1, 2. Ihi ia dilongo Phetele kioso kia bhiti usuku uoso mu kutamba?

SAMBUADI dia maxibulu a Jezú, a tambe usuku uoso mu Kalunga ka Ngalileia. Maji ene ka tenene kukuata né ngó mbiji imoxi. Mu kamene, Jezú ua tukuluka ku kalunga, anga ua a tala. Mu kiki, muene ua a tangela uixi: “Kuzenu uanda ku mbandu ia kadilu ia bote, mu kuate. Ene anga a u kuza, anga a lémbua ku u sungila mu bote, mukonda dia jimbiji kuvula!”—Nzuá 21:1-6.

² Jezú ua sokejeka mbolo ni mbiji, anga u bhana ku maxibulu mê phala kudia. Mu kiki, muene ua tonginina Ximá Phetele, anga u muibhula uixi: ‘Ximá, mon’a Jona, eie ua beta ku ngi zola eme, o ima iii ndenge?’ Jezú uejiidile kuila, Phetele ua uabhelele kutamba. Nange Jezú ua mesenene kuijiia se Phetele ua betele ku mu zola muene ni milongi iê, o uenji ua kutamba ndenge. Phetele ua tambuijila Jezú uixi: “Eue, Ngana! Eie ua k’ijiia, kuma nga ku zola.” (Nzuá 21:15) Tundé mu  kizuua kieniókio, Phetele ua londekesa kuila, ua mesenene kukumbidila o kizuelu kiê. Muene ua londekesa o henda iê kua Kristu mu kuboka ni kusuina kuoso. Phetele ua tambula ikalakalu iavulu mu kilunga kia Jikidistá.

3. Mu ima iebhi o Jikidistá ja tokala ku dilanga?

³ O izuelu ia Jezú kua Phetele i tu longa ihi? Tua tokala kudilanga phala o henda ietu kua Kristu ki i zoze. Jezú uejiidile kuila, o muenhu ku mundu iú u tena kubhonza kiavulu, uejiidile ue kuila tueji dibhana ni hele ni ibhidi. Mu kifika kiê kia lungu ni mukuni ua jimbutu, Jezú uambe kuila, sai athu mu dimatekenu eji xikina o “maka ma Utuminu,” ni kukalakala ni kusuina kuoso. Maji mu kubhita thembu, o “kusênduka kua jimbongo” kueji tena “kubhaka o maka mua vundu.” Mukonda dia kiki, athu iá eji zoza mu nzumbi. (Matesu 13:19-22; Marku 4:19) Se ki tu dilange o hele ia kizuua ni kizuua, i tena ku tu bhangesa kuzoza mu sidivisu ietu kua Jihova. Mu kiki, Jezú ua dimuna maxibulu mê uixi: “Alukenu-phe, ki mu di jimbe! Mixima ienu ni i biluke ia neme ni kúdia jifesa, ni kunua uhôlua, ni makubhindama ma muenhu iú.”—Luka 21:34.

4. Kiebhi ki tu tena kuijiia kuila o henda ietu kua Kristu i zondo? (Tala o foto ia dianga.)

⁴ Kála kia bhiti ni Phetele, tu tena kulondekesa o henda ietu kua Kristu, mu kuta ku pholo dia muenhu uetu o kikalakalu kia kuboka. Kiebhi ki tu tena kuijiia kuila tua mu ki bhanga muene? Tu tena kudibhuidisa: ‘Ihi i nga zolo dingi ku muenhu? O kuila o kisangusangu kiami kijila mu kubhanga o vondadi ia Jihova inga mu kubhanga ima iengi?’ Phala ku tu kuatekesa kutambuijila o ibhuidisu iii, tua-nda dilonga kiebhi o salu, o itonokenu ni jimbote i tena kuzozesa o henda ietu kua Jezú Kristu.

5. Kikalakalu kiebhi kia bhana Jihova ku atuameni a miji?

⁵ Phala Phetele, kutamba ki kuexile ngó kima kia kutonoka. Muene ua kexile mu tamba phala kudikila o muiji. Lelu, Jihova u bhana ue ku atuameni a miji, o kikalakalu kia kudikila o miji iâ. (1 Timote 5:8) Ene a kalakala ni nguzu ioso phala kubhanga kiki. Maji, mu izuua iii isukidila-ku, o salu i tena kubhangesa o muthu kukala ni hele iavulu.

6. Mukonda diahi o salu i tena ku tu thandanganhesa?

⁶ Lelu kuene athu avulu a bhindamena salu, maji kua bhonzo kusanga salu. Mukonda dia kiki, athu a bhanga ioso ni ioso phala kusanga salu. Avulu a kalakala kiavulu, maji o kitadi kiofele. Lelu, o matenda a sota kubhanga ima iavulu ni akalakadi ofele, m’ukulu ndenge. Mu kiki, o akalakadi a thandanganha, a tohoka, katé muene ni kukata. Avulu a thandanganha kuila ka-nda kala dingi ni salu, se ka bhanga o vondadi ia xefe.

7, 8. (a) Nanhi tua tokala ku mu londekesa o ufiiele uetu uoso? (b) Ihi ia di longo phangi’etu mu ixi ia Tailândia, ia lungu ni salu iê?

 ⁷ Kuma tu Jikidistá, tua tokala kulondekesa o ufiiele uoso kua Jihova, mu veji dia muthu, uoso-uoso, né muene se xefe ietu. (Luka 10:27) O sidivisu ietu iala ni valolo, mukonda i tu kuatekesa kusuua o ibhindamu ietu, ni kukolokota mu ukunji uetu. Maji se ki tu dilange, o salu ietu i tena kufidisa o ubhezelu uetu kua Nzambi. Tu tena ku di longa o phangu ia phange mukua Tailândia. Muene uambe: “Eme nga zolele kiavulu o kikalakalu kiami kia kuiudika ji komputadolo. Maji nga kexile mu kalakala thembu iavulu. Mukonda dia kiki, ki nga kexile ni kithangana kia soko, phala kubheza Jihova. Maji nga mono kuila, phala kuta ku pholo o kikalakalu kia Nzambi, nga tokalele kusota salu iengi.” Ihi ia bhange phang’ietu?

⁸ Muene uambe: “Nga bhiti muvu mu ku di sokejeka, mu kusuluka, nga mateka kusumbisa jeladu mu ikoka. Ku dimatekenu, ki ngi kexile ni kitadi kia soko. Mukonda dia kiki, nga luualele kiavulu. Kioso ki nga kexile mu disanga ni jikoleka ja salu iami io’kulu, ene a kexile mu ngi xonguena. Akexile mu ng’ibhula se mukonda diahi nga xisa o kikalakalu kia kuiudika ji komputadolo phala kusumbisa jeladu. Nga sambe kua Jihova phala ku ngi kuatekesa ku dibhana ni maka u nga kexile mu bhita nau. Nga bhingi ue phala ku ngi kuatekesa kukala ni kithangana kia soko, phala kubhanga dingi mu sidivisu iê. Mu kubhita kithangana, o ima ia lunguluka. O uhete uami ua kubhanga jeladu, ua di bandekesa dingi, mukonda ngejiidile kiambote o ima ia uabhelele o asumbi. Nga kexile mu bhanga di komba. Lelu, ngala dingi ni kitadi, m’ukulu ndenge. Nga sanguluka, mukonda ki nga thandanganha dingi, kala ki nga kexile mu sidivisu ia ji komputadolo. Ngi sanguluka dingi kiavulu, mukonda ngala ni ukamba uambote ni Jihova.”—Tanga Matesu 5:3, 6.

9. Kiebhi ki tu tena kuijiia kuila tua mu mona o salu mu ukexilu ua tokala?

⁹ Kioso ki tu kalakala ni kusuina kuoso, Jihova u sanguluka kiavulu. O kukalakala ni kusuina kuoso, kubhekela mabesá. (Jisabhu 12:14) Maji tua tokala ku di langa, phala ki tu te ku pholo o sidivisu ietu, ni kuxisa ku dima o kikalakalu kia Jihova. Jezú ua zuela ia lungu ni ibhindamu ietu. Muene uambe:“Diangenu-phe kusota o Utuminu ua Nzambi ni uiukilu uê, nda ima ioso iii a mi kuiila-iu.” (Matesu 6:33) Maji kiebhi ki tu tena kuijiia se tua mu mona o salu mu ukexilu ua tokala inga kana? Tu tena ku di bhuidisa: ‘O kuila ngi sanguluka dingi ni salu iami, maji ngi divua kuma o sidivisu ia Nzambi kima kia bhonzo, ki bhekela kuluuala?’ O kuxinganeka mu kibhuidisu kiki, kutena ku tu kuatekesa kuijiia o kima ki tua zolo ni muxima uoso.

10. Diebhi o disá dia dikota dia tu longo Jezú?

¹⁰ Jezú ua tu londekesa o kima ki tua tokala kuta ku pholo. Sai kizuua, muene uai  ku inzo ia Malata ni Madiia. Mu kithangana kieniókio, Malata ua mateka ku pelepalala o kúdia phala Jezú. Maji Madiia ua xikama bhu mbandu ia Jezú, phala kuívua ia kexile mu longa. Malata ua divu kiaiibha, mukonda Madiia ka kexile ku mu kuatekesa. Jezú ua tangela Malata, uixi: “Madiia ua solo o mbandu iambote, kà tena ku mu tambula-iu.” (Luka 10:38-42) Jezú ua tu longo disá dia dikota. Phala ki tu landuke ni ibhindamu ietu, ni kulondekesa o henda ietu kua Jezú Kristu, tua tokala ‘kusola o mbandu iambote.’ Kiki kilondekesa kuila, o ukamba uetu ni Jihova, ua tokala kukala o kima kia beta-o-kota ku muenhu uetu.

11. Ihi i zuela o Bibidia ia lungu ni kunhoha?

¹¹ O muenhu uetu uezala ni ima iavulu i tu thandanganhesa, mukonda dia kiki, sai bhabha tu bhinga kunhoha bhofele. O Bibidia i zuela: “Manhi ki kima kiambote muene o muthu kúdia ni kúnua, o muenhu uê ni u kembe mu mbote ia kikalakalu kiê?” (Ndongixi 2:24) Jezú uejiidile kuila, o maxibulu mê, a bhingile kithangana phala kunhoha. Mu kifika, kioso kia bhiti kizuua kia muvimba mu kuboka o njimbu, Jezú ua a tangela uixi: “Zenu: Tuienu k’ubheka uetu ku mukáu, tu nhohe-ku bhuófele.”—Marku 6:31, 32.

12. Mukonda diahi tua tokala ku dilanga mu itonokenu? Bhana phangu.

¹² O itonokenu, i tena ku tu kuatekesa kunhoha, ni kudivua kiambote. Maji tua tokala kudilanga, phala o ima iii, ki i kale o ima ia beta-o-kota ku muenhu uetu. Ku hama ia dianga, sai athu akexile ni ukexilu iú uaiibha. Ene akexile mu zuela: ‘Tu dienu, tu nuenu, mukonda mungu tua-nda fua.’ (1 Kolindo 15:32) Lelu, o athu ala ue ni ukexilu iú, uaiibha. Mu kifika, sai munzangala ku Europa, ua mateka kuia mu iônge. Maji mukonda dia kuuabhela kiavulu o itonokenu, ua xisa o kilunga kia Jihova. Mu kubhita thembu, muene ua mono kuila, o kuzola kiavulu o itonokenu kua mu bhekela maka avulu. Mukonda dia kiki, muene ua mateka dingi ku di longa o Bibidia. Mu kubhita thembu, ua mateka kuboka o njimbu iambote. Kioso kia mu batizala, muene uambe: “Ngi diela mukonda, nga di botesa ngó mu itonokenu. Lelu ngi mona kuila, o kusidivila Jihova kubhekela dingi kisangusangu, o itonokenu ia mundu iú ndenge.”

13. (a) Bhana phangu i londekesa, se mukonda diahi ki kima kiambote kubhita thembu iavulu mu itonokenu. (b) Ihi i tena ku tu kuatekesa kumona o itonokenu mu ukexilu ua tokala?

¹³ O itonokenu i tena kukuatekesa kunhoha ni kukala dingi ni nguzu ia kubhanga ima iengi. Mu kiki, ithangana ikuxi i tua tokala kubhanga mu itonokenu? Phala kutambuijila o kibhuidisu kiki, tu xinganeke mu kifika kia kaiela. Athu avulu a uabhela kudia jibolo, ni ima ia ka mukuá ia touala. Maji tuejiia kuma, se tu dia kiavulu o ima iii, tua-nda kata. Se tua mesena kukala ni sauidi, tua tokala kudia ima iambote. Kiene ue kimoxi, se tu zanga thembu iavulu mu itonokenu, o ukamba uetu ni Jihova ua-nda zoza. Ihi i tena ku tu kuatekesa kuijiia se tua mu mona o itonokenu mu ukexilu ua tokala, mba kana? Tu tena kusoneka o jiola ji tu bhanga semana joso mu sidivisu ia Jihova, kala kuia mu iônge, kuboka, ni ku di longa o Bibidia. Mu kusuluka, tu tena kusoneka o ji ola ji tu bhanga mu jijoko, kutala o mutelembe  ua izuzumbia, mba kujokala mu komputadolo. Kioso ki tu sokesa o ijimbuete iiadi iii, ihi i tu mona? O kuila tua bhingi kulungulula o ukexilu uetu?—Tanga Efezo 5:15, 16.

14. Ihi ia-nda tu kuatekesa kusola kiambote o itonokenu?

¹⁴ Jihova u tu bhana ufôlo ua kusola o itonokenu i tua uabhela. Mu kiki, o atuameni a miji a tena uá kusola o itonokenu phala o miji iâ. Bhu kaxi ka Bibidia, Jihova u tu bhana ijila i tu kuatekesa kuijiia o ibanzelu iê. O ijila iii, i tena ku tu kuatekesa kusola kiambote. * (Tala ku luiji.) O itonokenu iambote, “ujitu ua Nzambi.” (Ndongixi 3:12, 13) Kuma o athu ka difu, ene mu sola uá itonokenu ki i difu. (Ngalásia 6:4, 5) Mu kiki, tua bhingi ku di langa mu itonokenu ioso i tu sola. Jezú uambe: “Kuoso kua ku kala jimbongo, kuene ku ku kala o muxima.” (Matesu 6:21) O henda kua Sobha ietu Jezú, i tu suinisa kubanza, kuzuela ni kubhanga ima ilondekesa kuila, o Utuminu ua Nzambi kiene o kima kia beta-o-kota ku muenhu uetu.—Filipe 1:9, 10.

15, 16. (a) Kiebhi o kuzola o jimbote kutena ku tu bhalesa? (b) Kitendelesu kiebhi kiambote kia bhana Jezú, kia lungu ni kuzola o jimbote?

¹⁵ Lelu, athu avulu a banza kuila a tokala kukala ni izuatu ia katunda, mitelembe, ji  komputadolo, ni ima ia mukuá dingi. Ene a suua ngó o jimbongo, a banza kuila, o kima kia beta-o-kota ku muenhu ua muthu, o kukala ni kitadi kiavulu. Kuma u Kidistá, ihi iala dingi ni valolo phala eie? Dibhuidise: ‘O kuila ngi bhita dingi ithangana iavulu mu kubanza mu ima kala makalu ni izuatu ia katunda, o kudisokejeka phala iônge ndenge? O kuila ki ngene mu kala dingi ni kithangana kia soko phala kusamba ni kutanga o Bibidia, mukonda dia kukalakala kiavulu?’ Se ki tu di lange, tu tena kumateka kuzola dingi o jimbote, Jezú Kristu ndenge. Tua tokala kuxinganeka mu izuelu ia Jezú, kioso kiambe: “Alukenu, mu di lange ku luímbi.” (Luka 12:15) Mukonda diahi Jezú uambe kiki?

¹⁶ Jezú uambe kuila “kana muthu u tena kubhikila ngana jiiadi.” Muene uambe dingi: ‘Enu ue ki mu tena kubhikila Nzambi ni Jimbongo.’ Ki tu tena kubheza Jihova ni kusidivila o jimbote. Jezú uambe kuila, ki tu tena kubhanga o ima iiadi, iú uixi: “Bhu kala ni iú u mu zemba, o iú u mu zola; mba iú a di tuma, o iú a di bhonza.” (Matesu 6:24) Kuma tu akua ituxi, tua tokala kusuluka kubhânga ni “jihanji ja xitu,” ni vondadi ia kumesena o jimbote.—Efezo 2:3.

17. (a) Mukonda diahi, amoxi kia a bhonza kukala ni ibanzelu ia tokala ia lungu ni jimbongo? (b) Ihi i tu kuatekesa kutolola o vondadi ia kumesena o jimbongo?

¹⁷ O athu a suua ngó o jihânji ni jivondadi jâ, kala ni ibanzelu ia tokala ia lungu ni jimbongo. (Tanga 1 Kolindo 2:14.) Kuma ene kala ni ibanzelu iambote, nange ka tena kusola o ima iambote, mu iii iaiibha. (Jihebeleu 5:11-14) Mu kubhita kithangana, o jihânji jâ ja kumesena o jimbongo jiia ni ku di bandekesa. Kioso kiaia ni kunganhala kitadi kiavulu, ene a ki mesena ue dingi. (Ndongixi 5:10) Maji kuene kima ki tena ku tu kuatekesa kutolola o kibanzelu kiki. Kutanga o Mak’â Nzambi izuua ioso, kua-nda tu suinisa kutolola o vondadi ia kumesena o jimbote. (1 Phetele 2:2) Jezú ua kexile mu xinganeka mu unjimu ua Jihova, kiki kia mu kuatekesele kudituna o jitendasá ja Satanaji. (Matesu 4:8-10) Lelu, se tua mesena kudituna o vondadi ia kumesena o jimbongo, tua tokala ue kukumbidila o unjimu ua Jihova ku muenhu uetu. Kubhanga kiki, kua-nda londekesa kua Jezú kuila, tua beta ku mu zola, o jimbongo ndenge.

18. Ihi i ua-nda bhanga?

¹⁸ Kioso Jezú kiebhuidisa Phetele, ‘Eie ua beta ku ngi zola eme, o ima iii ndenge?’ muene ua kexile mu longa Phetele kuila, kusidivila Jihova kua tokalele kukala o kima kia beta-o-kota ku muenhu uê. Kima kiambote kuijiia kuila, o dijina dia Phetele dilombolola “Mbandu ia Ndànji.” O idifua iambote ia Phetele, tu tena ku i sokesa ni ndanji. (Ikalakalu 4:5-20) Lelu, tua mesena ue kuzola Jezú Kristu ni tu suine. Mu kiki, tuejiia kuila o salu, o itonokenu, ni jimbongo, o ima iii iala ni ididi iê ku muenhu. Maji kiki kia-nda bhita ngó se tu londekesa o ukexilu ua Phetele, kioso kiambe: “Ngana! Eie ua k’ijiia, kuma nga ku zola.”