ANDE dia kuia ku diulu, Jezú uambela o maxibulu mê, uixi: “Mua kà ngi kalela jimbangi . . . katé ni ku maxokololo ma jixi.” (Ikalakalu 1:8) Kiebhi ene kieji tena kubokela o athu mu ixi ioso?

Martin Goodman, mesene ia Xikola ia Oxford, uambe: “Mukonda dia kitumu kia a bhanene, o Jikidistá a di tungula bhu kaxi ka jingeleja ja mukuá, katé muéne ni ngeleja ia Jijudé, mu Utuminu ua Loma.” Jezú ua boko mu ididi ioso. O Jikidistá ja kidi, a tokalele ku kaiela o phangu iê, mu kuboka “o Njimbu Iambote ia Utuminu ua Nzambi,” mu ididi ioso. Ene a tokalele ku sota o athu, a mesenene kuijiia o kidi kia Bibidia. (Luka 4:43) Mukonda dia kiki, ku hama ia dianga, kuexile o “Jipoxolo.” O kizuelu jipoxolo, kilombolola athu a a tumina kuia kubhanga kikalakalu. (Marku 3:14) Jezú ua tendelesa o maxibulu mê, uixi: “Enu-phe ndenu, mua ka longe jixibulu ku akua jixi joso.”​—Matesu 28:18-20.

O 12 kia jipoxolo a Jezú, kala dingi mu ixi. Maji o jiselevende ja Jihova, a kaiela o phangu iâ mu ukunji. Kioso kia a tumina kuboka mu ididi mua bhindamena aboki, ene a zuela: “Eme’ami-ú, Ngana, ngi tume eme.” (Izaia 6:8) Athu avulu, kala ió endele bhu Xikola ia Ngiliiade, ai mu jixi ja mukuá. A mukuá, ai mu ididi iéngi mu jixi jâ. Avulu a di longo dimi dia ubhe, phala kukuatekesa kilunga, mba kibuka mua zuela o dimi dia di longo. Sumbala kia bhonzele, o jiphange jiji akexile polondo, phala kubhanga o ima iii. Ene a  bhange kiki, phala kulondekesa o henda iâ kua Jihova ni ku athu. Mu kiki, ene a di sokejeka kiambote, mu kusota kithangana, kitadi, ni kubhanga nguzu phala kuboka mu ididi mua bhindamene aboki. (Luka 14:28-30) O ima ia mu bhanga o jiphange jiji, iala ni valolo ia dikota.

Amoxi mudietu, ka tena kuia mu ididi mua bhindamena aboki, mba ku di longa dimi diéngi, phala kukuatekesa o athu. Maji etu enioso tu tena kukalakala mu kilunga kietu, kála ki kalakala o akunji a jixi jengi.

Sumbala akexile mu ixi iâ, ni kuila, kexile akunji a jixi jengi, o Jikidistá ku hama ia dianga, akexile mu boka kiavulu. Phaulu ua tangela Timote, uixi: “Kalakala kia tokala o mukunji ua Njimbu Iambote, kumbidila kiambote o ungunza ué kua Nzambi.” (2 Timote 4:5) O Jikidistá ku hama ia dianga, a tokalele kukaiela o kitendelesu kiki. Lelu, etu ué tua tokala kukaiela o kitendelesu kiki. O Jikidistá joso a tokala kubelesela o kitumu kia kuboka o njimbu ia Utuminu, ni kubhanga maxibulu. Né muene mu kilunga kietu, kuene maukexilu avulu a kukalakala kála o akunji a jixi jengi.

Mu kifika, kioso kiaia mu jixi jengi, o akunji a jixi jengi a tokala kubhanga ioso phala ku ijidila o ijila ia jixi jiji, mukonda iene ki i difu. Né muene se ki tu tena kuia mu ididi mua bhindamena o aboki, o kuila tu tena kusota jindunge ja ubhe phala kubokela o athu? Mu kifika, ku muvu ua 1940, a dianga ku tendelesa o jiphange jetu, phala kuboka mu ikoka mu veji imoxi ku semana. O kuila ua fikisile kiá kuboka mu ikoka? O kuila ua fikisile kiá kukalakala ni ka dikalu ka madivulu? Mu kidi, o kibhuidisu ki tua mesena kubhanga, kiki: O kuila uala polondo phala kufikisa o maukexilu a ubhe a kuboka o njimbu iambote?

Se u kala polondo phala kufikisa o maukexilu a ubhe, ua-nda bhanga ioso phala kubandekesa o ukunji uê, mu kuboka ni kisangusangu kioso. O jiphange jiia mu ididi mua bhindamena o aboki, mba ió a di longa dimi dia ubhe, a tena kukuatekesa kiavulu o kilunga, mukonda ejiia kubhanga kiambote o kikalakalu kiki. Mu kifika, ene endesa o kikalakalu kia kuboka. O akunji a jixi jengi, endesa ué o ikalakalu mu ilunga, katé kia mona kuila, o jiphange ala polondo  phala kuendesa o ikalakalu mu ilunga iâ. Se a ku batizala kiá, o kuila ‘uendi,’ mba ua mu sota kukala kafunga, mba múkuatekexi ua tufunga, phala kusidivila o jiphange mu kilunga kiê?​—1 Timote 3:1.

Tu tena ué kukuatekesa o kilunga kietu mu maukexilu a mukuá. Ki kale se tu minzangala mba adiakimi, maiala mba ahatu, etu enioso tu tena ku ‘konda o malamba’ a jiphange ja bhindama.​—Kolose 4:11.

Se tua mesena kukuatekesa o jiphange jetu, tua tokala ku a ejiia kiambote. O Bibidia i tu suínisa ku ‘di xinganeka mudietu,’ mba kuxinganeka mu ibhindamu ia jiphange jetu, kioso ki tu diongeka. (Jihebeleu 10:24) O kitendelesu kiki, ki kilombolola kuila, tua tokala ku di ta mu maka a akuetu, mba ku sota kuijiia o ima ioso i bhita ni akuetu. Kilombolola kuila, tua tokala kubhanga nguzu, phala kuijiia kiambote o jiphange jetu ni kuijiia ué o ima ia bhindamena. Nange a bhindamena kima, a bhingi ku a konda o malamba mâ, mba ku a suínisa bhu kaxi ka Bibidia. Mu kidi, saí ithangana, o tufunga ni akuatekexi a tufunga, ene ngó a tena ku a kuatekesa. (Ngalásia 6:1) Maji etu enioso tu tena kukuatekesa o jiphange a kuka, mba o miji ia mu dibhana ni ibhidi.

Salvatore, ua tambula o kikuatekesu kiki. Mukonda dia maka a lungu ni kitadi, muéne ua sumbisa o ditenda diê, o inzo iê, ni ima ia mukuá ia kexile na-iu. Muéne ua thandanganhele kiavulu ni muiji uê. O muiji ua mukuá mu kilunga, ua mono kuila, ene a bhingile kikuatekesu. Ene a bhana kitadi kua Salvatore. Mu kusuluka, a sota salu phala muéne ni muhatu’ê. Ene a sungila ni muiji uê mu veji javulu, phala ku a evua ni ku a suínisa. Ene a kituka makamba ambote. Lelu, o miji íii i xinganeka ni kisangusangu, mu ithangana ia bhitile kumoxi, kioso kia kexile mu dibhana ni ibhidi.

O Jikidistá ja kidi, kala ni hele ia kujimbulula o ima ia lungu ni kixikanu kiâ ku akuâ. Tua tokala kukaiela o phangu ia Jezú, mu kutangela o athu oso, o ima iambote ia tu kanena Nzambi. Kikale se tu tena kuia mu ididi mua bhindamena o aboki, mba kana, etu enioso tu tena kubhanga nguzu, phala kukuatekesa akuetu mu kilunga kietu. (Ngalásia 6:10) Se tu kuatekesa akuetu, tua-nda sanguluka, ni “kuima ibundu mu ikalakalu iambote.”​—Kolose 1:10; Ikalakalu 20:35.