1, 2. Ibhuidisu iebhi i moneka mukonda dia izuelu ia Jezú i tu sanga mu divulu dia Matesu 24:14?

JEZÚ ua kanena kuila, mu izuua isukidila-ku, eji boka o njimbu iambote ia Utuminu ku athu oso. (Matesu 24:14) O athu oso ku mundu ejiia kuila, o Jimbangi ja Jihova a bhanga o kikalakalu kia kuboka. Saí athu, a uabhela o njimbu i tu boka, maji amukuá kana. Maji katé muene ni ió a dituna o njimbu ietu, a xila o kikalakalu kietu. Tuene mu zuela kuila, etu ngó tua mu bhanga o kikalakalu kia kanene Jezú. O kuila tuala ni ujitu ua kuzuela kiki? Kiebhi ki tu tena kuijiia ni kidi kioso kuila, o kikalakalu kietu kia kuboka, kiene o kikalakalu kia kanene Jezú?

² Jingeleja javulu ji zuela kuila, ene mu boka o njimbu ia Jezú. Maji o kuboka kuâ, kua lungu ngó ni madiskursu a bhanga mu jingeleja, mu mutelembe ua izuzumbia, ni mu Internete. Mba nange a tangela ngó akuâ, kiebhi kia di longo ia lungu ni Jezú. A mukuá a banza kuila, se a kuatekesa o athu a bhindama, a saka o athu a mu kata, mba a longa o athu bhu  jixikola sé kua bhinga kitadi, ene a mu bhanga o kikalakalu kia kuboka. Maji o kuila o ikalakalu íii ia lungu ni kikalakalu kia kuboka kia zuela Jezú?

3. Kala ki tendelesa o divulu dia Matesu 28:19, iebhi o ima iuana ia tokala kubhanga o akaiedi a Jezú?

³ O kuila Jezú ua mesenene o athu ene eza mu sota o maxibulu mê? Kana! Kioso kia fukunuka, Jezú ua tangela o jihama ni jihama ja akaiedi’ê, uixi: “Enu-phe ndenu, mua ka longe [maxibulu] ku akua jixi joso, ni ku a batizala . . . Ni ku a longa kualuka o ima ioso kiá i nga mi tumu eme.” (Matesu 28:19, 20) Mu kiki, kuma tu maxibulu a Jezú, tua tokala kubhanga ima iuana. Tua tokala kubhanga maxibulu, ni ku a batizala, ni ku a longa. Maji kia dianga, tua tokala kuia mu sota o athu. Saí muthu mukua kutokuesa o milongi ia Bibidia, ua zuela: “O kitumu kia ‘kuia’ kia tokala o athu oso ala ni kixikanu, né muene se kubhinga kuenda mu ikoka mba kuzaúka o musanza ua kalunga.”​—Matesu 10:7; Luka 10:3.

4. Ihi ilombolola kukala ‘athambi a athu?’

⁴ Ihi ia kingile Jezú ku maxibulu mê? O kuila muéne ua mesenene kuila, kala muthu u boka ubheka uê, inga a di sokejeka phala kuboka kumoxi? Kuma o muthu umoxi ka tena ku bokela “akua jixi joso,” o maxibulu mê a tokalele ku di bunda kumoxi. Kiki kiene o kima kia mesenene kuzuela Jezú, kioso kiexana o maxibulu mê phala kukala ‘athambi a athu.’ (Tanga Matesu 4:18-22.) Jezú ka kexile mu zuela ia lungu ni muthambi u takula o nzolo ni ixika, anga u kingila o mbiji kuíza phala kudia o ixika. Mu veji dia kiki, Jezú ua kexile mu zuela ia lungu ni ku tamba ni uanda. Phala kutamba ni uanda, ku bhinga kukalakala kiavulu, ku di sokejeka kiambote, ni kukalakala kumoxi.​—Luka 5:1-11.

5. Iebhi o ibhuidisu iuana i tua tokala kutambuijila, ni mukonda diahi?

⁵ Phala kuijiia se nanhi ua mu boka o njimbu iambote lelu, tua tokala kutambuijila o ibhuidisu iuana ia kaiela:

• Njimbu iebhi ia tokala kuboka o akaiedi a Jezú?

• Mukonda diahi a tokala kuboka o njimbu íii?

• Kiebhi kia tokala kuboka?

• A tokala kuboka katé kuebhi ni thembu kuxi a tokala kuzubha o kikalakalu kiki?

O itambuijilu ia ibhuidisu íii, ia-nda tu kuatekesa kuijiia se a nanhi a mu bhanga o kikalakalu kiki, ki bhulula o mienhu. Ia-nda suínisa ué o vondadi ietu ia kukolokota mu kuboka.​—1 Timote 4:16.

6. Mukonda diahi u tena kudielela ni kidi kioso kuila, o Jimbangi ja Jihova a mu boka o njimbu ia kidi?

⁶ Tanga Luka 4:43. Jezú ua boko o “Njimbu Iambote ia Utuminu.” Mu kiki, muéne ua mesena kuila, o maxibulu mê a boka ué. A nanhi a mu boka o njimbu íii ku athu oso? O Jimbangi ja Jihova, ene ngó a mu bokela o athu oso! Katé muene ni ió a tu zemba,  ejiia o kidi kiki. Mu kifika, saí mutuameni ua ngeleja ua kalakala kiá mu jixi javulu, ua tangela Mbangi ia Jihova kuila, mu jixi joso muende, muéne uebhula o Jimbangi ja Jihova, se njimbu iebhi ia kexile mu boka. O mutuameni uambe: “Mukonda dia kutobha kuâ, ene oso a tambuijila: ‘O njimbu iambote ia Utuminu.’” Mu kidi, o izuelu ia mutuameni iú, ilondekesa kuila, etu ki tua tobho, kana. Mu veji dia kiki, iene ilondekesa kuila, etu tua dibundu kumoxi, tu Jikidistá ja kidi. (1 Kolindo 1:10) O Utuminu ua Nzambi, uene ué o njimbu ia beta-o-kota ia Mulangidi u Bhana Ngolokela ia Utuminu ua Jihova. O kadivulu kaka, a ka bhanga mu 254 a madimi. Kioso kia bhanga O Mulangidi, a katula 59.000.000 a jikopia. Mu kiki, o kadivulu kaka, kene o kadivulu ka beta kota ku ka uanena o athu ku mundu uoso!

7. Kiebhi ki tuejiia kuila, o atuameni a Kidistándade ka mu boka o njimbu ia kidi?

⁷ O atuameni a Kidistándade, ka mu boka o njimbu ia lungu ni Utuminu ua Nzambi. Kioso kia zuela ia lungu ni Utuminu, ene amba kuila, o Utuminu, kima kiala ku muxima ua muthu. Ene ka zuela kuila, o Utuminu ua Nzambi uala ku diulu, ni kuila, o sobha ia Utuminu iú, Jezú. Mu veji dia kiki, a zuela ngó ia lungu ni Jezú, mu kithangana kia Natale mba kia Phasu. Ene ka jimbulula kuila, o Utuminu ua Nzambi ua-nda zubha o hadi ioso iene mu tala o athu, ni kuila, kua kambe ngó, uene ua-nda zubha o kuiibha kuoso mu ixi. (Dijingunuinu 19:11-21) Tu tena kumona kuila, o atuameni a Kidistándade kejiia o ima ia-nda bhanga Jezú, o Sobha ia Utuminu ua Nzambi. Kuma ene kejiia kiambote o njimbu ia Jezú, ene ka tendela se mukonda diahi a tokala kuboka.

8. Uebhi o ukexilu ua iibha ua kubhanga o kikalakalu kia kuboka?

⁸ O maxibulu a Jezú ka tokala kuboka phala ku nganhala kitadi, mba kutunga jinzu ja fuama. Jezú uambe: “Mua tambula ngoho, bhanenu ngoho.” (Matesu 10:8) Mu kiki, o athu ka tokala kuboka phala ku nganhala kitadi. (2 Kolindo 2:17) O maxibulu a Jezú ka tokala kubhinga kitadi, phala kubhanga o kikalakalu kia kuboka. (Tanga Ikalakalu 20:33-35.) Sumbala Jezú ua jimbulula kiambote o kitendelesu kiê, jingeleja javulu a landuka, mukonda ene mu bhinga kitadi phala ku fuamesa o jingeleja jâ, kufuta o atuameni, ni athu amukuá a kalakala-mu. Mukonda dia kiki, atuameni avulu a Kidistándade, a kituka jimvuama.​—Dijingunuinu 17:4, 5.

9. Kiebhi o Jimbangi ja Jihova kia londekesa kuila, kene mu bhanga o kikalakalu kia kuboka phala kunganhala kitadi?

⁹ O kuila o Jimbangi ja Jihova a bhinga kitadi mu Ididi iâ ia Ubhezelu, mba mu iônge ia makota? Kana! Ene a bhanga o kikalakalu kiâ ni kitadi ki sangela o athu mu vondadi iâ. (2 Kolindo 9:7) Maji né kiki, o muvu ua bhiti, o Jimbangi ja Jihova a bhange tu zunda tuiadi tua ji ola mu kikalakalu kia kuboka. Ene a longo ué divua dia mazunda a maxibulu a Bibidia ndenge, ku jimbeji joso. Kene mu a futa phala kubhanga o  kikalakalu kia kuboka, maji né kiki, ene a sanguluka mu ku sangela kitadi phala kubhanga o kikalakalu kiki. Ia lungu ni kikalakalu kia Jimbangi ja Jihova, saí muthu mukua kutokuesa, uambe: “O kima kia beta o kota kia bhangesa kubhanga o kikalakalu kiki, o kubokela o athu ni ku a longa.” Muéne ua zuela ué kuila, o Jimbangi ja Jihova kala ni atuameni a bhingi ku a futa. Mu kiki, mukonda diahi tu boka, se ki tuene mu nganhala kitadi? Tu bhanga o kikalakalu kiki mu vondadi ietu, mukonda tua zolo Jihova ni athu. O ku dibhakula kuku, ku kumbidila o kikanenu mu divulu dia Jisálamu 110:3. (Tanga.)

10. Kiebhi kia kexile mu boka Jezú ni maxibulu mê?

¹⁰ Kiebhi kia kexile mu boka Jezú ni maxibulu mê? Ene ai mu ididi ioso mua kexile o athu. Mu kifika, ene a bokele mu ikoka ni bhu itanda. Ene akexile ué múia mu sota o athu mu jinzu jâ. (Matesu 10:11; Luka 8:1; Ikalakalu 5:42; 20:20) O kuboka nzo ni inzo, kua kexile mu kuatekesa ku bokela o athu oso.

11, 12. Kiebhi ki u tena kusokesa o nguzu iene mu bhanga o athu a Kidistándade ni mundu ua Jihova, phala kuboka o njimbu iambote?

¹¹ O kuila o jingeleja ja Kidistándade a boka o njimbu iambote kála kia kexile mu boka Jezú? Mu kidi, o atuameni a tambula kitadi, a bhanga madiskursu phala o athu aia mu jingeleja jâ. O atuameni iá, kene mu bhanga maxibulu a ubhe. Ene a bhanga ngó ioso phala o athu ka tunde mu jingeleja jâ. Saí ithangana, ene a suínisa o athu mu jingeleja jâ, kuia mu boka. Mu kifika, ku  muvu ua 2001, Papa João Paulo II ua soneka mu mukanda kuila, o athu mu ngeleja a tokalele kuboka o Njimbu Iambote. Muéne uambe ué kuila, o athu a tokalele ku divua kala Phaulu, kioso kiambe: “Kokolo diami se ngi kamba kukola o Njimbu Iambote!” Muéne ua suluka mu kuzuela kuila, o athu a tokala kubhanga o kikalakalu kiki, ko athu ngó ala ni uhete, maji o athu oso mu ngeleja. Maji athu avulu ka mu bhana mátui.

¹² Ihi i tuamba ia lungu ni Jimbangi ja Jihova? Ene ngó a boka kuila, Jezú uene mu tumina kiá kala Sobha, tundé ku muvu ua 1914. Ene a belesela Jezú, mu kiki, ene a tá o sidivisu ia kuboka ku pholo. (Marku 13:10) O divulu Pillars of Faith—American Congregations and Their Partners [Pilares da Fé​—Congregações Americanas e Seus Apoiadores] dia zuela kuila, o Jimbangi ja Jihova, a bhana valolo iavulu ku kikalakalu kia kuboka. Diene diambe ué kuila, kioso kia sanga o athu ala ni nzala, ala ubheka, mba athu a mu kata, ene a a kuatekesa. Maji ka jimba kuila, o kima kia beta kota, o ku a bokela ia lungu ni dizubhilu dia mundu iú, ni ku a longa o njimbu ia kubhuluka. O Jimbangi ja Jihova, a mu boka hanji o njimbu íii, ni kukaiela o ukexilu ua kuboka ua Jezú ni maxibulu mê.

13. A tokala kuboka o njimbu iambote katé kuebhi?

¹³ Jezú ua zuela kuila, o akaiedi’ê eji boka ni ku longa o njimbu iambote “mu ngongo ioso.” A a tumina kubhanga maxibulu akua “jixi joso.” (Matesu 24:14; 28:19, 20) Kiki kilombolola kuila, a tokalele kuboka o njimbu iambote ku mundu uoso.

14, 15. Ihi ilondekesa kuila, o Jimbangi ja Jihova a mu kumbidila o kikanenu kia Jezú kia ku tula o njimbu iambote ku mundu uoso? (Tala o foto ia dianga.)

¹⁴ O Jimbangi ja Jihova, ene ngó a mu kumbidila o kikanenu kia Jezú, kia kuboka o njimbu iambote ku mundu uoso. Mukonda diahi tu zuela kiki? Mu ixi ia Estados Unidos, kuene 600.000 a atuameni a jingeleja ja Kidistándade, maji kuene 1.200.000 a Jimbangi ja Jihova a mu boka o njimbu iambote mu ixi ienioió. Kuene 400.000 a atuameni a ngeleja ia Katolika ku mundu uoso, maji kuene 8 dia mazunda a Jimbangi ja Jihova ndenge, a mu boka o njimbu iambote ku 240 a jixi. Sé phata, o Jimbangi ja Jihova, a mu boka o njimbu iambote ku mundu uoso. O kikalakalu kiki, ki bheka kijingu kua Jihova!​—Jisálamu 34:1; 51:15.

¹⁵ Kuma tu Jimbangi ja Jihova, tua mesena kuboka o njimbu iambote ku athu avulu ande dia kuíza o dizubhilu. Phala kubhanga o kikalakalu kiki, tuene mu bhanga mazunda ni mazunda a madivulu, tudivulu, ni tumikanda phala kuixana o athu mu iônge ietu ia makota ni Lembalasa, mu 700 a madimi ndenge. Tuene mu bhana o madivulu iá ku athu, sé ku a bhinga kitadi. Ku muvu ua tundu-mu, tua bhange 4.5 a tu zunda tua madivulu a Bibidia. Tua bhange ué 200 a mazunda ndenge, a ji Bibidia Tradução do Novo Mundo das Escrituras Sagradas, mu 130 a madimi ndenge. O milongi mu kijimbuete kietu kia internete, iala mu 750 a madimi ndenge. O Jimbangi ja Jihova, ene ngó a mu bhanga o kikalakalu kiki kia madiuanu.

16. Kiebhi ki tuejiia kuila, o Jimbangi ja Jihova ala ni nzumbi ikola ia Nzambi?

¹⁶ Thembu kuxi kieji bhua o kikalakalu kia kuboka? Jezú ua zuela kuila, eji boka o njimbu  iambote katé kieji kuíza o dizubhilu. Kuma tu Jimbangi ja Jihova, tuene mu kolokota mu kuboka mu izuua íii isukidila-ku, mukonda tuala ni nzumbi ikola ia Jihova. (Ikalakalu 1:8; 1 Phetele 4:14) Saí athu mu jingeleja, nange a zuela: “Tuala ni nzumbi ikola.” Maji o kuila a tena kubhanga o kikalakalu kia mu bhanga o Jimbangi ja Jihova mu izuua íii isukidila-ku? Saí ibuka ia fikisa kuboka kála etu, maji a lembua. A mukuá ala ni vondadi ia kuboka, maji ka mesena kuboka thembu iavulu. A mukuá nange a boka nzo ni inzo, maji kene mu boka o njimbu iambote ia Utuminu. Mu kiki, ene ka tena kusuluka ni kubhanga o kikalakalu kia mateka Jezú.

17, 18. (a) Mukonda diahi tu tena kuxikina ni kidi kioso kuila, o Jimbangi ja Jihova ene a mu boka o njimbu iambote ia Utuminu lelu? (b) Nanhi u tu kuatekesa kukolokota mu kubhanga o kikalakalu kiki?

¹⁷ Mu kiki, a nanhi a mu boka o njimbu iambote ia Utuminu lelu? O Jimbangi ja Jihova! Kiebhi ki tuejiia o kidi kiki? Mukonda etu tua mu boka o njimbu ia tokala, o njimbu iambote ia Utuminu. Tua mu sota o athu mu ukunji uetu. Mu kiki, tua mu boka mu ukexilu ua tokala. Saí kima kiambote ki tu bhangesa kuboka. Mu kidi, tuene mu boka, mukonda tua zolo Jihova ni athu. O kikalakalu ki tu bhanga kionene, mukonda tu bokela o athu akua jixi joso ni madimi moso. Tua-nda suluka ni kuboka o njimbu iambote ia Utuminu, katé kia-nda kuíza o dizubhilu!

¹⁸ Tu diuana mu kumona o kikalakalu kia dikota kia mu bhanga o mundu ua Jihova, phala kuboka o njimbu iambote mu izuua íii isukidila-ku. Nanhi u tu kuatekesa kubhanga o kikalakalu kioso kiki? Poxolo Phaulu ua jimbulula: “Nzambi muène u kalakala moxi dienu, mu ku mi solesa ni ku mi bhangesa kutumaka kioso kia mu kala mu vondadi iê iambote.” (Filipe 2:13) Jihova a kolokote mu ku tu bhana nguzu, phala tu suluke ni kuboka o njimbu iambote ni kusuína kuoso!​—2 Timote 4:5.