1, 2. (a) Kiebhi o Jimbangi ja Jihova kia mona o milongi ia Bibidia? (b) Milongi iebhi ia Bibidia i ua uabhela dingi?

KUMA tu Jimbangi ja Jihova, etu tua zolo o milongi ioso ia Bibidia. O Bibidia i tu bhana kikuatekesu kia tokala, kidielelu, ni itendelesu ia kidi. (Loma 15:4) O Bibidia ki divulu dia athu kana, maji ‘o Mak’â Nzambi.’​—1 Tesalonika 2:13.

² Nange, saí milongi ia Bibidia i tua uabhela dingi. Saí athu a uabhela o madivulu a Matesu, Marku, Luka, ni Nzuá, mukonda, o misoso ia lungu ni Jezú, ilondekesa kiambote o ídifua ia Jihova. (Nzuá 14:9) Amukuá a uabhela dingi o madivulu a zuela ia lungu ni ikanenu, kála o divulu dia Dijingunuinu, di londekesa o ‘ima ia-nda bhita kindala.’ (Dijingunuinu 1:1) Amukuá a divua kiambote kioso kia tanga o divulu dia Jisálamu. Athu amukuá a uabhela kutanga o divulu dia Jisabhu, mukonda diala ni itendelesu i tena ku a kuatekesa ku muenhu. Tu tena kumona kuila, mu Bibidia, muala milongi phala o athu oso.

3, 4. (a) Kiebhi ki tuene mu mona o milongi ia madivulu metu? (b) Madivulu ebhi u tuene mu tambula ene mu a bhanga phala o ibuka ia mukuá ia athu?

³ Kuma tua zolo o milongi ia Bibidia, tua zolo ué o milongi  ia madivulu metu, mukonda i tunda mu Bibidia. O madivulu oso ni tumikanda tu tuene mu tambula, tu tunda kua Jihova. Iene i tu kuatekesa ku mu zukama dingi, ni kukolesa o kixikanu kietu.​—Tito 2:2.

⁴ O madivulu metu, a a soneka dingi phala o Jimbangi ja Jihova. Maji saí madivulu, ene mu a soneka benge benge phala kibuka kimoxi kia athu, kala o minzangala mba o jitata. O madivulu ni jividiu jala mu kijimbuete kietu kia internete, ene mu ji bhanga dingi phala ió ki Jimbangi ja Jihova. O milongi ioso íii, ilondekesa kuila, Jihova ka jimbi o kikanenu kiê, kia kubhana milongi iavulu phala o athu oso.​—Izaia 25:6.

5. Tu tena kudielela kuila, Jihova u sanguluka ni ihi?

⁵ Athu avulu a mesenene kukala dingi ni kithangana kia soko, phala kutanga o Bibidia ni madivulu metu. Mu kiki, nange ki tu kala ni kithangana kia soko phala ku di longa o madivulu oso u tu tambula. Tu tena kudielela kuila, Jihova u sanguluka kiavulu, kioso ki tu londekesa o unjimu, mu ku katula kithangana kia soko, phala kutanga ni ku di longa o Bibidia ni madivulu a mukuá. (Efezo 5:15, 16) Maji tua tokala ku di langa, mukonda saí kiluezu. Kiluezu kiahi?

6. Ihi i tena ku tu fidisa kukatula mbote mu milongi iene mu tu bhana Jihova?

⁶ Se ki tu di lange, tu tena kubanza kuila, saí milongi ia Bibidia ni ia madivulu metu, ki i tu tokala. Mu kifika, ihi i tuamba se saí milongi ia Bibidia, ki ia lungu ni ibhidi i tuala na-iu? Mba se o divulu ka di soneka phala o athu a kitala kietu? O kuila tu i tanga ngó ni lusolo, mba tu kala sé ku i tanga? Se kiene, nange tueji kamba kutanga milongi iambote, ieji tu kuatekesa ku muenhu. Kiebhi ki tu tena kulenga o kiluezu kiki? Tua tokala kuijiia kuila, o milongi ioso i tu tambula, i tunda kua Jihova. O Bibidia i zuela: “Eme Jihova Nzambi ié, u ku longa kioso kia uabha, hé u ku endesa mu njila i ua fuama kuenda mu ku di-tela.” (Izaia 48:17) Mu milongi íii, tua-nda zuela ia lungu ni ima itatu, ia-nda tu kuatekesa kukatula mbote, mu ima ioso iene mu tu bhana Jihova.

7. Mukonda diahi tua tokala kuehela o milongi ia Bibidia kutula ku muxima uetu?

⁷ Ehela o milongi ku tula ku muxima ué. Mu kidi, saí milongi ia Bibidia, a i soneka phala muthu umoxi, mba kibuka kia athu. Maji o Bibidia i zuela kuila, o “mikanda ioso ia bhusu Nzambi, mikanda ia kubhandulula.” (2 Timote 3:16) Mukonda dia kiki, kioso ki tu tanga o Bibidia, tua tokala kuehela o milongi kutula ku muxima uetu. Saí phange ua zuela kuila, muéne u tena ku di longa ima iavulu mu musoso umoxi ngó ua Bibidia. Kiki, ki mu kuatekesa kuijiia o ima ioso ia lungu ni musoso iú. Mu kiki, ande dia kumateka kutanga o Bibidia, tua tokala kubhinga kua Jihova, phala ku tu bhana muxima ua tululuka, ni unjimu, phala tu tene kuijiia o madisá a mesena ku tu longa muéne.​—Ejidala 7:10; tanga Tiiaku 1:5.

8, 9. (a) Ibhuidisu iebhi i tua tokala o kubhanga kioso ki tu tanga o Bibidia? (b) O milongi ia lungu ni tufunga, i tu longa ihi ia lungu ni Jihova?

⁸ Bhanga ibhuidisu. Kioso ki u tanga o  Bibidia, dibhuidise: ‘O milongi íii, i ngi longa ihi ia lungu ni Jihova? Kiebhi ki ngi tena kukumbidila o milongi íii ku muenhu uami? Kiebhi ki ngi tena kukuatekesa akuetu bhu kaxi ka milongi íii?’ Se tu xinganeka mu ibhuidisu íii, tua-nda katula mbote iavulu mu kitangelu kietu kia Bibidia. Xinganeka mu phangu íii. O Bibidia i zuela o ídifua ia tokala kulondekesa o tufunga mu kilunga. (Tanga 1 Timote 3:2-7.) Maji avulu mudietu, ki tufunga. Mu kiki, nange tu banza kuila, o milongi íii, ki i tena ku tu kuatekesa. Maji, bhu kaxi ka ibhuidisu i tua mono kiá kudima, tua-nda mona se kiebhi o milongi íii i tena ku tu kuatekesa.

⁹ “O milongi íii, i ngi longa ihi ia lungu ni Jihova?” Jihova u tu tangela o ídifua ia tokala kukala na-iu o tufunga. Muéne ua mesena kuila, o maiala a langa o kilunga kiê, a londekesa o ídifua íii. Kiki kilondekesa kuila, o kilunga kiala ni valolo iavulu bhu pholo ia Jihova. O Bibidia i zuela kuila, muéne ua ki sumbu “ni manhinga ma Mon’êlele muene.” (Ikalakalu 20:28) Mu kiki, Jihova ua mesena kuila, o tufunga a bhana phangu iambote. Ene a-nda bhakula ji konda kua muéne, mukonda dia ukexilu ua kutalatala o athu a tokala mu kilunga. Muéne ua mesena kuila, tu divua kiambote bhu mbandu iâ. (Izaia 32:1, 2) Kioso ki tu tanga  ia lungu ni ídifua íii, tu mona kuila, Jihova ua tu zolo kiavulu.

10, 11. (a) Kiebhi ki tu tena kukumbidila o milongi ia lungu ni tufunga? (b) Kiebhi ki tu tena kukuatekesa akuetu bhu kaxi ka milongi íii?

¹⁰ “Kiebhi ki ngi tena kukumbidila o milongi íii ku muenhu uami?” Se u kafunga, ua tokala kubhitulula o milongi íii, ni kubhanga ioso phala ku i kumbidila dingi kiambote. Se ‘ua mesena kukala kafunga,’ ua tokala kubhanga ioso phala kukala ni ídifua íii iambote. (1 Timote 3:1) Maji o Jikidistá joso, a tena kukatula mbote mu milongi íii. Mu kifika, Jihova ua mesena kuila, tu kala tu athu a tetuluka, ala ni kilunji. (Filipe 4:5; 1 Phetele 4:7) Kioso o tufunga kia “bhana phangu ku kilunga,” tu tena ku di longa ima iavulu ni ene, ni ku fikisa o “kuxikana kuâ.”​—1 Phetele 5:3; Jihebeleu 13:7.

¹¹ “Kiebhi ki ngi tena kukuatekesa akuetu bhu kaxi ka milongi íii?” Bhu kaxi ka milongi íii, tu tena ku kuatekesa o maxibulu a Bibidia ni athu a mukuá, kumona kuila, o tufunga ka difu ni atuameni a jingeleja. O milongi íii, i tu lembalesa ué o kikalakalu kia dikota, kiene mu bhanga o tufunga tua kilunga kietu. O kuijiia o ima íii, kua-nda tu kuatekesa kuxila o jiphange jiji. (1 Tesalonika 5:12) Se tuia ni kua xila, ene a-nda bhanga o kikalakalu kiâ ni kisangusangu kioso.​—Jihebeleu 13:17.

12, 13. (a) Ni jifalamenda ja kutokuesa ji tuala naju, ihi i tu tena o kutokuesa? (b) Bhana phangu ilondekesa se kiebhi o milongi imoxi, i tena ku tu kuatekesa kuijiia dingi ia lungu ni musoso.

¹² Tokuesa o milongi. Kioso ki tu tanga o Bibidia, tu tena kusota o itambuijilu ia ibhuidisu íii:

• Nanhi ua soneka o milongi íii ia Bibidia?

• Kuebhi kua i soneka, ni thembu kuxi?

• Izulukutu iebhi ia kexile mu bhita, kioso kia soneka o divulu didi?

O kuijiia o milongi íii, ku tu kuatekesa kumona o madisá amukuá a lungu ni musoso.

¹³ Mu kifika, o divulu dia Izekiiele 14:13, 14, dizuela: “Kioso o ixi ki i ta kituxi kokuami, anga i ngi xinukina muene kiavulu, kuabhu-phe, eme ue nga-nda kusunununa lukuaku luami mu ku i bilukila, o huta ia kúdia nga-nda ku i bhanga kabilu-bilu hé o ix’oio ngi i tumikisa o nzala, nda ngi vuza-mu o athu ni iama. Né-mbe hanji mu kaxi kâ mu kala kitatu kiki: Noué, Daniiele ni Jobe, ene ngoho mu kuiuka kuâ eji kubhulula o mienhu iâ—Jihova Nzambi ua ki tange.” Se tu tokuesa kiambote o maka enhá, tua-nda mona kuila, kioso Izekiiele kia soneka o izuelu íii, kua kambele hanji 612 kia mivu, phala Kristu kumoneka. Noué ni Jobe, a fuile kiá ukulu, maji Jihova ua lembalala hanji o ufiiele uâ. Maji Daniiele ua kexile hanji ku muenhu. Nange muéne ua kexile ngó ni 20 a mivu, kioso Jihova kia mu tangele kuila, muéne uexile fiiele kala Noué ni Jobe. O milongi íii, i tu longa ihi? I tu longa kuila, Jihova u bhana valolo ku jiselevende jê joso ja fiiele,  katé muene ni minzangala.​—Jisálamu 148:12-14.

14. Kiebhi o milongi iene mu soneka phala o minzangala, kiene mu a kuatekesa? Kiebhi kiene mu kuatekesa ué o athu a mukuá? (Tala o foto ia dianga.)

¹⁴ Madivulu phala o minzangala. Tua di longo kiá kuila, tu tena kukatula mbote mu milongi ioso ia Bibidia. Kiene kimoxi ué, tu tena kukatula mbote, mu milongi ioso ia madivulu metu. Tua-nda di longa phangu ia-nda tu kuatekesa. Ku mivu íii, Jihova uene mu bhana milongi iavulu phala o minzangala. ^[1] (Tala ku disukilu dia milongi.) O milongi íii, i tena ku a kuatekesa ku ditunda kiambote ku ijijidiku ia jikoleka mu xikola, ni kubatula kiambote o maka a moneka kioso kiaia ni kukula. Maji kiebhi ki tu tena kukatula mbote mu kutanga o madivulu a zuela ia lungu ni maka enhá? Kioso ki tu tanga o milongi, tu tena kuijiia o ibhidi iene mu di bhana na-iu o minzangala, mukonda dia kiki, tu kala ni uhete ua ku a kuatekesa ni ku a suínisa.

15. Mukonda diahi o adiakimi a tokala kutanga o milongi iene mu soneka phala o minzangala?

¹⁵ O adiakimi, ka tokala ku dituna kutanga o madivulu a minzangala. Saí milongi iene mu soneka mu madivulu iâ, ia tokala o Jikidistá joso. Mu kifika, etu enoso tua bhingi ku zokela o ubhezelu uetu, ku langa o jihanji jetu, kulenga o ijijidiku ia athu, ni kudituna ku di ta ni makamba a iibha, ni kulenga o itonokenu ia iibha. Mu kiki, sumbala o milongi a i soneka phala o minzangala, maji o milongi ioso i tunda mu Bibidia. Mukonda dia kiki, o Jikidistá joso a tena kukatula mbote mu milongi.

16. O madivulu metu a kuatekesa o minzangala kubhanga ihi?

¹⁶ O madivulu ene mu soneka phala o minzangala, a tena ué ku a kuatekesa kukolesa o ukamba uâ ni Jihova. (Tanga Ndongixi 12:1, 13.) O adiakimi a tena uá kukatula mbote. Mu kifika, mu Despertai! dia Kasamanu ua 2009, mu phutu, tu sanga-mu o milongi “Os Jovens Perguntam . . . Como Tornar a Leitura da Bíblia Agradável?” O milongi íii, iala ni jindunge javulu, iala ué ni kaxa i tu tena kukatula ni ku ku i bhaka phala ku di longa. O kuila o adiakimi a katula mbote mu milongi íii? Saí muhatu uambe kuila, m’ukulu, kia mu bhonzele kiavulu kutanga o Bibidia. Maji muéne ua kumbidila o jindunge ja milongi íii, mukonda dia kiki, muéne u kala ni vondadi iavulu ia kutanga o Bibidia. Muéne uambe kuila, ua uabhela kumona kiebhi o madivulu a disokejeka kiambote. Mu kiki, muéne uene mu tendela kiambote o milongi ioso ia Bibidia. Muéne uambe: “Ki nga kexile ni kisangusangu kiki m’ukulu.”

17, 18. Kiebhi ki tu tena kukatula mbote mu kutanga o madivulu phala o athu u tuene mu bokela? Bhana phangu.

¹⁷ Madivulu phala o athu u tuene mu bokela. Tundé ku muvu ua 2008, tuene mu bhanga O Mulangidi ua ku di longa. O kadivulu kaka, a ka bhange benge benge phala  o Jimbangi ja Jihova, maji saí madivulu a mukuá, a tokala ku athu u tuene mu bokela. O kuila tu tena ué kukatula mbote mu madivulu iâ? Tua-nda di longa phangu imoxi. Kioso ki uixana muthu phala kuia mu kiônge, anga muéne uia, eie u sanguluka. Kioso o mulongexi kia bhanga o diskursu, eie u xinganeka o muthu u ua muixana. Eie u di bhuidisa se kiebhi kia mu divua muéne, ni kiebhi o milongi ia mu kuívua, i tena kulungulula o muenhu uê. Mukonda dia kiki, u sanguluka kiavulu. Maji eie u sanguluka dingi mukonda dia diambu dia diskursu dia tokala.

¹⁸ Kiene ué ki tena ku bhita n’etu, kioso ki tu tanga o madivulu ene mu soneka phala o athu u tuene mu bokela. Mu kifika, O Mulangidi phala o athu, ni milongi ia mukuá mu kijimbuete kietu jw.org, ijimbulula o Mak’â Nzambi mu ukexilu ua bhebhuluka, u kuatekesa o athu kutendela kiambote. Kioso ki tu tanga o milongi íii, tu tena kutendela dingi kiambote o milongi, ni kuzola dingi o kidi kia Bibidia ki tuejiia kiá kiambote. Tu tena ué ku di longa o maukexilu a mukuá, a kujimbulula o ubhezelu uetu mu ukunji. Kiene kimoxi ué, o Despertai! di tu kuatekesa kusuínisa o kixikanu kietu kia kuila, kuene muene muthu ua Bhange o ima ioso. Di tu kuatekesa ué kuzokela o ubhezelu uetu.​—Tanga 1 Phetele 3:15, 16.

19. Kiebhi ki tu tena kulondekesa o kisakidilu kietu ku ima ioso iene mu tu bhana Jihova?

¹⁹ Tu tena kumona kuila, Jihova uene mu tu bhana milongi iavulu phala o mbote ietu. (Matesu 5:3) Tu suluke mu kutanga, ni ku kumbidila o milongi ioso iene mu tu bhana. Se tu bhanga kiki, tua-nda katula mbote iavulu, ni kulondekesa o kisakidilu kietu kua Jihova, mukonda dia ima ioso iene mu tu bhana muéne.​—Izaia 48:17.