1, 2. (a) O izuelu ia Jezú mu divulu dia Matesu 24:12 a dianga ku i tangela a nanhi? (b) Kiebhi o divulu dia ikalakalu di londekesa kuila o Jikidistá ja dianga a sulukile mu kolesa o henda iâ? (Tala o foto ia dianga.)

KIOSO Jezú kiexile mu ixi, ua jimbulula kiebhi o athu kieji kuijiia o kijimbuete “kia dizubhilu dia mundu.” Mu’axaxi ka ima iavulu ia zuela, muene ua jimbulula uixi: “Mukonda dia úsueia kuvula, ku kala athu avulu, o’henda iâ i zonda.” (Matesu 24:3, 12) O Jijudé ku hama ia dianga akexile mu zuela kuila, ene o mundu ua Nzambi, maji ehela o henda iâ kua Nzambi kuzonda.

² Maji mu izuua ienioió Jikidistá javulu, kehela o henda iâ kuzonda. Ene a kexile mu boka ni kusuina o ‘Njimbu Iambote iii, kuma Jezú, muène Kristu.’ Ni kulondekesa henda kua Nzambi, ku jiphange ni kua ió kejiidile luua o kidi. O Jikidistá ja dianga a suluka mu kolesa o henda iâ kua Nzambi. (Ikalakalu 2:44-47; 5:42) Maji tuejiia kuila, mu’axaxi ka Jikidistá jenhojo, amoxi ehela o henda iâ kuzonda. Kiebhi ki tuejiia o maka enhá?

3. Nange ihi ia zondesa o henda ia Jikidistá ja dianga?

 ³ Jezú uambe ku Jikidistá ja tungile mu mbanza ia Efezo: “O henda ié i uandekele na-iu ua i xi. Ku ngi zolo dingi kala ku dimatekenu.” (Dijingunuinu 2:4) Nange o Jikidistá akua Efezo, a kexile mua funhisa ku athu a a kondolokele, a mesenene ngó kubhanga o jihânji jâ. (Efezo 2:2, 3) Mu mbanza ia Efezo muexile umvuama uavulu, mu kiki, o athu akexile dingi mu suua o jihânji jâ, o ima iengi ndenge. Athu avulu akua Efezo akexile mu bhanga undumbu, kexile mu xila o itumu ia Nzambi. Ene akexile dingi mu suua o jihânji jâ, mu veji dia kulondekesa henda kua Nzambi ni athu.

4. (a) Kiebhi o henda ia athu ia zondo mu izuua ietu? (b) Mbandu jebhi jitatu, ji tua-nda dilonga, mu tua tokala ku kukolesa o henda ietu?

⁴ O izuelu ia Jezú, ia kuila, o henda ieji zonda, ia lungu ue ku izuua ietu. Athu avulu lelu, kene mu londekesa né ngó henda iofele kua Nzambi. Mu veji dia kukingila Nzambi phala kubatula o maka ku mundu, mazunda a athu a mu dielela ku isangela ia mundu. O henda iâ, ia mu zonda dingi. Katé muene ni henda ia jiselevende ja Jihova, nange i tena kuzonda kála kia bhitile ni Jikidistá mu mbanza ia Efezo. Tua-nda dilonga mbandu jitatu mu tua tokala kukolesa o henda ietu: (1) o henda ietu kua Jihova, (2) henda mu kidi kia Mak’â Nzambi ni (3) henda ku jiphange jetu.

5. Mukonda diahi tua tokala kuzola Jihova?

⁵ Nanhi tua tokala ku mu londekesa dingi o henda? Jezú uambe uixi: “Zola Ngana, Nzambi iê, ni muxima ué uoso, ni muenhu ué uoso, ni kilunji kié kioso. Kiene kijila kia dianga kia dikota.” (Matesu 22:37, 38) O henda ietu kua Nzambi i tu suinisa ku mu belesela, kukolokota, ni ku zemba o ima iaiibha. (Tanga Jisálamu 97:10.) Maji Satanaji ni mundu uê, a mesena kuzozesa ni kuzanga o ukamba uetu ni Nzambi.

6. Ihi i bhita kioso o athu kia xisa o henda iâ kua Nzambi?

⁶ O athu ku mundu kene mu mona o henda mu ukexilu ua tokala. Mu veji dia kuzola Nzambi, ene “azodi a ene ngó.” (2 Timote 3:2) Ene a suua dingi “o jihânji jaiibha ja luimbi lua xitu, o vondadi ia luimbi lua kumesena ima ioso i mona o mesu, ni izala mu ima ioso iene ku muenhu.” (1 Nzuá 2:16) O poxolo Phaulu ua tu dimuna ku ima i tena kubhita se tu suua ngó o ima i tua uabhela. Muene uambe uixi: “Kukala ni kilunji kia mu tumina kuala o hanji ia xitu, kubhekela kalunga.” Mukonda diahi? Mukonda o athu a bhanga o ima iii, mu kidi a di bhanga jinguma ja Nzambi. (Loma 8:6, 7) O athu a suina ngó kusota o jimbongo ni kubhanga o undumbu, ene mu bhita ni mavuua avulu.—1 Kolindo 6:18; 1 Timote 6:9, 10.

7. Ibanzelu iebhi i tena ku ta o henda ia Jikidistá mu iluezu?

⁷ O athu amba kuila, o ima ia moneke ngó, ni ió amba kuila ki kuene Nzambi, a bhangesa akuâ kuxikina kuila Nzambi ka tu suu. Ene a funhisa ue akuâ phala ka zole Nzambi. Ene a bhangesa o athu kubanza kuila, o kuxikina kua Nzambi, ni kuxikina kuila kuene Mubhangi, uôua. Athu avulu a xila dingi o jingijiié, mu veji dia kuxila o Mubhangi uâ. (Loma 1:25) Né muene se tu Jikidistá, nange a tena ku tu funhisa ku ibanzelu iii. O ukamba ni henda ietu kua Jihova i tena kuzonda.—Jihebeleu 3:12.

8. (a) Ihi i tena kuluualesa o mundu ua Jihova? (b) Kiebhi o divulu dia Jisalamu 136 di tu suinisa?

 ⁸ Kuma tua tungu ku mundu uaiibha ua Satanaji, sai ima iavulu nange i tena ku tu luualesa. (1 Nzuá 5:19) Maji se tu luuala kiavulu, o kixikanu ni henda ietu kua Nzambi ia-nda zonda. Mu kifika, nange tu bhita ni maka a lungu ni kukuka, uhaxi, ni kukamba kitadi. Mba nange tu luuala mukonda ki tu tena kubhanga kima mu ukexilu u tua mesena. Sai bhabha tu luuala ue mukonda sai ima ku muenhu uetu, ki i bhiti kála ki tua mesenene. Né muene se tu bhita ni maka a dikota, ki tu tokala kubanza kuila Jihova ua tu bhana dikunda. Xinganeka mu izuelu i tululukisa o muxima uetu, i tu sanga mu divulu dia Jisálamu 136:23 diamba: “[Muene] ua tu lembalala mu ditala dietu dia kutola; kuma kulenduka kuê ki kuene kúbhua.” Tu xikina ni kidi kioso kuila, Jihova uívua o “kudionda” kuetu, anga u tu tendela.—Jisálamu 116:1; 136:24-26.

9. Ihi ia kuatekesa Phaulu phala kukolokota mu henda iê kua Nzambi?

⁹ Poxolo Phaulu uexile selevende ia Nzambi ia kexile mu xinganeka mu kikuatekesu kia Jihova. Kubhanga kiki kua mu kuatekesa kukolesa o henda iê. Muene uambe: ‘Jihova muène mukuatekexi uami, eme ki ngi kala ni uôma. Hé muthu u ngi bhanga-hi?’ (Jihebeleu 13:6) O kidielelu kia Phaulu kua Jihova, kia mu kuatekesa ku dibhana kiambote ni ibhidi ia bhiti na-iu. Kioso Phaulu kiexile mu bhita ni ibhidi, muene kexile mu kuehela o kidielelu kiê kua Jihova kuzonda. Né muene kioso kiexile mu kaleia, muene ua suinisa o Jikidistá ja mukuá, mu kua sonekena mikanda phala kusuinisa o kilunga. (Efezo 4:1; Filipe 1:7; Filimone 1) Phaulu ua suluka mu kukolesa o henda iê kua Jihova, katé muene mu ithangana ia bhonzo. Muene ua dielele kua “Nzambi ió athu oso kuene mú tambula o dikuatekesu! Muène mukua ku tu kuatekesa mu hadi ietu ioso.” (2 Kolindo  1:3, 4) Kiebhi ki tu tena kukaiela o phangu ia Phaulu?

10. Kiebhi ki tu tena kukolesa o henda ietu kua Jihova?

¹⁰ Phaulu ua jimbulula kiebhi ki tu tena kusuluka mu kukolesa o henda ietu kua Nzambi kioso kiambe: “Sambenu sé kufula.” Mu kubhita thembu, muene uambe dingi: “Kolokotenu mu kusamba.” (1 Tesalonika 5:17; Loma 12:12) Mukonda diahi o musambu u tu zukamesa dingi kua Nzambi? Kioso ki tu samba tua mu zuela ni Jihova. O kubhanga kiki, kujikula o njila ia ukamba uambote ni muene. (Jisálamu 86:3) Kioso ki tu jikula o muxima kua Tat’etu ia diulu, phala ku mu tangela ioso i tu banza ni ukexilu u tu divua, tu zukama dingi kua muene. (Jisálamu 65:2) O henda ietu kua Jihova i kola dingi, kioso ki tu mona kuila muene u tambuijila o misambu ietu. Tua dielela ni muxima uetu uoso kuila, “Jihova ua zukama kua ió a dikola kua muene.” (Jisálamu 145:18) O kidielelu kietu ku henda ni ku kikuatekesu kia Jihova, ki tu suinisa kutolola o ibhidi ioso-ioso, ki kale kindala mba ku hádia.

11, 12. Kiebhi ki tu londekesa kuila tua zolo o kidi kia Bibidia?

¹¹ Kuma tu Jikidistá, etu tua zolo o kidi. O kidi kiki, tu ki sanga mu Mak’â Nzambi. Jezú uambe kua Tat’ê uixi: ‘O maka mé ene o kidi.’ (Nzuá 17:17) Phala kuzola o kidi kia Bibidia, tua tokala kuijiia ihi iala mu Bibidia. (Kolose 1:10) Maji sai dingi kima kiengi ki tua tokala kubhanga. O musoneki ua Jisálamu 119, u tu kuatekesa kutendela kiambote, o kima ki tua tokala o kubhanga. (Tanga Jisálamu 119:97-100.) Tua tokala kubanza mba kuxinganeka kiambote mu ima i tu tanga mu Bibidia ithangana ioso. Se tu xinganeka mu mbote i ijila mu kukumbidila o milongi ia Bibidia ku muenhu uetu, tua-nda zola dingi o kidi kia Bibidia.

¹² O mukua Jisálamu uambe: “Maka mé nga a lola, o kutouala kuahi ngó! ene a beta kutouala, o uiki ndenge, mu kanu diami.” (Jisálamu 119:103) O milongi ia Bibidia io sokejeke ku kilunga kia Nzambi, iala kála kúdia kua touala kiavulu. Kioso ki tu dia kima ki tua uabhela kiavulu, tu kala ni vondadi ia ku ki dia dingi. Kiene ue kimoxi, se tu katula kithangana kia soko phala kudilonga, tua-nda uabhela dingi o “maka ambote a kidi.” Kua-nda tu bhangesa kulembalala o ima i tua dilongo ni kukuatekesa ue akuetu.—Ndongixi 12:10.

13. Ihi ia kuatekesa Jelemiia kuzola o mak’â Nzambi? Kiki kia mu suinisa kubhanga ihi?

¹³ Polofeta Jelemiia ua zolele kiavulu o mak’â Nzambi. Muene uambe uixi: “Maka mé kioso ki nga ma sange, nga ma di lusolo, kuma maka mé ma ngi kala kutana ni kusanguluka mu muxima uami; kuma a ngi luku dijina dié, eie u Jihova, Nzambi dia Ilombo Ieta.” (Jelemiia 15:16) Kuma Jelemiia ua zolele o mak’â Nzambi, muene ua kexile mu xinganeka kiambote mu mak’enhá. Muene ua kexile mu disokejeka kiambote, phala kubhanga o kikalakalu kia Jihova, ni kuboka o njimbu iê. Se tu zola o kidi kia Bibidia, tua-nda mona kuila ujitu ua dikota kukala tu Jimbangi ja Jihova ni kuboka o njimbu iambote ia Utuminu, mu izuua iii ia sukidila-ku.

14. Ihi i tua tokala kubhanga phala kuzola dingi o kidi kia Bibidia?

 ¹⁴ Ihi dingi ia-nda tu kuatekesa kuzola dingi o Mak’â Nzambi? Tua tokala kuia mu iônge semana joso, mukonda muéne mu tuene mu tambula ue o milongi ia Jihova. O milongi ia Mulangidi i tuene mu i tambula semana joso, ukexilu uéngi ua ku tu longa. Se tua mesena kukatula mbote mu milongi iii, tua tokala kudisokejeka kiambote, ande dia kizuua kia kiônge. Mu kifika, tu tena kutokuesa o jivelusu joso ji tu sanga mu milongi. Lelu, athu avulu a tena kutanga mba kukatula O Mulangidi bhu kaxi ka internete, mukonda tu u sanga mu madimi a avulu, mu kijimbuete kietu mu jw.org ni mu JW Library. Sai mitelembe i tu kuatekesa kusanga o jivelusu ja Bibidia ni lusolo. Se tu tanga ni kuxinganeka kiambote mu jivelusu ja Bibidia ji tu sanga mu milongi ia Mulangidi, tua-nda zola dingi o kidi.—Tanga Jisálamu 1:2.

15, 16. (a) Mu divulu dia Nzuá 13:34, 35, kitumu kiebhi kia tu bhana Jezú? (b) Kiebhi o henda ietu kua Nzambi ni ku Bibidia, ia lungu ni henda ietu ku jiphange?

¹⁵ Mʹusuku ua sukina ua Jezú mu ixi, muene uambe ku maxibulu mê uixi: “Nga mi bhana kijila kiôbhe: Di zodienu mudienu. Kala kioso eme ki nga mi zola, enu uenu di zodienu mu dienu. Kiene kia m’ijidila ku athu oso, kuma muala mu jixibulu jami, se mua di zolo mu dienu.”—Nzuá 13:34, 35.

¹⁶ O henda ietu ku jiphange, ia lungu ni henda ietu kua Jihova. Se ki tu zolo Nzambi, ki tu tena ue kuzola o jiphange jetu. Kiene ue kimoxi, se ki tu zolo o jiphange jetu, ki tu tena ue kuzola Nzambi. O Poxolo Nzuá ua soneka kuila: “Kuma uoso u kamba kuzola phang’iê, ua mu mono ni mesu, ka tena kuzola Nzambi kiluua a mu mona.” (1 Nzuá 4:20) O henda ietu kua Jihova ni ku jiphange, ia lungu ue ni henda ietu ku Bibidia. Mukonda  diahi? Mukonda se tu zola o milongi ia Bibidia, tua-nda belesela o kitumu kiê, kia kuzola Nzambi ni kuzola ue o jiphange jetu.—1 Phetele 1:22; 1 Nzuá 4:21.

17. Tu tena ku londekesa o henda ietu mu maukexilu ebhi?

¹⁷ Tanga 1 Tesalonika 4:9, 10. Mu maukexilu ebhi u tu tena ku londekesa o henda ku jiphange jetu mu kilunga? Nange phange ietu ua kuka u bhinga ku muambata, phala kuia ni kuvutuka mu iônge. Mba sai mutudi u bhinga kikuatekesu phala kuiudika kima kia zanganha ku bhata diê. (Tiiaku 1:27) O jiphange ja luuala, ala ni kikote ku muxima, mba a bhita mu ibhidi ioso-ioso, a bhinga o kikuatekesu kietu, kua suua, ni kua konda o malamba. (Jisabhu 12:25; Kolose 4:11) Tu londekesa kuila tua zolo ió “a tokala mu dianda dia kuxikana,” bhu kaxi ka ima i tu bhanga ni i tu zuela.—Ngalásia 6:10.

18. Ihi ia-nda tu kuatekesa kubatula o maka ni jiphange mu ukexilu ua tokala?

¹⁸ O Bibidia i zuela kuila “mu izuua isukidila-ku” ia mundu iú uaiibha, athu avulu eji kala akua luímbi ni azodi a ene ngó. (2 Timote 3:1, 2) Kuma tu Jikidistá, tua tokala kubandekesa o henda ietu kua Jihova, ku Mak’â mê, ni ku akuetu. Kuma tu akua ituxi, sai bhabha ki tua-nda ditendela ni phang’etu. Maji, kuma tua dizolo, tua-nda sota kulenduka ni kubatula o maka mu ukexilu ua tokala sé kulaleka. (Efezo 4:32; Kolose 3:14) Ki tua-nda kuehela o henda ietu kuzonda! Mu veji dia kiki, tua-nda suluka mu kukolesa o henda ietu kua Jihova, kuzola o Mak’â mê, ni jiphange jetu.