama mu kuxikana, alundudi a ungana ua tange Muène ku u bhana oso a mu zola.” (Tiiaku 2:5) Nzuá ua soneka kuila, Nzambi ua mesena kuila, “tu xikane mu dijina dia Mon’ê Jezú Kristu, tuixi ni kudizola mudietu, uila muène Kristu kia tu tumu.”​—1 Nzuá 3:23.

¹⁷ Maji Phaulu ua soneka ué: “Uila kiki, ima ia xalela-ku o kuxikana, o kudielela, o henda, kitatu kiâ. Kiala-bhu-phe kota, o henda.” (1 Kolindo 13:13) Ku hádia, ki tua-nda bhinga dingi kuxikina mu ikanenu ia Nzambi ia lungu ni mundu uobhe, mukonda ia-nda dikumbidila kiá. Tua-nda tambula o mabesá oso a kanena mu Bibidia. Maji tua-nda bhinga kulondekesa o henda ietu kua Nzambi, ni ku athu, ithangana ioso. Mu kidi, o henda ietu kua ene ia-nda-ia ni ku dibandekesa, katé ku hádia ni hádia.

18, 19. Ihi iene mu bhita mukonda dia mundu ua Nzambi lelu, kukala ni kixikanu? Nanhi ua fuama ku mu ximana mukonda dia ima íii?

¹⁸ O mundu ua Jihova lelu, u xikina o Utuminu ua Nzambi. Ene a zokela o Utuminu iú. Ene a dizolo mudiâ. Kiki ki bhita, mukonda ene ehela o nzumbi ikola ia Nzambi kuendesa o mienhu iâ. (Ngalásia 5:22, 23) Ihi iene mu bhita? Mazunda ni mazunda a jiphange ku mundu uoso, ala ni kutululuka, ni ukamba uambote mudiâ. Sé phata, o kixikanu ni henda, idifua ia dikota.

¹⁹ Tuene ni ukamba iú, mukonda Nzambi uene mu tu kuatekesa. Muéne ua fuama ku mu ximana, mukonda dia ku tu kuatekesa. (Izaia 55:13) Tu mu sakidila ni muxima uoso, mukonda muéne ua sokejeka o ima, ni tu ‘bhuluke mu kuxikana.’ (Efezo 2:8) Jihova ua-nda suluka ni kukuatekesa dingi o athu amukuá kukala ni kixikanu. Mu kusuka-ku, o ixi ioso ia-nda kuizala ni athu a iuka, a sanguluka, a-nda ximana Jihova, katé ku hádia ni hádia!