1, 2. Iebhi o misoso ia athu a dibhanene ni maka, i tu sanga mu divulu dia Dimatekenu? Mbote iahi i tu katula mu misoso íii?

O KUILA ua tange kiá mu Bibidia misoso ia athu a di bhanene ni maka? O ibatulu ia dianga, i zuela kuila, Kaini ua jibha Abele (Dimatekenu 4:3-8); Lameke ua jibha munzangala ua diiala, mukonda ua mu diota (Dimatekenu 4:23); O abhidi a ibhaku ia Mbalahamu a di kuatele ni abhidi a ibhaku ia Lote (Dimatekenu 13:5-7); Mukonda dia ku di zangeleka kua Hangale, Sala ua divuile kia iibha ni Mbalahamu (Dimatekenu 16:3-6); Kuma Ijimaiele ua di kuatele unguma ni athu oso, ene a mu kuatele ué unguma.​—Dimatekenu 16:12.

² Mukonda diahi o misoso íii a i tumbula mu Bibidia? Mukonda tu tena ku di longa disá ku phangu ia athu iá akua ituxi. Ene a di bhanene ni maka. Kuma tu akua ituxi, kioso ki tu dibhana ni maka ku muenhu uetu, tua tokala kukaiela o phangu iambote i tu sanga mu Bibidia. Tua tokala ué ku dituna kukaiela o phangu ia athu a iibha. (Loma 15:4) Kiki, ki tu kuatekesa kukala ni ukamba uambote ni akuetu.

3. Ihi i tua-nda di longa mu milongi íii?

 ³ Mu milongi íii, tua-nda di longa se mukonda diahi, tua bhingi kubatula o maka a moneka mudietu, ni kiebhi ki tu tena kubhanga kiki. Tua-nda di longa ué ibatulu ia Bibidia i tena ku tu kuatekesa kubatula o maka, phala kukala ni ukamba uambote ni Jihova ni akuetu.

4. Ukexilu uebhi ua di muange ku mundu uoso? Ibhidi iahi ijila mukonda dia kibanzelu kiki?

⁴ O athu a di kuata ni ku diuanuna mu ibuka-ibuka, mukonda dia Satanaji. Mukonda diahi tu zuela kiki? Mu jaludim ia Edene, Satanaji uambe kuila, o athu a tena kusola mudiâ o ima iambote mu íii ia iibha, sé kikuatekesu kia Nzambi. (Dimatekenu 3:1-5) Maji, kioso ki tu mona o ima ku mundu, tu mona kuila, o kibanzelu kiki ki bhekela ngó hadi. Athu avulu a banza kuila, a tena kusola mudiâ o ima iambote mu íii ia iibha. Ene akua luímbi, akua ku di zangeleka. Mukonda dia kiki, ene ka suu o ibhidi ijila mu ukexilu uâ ua kubatula o maka. O ukexilu iú, u bhangesa o ku di kuata. O Bibidia i tu dimuna kuila, se tu kala tu akua njinda, tua-nda di kuata ni akuetu. Mu kiki, tua-nda lueza kiavulu.​—Jisabhu 29:22.

5. Kiebhi Jezú kia kukuatekesa o jingivuidi jê kubatula o maka eji moneka mudiâ?

⁵ Kioso Jezú kia bhangele o diskursu ku Mulundu ua Midiva, muéne ua longo o maxibulu mê ku dibhana kiambote ni akuâ, ni kubatula o maka eji moneka mudiâ. Ene a tokalele kubhanga kiki, né muene se kia bhonzele. Mu kifika, muéne ua a tangela phala kukala athu a lenduka, kukala ni kutululuka ni akuâ, kueha o njinda, kubatula maka ni lusolo, ni kuzola o jinguma jâ.​—Matesu 5:5, 9, 22, 25, 44.

6, 7. (a) Mukonda diahi kima kiambote kubatula o maka ni akuetu ni lusolo? (b) Iebhi o ibhuidisu ia tokala ku di bhanga o jiselevende ja Jihova?

⁶ Lelu, tu bheza Jihova kioso ki tu samba, tu boka ni kioso ki tuia mu iônge. Jihova ka-nda xikina o ubhezelu uetu, se ki tu dibhana kiambote ni jiphange jetu. (Marku 11:25) Se tua mesena kukala ni ukamba uambote ni Jihova, tua tokala kuloloka o itondalu ia akuetu.​—Tanga Luka 11:4; Efezo 4:32.

⁷ Jihova u kingila kuila, o jiselevende jê joso ji kala ni ukexilu ua kuloloka, ni kudibhana kiambote ni akuâ. Tua tokala kudibhuidisa: ‘O kuila ngene mu loloka ni lusolo o jiphange jami? O kuila nga uabhela kukala kumoxi ni ene?’ Se u mona kuila, kua bhingi kulungulula o ukexilu uê, samba kua Jihova ni u mu bhinge phala k’u kuatekesa. O Tata ietu ia diulu ua-nda kuívua ni kutambuijila o misambu ié.​—1 Nzuá 5:14, 15.

8, 9. Ihi i tua tokala o kubhanga se a tu xinga?

⁸ Kuma tu akua ituxi, tu kingila kuila, o athu a zuela ni kubhanga ima i tu luualesa.  (Ndongixi 7:20; Matesu 18:7) Ihi i ua-nda bhanga? Tu mona o mbote i tu katula mu musoso iú: Saí phange ia muhatu ua menekena phange jiiadi ja maiala mu kiônge. Maji o phange ia mukuá ka uabhela o ukexilu ua ku mu menekena. Kioso jiphange jiji kia kexile ubheka uâ, o phange ua divuile kia iibha ua mateka kulongolola o phange ia muhatu. Maji, o mukuá ua mu lembalesa kuila, né muene ni ibhidi, o phange íii ia muhatu ua kexile mu sidivila Jihova ni ufiiele uoso mu 40 a mivu. Muéne ua kijidile ni kidi kioso kuila, muéne ka mesenene ku mu xinga. Kiebhi kia divu o phange ia dianga? Muéne uambe: “Ua lung’ué.” Mu kiki, muéne ka bhana valolo mu ima ia bhitile.

⁹ Ihi i tu longa o musoso iú? Kioso mukuetu kia tu xinga, tu tena kusola o ukexilu ua kudibhana ni maka. O muthu mukua henda u loloka akuâ. (Tanga Jisabhu 10:12; 1 Phetele 4:8.) Jihova u sanguluka, kioso ki tu loloka ‘o itondalu ia akuetu.’ (Jisabhu 19:11; Ndongixi 7:9) Mu kiki, kioso muthu kia zuela, mba u bhanga kima ki kubhangesa kudivua kia iibha, dibhuidise: ‘O kuila ngi tena ku mu loloka? O kuila nga tokala muene kubanza kiavulu o maka enhá?’

10. (a) Kiebhi kia divu o phange ia muhatu, kioso kia mu xingi? (b) Kiebhi o kibatulu kia Bibidia kia mu kuatekesa kukala ni kutululuka?

¹⁰ Ki bhonza kiavulu, kioso akuetu kia zuela kima kia lungu n’etu ki tu luualesa. Tu mone ihi ia bhiti ni phange Lucy, muboki ua thembu ioso. Athu avulu mu kilunga a zuela kia iibha ia lungu ni sidivisu iê ia kuboka, ni ukexilu uê ua kusokejeka o kithangana. Muéne ua divu kia iibha, mu kiki, ua soto jiphange phala mu kuatekesa. Ihi ia bhiti? Muéne uambe kuila, bhu kaxi ka Bibidia, ene a mu kuatekesa kumona o ima kála ki mona Jihova, mu veji dia kubanza o ima ia kexile mu zuela o athu. Muéne ua suína dingi kioso kia tange o divulu dia Matesu 6:1-4. (Tanga.) O ji velusu jiji, ja mu lembalesa kuila, o kima kia beta-o-kota o kubhanga o ima i sangulukisa Jihova. Mu kiki, muéne ka xinganeka dingi mu izuelu ia mu bhangesa ku luuala. Lelu, né muene kioso akuá kia zuela kia iibha ia lungu ni sidivisu iê ia kuboka, muéne ka luuala dingi. Mukonda dia kiki, muéne u divua kuma, ua mu bhanga ioso phala kusangulukisa Jihova.

11, 12. (a) Ihi ia tokala kubhanga o Kidistá, se u mona kuila, ‘mukuenu ua mu luualesa?’ (b) Ihi i tu longa o ukexilu ua Mbalahamu ua kubatula o maka a moneka? (Tala o foto ia dianga.)

¹¹ “Etu-ene oso, tuene mu [tondala] mu ima iavulu.” (Tiiaku 3:2) Abha se u mona kuila, saí phange ua divu kia iibha, mukonda dia kima ki ua zuela, mba ki ua bhange. Ihi i ua tokala o kubhanga? Jezú uambe kuila, “se u kala mu bhana ujitu ué bhu kalatódio kua Nzambi, anga u tukumuka bhenhobho kuma mukuenu ua ku luualela, Ujitu ué xe-u bhu kalatódio, uie hanji u di luulule ni mukuenu, uize kiua u bhane o ujitu ué kua Nzambi.” (Matesu 5:23, 24)  Mu kiki, zuela ni phang’ié. Ua tokala kubhanga kiki, phala ku dibhana kiambote ni muéne. Mu veji dia ku mu tatela, eie ua tokala kuxikina kuila, ua tondala. O kima kia beta-o-kota o ku dibhana kiambote ni jiphange jetu.

¹² O Bibidia ilondekesa kiebhi o jiselevende ja Nzambi a tena ku dibhana kiambote, kioso ki moneka maka. Mu kifika, Mbalahamu ni muebhu’ê Lote, akexile ni ibhaku iavulu. Mukonda dia kiki, o abhidi a ibhaku iá a di kuatele, mukonda o kididi kia tolele phala o ibhaku. Kuma Mbalahamu ua mesenene ku dibhana kiambote, muéne uehela Lote kusola o kididi kia beta-o-kota. (Dimatekenu 13:1, 2, 5-9) Muéne ua tu xila phangu iambote! O kuila Mbalahamu ua divu kia iibha mukonda dia kubhanga kiki? Kana. Mu kubhita kithangana, Jihova ua kanena ku besoala Mbalahamu ni ima iavulu, o ima ia xisa ndenge. (Dimatekenu 13:14-17) Ihi i tu longa? Jihova ua-nda besoala o nguzu i tu bhanga phala kubatula o maka a moneka mudietu, né muene se kubhinga kuxisa ima. ^[1]​—Tala ku disukilu dia milongi.

13. Kiebhi kia divu phange, kioso kia mu zuela kia iibha? Ihi i tu longa o phangu iê?

¹³ Tu mone o phangu íii. Saí phange ua kexile ku pholo mu kusokejeka o kiônge kia dikota, ua xindi kua phange ia mukuá phala ku mu ibhuidisa se ueji tena kubhanga o kikalakalu kiki kumoxi ni muéne. O phange íii ua mu zuela kia iibha. Mu kusuluka, muéne ua jika o mutelembe, mukonda ua luualele ni phange ia dianga ua kexile ku pholo dia kikalakalu kiki. Sumbala o phange ia ubhe ka divu kia iibha, maji muéne ua bhange ioso phala kubatula o maka a moneka. Mu kubhita tu ithangana, muéne ua mu xindi dingi, phala ku di sanga mudiâ. Mu semana ia kaiela, ene a di sange bhu Kididi Kia Ubhezelu. Kioso kia zubha o kusamba kua Jihova, ene a di zuelesa ola imoxi. O phange ua jimbuluila o maka a bhitile na-u, kioso kia kexile mu kalakala ni phange ia dianga. O phange uevu ni uhete uoso, ni ku mu bhana kikuatekesu bhu kaxi ka Bibidia. Mu kusuka-ku, o jiphange a dibhana kiambote, ni kukalakala kumoxi mu kiônge kia dikota. O phange u sakidila kiavulu, mukonda o phange ua kexile ku pholo ua zuela nê ni henda.

14, 15. (a) Kithangana kiebhi ki tua tokala kukaiela o kitendelesu ki tu sanga mu divulu dia Matesu 18:15-17? (b) Jebhi o jindunge jitatu ja bhana Jezú, ni mukonda diahi tua tokala kukaiela o jindunge jiji?

¹⁴ Maka avulu a moneka ni jiphange, a tokala kua batula mudiâ. Maji saí ithangana, ki bhonza kubhanga kiki. Saí maka a bhingi kikuatekesu kia akuetu, kála kio soneke mu divulu dia Matesu 18:15-17. (Tanga.) O “kituxi” kia zuela Jezú ki kia lungu ni maka ofele a moneka bhu kaxi ka Jikidistá. Kiebhi ki tuejiia kiki? Jezú uambe kuila, se o muthu ka diela o kituxi, né muene kioso kia zuela ni phang’iê, bhu kaxi ka jimbangi, mba kia zuela ni jiphange ala ku pholo, a tokala ku mu mona kála “mukua matumbu, mba mukua kutambula lubhaku.” Lelu, tu tendela kuila, a tokala ku mu kaia mu kilunga. O “kituxi” kiki kia lungu ni kunganala, ni kutatela akuâ. Maji ki kia lungu ni ku ta phánda, ubhezelu ua iteka, kulungulula o kidi, mba diiala kuzeka ni diiala ni mukuá. O tufunga ene ngó a tokala kubatula maka a lungu ni ituxi íii.

 ¹⁵ Kuma tua zolo phang’ietu, Jezú ua bhana o kitendelesu kiki, phala ku mu kuatekesa. (Matesu 18:12-14) Kiebhi ki tu tena kukaiela o kitendelesu kiki? (1) Tua tokala kubatula o maka a moneka mudietu. Nange ku bhinga kuzuela nê veji javulu. Maji Ihi i tua tokala kubhanga, se ki tua mu dibhana kiambote? (2) Tua tokala kuzuela ni phang’ietu kumoxi ni muthu uejiia kiambote o maka, mba muthu u tena kuijiia se nanhi uala ni kikuma. Se u batula o maka, “mukuenu ua mu nganhala.” Maji, se u mona kuila, ua bhange ioso phala kuzuela ni phang’iê veji javulu, maji né kiki, muéne ka xikina (3) ua tokala kuzuela o maka ku tufunga.

16. Mukonda diahi kima kiambote kukumbidila o kitendelesu kia Jezú?

¹⁶ Saí ithangana, ki kubhingi kukaiela o jindunge jitatu ji tu sanga mu divulu dia Matesu 18:15-17. Kiki, ki tu suínisa. Mukonda diahi tu zuela kiki? Mukonda o muthu u diela o kituxi kiê, anga u lungulula o ukexilu uê. Mukonda dia kiki, ki ku bhingi ku mu kaia mu kilunga. O muthu uevu ndolo u loloka phang’iê, n’a kale ni ukamba uambote. Sé phata, o kitendelesu kia Jezú ki kilombolola kuila, tua tokala kuzuela o maka ku tufunga ni lusolo. Tua tokala kuzuela ngó o maka se tua kaiela kiá o jindunge jiiadi ja dianga, mba se tu mona kuila, o mukuetu ua tu bhange muene kima kia iibha.

17. Mabesá ebhi u tua-nda tambula se tu sota ku ‘kala ku paze’ ni akuetu?

¹⁷ Kuma tu akua ituxi, tua-nda zuela ima i luualesa akuetu. Poxolo Tiiaku ua soneka: “Uoso u kamba kudibhukana mu kuzuela, ió muene o muthu uatenena, ua soko-bho o kukuika mukutu uê uoso.” (Tiiaku 3:2) Phala kubatula maka a moneka, tua tokala kubhanga ioso phala ku “sota o paze, ni ku i jijila.” (Jisálamu 34:14) Tua-nda kala ni ukamba uambote ni jiphange jetu ni kudibunda kumoxi, kioso ki tu bhanga ioso phala kudibhana kiambote ni akuetu. (Jisálamu 133:1-3) O kima kia beta-o-kota, tua-nda kala ni ukamba uambote ni Jihova, ‘o Nzambi ia paze.’ (Loma 15:33) Tua-nda tambula mabesá avulu, kioso ki tu sota kubatula o maka a moneka mudietu ni henda.