1. Ihi i tu bhangesa kubeta kota o yama ndenge?

JIHOVA wa bhana kima kya katunda ku athu. O kima kiki, o kitongolwelu kyetu. O kitongolwelu ki tu bhangesa ku di tungula ku yama. Kyebhi ki twejiya kwila Adá ni Eva exile ni kitongolwelu? Kyoso kya tele o kituxi kwa Nzambi, ene a di swekele. O kitongolwelu kyâ, kyexile mu a lembalesa o kima kya bhangele.

2. Kyebhi o kitongolwelu kyetu kya difu ni búsula? (Tala o foto ya dyanga.)

² O kitongolwelu ukexilu moxi dyetu, u tu kwatekesa kusola o ima yambote, bhu kaxi ka ima ya yibha. O muthu u kamba kulonga o kitongolwelu kyê, tu tena ku mu sokesa ni ulungu wala ni búsula ya budika. O kitembu ni mabhuku a kalunga, a tena kwambata o ulungu mu kididi kyengi. Maji o búsula ya mu kalakala kyambote i tena kwendesa o mwendexi wa ulungu phala kukayela o njila ya solo. Kyene we kimoxi, se tu longa o kitongolwelu kyetu mu ukexilu wambote, ki tena ku twendesa kyambote.

3. Ihi i bhita se ki tu longo kyambote o kitongolwelu kyetu?

 ³ Se tu kamba kulonga kyambote o kitongolwelu kyetu, ki kya-nda tu dimuna ku ima yayibha. (1 Timote 4:1, 2) Katé ki tena ku tu bhangesa kuxikina o kwila, o ‘kya yibha kima kyambote.’ (Izaya 5:20) Jezú wambela o maxibulu mê: “Kumbi dya-ndu kwiza dya kwila, woso u mi jibha, u fika mwene kuma wa bhange kya wabhela Nzambi.” (Nzwá 16:2) Kiki kyene kya kexile mu banza o athu a jibhile Xitevá. (Ikalakalu 6:8, 12; 7:54-60) Tundé ukulu, o athu a tokala mu jingeleja, ene mu ta ituxi, kala ujibhangânga, maji a banza kwila a mu ki bhangela Nzambi. Maji o ima yene mu bhanga, mu ijila ya Nzambi kituxi. (Makatukilu 20:13) Sé phata o kitongolwelu kyâ kyene mu a endesa kyambote!

4. Kyebhi ki tu tena kwijiya se o kitongolwelu kyetu kya mu kalakala mwene kyambote?

⁴ Ihi-phe i twa tokala o kubhanga phala o kitongolwelu kyetu kukalakala kyambote? O ijila ni itumu ya Bibidya, i ‘bhandulula, i longa o kidi, i bazela itondalu, i yukisa ya bhengalala, ijidisa wendelu wambote.’ (2 Timote 3:16) Twa tokala ku dilonga o Bibidya izuwa yoso, kuxinganeka mu milongi yê ni ku i kumbidila ku mwenyu wetu. Se tu bhanga kiki, twa-ndaya ni kuxinganeka kala ki xinganeka Jihova. Mu kiki-phe, o kitongolwelu kyetu kya-nda twendesa kyambote. Tu dilonge kyebhi o ijila ni itumu ya Jihova i tena kulonga o kitongolwelu kyetu.

5, 6. Kyebhi o ijila ya Nzambi i tu kwatekesa?

⁵ Se twa mesena kwila o ijila ya Nzambi i tu kwatekesa, ki twa tokala ngó ku i tanga ni ku ijiya. Twa bhingi ku i zola ni ku i xila. O Bibidya i tu tangela: ‘Kubhanga kyayibha ku mi ibhile, mu wabhele kubhanga mbote.’ (Amoji 5:15) Kyebhi ki tu bhanga kiki? Twa bhingi kudilonga kutala o ima kala ki tala Jihova. Xinganeka mu kifika kiki: Eye kwa mu kwata kilu, o dotolo u ku tendelesa kudya kyambote, kutungutisa dingi o mukutu, ni kulungulula ima yengi ku mwenyu wé. Eye u kayela o itendelesu há u disanza! Kyebhi ki wa-nda divwa ya lungu ni itendelesu ya dotolo?

⁶ Kyene kimoxi we, o Mubhangi wetu wa tu bhana ijila i tu langa ku ibhidi íjila mukonda dya kituxi, i fwamesa dingi o mwenyu wetu. Mu kifika, o Bibidya i tu longa kwila ki tu tokala kuzwela makutu, kunganala, kunyana, kubhanga undumbu, ufusa, usweya, mba kubhanga kima kyoso-kyoso kya lungu ni madimonyo. (Tanga Jisabhu 6:16-19; Dijingunwinu 21:8) Kyoso ki tu mona o ima yambote íjila mu kubelesela Jihova, o henda yetu kwa Jihova ni ku ijila yê i di bandekesa dingi.

7. O misoso ya Bibidya i tu kwatekesa kyebhi?

⁷ Ki twa bhingi kutala hadi íjila mu kubhukumukina o itumu ya Nzambi phala kwijiya kya wabha ni kya yibha. Tu tena kudilonga ni itondalu ya akwetu mu ukulu. O misoso yiyi, tu i sanga mu Bibidya. Jisabhu 1: 5, yamba: ‘Njimu ki ivwa, i kula mu unjimu wê.’ O milongi yiyi i tunda kwa Nzambi, yene ya beta-kota! Mu kifika, xinganeka mu hadi yoso ya tale Davidi kyoso kya bhukumukina Jihova, yú wa tele phánda ni Bate-seba. (2 Samuwele 12:7-14) Kyoso ki uya ni kutanga o musoso yú, dibhwidise: ‘Kyebhi Davidi kyeji tena kulenga o maka yá? Se nga bhitile we mu ibhidi yiyi, ihi i ngeji bhanga? Ngeji bhanga undumbu kala Davidi inga  ngeji lenga kala kya bhangele Zuzé?’ (Dimatekenu 39:11-15) Se tu xinganeka kyambote mu ibhidi íjila mu ku tá kituxi, twa-nda bhanga yoso phala kukumbidila o izwelu yiyi: “Kubhanga kyayibha ku mi ibhile.”

8, 9. (a) O kitongolwelu kyetu ki tu kwatekesa kubhanga ihi? (b) Mu ukexilu webhi o kitongolwelu kyetu ki kalakala kyambote ni itumu ya Jihova?

⁸ Tu bhanga yoso phala kulenga o ima ya zembe Nzambi. Maji ihi i twa-nda bhanga, se kumoneka maka u twejiya kwila, mu Bibidya ki mwala kijila ki fidisa o maka yá? Kyebhi ki twa-nda kwijiya, ihi ya mesena Nzambi? Se twehela o Bibidya kulonga o kitongolwelu kyetu, twa-nda sola kyambote.

⁹ Kuma Jihova wa tu zolo, mwene wa tu bhana itumu i tena kwendesa o kitongolwelu kyetu. Mwene wambe: “Eme Jihova Nzambi yé, u kulonga kyoso kya wabha, hé u kwendesa mu njila i wa fwama kwendela.” (Izaya 48:17, 18) Kyoso ki tu xinganeka kyambote mu itumu ya Bibidya, anga tu i ehela kutula mu mixima yetu, tu tena kulonga ni kubazela o kitongolwelu kyetu. Sé phata, kubhanga kiki, ku tu kwatekesa kusola kyambote.

10. O kitumu ihi? Kyebhi Jezú kya longo o maxibulu mê bhu kaxi ka itumu?

¹⁰ O kitumu, kidi kya beta-kota, kyendesa o ixinganeku yetu, ki tu kwatekesa kusola  kyambote. Kwijiya o itumu ya Jihova, ku tu kwatekesa kutendela kyebhi mwene kya xinganeka, ni mukonda dyahi u tu bhana ijila. Bhu kaxi ka itumu, Jezú wa longo o maxibulu mê kwila, o ima i tu sola i tena kubhekela mbote mba ibhidi. Mu kifika mwene wa longo kwila, o njinda i bhekela usweya, o ixinganeku ya ufusa i tena kubhangesa o muthu ku ta phánda. (Matesu 5:21, 22, 27, 28) Kyoso ki twehela o itumu ya Jihova ku twendesa, o kitongolwelu kyetu, kya-nda kalakala kyambote o ima i twa-nda sola ya-nda ximanesa Nzambi.—1 Kolindo 10:31.

11. Mu ukexilu webhi o kitongolwelu kya muthu umoxi ki ki difu ni kya muthu wengi?

¹¹ Né mwene kyoso o Jikidistá kya longa o kitongolwelu kyâ bhu kaxi ka Bibidya, a tena kukala ni ixinganeku ki i difu ya lungu ni maka oso-oso. Mu kifika, ya lungu ni kunwa uhólwa. O Bibidya ki i fidisa kunwa uhólwa, maji yene i tu dimuna kwila ki twa tokala kunwa kyavulu mba ku kodiwa. (Jisabhu 20:1; 1 Timote 3:8) Abha se o Kidistá kalé ni kifwa kya kunwa kyavulu? O kwila kilombolola kwila mwene ka bhingi kuxinganeka kima, kyoso kya sola kunwa? Kana. Né mwene se o kitongolwelu kyê ki mwehela kunwa, mwene wa bhingi kuxinganeka mu kitongolwelu kya akwá.

12. Kyebhi o divulu dya Loma 14: 21, di tu kwatekesa kuxila o kitongolwelu kya akwetu?

¹² Phawlu wa londekesa kwila twa bhingi kuxila o kitongolwelu kya akwetu, kyoso kya soneka: “Kima kyawabha o kukamba kudya xitu, mba kukamba kunwa vinyu, mba kukamba kubhanga kima kyoso-kyoso ki bhangesa phang’yê kudibhala mu kituxi.” (Loma 14:21) Kyenyiki, né mwene se twejiya kwila ki kima kyayibha kunwa uhólwa, twa tokala kukala polondo phala kweha o vondadi yetu, se twejiya kwila, kiki ki bhangesa akwetu kudibhala. Nange phange wexile hôlwa ande dya kudilonga o kidi. Kindala ka mesena dingi ku ta Uhólwa mu kanu. Etu ki tweji mesena kubhanga kima ki bhangesa phang’yetu kuvutuka mu uhólwa. (1 Kolindo 6:9, 10) Se tu zalela o phange yiyi kubhata dyetu, o kwila twa-nda mu jijidika kunwa uhólwa, se mwene u dituna? Kana!

13. Kyebhi Timote kya xila o kitongolwelu kya akwa phala ku a kwatekesa kuxikina o njimbu yambote?

¹³ Kyoso Timote kyexile munzangala, mwene wa xikina ku mu saya, sumbala kubhanga kiki kyeji mu bhekela ndolo yavulu. Mwene wejidile kwila, kwa bhingile mwene ku mu saya mukonda weji bokela Jijudé. Kala Phawlu, Timote ka mesenene kubhangesa muthu kudivwa kyayibha. (Ikalakalu 16:3; 1 Kolindo 9:19-23) Eye we wala polondo phala ku ta o jivondadi ja akwenu kupholo dya jivondadi jê?

14, 15. (a) Kyebhi ki tu kukula mu nzumbi? (b) Kyebhi o Jikidistá ja kulu mu nzumbi kya talatala akwá?

¹⁴ kuma etu enyoso ‘twa xisa kudima o maka’ a Kidistu u twa dyanga ku dilonga, “tu di sungyenu ku pholo, ku wadyakime.” (Jihebelew  6:1) O kukala mivu yavulu mu kilunga, ki ku tu bhangesa kukala tu Jikidistá ja kulu mu nzumbi. Kubhinga nguzu phala kukula mu nzumbi. Twa bhingi kutendela ni kubandekesa o kwijiya kwetu. Kyenyiki twa bhingi kutanga o Bibidya izuwa yoso. (Jisálamu 1:1-3) Kyoso ki uya ni kutanga o Bibidya izuwa yoso wa-nda tendela dingi kyambote o ijila ni itumu ya Jihova.

¹⁵ Kijila kyebhi kya beta-o-kota phala o Jikidistá? O kijila kya henda. Jezú wambela o maxibulu mê: “Kyene kya m’ijidila ku athu oso, kuma mwala mu jixibulu jami, se mwa di zolo mu dyenu.” (Nzwá 13:35) O henda a ixana kya “[kijila] kya utuminu,” amba we kwila “woso wa zolo, wa kumbidila o kitumu kyoso.” (Tiyaku 2:8; Loma 13:10) Etu ki tu diwana kwila, o henda o kijila kya beta o kota, mukonda o Bibidya yamba kwila, “Nzambi henda.” (1 Nzwá 4:8) Phala Nzambi, o henda ki ixinganeku ngó, kana. Mwene u londekesa o henda yê bhu kaxi ka ibhangelu. Nzwá wa soneka: “Mwene mwa tu tukulwila Nzambi o henda yê ya tu kwatela, Nzambi kya katula Mon’ê umoxi-èlele, anga u mu tumikisa mu ngongo, phala etu ni tu mone mwenyu kwa mwène.” (1 Nzwá 4:9) Kyoso ki tu londekesa henda kwa Jihova, Jezú, jiphange jetu, ni ku athu engi, tu londekesa kwila, tu Jikidistá, twa kulu mu nzumbi.—Matesu 22:37-39.

16. Kuma tu Jikidistá ja kulu mu nzumbi, mukonda dyahi twa bhingi kubhana dingi valolo ku itumu?

¹⁶ Kyoso ki tu kituka Jikidistá ja kulu mu nzumbi, tu bhana dingi valolo ku itumu. O ijila ya lungu ni kima kimoxi, maji o itumu ya lungu ni ima yavulu. Mu kifika, o mona ndenge ka tendela o ilwezu íjila mu kubhanga ukamba ni athu ayibha. Mu kiki, o jitata a bhingi kubhana itendelesu phala ku mu langa. (1 Kolindo 15:33) Maji kyoso  kya kula, mwene u dilonga kuxinganeka bhu kaxi ka itumu ya Bibidya. O itumu yiyi, ya-nda mu kwatekesa kusola makamba ambote. (Tanga 1 Kolindo 13:11; 14:20.) Kyoso ki tuya ni kuxinganeka mu itumu ya Bibidya, twa-nda tena kudyelela dingi mu kitongolwelu kyetu. Twa-nda tena we kutendela kyambote o vondadi ya Nzambi mu ima yoso-yoso i moneka phala kusola.

17. Mukonda dyahi twamba kwila twala ni ima yoso ya bhingi phala kusola kyambote o ima?

¹⁷ Etu twala ni yoso i twa bhindamena phala kusola kuximanesa Jihova. Mu Bibidya tu sanga-mu ijila ni itumu i tu kwatekesa kukituka tu athu a ‘tenena, twa di sokejeka kya soko, mu kubhanga madimu moso mambote.’ (2 Timote 3:16, 17) O itumu ya Bibidya i tu kwatekesa kutendela o ixinganeku ya Jihova. Maji phala ku i sanga kubhinga nguzu. (Efezo 5:17) Phala ku tu kwatekesa, twala ni Índice das Publicações da Torre de Vigia, Kadivulu ka ku Tokwesa Phala o Jimbangi ja Jihova, Biblioteca da Torre de Vigia mu CD-ROM, BIBLIOTECA ON-LINE da Torre de Vigia ni aplikativu JW Library. Kukalakala ni jifalamenda jiji, kyoso ki tu dilonga ubheka mba ku mwiji, ku tu bhekela mbote yavulu.

18. Ihi i bhita kyoso ki tu kumbidila o ijila ni itumu ya Jihova ku mwenyu wetu?

¹⁸ O mwenyu wetu u fwama dingi kyoso ki tu kumbidila o ijila ni itumu ya Jihova! Jisálamu 119:97-100 yamba: “Ngonge yé ku ngi wabhela kwahi! Ngi i xinganeka kumbi dyoso dya kambàmba. Eye, mu itumu yé u ngi bhana kwijiya, jinguma jami ndenge; kuma o jinguma ki jene mu kamba. Nga beta kutongoloka, jimesene jami joso ndenge; mukonda-phe dya kuxinganeka o umbangi wé. Ngejiya mwene, ni adyakime a ki lémbwa, mukonda nga kwata o ijila yé.” Kyoso ki tu sota kithangana phala kuxinganeka kyambote mu ijila ni mu itumu ya Nzambi, tu bhanga o ima ni unjimu ni kutongoloka. Se tu kayela o ijila ni itumu ya Nzambi, twa-nda kula ‘katé mu kitala kya tenena kya Kidistu.—Efezo 4:13.