KÁLA ki tua di longo mu milongi ia tundu-mu, Satanaji ua zuela kuila, Jihova ka tokala kutumina o athu. Muene uambe ue kuila, Jihova kejiia kutumina mu ukexilu uambote, ni kuila, o athu a-nda zediua ku muenhu se a di tumina mudiâ. O kuila Satanaji ua zuela o kidi? Xinganeka kuila, o athu a mu di tumina mudiâ, mu veji dia Nzambi, iá ala ni muenhu ua kalela-ku. O kuila eji zediua? O kuila eie ueji zediua kukala ni muenhu ua kalela-ku, maji ku bhingi kubelesela o itumu ia Nzambi?

1, 2. Ihi i tua tokala kuijiia? (Tala o foto ia dianga.)

² Sé-ku muthu u tena kutambuijila o ibhuidisu iii, bhu kididi kié. Kala muthu mudietu, ua bhingi kubanza kiambote mu maka enhá. Mu kiki, etu enioso tua tokala kuijiia kuila, o ukexilu ua Jihova kutumina uene ua beta-o-kota, ni kuila, tua tokala kuzokela o ungana uê ni muxima uetu uoso. Etu tuejiia o maka enhá, mukonda dia ima i tu tanga mu Bibidia. Tu di  longe kiebhi o Bibidia i londekesa kuila, Jihova, muéne ngó ua tokala kutumina o ngongo ioso.

3. Mukonda diahi Jihova ua tokala kukala Ngana ia ngongo ioso?

³ Jihova muéne ngó o Ngana ia ngongo ioso mukonda, muene o Nzambi ia tena ioso, o Mubhangi. (1 Malunda 29:11; Ikalakalu 4:24) Poxolo Nzuá ua mono mu kisuma kia diulu, 144.000 ja athu a-nda tumina kumoxi ni Jezú. Ene ambe: “Eie u Ngana ietu, Nzambi ietu! Kia ku fuama o kutambula fuma ni ujitu, ni unéne. Mukonda é’Muène ua [bhange] ioso, o vondadi ié iene ia i bhangesa kuiza-ku, íi ia di bhange, íi iala-ku.” (Dijingunuinu 4:11) Jihova ua bhange ima ioso, mukonda dia kiki muéne ua tokala kutumina athu oso, kikale ku diulu kikale mu ixi.

4. Mukonda diahi o ufôlo ua kusola, ki ua tokala ku tu bhangesa kubhukumukina Nzambi?

⁴ Satanaji ka bhange né ngó kima kimoxi. Mukonda dia kiki, muene ka tokala kutumina o ngongo. Kioso Satanaji ni dikaza dia dianga, kia bhukumukina Nzambi, ene a londekesele kuila, ka bhingile ku a tumina kua Jihova. (Jelemiia 10:23) Tuejiia kuila Nzambi ua a bhanene o ufôlo ua kusola. O kuila kiki kilombolola kuma ene a tokalele kusola kubhukumukina o ungana ua Jihova? Kana. O ujitu iú, u tu kuatekesa kusola o ima i tua mesena, maji ki u tu bhangesa kubhukumukina o Mubhangi uetu, Jihova. Mu kidi, o kubhukumukina Nzambi, kulombolola kukamba kusakidila o ufôlo ua kusola ua tu bhana Nzambi. Etu tua bhindamena o Utuminu ni itendelesu ia Jihova.

5. Mukonda diahi tua bhindamena o itumu ia Jihova?

⁵ Xinganeka mu kima kia mukuá ki londekesa kuila, Jihova, muéne ngó ua tokala kutumina. Muene u kalakala ni kutena kuê mu ukexilu ua iuka. Muene u tu tangela: “Eme muene ngi Jihova, ngi mukua kulendukila muthu, ni kufundisa ni kubatula mu kidi mu ngongo; mbata ima ienhi’ii iene ia ngi uabhela.” (Jelemiia 9:24) Jihova ka bhingi ku kaiela o itumu ia athu phala kusola kubhanga o kima kia tokala. Mu veji dia kiki, muene mukua kubhana o itendelesu ia iuka. Bhu kaxi ka kuiuka kuê, muene u bhana itumu phala o athu ku i kumbidila. O mukua jisálamu uambe: “Ni [kufundisa] kua kidi ni kutetuluka kua ku fikidila o kiandu kié.” Mukonda dia kiki, o itumu ioso, ijila ni itendelesu ia Jihova, ia iuka. (Jisálamu 89:14; 119:128) Satanaji ua zuela kuila, Jihova ki Ngana iambote. Maji tuejiia kuila, Satanaji ka tena kubheka o kuiuka kua kidi mu ngongo.

6. Mukonda diahi Jihova, muéne ngó ua tokala kutumina?

⁶ Jihova, muéne ua tokala kutumina, mukonda muéne ngó uala ni kuijiia ni unjimu uoso phala kulanga o ngongo. Tu tena kumona kiki, mukonda muene ua bhana o unjimu kua Jezú ua kusaka mauhaxi ka a tenene kua saka ku ji dotolo. (Matesu 4:23, 24; Marku 5:25-29) Sumbala tu mona o ima  iii, kala madiuanu, maji phala Jihova ki madiuanu, kana. Muene uejiia kiambote kiebhi ki kalakala o mukutu uetu, muene u tena ue kusaka uhaxi uoso-uoso. Muene u tena kufukununa o athu afu kiá, ni kuzubha o mavuua.

7. Kiebhi Jihova kia tundu athu oso mu unjimu, ku mundu ua Satanaji?

⁷ O mundu ua Satanaji ki u tena kubheka o kutululuka, né muene mu ixi imoxi ngó. Jihova ngó uala ni unjimu phala kubheka o kutululuka mu ngongo ioso. (Izaia 2:3, 4; 54:13) Tu divua kála kia divuile poxolo Phaulu. Muene uambe: “O jimbongo ja Nzambi kuvula kuahi! Ku zonga kuahi o unjimu ua Nzambi, ni kuijiia kuê! Mu kuahi u tena ku lombolola o kaiula kê? Nanhi u tena kutongolola o ikutu iê?”—Loma 11:33.

8. Ihi i u banza ia lungu ni ukexilu ua Jihova kutumina?

⁸ Kála ki tua mono kiá, o Bibidia i londekesa kuila Jihova, muéne ngó ua tokala kutumina. O Bibidia i londekesa ue se mukonda diahi muéne o Ngana ia beta-o-kota. Kia dianga, tuejiia kuila muene u tumina ni henda. Kioso ki tu xinganeka kuila, muene Nzambi ia “jihenda ni kiadi, ua lenduka, u kokoloka mu kuthathamana, u kôla mu kukuatela henda, ufiiele u vula,” tu mu zukama dingi. (Makatukilu 34:6) Jihova u tu xila, muene u tu talatala ni henda. Jihova ua beta-o-kota ku tu langa, etu ndenge. Satanaji uambe kuila, Jihova u sueka o ima iambote ku jiselevende Jê, maji o izuelu iii, ia makutu. Nzambi ua tu bhana Mon’ê umoxèlele phala tu kale ni kidielelu kia muenhu ua kalelaku.—Tanga Jisálamu 84:11; Loma 8:32.

9. Kiebhi ki tuejiia kuila, Nzambi u suua muthu ni muthu?

⁹ Jihova ua zolo o mundu uê uoso. Maji ua zolo ue muthu ni muthu. Xinganeka mu ima ia bhiti m’ukulu. Mu hama jitatu ja mivu, Jihova uendesa o mundu uê ni ku a kuatekesa kutolola o jinguma, bhu kaxi ka afundixi. Mu thembu ienioió, Jihova ua kexile ue mu langa muthu ni muthu. Kiene kia bhitile ni muhatu a mu ixanene Lute. Muene kexile mukua Izalaiele, maji ua xisa ima iavulu phala kubheza Jihova. Mukonda dia kiki, Jihova ua mu besoala, mu ku mu kuatekesa kusanga diiala diambote, ni kuvuala mona. O kima kia beta-o-kota o kuijiia kuila, o Mexiia ua tundu ku muiji ua mon’a Lute. Jihova ua tumu kusoneka mu Bibidia o musoso ua Lute, mu divulu diambata o dijina diê. Mudié, kiebhi Lute kia-nda divua mu kuívua o maka oso iá, kioso kia-nda mu fukununa?—Lute 4:13; Matesu 1:5, 16.

10. Kiebhi ki tuejiia kuila, o ukexilu ua Jihova kutumina uambote?

¹⁰ Jihova ka tumina ni undanda. Mu veji dia kiki, o athu a belesela Nzambi, ala ni ufôlo, a sanguluka. (2 Kolindo 3:17) Davidi uambela Jihova uixi: “[Kijingu] ni kubenha kuala ku pholo iê, nguzu ni kutana bhu kididi kié kikola.” (1 Malunda 16:7, 27) O  mukua jisálamu Etane ua soneka: “Athu ió a zediua ejiia o nzóngo ié ia ngalasa; enda jinga muene, u Jihova, mu mukengeji ua pholo ié. A sangulukila mu dijina dié, kumbi dioso dia kambàmba; mu kufundisa kué kua kidi, muene mua bhandulukila.”—Jisálamu 89:15, 16.

11. Kiebhi ki tu tena kuijiia kuila, o ungana ua Jihova ua beta-o-kota?

¹¹ Se tu xinganeka mu mbote ioso iene mu tu bhangela Jihova, tua-nda xikina ni kidi kioso kuila, o utuminu uê uene ua beta-o-kota. Tua-nda divua kala, o mukua jisálamu ua zuela kua Nzambi, uixi: “Kuma kizuua kimoxi ku lumbu lué, kota, o midi ku bhata diengi, ndenge!” (Jisálamu 84:10) Jihova muéne ua tu bhange, mu kiki, muene uejiia kiambote o ima i tu sangulukisa. Muene kene mu tu bhana ngó o ima i tua bhindamena, maji u tu bhana dingi ima iamukuá. Ioso i tu tumina Jihova, phala o mbote ietu. Sai ithangana nange kubhinga nguzu phala kubelesela Jihova, maji se tu mu belesela tua-nda zediua ku muenhu.—Tanga Izaia 48:17.

12. Ihi i tu bhangesa kuzokela o ungana ua Jihova?

¹² O Bibidia i longa kuila, kioso kia-nda bhua o Midi ia Mivu ia Utuminu ua Kristu, sai athu a-nda bhukumukina o ungana ua Jihova. (Dijingunuinu 20:7, 8) Ihi ia-nda bhangesa o athu kubhukumukina o ungana ua Nzambi? Mu thembu ienióio, Satanaji ua-nda bhangesa o athu kudizangeleka. Kiki kiene o ukexilu uê. Nange muene ua-nda kua bhangesa kubanza kuila, ene a tena sé kubelesela Jihova. Maji o izuelu iii, ia makutu. Mu kiki, tua tokala kudibhuidisa: ‘O kuila nga-nda xikina o makutu a Satanaji?’ Se tua zolo muene Jihova ni muxima uoso, anga tu xikina ni kidi kioso kuila, muene Nzambi iambote, ni kuila ua tokala kutumina o ngongo ioso, ki tua-nda xikina o makutu a Satanaji. Tua-nda mesena ku tu tumina kua Jihova, mukonda muéne ngó u tumina ni henda.

13. Kiebhi ki tu zokela o ungana ua Jihova kioso ki tu kaiela o phangu iê?

¹³ Tua di longo kiá, kuila Jihova muéne ngó ua tokala kutumina, mukonda o ukexilu uê ua kutumina uene ua beta-o-kota. Tua tokala muene kuzokela o ungana uê ni muxima uoso. Tu zokela o ungana ua Jihova, mu kulondekesa o ufiiele uetu kua muene, ni kukaiela o phangu iê. Kioso ki tu bhanga o ima kala kia mesena Jihova, tu londekesa kuila, tua mu zolo, ni kuila tu zokela o ukexilu uê ua kutumina.—Tanga Efezo 5:1, 2.  

14. Kiebhi o tufunga ni atuameni a miji kia tena kukaiela o phangu ia Jihova?

¹⁴ O Bibidia i longa kuila, Jihova u londekesa o kutena kuê ni henda. O atuameni a miji ni tufunga tua zolo o ungana ua Jihova, a kaiela o phangu ia Jihova. Mu kiki, ka londekesa o ungana uâ ni undanda. Poxolo Phaulu ua bhange nguzu iavulu, phala kukaiela o phangu ia Nzambi ni ia Mon’ê. (1 Kolindo 11:1) Muene kexile mu thandanganhesa akuâ, né ku a jijidika kubhanga o ima. Mu veji dia kiki, ni henda ioso muene ua kexile mu suinisa o jiphange kubhanga o ima iambote. (Loma 12:1; Efezo 4:1; Filimone 8-10) Mu kubhanga kiki, Phaulu ua kaiela o phangu ia Jihova. Kioso ki tu londekesa henda ku akuetu, tua mu zokela o ungana ua Jihova.

15. Kiebhi ki tu zokela o ungana ua Jihova kioso ki tu xila o athu ala ku pholo?

 ¹⁵ Tu zokela ue o ungana ua Jihova, kioso ki tu xila ni kubelesela o athu ala ku pholo. Né muene se ki tu tendela kiambote o maka, mba ki tu xikina o ukexilu ua batula o maka oso-oso, tu suluka mu ku a belesela. Ki kiene ki bhanga o athu ku mundu, maji kiene ki tu bhanga kioso ki tu xikina Jihova kala Ngana ietu. (Efezo 5:22, 23; 6:1-3; Jihebeleu 13:17) Mu kubhanga kiki, tu sanguluka kiavulu mukonda, tuejiia kuila, Nzambi ua mesena ngó o mbote ietu.

16. Kiebhi o ima i tu sola i tena kulondekesa kuila, tu zokela o ungana ua Jihova?

¹⁶ Tu tena ue kuzokela o ungana ua Jihova bhu kaxi ka ima i tu sola. Jihova ka bhana itumu phala o ima ioso. Mu veji dia kiki, muene u tu tangela o ibanzelu iê. Kiki ki tu kuatekesa kuijiia o kima ki tua tokala o kubhanga. Mu kifika, Jihova ka tu bhana mukanda u londekesa o izuatu i tua tokala ku ta, ni izuatu ki tu tokala ku i zuata. Mu veji dia kiki, muene u tu tangela kuila, tua tokala kuzuata mu ukexilu uambote, ulondekesa kuila, tu Jimbangi jê. (1 Timote 2:9, 10) Muene ua mesena kuila, tu xinganeka se kiebhi kia-nda divua o athu mu kumona o ima i tua solo. (1 Kolindo 10:31-33) Kioso ki tu sola o ima kala kia mesena Jihova, tu londekesa kuila, tua mu zokela o ungana ua Jihova.

17, 18. Kiebhi o makaza kia tena kulondekesa kuila, a zokela o ungana ua Jihova?

 ¹⁷ Tu mone se kiebhi o makaza kia tena kuzokela o ungana ua Jihova. Nange o ima mu ukaza ki ia mu bhita kala kia kexile mu banza o dikaza. Nange ene a dibhana ni maka avulu. Se kiene, ene a tena ku di longa kiebhi Jihova kia kexile mu talatala o kifuxi kia Izalaiele. Jihova uambe kuma, muene uexile kala munumi ua kifuxi kia Izalaiele. (Izaia 54:5; 62:4) Mu ithangana iavulu, o kifuxi kia kexile mu luualesa Jihova. Iexile kala ukaza ua bhonzo. Maji Jihova, ka xisa o kifuxi kia Izalaiele ni lusolo. Mu veji dia kiki, Jihova ua a loloka mu veji javulu, anga ua suluka mu kumbidila o ikanenu ia a bhangele.—Tanga Jisálamu 106:43-45.

¹⁸ O makaza a zolo Jihova, a sota kukaiela o phangu iê. Né muene se kumoneka maka mu ukaza, ene a sota kukaiela o milongi ia Bibidia. Ene ejiia kuila, Jihova u bhana valolo iavulu ku kikutu kia ukaza. Muene ua mesena kuma, o diiala ni muhatu a “kuatenena.” O makaza a tena ngó ku di xisa ni kukazala ni muthu uengi, se mu kaxi kâ, mu kala muthu u zeka ni muthu uengi. (Matesu 19:5, 6, 9) Kioso o Jikidistá kia bhanga ioso, phala kusanguluka mu ukaza, ene a zokela o ungana ua Jihova. 

19. Ihi i tua tokala kubhanga kioso ki tu ta kituxi?

¹⁹ Etu enioso tu akuâ ituxi, mukonda dia kiki, sai ithangana tu bhanga ima i luualesa Jihova. Muene uejiia o maka enhá. Mukonda dia kiki, muene ua tu bhana o ujitu ua kukula bhu kaxi ka Jezú Kristu. Mu kiki, kioso ki tu ta kituxi, tua tokala kubhinga muloloki kua Jihova. (1 Nzuá 2:1, 2) Mu veji dia kudivua ngó kiaiibha mukonda dia iluezu ietu, tu tena kukatula disá ku iluezu. Tua mesena kuzukama dingi kua Jihova, mukonda muene u tu loloka, u tu kuatekesa kutolola o ibhidi, ni kukolokota mu ku mu sidivila.—Jisálamu 103:3.

20. Mukonda diahi tua tokala kuzokela o ungana ua Jihova kindala?

²⁰ Ku mundu uobhe, athu oso a-nda kua tumina kua Jihova. Mu kiki a-nda dilonga o jinjila jê joso ja iuka. (Izaia 11:9) Maji né muene lelu, tu tena kudilonga kiavulu ia lungu ni ibanzelu iê, ni ukexilu ua kubhanga o ima. Kua kambe ngó bhofele, sé-ku muthu dingi ua-nda kala ni phata ia kuila, Nzambi muene ngó ua tokala kutumina. Mukonda dia kiki, tu bhange ioso kindala, phala kuzokela o ungana ua Jihova, mu ku mu belesela, ku mu sidivila ni ufiiele, ni kubhanga ioso phala kukaiela phangu iê, mu ibhangelu ietu, kizuua ni kizuua.