1. Bhana phangu ilondekesa o itumu ia Bibidia, ni mu ukexilu uebhi o ku i belesela ku tu bhekela mbote?

BHU KAXI ka Bibidia, Jihova ua tu bhana itumu, ilondekesa kiambote o ima i tua tokala o kubhanga. Mu kifika, muéne u tu tangela kuila, ki tu tokala kubheza iteka, ku nhana, ku kala jihôlua, mba kubhanga ufusa. (1 Kolindo 6:9, 10) O Mon’â Jihova, Jezú, ua tendelesa kiambote o maxibulu mê, ia lungu ni ima ia tokalele o kubhanga. Muéne uambe: “Mua ka [longa maxibulu] ku akua jixi joso, ni ku a batizala mu dijina dia Tata, ni dia Mona, ni dia Nzumbi Ikôla; Ni ku a longa kualuka ima ioso kiá i nga mi tumu eme. Talenu, eme-muène ngà kala ni enu izuua ioso, katé ku dizubhilu dia mundu.” (Matesu 28:19, 20) O ima ioso i tu tumina Jihova ni Jezú, phala o mbote ietu. O itumu ia Jihova, i tu longa kiebhi ki tua tokala ku di langa, ni kulanga o muiji uetu. I tu kuatekesa ué kukala ni sauidi iambote, ni kuzediua ku muenhu. O kima kia beta-o-kota, o kuijiia kuila, kioso ki tu belesela o itumu ia Jihova, katé muene ni kitumu kiê kia kuboka o njimbu, muéne u sanguluka kiavulu, mukonda dia kiki, muéne u tu besoala.

2, 3. (a) Mukonda diahi o Bibidia ki i bhana itumu ia lungu ni ima ioso i tua tokala o kusola ku muenhu? (b) Ibhuidisu iebhi i tua-nda tambuijila mu milongi íii? (Tala o foto ia dianga.)

 ² O Bibidia ki i tu bhana itumu ia lungu ni maka oso u tu dibhana nau. Mu kifika, o Bibidia ki i tumbula o izuatu ioso i tua tokala o ku ta. Kiki kilondekesa o unjimu ua Jihova. O athu ku mundu uoso kene mu zuata mu ukexilu umoxi. Ene a lungulula kiavulu o ukexilu uâ ua kuzuata, maji o milongi ia Bibidia iala ni valolo mu ithangana ioso. O Bibidia ki i tumbula ué o kikalakalu ki tua tokala o kubhanga, itonokenu, mba o ima i tua tokala o kubhanga phala kukala ni sauidi iambote. Jihova uehela o athu, ni atuameni a miji kusola o ima íii.

³ Mu kiki, kioso ki tu mesena kusola kima, ni tu mona kuila, ki bhuala kitumu mu Bibidia ki tumbula o maka u tuala nau, tua tokala ku dibhuidisa: ‘O kuila Jihova u bhana valolo mu ima i ngi sola? O kuila muéne ua-nda sanguluka ni kima kioso-kioso ki ngi sola, se ki ngi xibhaka o itumu ia Bibidia? Kiebhi ki ngi tena kuijiia kuila, muéne ua-nda sanguluka ni ima i nga-nda sola?’

4, 5. Kiebhi o ima i tu sola, i tena ku tu luualesa mba ku tu zediuisa, ni ku luualesa akuetu mba ku a zediuisa?

⁴ Saí athu a banza kuila, a tena kubhanga o ima ioso-ioso ia mesena. Maji etu tua mesena kubhanga o ima i sangulukisa Jihova. Mu kiki, ande dia kusola kubhanga kima, tua tokala kuxinganeka se ihi i longa o Bibidia ia lungu ni maka u tuala nau, ni ku belesela o milongi. Mu kifika, o Bibidia i tu tangela o ibanzelu ia Nzambi ia lungu ni manhinga. Mukonda dia kiki, etu tuene mu bhanga ioso phala kukaiela o milongi ia Bibidia. (Dimatekenu 9:4; Ikalakalu 15:28, 29) Tu tena kusamba kua Jihova, mu ku mu bhinga phala ku tu kuatekesa kusola o ima i mu sangulukisa.

⁵ O ima i tu sola, i tena ku tu luualesa mba ku tu zediuisa. O kusola kiambote, ku tena ku tu kuatekesa kuzukama dingi kua Jihova. Maji o kusola kia iibha, ku tena kuzanga o ukamba uetu ni muéne. O ima i tu sola, i tena ué ku luualesa akuetu mba ku a sangulukisa. Etu ki tu mesena kubhanga kima, ki tena ku luualesa akuetu, mba kima ki zozesa o kixikanu kiâ. Ki tu mesena ué kuzanga o ukamba ua jiphange jetu mu kilunga. Mu kiki, tua tokala kubhanga ioso, phala kusola kiambote o ima.​—Tanga Loma 14:19; Ngalásia 6:7.

6. Ihi ia-nda tu kuatesa kusola kiambote o ima i tua mesena?

⁶ Kiebhi ki tu tena kusola kiambote, se ki bhuala kitumu kia Bibidia kia lungu ni maka u tua mu bhita nau? Mu veji dia kubhanga o ima kala ki tua mesena, tua tokala kuxinganeka kiambote mu maka u tua mu bhita, ni kusola kubhanga o kima ki sangulukisa Jihova. Mu kusukáku, tu tena ku dielela kuila, muéne ua-nda tu kuatekesa ku di tunda kiambote.​—Tanga Jisálamu 37:5.

7. Se ki bhuala kitumu kia Bibidia ki kizuela ia lungu ni maka u tua mu bhita, kiebhi ki tu tena kuijiia o ibanzelu ia Jihova?

⁷ Kiebhi ki tu tena kuijiia o ima i sangulukisa Jihova? O divulu dia Efezo 5:17, dizuela: “Tongolola ioso o vondadi ia mi mesena [Jihova] o kubhanga.” Se ki bhuala kitumu  kia Bibidia, ki zuela ia lungu ni maka u tua mu bhita nau, tua tokala kutongolola kiambote, ni kusota kuijiia o kima kia mesena Jihova, phala kubatula kiambote o maka u tuala nau. Kiebhi ki tu tena kubhanga kiki? Tua tokala kusamba kua Nzambi, ni kuehela o nzumbi ié ikola ku tuendesa.

8. Kiebhi Jezú kia tongolola o vondadi ia Jihova? Bhana phangu.

⁸ Jezú uejidile kiambote o ima ia tokalele o kubhanga, phala kusangulukisa Jihova. Mu kifika, mu ithangana iiadi, kioso o mundu kia kexile ni nzala iavulu, Jezú ua sambele kua Nzambi, ni ku a bhana kudia bhu kaxi ka madiuanu. (Matesu 14:17-20; 15:34-37) Maji kioso muéne kia kexile ni nzala iavulu mu kikangalakata, anga Diabhu u mu tendala phala kubhangesa o matadi ku kituka jimbolo, Jezú ua ditunu. (Tanga Matesu 4:2-4.) Muéne uejidile kiambote Tat’ê, mukonda dia kiki, muéne uejidile kuila, Jihova ka mesenene kuma, muéne u katula mbote mu kutena kua nzumbi ikola, phala kusuua o ibhindamu iê. Muéne uejidile ni kidi kioso kuila, Tat’ê, ueji mu langa, ni ku mu bhana o kudia mu kithangana kia tokala.

9, 10. Ihi ia-nda tu kuatekesa kusola kiambote o ima? Bhana phangu.

⁹ Kála Jezú, tu tena kusola kubhanga kiambote o ima, se tu xikina ku tuendesa kua Jihova. O Bibidia i zuela: “Dielela kua Jihova ni muxima ué uoso; kana kudielela ngó o kilunji kié. Mu suue muene ngó mu mauendelu mé moso, muene a iukise o njila jé joso. Ku di-mone unjimu ku mesu mé e’muene; ku phulu tunda-ku, u xile Jihova.” (Jisabhu 3:5-7) Se tu di longa o Bibidia, ni kusota kuijiia o ibanzelu ia Jihova, tua-nda kuijiia kiambote o ima i tua tokala o kusola phala ku mu sangulukisa. Kioso ki tuia ni ku di longa ia lungu ni ibanzelu ia Jihova, ki kia-nda tu bhonza kubhanga o ima i mu sangulukisa. Mu kiki, tua-nda kala polondo phala kuxikina o itendelesu ia Nzambi.​—Izekiiele 11:19.

¹⁰ Xinganeka kuila, muhatu ua kazala kiá, uia mu sumba ima, anga u mona idiatelu ia uabha. Maji ia te kalu. Sumbala o munumi’iê kala nê kumoxi, maji muéne uejiia se ihi ieji banza muéne, se u ngastala kitadi kiavulu. Kiebhi muéne kiejiia o maka enhá? Ene a kazala kiá thembu, mu kiki, muéne uejiia kiambote kiebhi o munumi’ê kia mesena kuila, ene a ngastala o kitadi. Kiene ué kimoxi, se tu sota kuijiia o ibanzelu ia Jihova, ni ima ia bhangele m’ukulu, tua-nda kuijiia o ima i tua tokala o kubhanga phala ku mu sangulukisa.

11. Ibhuidisu iebhi i tua tokala o kubhanga, kioso ki tu tanga mba ki tu di longa o Bibidia? (Tala o kaxa “ Kioso ki u di Longa o Bibidia, Dibhuidise.”)

¹¹ Kiebhi ki tu tena kuijiia kiambote o ibanzelu ia Jihova? O kima kia beta-o-kota ki tua tokala o kubhanga, o kutanga ni ku di longa o Bibidia izuua ioso. Kioso ki tu di  longa, tua tokala ku dibhuidisa: ‘O milongi íii i ngi longa ihi ia lungu ni Jihova? Mukonda diahi muéne ua bhange kiki?’ Kála Davidi, tua tokala ué kubhinga kua Jihova phala ku tu kuatekesa ku muijiia kiambote. Davidi uambe: “Ng’ijidise jinjila jé, u Jihova; ngi longe o uendelu ué. Ng’endese, u mukua kukumbidila o kidi; ngi longe, u Nzambi iami ia kibhamuenhu; kumbi dioso dia [kambàmba] ngi kinga kokué.” (Jisálamu 25:4, 5) Kioso ki tu di longa kima kia lungu ni Jihova, tua tokala kuxinganeka, se kiebhi ki tu tena kukumbidila o milongi íii ku muenhu uetu. O kuila tu tena ku i kumbidila ku muiji, ku salu, bhu xikola, mba mu ukunji? Se tu xinganeka mu mak’etu a kizuua ni kizuua, ki kia-nda tu bhonza kuijiia kiebhi Jihova kia mesena kuila, tu kumbidila o milongi i tua di longo.

12. Kiebhi o madivulu metu ni iônge, i tu kuatekesa kuijiia kiambote o ibanzelu ia Jihova, ia lungu ni maka u tu bhita nau?

¹² O ukexilu ua mukuá ua kuijiia o ibanzelu ia Jihova, o kuívua kiambote o milongi ia Bibidia i tu longa o kilunga kiê. Mu kifika, se tua mesena kubatula maka, o ji falamenda jetu, kala o Kadivulu ka ku Tokuesa Phala o Jimbangi ja Jihova, ni jifalamenda jamukuá,  ji tena ku tu kuatekesa kuijiia o ibanzelu ia Jihova. Tu tena ué kukatula mbote mu iônge ietu, kioso ki tuívua kiambote o milongi, ni kubhana itambuijilu, ni kioso ki tu xinganeka mu milongi i tuívua. Kiki ki tena ku tu kuatekesa kubanza kála ki banza Jihova. Mukonda dia kiki, tua-nda sola kubhanga o ima i mu sangulukisa, ni kukingila o dibesá diê mu ima i tu sola.

13. Bhana phangu ilondekesa se kiebhi ki tu tena kusola kiambote, kioso ki tu sota kuijiia o ibanzelu ia Jihova.

¹³ Tua-nda di longa phangu ilondekesa se kiebhi ki tu tena kusola ni unjimu, kioso ki tu xinganeka kiebhi ki divua Jihova. Nange eie ua mesena kukala muboki ua thembu ioso. Eie ua lungulula o ukexilu uê ua muenhu, phala kukala ni kithangana kia soko phala kuboka. Maji né kiki, eie uala hanji ni phata sé ua-nda sanguluka ku muenhu mba kana, mukonda ki uala dingi ni kitadi kiavulu. Mu kidi, o Bibidia ki i zuela kuila, phala kusidivila Jihova, o muthu ua tokala kukala muboki ua thembu ioso. Tu tena ku mu sidivila ni ufiiele uoso, kála muboki. Maji Jezú uambe kuila, Jihova u besoala oso a di bhakula mu sidivisu ia Utuminu. (Tanga Luka 18:29, 30.) O Bibidia izuela ué kuila, Jihova u sanguluka kioso ki tu bhanga ioso phala ku mu ximana, ni kuila, muéne ua mesena kuma tu mu sidivila ni kisangusangu kioso. (Jisálamu 119:108; 2 Kolindo 9:7) Se tu samba ia lungu ni maka enhá, ni kuxinganeka mu ima íii, tua-nda tena kusola kubhanga o kima kia tokala, ni ku kingila o dibesá dia Jihova.

14. Kiebhi ki u tena kuijiia o se o izuatu iê i sangulukisa Jihova mba kana?

¹⁴ Xinganeka mu phangu ia mukuá: Saí izuatu i ua uabhela kiavulu, maji eie uejiia kuila, saí athu mu kilunga, ka-nda divua kiambote se a ku mona ni izuatu íii. Mu Bibidia, ki muala milongi i tumbula o ukexilu iú ua kuzuata. Mu kiki, kiebhi ki u tena kuijiia o ibanzelu ia Jihova ia lungu ni maka enhá? O Bibidia i zuela: “Ahatu a [tokala a] kemba ni izuatu ia fuama muthu ua sonhi, a kala jinjimu. Kana kukemba ni usamuinu ua bhônzo, mba matunda a ulu, mba ni jiphélula, ni izuatu iate kitadi kiavulu. Maji kota uzuatelu ua kubhanga ima iambote, kala kia fuama ahatu a sola kuxila Nzambi.” (1 Timote 2:9, 10) Mu kidi, o kitendelesu kiki, phala o jiselevende joso ja Nzambi, kikale o ahatu mba o maiala. Se tu kala ni ukexilu uambote, ande dia kuzuata, tua-nda xinganeka kiambote se kiebhi kia-nda divua akuetu, kioso kia-nda mona o izuatu ietu. Kuma tua zolo o jiphange jetu, etu ki tua mesena kubhanga kima kioso kioso, ki tena ku a luualesa mba ku a bhangesa ku divua kia iibha. (1 Kolindo 10:23, 24; Filipe 3:17) Se tu sota ku kumbidila o milongi ia Bibidia, ni ku xinganeka kiebhi ki divua Jihova, tua-nda sola o ima i mu sangulukisa.

15, 16. (a) Kiebhi kia-nda divua Jihova se tu suluka ni kubanza mu ima ia ufusa? (b) Kiebhi ki tu tena kuijiia se o itonokenu i tua mesena i sangulukisa Jihova mba kana? (c) Kiebhi ki tua tokala kusola o ima ia beta-o-kota?

¹⁵ O Bibidia i tu longa kuila, Jihova u divua kia iibha, kioso o athu kia bhanga ima ia iibha, mba a xinganeka mu ima ia iibha. (Tanga Dimatekenu 6:5, 6.) Kiki, kilondekesa kuila, Jihova ka mesena kuma tu xinganeka mu ima ia ufusa. Mu kidi, se tu suluka  ni kuxinganeka mu ima íii ia iibha, tu tena ku i bhanga. Jihova ua mesena kuila, tu xinganeka mu ima ia zele, ni mu ima iambote. O dixibulu Tiiaku ua soneka kuila, o unjimu ua Jihova “u dianga kuzela, anga u tululuka, u lenduka, u bhekela u kamba. Uene u vula ku kuatela henda, u bhekela kubhongolola ibundu ia ibhangelu iambote. Ki u moneka katungu, mba u kala ni mangonha.” (Tiiaku 3:17) Mu kiki, o Bibidia i tu longa kuila, tua tokala kulenga o itonokenu ioso ioso, i tena ku tu bhangesa kubanza mba kukala ni ji hanji ja kubhanga o ima ia iibha. Se tu sota ku tendela kiambote o ima ia zolo Jihova ni ima ia zembe, ki kua-nda tu bhonza kusola o madivulu, ji filme, ni ji joko jambote. Ki tua-nda bhinga kuibhula akuetu se ihi i tua tokala o kubhanga.

¹⁶ Kioso ki tu mesena kusola kima, saí bhabha, kukala maukexilu avulu a sangulukisa Jihova. Maji se kua bhingi kusola kima kia dikota, nange kima kiambote kubhinga o kikuatekesu kia kafunga mba kia phange ia mukuá, phala ku tu bhana jindunge. (Tito 2:3-5; Tiiaku 5:13-15) Mu kidi, ki tu tokala kubhinga kua phange phala kubatula o maka. Mu veji dia kiki, tua tokala kuxinganeka kiambote mu milongi ia Bibidia, ni kubatula o maka. (Jihebeleu 5:14) Poxolo Phaulu uambe: “Muthu ua bhingi uambata o kimbamba kiê, muthu uambata o kimbamba kiê.”​—Ngalásia 6:5.

17. Mbote iebhi i tu katula, kioso ki tu sola kubhanga o ima i sangulukisa Jihova?

¹⁷ Se tu sota kubhanga o ima i sangulukisa Jihova, tua-nda mu zukama dingi, tua-nda kala ni ukamba uambote ni muéne, ni kutambula mabesá. (Tiiaku 4:8) Mu kiki, o kixikanu kietu kua Jihova, kia-nda suína dingi. Tu suluke ni kuxinganeka mu milongi ia Bibidia, phala kutendela, ni kuijiia kiambote o ibanzelu iê. Mu kidi, izuua ioso, tua-nda di longa kima kia ubhe kia lungu ni Jihova. (Jobe 26:14) Maji se tu bhanga ioso phala ku di longa o ima ia lungu ni muéne lelu, tua-nda kala tu ji njimu, mu kiki, tua-nda sola kiambote o ima ku muenhu uetu. (Jisabhu 2:1-5) O ixinganeku ia athu, i lunguluka, maji Jihova kene mu lunguluka. O mukuá jisalamu uambe: “Phangu ia Jihova kene ku i lungulula, kuma ia kalé; kikutu kia ta muene, ki xalela ku miji ni miji.” (Jisálamu 33:11) Tu tena kumona kuila, se tu sota kubanza kala ki banza Jihova, ni kubhanga o ima i mu sangulukisa, tua-nda sola kiambote o ima ku muenhu uetu.