1-3. (a) Iebhi o ima i tena ku tu bhonza kulungulula, né muene kioso kia tu batizala? (b) Nange ihi i tu dibhudisa, se kia mu tu bhonza kulungulula ima ku muenhu uetu? (Tala o foto ia dianga.)

KU MIVU iavulu, Kevin ua kexile mu jokala phala ku mu futa kitadi, ua kexile mu xibha, kúnua kiavulu, ni kuxibha diamba. ^[1] (Tala ku disukilu dia milongi.) Mu kubhita thembu, muéne ua di longo ia lungu ni Jihova, iú ua mesenene kukala kamba diê. Maji phala kukala kamba dia Jihova, muéne ua tokalele kulungulula o muenhu uê. Ni kikuatekesu kia Jihova ni Maka Mê, o Bibidia, muéne ua lungulula o ukexilu ua muenhu uê.​—Jihebeleu 4:12.

² Kioso Kevin kia mu batizala, muéne ua tokalele hanji kulungulula o ukexilu uê, phala ku kituka Kidistá iambote. (Efezo 4:31, 32) Mu kifika, muéne ua kexile mu kala ni njinda iavulu. Muéne ua sasumuka mu kumona kuila, kia bhonzele ku langa o njinda iê. Mu kidi, Kevin uambe kuila, kia bhonzele dingi ku  langa o njinda iê, o maukexilu a iibha a xisa ande dia ku mu batizala, ndenge! Maji muéne ua lungulula o ukexilu uê, mu kubhinga o kikuatekesu kia Jihova ni ku di longa o Bibidia.

³ Ande dia ku tu batizala, avulu mudietu a lungulula ima iavulu ku muenhu uâ, phala kubhanga kála ki tuma o Bibidia. Maji né muene lelu, tu mona kuila, kuene hanji ima iofele i tua tokala kulungulula, phala kukaiela o ídifua ia Nzambi ni ia Kristu. (Efezo 5:1, 2; 1 Phetele 2:21) Mu kifika, nange tu mona kuila, tu di tenda kiavulu, mba tu longolola kiavulu, ni kuzuela ima i xidisa o majina a akuetu. Mba nange tu kala ni uôma uavulu ua ima ia-nda zuela, mba ia-nda banza akuetu. Mukonda dia kiki, tu dituna kubhanga o kima kia tokala. Mba nange tuene mu di suínisa phala kulungulula o ukexilu uetu, maji né kiki, tua mu bhanga hanji o ima ia iibha i tuexile mu bhanga m’ukulu. Mu kiki, nange tu dibhuidisa: ‘Mukonda diahi kibhonza kulungulula o ima íii iofele? Ihi i nga tokala kubhanga phala kubelesela o ima i tuma o Bibidia, ni kulungulula o ukexilu uami?’

4. Mukonda diahi ki tu tena kusangulukisa Jihova mu ima ioso i tu bhanga?

⁴ Etu tua zolo Jihova. Mukonda dia kiki, tua mesena ku mu sangulukisa ni muxima uoso. Maji mukonda dia ukexilu uetu ua ituxi, ki tu tena ku mu sangulukisa mu ithangana ioso. Mu ithangana iavulu, tu divua kala poxolo Phaulu, kioso kiambe: “O kusola kubhanga o ima iambote eme na-ku, maji kubhanga o ima iauabha nga ku tokoka.”​—Loma 7:18; Tiiaku 3:2.

5. Ima iahi i tua xisa ande dia ku tu batizala, maji ihi i tena hanji ku tu bhonza ku i lungulula?

⁵ Phala kubhanga mbandu mu kilunga, tua xisa ima iavulu ia zembe Jihova. (1 Kolindo 6:9, 10) Maji né kiki, tuala hanji ni ukexilu ua ituxi. (Kolose 3:9, 10) Mu kiki, sumbala a tu batizala kiá ukulu, tuene mu ta hanji ituxi. Saí ithangana, nange tu kala ni jihanji ja iibha, mba ki bhonza kulungulula kima ku muenhu uetu. Mu kidi, nange tuene kiá mu di suínisa mu mivu iavulu, phala kulungulula kima ku muenhu uetu.

6, 7. (a) Sumbala tu akua ituxi, ihi i tu kuatekesa kukala makamba a Jihova? (b) Mukonda diahi ki tu tokala kukala ni hele ua kubhinga o muloloki ua Jihova?

⁶ Sumbala tu akua ituxi, tu tena hanji kukala ni ukamba uambote ni Jihova ni ku mu sidivila. Kana kujimba kiebhi ki ua kituka kamba dia Jihova. Jihova Muene ua mono kima kiambote ku muxima uê, anga u mesena kuila, u mu sidivila. (Nzuá 6:44) Muéne uejidile kuila u mukua ituxi, ni kuila, ueji lueza. Maji né kiki, Jihova ua mesenene kuila, u kala kamba diê.

⁷ Jihova ua tu zolo kiavulu. Mukonda dia kiki, ua tu bhana ujitu ua dikota. Muéne ua tumikisa Mon’ê Jezú mu ixi, phala ku bhana o muenhu uê kala sata, phala ku tu bhulula ku ituxi ietu. (Nzuá 3:16) Kioso ki tu ta kituxi, tu tena kubhinga kua Jihova phala ku tu loloka o ituxi ietu. Mukonda dia sata ia kukula, tu tena ku dielela ni kidi kioso kuila, muéne ua-nda tu loloka, ni kuila, tu tena kukala hanji makamba mê. (Loma 7:24, 25; 1 Nzuá 2:1, 2) Lembalala kuila, Jezú uafú mukonda dia athu a diela o ituxi iâ. Mu kiki, né muene se tu divua kuma tua bhange kima kia iibha, tua tokala kukolokota mu kusamba kua Jihova, phala ku tu  loloka. O kudituna kubhinga o muloloki uê, kua difu ni kudituna kusukula o maku metu, sumbala a xidi. Tu sakidila kiavulu Jihova, mukonda muéne ua iudika o ima, phala ku tu kuatekesa kukala makamba mê, sumbala ni ituxi ietu!​—Tanga 1 Timote 1:15.

8. Mukonda diahi ki tu tokala kubanza kuila, ki tuala ni ima i tua bhingi kulungulula ku muenhu uetu?

⁸ Mu kidi, ki tu tokala kubanza kuila, ki tuala ni ima i tua tokala kulungulula ku muenhu uetu. Jihova ua tu tangela o ídifua ia tokala kukala na-iu o makamba mê. (Jisálamu 15:1-5) Mu kiki, se tua mesena ku mu zukama dingi, tua tokala kubhanga nguzu, phala kukaiela o ídifua iê ni ia Mon’ê. Tua tokala ué kubhanga nguzu, phala kulanga o jihanji ja iibha, mba kuxisa o ídifua ia mukuá ia iibha. Né muene se a tu batizala kiá ukulu, tua tokala kuia ni kulungulula o ukexilu uetu.​—2 Kolindo 13:11.

9. Kiebhi ki tuejiia kuila, tu tena kuia ni kulungulula o ukexilu uetu?

⁹ Poxolo Phaulu ua tangela o Jikidistá, uixi: “Bhu kaxi’abha ni kikexilu kienu kia bhiti, zulenu o muthu uokulu, ua bôlo, mù kaiela o jihanji ja kudinganala. Phala mu biluke kiengi mu ilunji ienu ni mu mixima ienu moxi. Mu zuata o muthu uobhe a mu bhangulula mu kidifua kia Nzambi, ki di monekena mu kukala ni muenhu ua kuiuka, ni mu kuzela kua kidi.” (Efezo 4:22-24) O izuelu ku “zuata o muthu uobhe” mu dimi dia Ngeleku, ilombolola kusuluka ni kubhanga nguzu, phala kulungulula o ukexilu ua muenhu uetu. Mu kiki, né muene se tuene kiá mu sidivila Jihova ku mivu iavulu, tu tena ku di longa ia lungu ni ídifua iê, ithangana ioso. O Bibidia i tena ku tu kuatekesa kulungulula o ukexilu uetu, phala kulondekesa kiambote o ídifua iê.

10. Ihi i tua tokala kubhanga phala kuia ni kulungulula o ukexilu ua muenhu uetu ni kikuatekesu kia Bibidia? Nange ihi i tu dibhudisa?

¹⁰ Etu enioso tua mesena kukaiela o itumu ia Bibidia. Maji se tua mesena kulungulula o ukexilu uetu, tua tokala kubhanga nguzu. Mukonda diahi tua tokala kubhanga nguzu? Mukonda diahi Jihova ka lungulula o ima phala ku tu kuatekesa ku mu belesela sé kubhanga nguzu?

11-13. Mukonda diahi Jihova u kingila kuila, tu bhanga nguzu phala kutolola o jihanji jetu ja iibha?

¹¹ Kioso ki tu mona o ngongo ni ima ioso iala-mu, tu xikina ni kidi kioso kuila, Jihova uala ni kutena kua kubhanga o ima ioso. Mu kifika, muéne ua bhange o muanha uala ni kutena kuavulu. Ithangana ioso, o muanha u bheka o mukengeji. U bhangesa ué o ixi ioso kutema. Maji o ixi ki i bhingi muanha mba mukengeji uavulu, phala o ima ia muenhu kukala-mu. (Jisálamu 74:16; Izaia 40:26) Jihova u bhana ué o kutena ku jiselevende jê mu ixi, kioso kia bhindama. (Izaia 40:29) Tu tena kumona kuila, se  Jihova ua mesenene, muéne ueji lungulula o ima, phala ku tu kuatekesa ku dibhana ni jihanji ja iibha, mba ku ji xisa sé kubhanga nguzu. Mu kiki, mukonda diahi muéne ka lungulula o ima?

¹² Jihova ua tu bhana o ufolo. Muéne u tuehela kusola, se tu mu belesela mba kana. Kioso ki tu sola ku mu belesela ni kubhanga o vondadi iê, tu londekesa kuila tua mu zolo, ni kuila, tua mesena ku sangulukisa o muxima uê. Satanaji ua zuela kuila, Jihova kala ni ujitu ua kutumina. Maji kioso ki tu belesela Jihova, tu londekesa kuila, tua mesena kuila, muéne u kala Nguvulu ietu. Tu tena kudielela kuila, Tata ietu ia henda, u bhana valolo mu nguzu ioso i tu bhanga phala ku mu belesela. (Jobe 2:3-5; Jisabhu 27:11) Kioso ki tu bhanga nguzu phala ku di langa ku ukexilu uetu ua ituxi, né muene se ki bhonza kubhanga kiki, tu londekesa o ufiiele uetu kua Jihova, ni kuila, tua mesena kuila, muéne u kala Nguvulu ietu.

¹³ Jihova u tu tangela kuila, tua tokala kubhanga nguzu phala kukaiela o ídifua iê. (Kolose 3:12; tanga 2 Phetele 1:5-7.) Muéne ua mesena ué kuila, tu bhanga nguzu phala ku di langa mu ima i tu banza ni ukexilu u tu divua. (Loma 8:5; 12:9) Kioso ki tu bhanga nguzu phala kulungulula ukexilu uetu ua iibha, anga tu di tunda kiambote, tu sanguluka.

14, 15. Ihi i tua tokala kubhanga, phala kukala ni ídifua ia uabhela Jihova? (Tala o kaxa, “ O Musambu ni Bibidia ia Lungulula o Mienhu Iâ.”)

¹⁴ Ihi i tua tokala kubhanga phala kukala ni ídifua ia Jihova? Mu veji dia kusola o ima  i tua tokala kulungulula ku muenhu uetu, tua tokala kuehela Nzambi ku tuendesa. O divulu dia Loma 12:2, di zuela: “Ki mu kaiele o funza ia mu ngongo, maji ehelenu Nzambi a mi kitule kiengi, katé kilunji kienu kieza ku ubhe. Phala mu tongolole ioso o vondadi ia [Nzambi,] iauabha, ia ujitu, iatenena, i mu uabhela kiambote.” Mu kiki, phala kuijiia o kima kia mesena Jihova, tua tokala kudielela mu kikuatekesu kiê. Tua tokala kutanga o Bibidia izuua ioso, kuxinganeka mu milongi i tu tanga, ni kusamba kua Jihova, phala ku tu bhana o nzumbi iê ikola. (Luka 11:13; Ngalásia 5:22, 23) Se tu bhanga kiki, Jihova ua-nda tu kuatekesa kutendela o ima i mu sangulukisa, etu ué tua-nda tena kubanza kála ki banza muéne. Mu kiki, o ima i tu banza, ni i tu zuela, ni ima i tu bhanga, ia-nda sangulukisa Jihova. Tua-nda di langa ué ku jihanji jetu ja iibha. Maji né kiki, tua-nda bhinga kukolokota mu kubhânga ni jihanji jetu ja iibha.​—Jisabhu 4:23.

¹⁵ Mu veji dia kutanga ngó o Bibidia, tua tokala ué ku di longa ni kikuatekesu kia madivulu metu, kala O Mulangidi ni Despertai! Mu madivulu iá, tu sanga-mu milongi iavulu, i tu longa kiebhi ki tu tena kukaiela o ídifua ia Jihova, ni kiebhi ki tu tena kubhânga ni jihanji jetu ja iibha. Tu tena kusanga-mu ué milongi ni ibatulu ia Bibidia, i tena ku tu kuatekesa. Tu tena kubhaka o ibatulu ni milongi íii, phala ku i tanga mu ithangana ni ithangana.

16. Mukonda diahi ki tu tokala ku divua kia iibha, se tu mona kuila, ki tua mu tena kulungulula o ukexilu uetu ni lusolo?

 ¹⁶ Ku bhinga thembu phala kulondekesa o ídifua ia Jihova. Mu kiki, se u mona kuila, kua lungulula luua o ima ioso i ua mesena kulungulula ku muenhu uê, kala ni muanhu. Ku dimatekenu, nange ku bhinga nguzu phala kubelesela o itumu ia Bibidia. Maji se u xinganeka ni kubhanga o ima kala kia mesena Jihova, ua-nda mona kuila, ku pholo, eie kua-nda bhinga dingi kubhanga nguzu phala kuxinganeka kála muéne, ni kubhanga o kima kia tokala.​—Jisálamu 37:31; Jisabhu 23:12; Ngalásia 5:16, 17.

17. Mabesá ahi u tua-nda tambula ku hádia, se tu londekesa o ufiiele uetu kua Jihova?

¹⁷ Tua mu kingila o kithangana ki tua-nda kala tu athu a iuka, ni kusidivila Jihova katé ku hádia ni hádia. Mu kithangana kieniókio, ki tua-nda bhinga kubhânga ni jihanji ja iibha. Mu kiki, ki kia-nda tu bhonza kukaiela o ídifua ia Jihova. Maji né muene lelu, tu tena kubheza Jihova, mukonda muéne ua tu bhana o ujitu ua sata ia kukula. Sumbala tu akua ituxi, tu tena ku mu sangulukisa, se tu kolokota mu kubhanga nguzu phala kulungulula o ukexilu uetu, ni kukaiela o ima ia tu longo mu Bibidia.

18, 19. Kiebhi ki tu tena kudielela kuila, o Bibidia iala ni kutena kua ku tu kuatekesa kulungulula o muenhu uetu?

¹⁸ Kevin ua bhange ioso phala kulanga o njinda iê. Muéne ua xinganeka mu milongi ia tange mu Bibidia, mu kusuluka, ua bhange nguzu phala kulungulula o ukexilu uê. Muéne ua kaiela ué o itendelesu ia mu bhana o Jikidistá ni akuâ. Sumbala kua bhiti mivu phala Kevin kulungulula o ukexilu uê, mu kubhita thembu, muéne ua mateka kusidivila kala múkuatekexi ua tufunga. Muéne uene mu sidivila kala kafunga mu 20 a mivu. Maji né muene kindala, muéne uejiia kuila, ua tokala kukolokota mu kubhânga ni jihanji jê ja iibha.

¹⁹ Kála ki bhanga Kevin, etu ué tu tena kuia ni kulungulula o ukexilu uetu. Se tu bhanga kiki, tua-nda zukama dingi kua Jihova. (Jisálamu 25:14) Se tu bhanga ioso phala kulungulula o ukexilu uetu, muéne ua-nda tu kuatekesa ku di tunda kiambote. Tu tena kudielela kuila, ni kikuatekesu kia Bibidia, tu tena kulungulula ima iavulu ku muenhu uetu.​—Jisálamu 34:8.