“EME nga kuijiia tundé kia kuvuala, nga sanguluka kiavulu mu kuijiia kuila, eie ua mesena ku kubatizala.” Kiene kia zuela kafunga, kua munzangala uexile ni 12 kia mivu a mu ixana Christopher. Muéne uambe dingi: “Nga mesena ku kuibhuidisa kima: ‘Mukonda diahi eie ua mesena ku kubatizala?’” O kafunga uejidile kiambote o kibhuidisu kia bhangele. Tu sanguluka kiavulu kioso ki tu mona o mazunda ni mazunda a minzangala ene mu a batizala ku mivu joso. (Ndongixi 12:1) Maji o jitata ni tufunga tua kilunga, a mesena kuila, o minzangala a sola mu vondadi iâ o ku a batizala, ni kuila, a sota kutendela kiambote o dilomboluelu dia batizu.

1, 2. (a) Ihi iene mu sangulukisa o mundu ua Nzambi lelu? (b) Kiebhi o jitata Jikidistá ni tufunga, kia tena kukuatekesa o minzangala kutendela o dilomboluelu dia batizu?

² O Bibidia i tu longa kuila, o ku di bhakula ni ku di batizala,  kulombolola o dimatekenu dia muenhu ua ubhe phala o Kidistá. O ukexilu iú ua muenhu, u bheka mabesá avulu a Jihova, maji u bheka ué izukutisu iavulu ijila kua Satanaji. (Jisabhu 10:22; 1 Phetele 5:8) Mukonda dia kiki, o jitata Jikidistá a tokala kusota kithangana kia soko, phala kulonga o tuana tuâ, se ihi ilombolola o kukala dixibulu dia Kristu. Se o munzangala kala ni jitata Kidistá, o tufunga mu kilunga, a-nda mu kuatekesa kutendela kiambote, se ihi ilombolola o ku di bhakula ni ku di batizala. (Tanga Luka 14:27-30.) Phala kutunga inzo, kubhinga ku di pelepalala kiambote, kiene ué kimoxi, o minzangala a bhingi ku di pelepalala kiambote ande dia ku a batizala, phala kukolokota kusidivila Jihova ni ufiiele uoso “katé bhu dizubhilu.” (Matesu 24:13) Ihi ia-nda kuatekesa o minzangala kukolokota mu kusidivila Jihova katé ku hádia ni hádia? Tua-nda di longa o maka enhá.

3. (a) Ihi i tu longa o izuelu ia Jezú ni ia Phetele, ia lungu ni ku di batizala? (Matesu 28:19, 20; 1 Phetele 3:21) (b) Ibhuidisu iebhi i tua-nda di longa, ni mukonda diahi?

³ O kuila eie u munzangala ua mesena ku u batizala? Se kiene, ejiia kuila, eie ua mu suua mbambe iambote! Ujitu ua dikota ku tu batizala kala Mbangi ia Jihova. Kiki, kiene o kima kia tokala o kubhanga o Kidistá, kima kia-nda tu kuatekesa ué kubhuluka mu kithangana kia hadi ia dikota. (Matesu 28:19, 20; 1 Phetele 3:21) Kioso kia ku batizala, eie ulondekesa ku athu kuila, ua kanena kusidivila Jihova katé ku hádia ni hádia. Mu kidi, eie ua mesena ku kumbidila o kikanenu kiê, mu kiki, o ibhuidisu ia kaiela ia-nda kukuatekesa kumona se uala polondo phala ku u batizala mba kana: (1) O kuila ngala kiá polondo phala ku ngi batizala? (2) O kuila kiene o kima ki nga mesena? (3) O kuila ngejiia kiambote se ihi ilombolola o ku dibhakula kua Jihova? Tua-nda di longa ia lungu ni ibhuidisu íii.

4, 5. (a) Mukonda diahi ko adiakimi ngó a tokala ku a batizala? (b) O kukala ni kilunji kulombolola ihi phala o Kidistá?

⁴ O Bibidia ki i tendelesa ku batizala ngó o adiakimi, ki izuela ué o kitala kia tokala phala kubatizala muthu. O divulu dia Jisabhu 20:11, di zuela: “Katé mona-ndenge a mu ijidila ku ima iê ia bhanga, se ia zele kiambote anga i iuka muene.” Mu kiki, né muéne mona-ndenge, u tena kuijiia o ima iambote, ni kutendelela kiambote se ihi ilombolola o ku di bhakula ku Mubhangi uê. Mukonda dia kiki, o batizu, mbambe iambote phala o munzangala ua londekesa kukala ni ukamba uambote ni Nzambi, iú ua solo o ku di bhakula kua Jihova.​—Jisabhu 20:7.

⁵ Ihi ilombolola o kukala ni kilunji? Ki  kulombolola ngó kukala muadiakimi mba kukula mu kitala kana. O Bibidia izuela kuila, o athu ala ni ukamba uambote ni Nzambi, “a sungu kiá kilunji” kia kuijiia kusola o ima iambote mu íii ia iibha. (Jihebeleu 5:14) O muthu uala ni kilunji, uejiia o ima iambote ia tokala o kubhanga. Ku muxima uê, muéne u mesena kubhanga ngó o ima iambote. Mukonda dia kiki, kehela ku mu funhisa ni lusolo, phala kubhanga o ima ia iibha. Muéne ka bhingi muthu u mu tendelesa mu ola joso, phala kubhanga o ima iambote. O munzangala a mu batizala kiá, ua tokala kubhanga o ima iambote, né muene se o jitata ni adiakimi a mukuá kala-nê kumoxi.​—Sokesa ni Filipe 2:12.

6, 7. (a) Jimbulula o ibhidi ia bhitile na-iu Daniiele, kioso kiexile mu ixi ia Babilonha. (b) Kiebhi Daniiele kia londekesa kuila uexile ni ukamba uambote ni Nzambi?

⁶ O kuila o munzangala u tena kulondekesa kilunji? Tu mone o phangu ia Daniiele. Nange muéne uexile hanji munzangala, kioso kia mu tambuile bhu maku a jitata jê, phala ku mu tumikisa ku ixi ia Babilonha. Daniiele ua tungile bhu kaxi ka athu exile mu xibhaka o itumu ia Nzambi. Maji tu mone o ima ia bhitile ni Daniiele. Ku ixi ia Babilonha, o athu akexile mu mu mona kala muthu ua katunda. Muéne a mu solele ué phala kukalakala mu kusidivila o sobha. (Daniiele 1:3-5, 13) Se ua kexile mu Izalaiele, nange Daniiele keji kala ni fuma iavulu, kala kia kexile mu ixi ia Babilonha.

⁷ Mu kiki, ihi ia bhange Daniiele? O kuila muéne uehela akua Babilonha ku mu funhisa ni ku zozesa o kixikanu kiê? Kana! O Bibidia izuela kuila, kioso Daniiele kiexile mu Babilonha, muéne “anga u ta kikutu ni muxima uê, uixi: Nguami ku di kasanesa,”  iú ua bhange ioso phala kulenga o ima ia lungile ni ubhezelu ua makutu. (Daniiele 1:8) Kiki kia londekesa kuila, muéne uexile ni ukamba uambote ni Nzambi!

8. Mbote iebhi i u tena kukatula mu phangu ia Daniiele?

⁸ Mbote iebhi i u tena kukatula ku phangu ia Daniiele? O munzangala uala ni ukamba uambote ni Nzambi, u kala ni kixikanu kia suína, né muene kioso kia bhita ni ibhidi. Muéne ka difu ni dinonguena, di bhiluka kabasa kididi bhu di kala. Muéne ka londekesa kukala kamba dia Nzambi bhu Kididi Kia Ubhezelu, maji bhu xikola u kala kamba dia mundu. Mu veji dia kiki, muéne u kolokota mu ufiiele uê, né muene kioso kia dibhana ni jitendasá.​—Tanga Efezo 4:14, 15.

9, 10. (a) Kiebhi o munzangala kia tena kukatula mbote, mu kuxinganeka se kiebhi kia di tundu mu jitendasá? (b) Ihi ilombolola o Batizu?

⁹ Mu kidi, sé-ku muthu ua iuka. Kikale o minzangala ni adiakimi, ene mu lueza. (Ndongixi 7:20) Maji se ua mesena ku u batizala, kima kiambote kusota kuijiia se uala muene polondo phala kubelesela o itumu ia Jihova. Dibhuidise: ‘O kuila ngene mu belesela kiá Jihova?’ Xinganeka se ihi i ua bhange kioso kia ku tendala. O kuila eie ua tenene kusola o kima kiambote ki ua tokalele o kubhanga? Kála Daniiele, o kuila saí muthu ua kusuínisa kukatula mbote mu uhete u uala nau, mu kukalakala ku mundu ua Satanaji? Se u bhita mu jitendasá jiji, o kuila ua-nda tena kumona se iebhi o vondadi ia Jihova?​—Efezo 5:17.

¹⁰ Mukonda diahi kima kiambote kuijiia o itambuijilu ia ibhuidisu íii? Mukonda ia-nda ku kuatekesa kumona kuila, o batizu kima kia dikota. Bhu kaxi ka batizu, eie ulondekesa ku athu kuila, ua kanena kima kia dikota kua Jihova. Eie ua kanena ku mu zola ni ku mu sidivila ni muxima uoso, katé ku hádia ni hádia. (Marku 12:30) O muthu a mu batizala, ua tokala kukala polondo phala kukumbidila o kikanenu kia bhange kua Jihova.​—Tanga Ndongixi 5:4, 5.

11, 12. (a) Ihi ia tokala kuijiia o muthu ua mesena ku mu batizala? (b) Ihi ia-nda ku kuatekesa kumona o batizu kala ki mona Jihova?

¹¹ O Bibidia izuela kuila, o mundu uoso ua Jihova, katé muene ni minzangala, eji mu sidivila mu “vondadi iâ.” (Jisálamu 110:3) Mu kiki, o muthu ua mesena o ku mu batizala, ua tokala kuijiia ni kidi kioso, se kiene o kima kia mesena muéne. Nange kubhinga kuijiia kiambote se kiene o kima ki ua mesena o kubhanga, benge benge se ua kudila mu kilunga kia Jihova.

¹² Tundé mu undenge uê, nange eie ua mono athu avulu ku a batizala, kala o makamba mê mba o jiphange jê. Maji ua tokala ku di langa, phala ka ku batizale ngó mukonda ua kulu mu kitala, mba mukonda dia kumona athu avulu ku a batizala. Kiebhi ki  u tena kumona o batizu kala ki mona Jihova? Katula kithangana phala kuxinganeka se mukonda diahi o batizu kima kiala ni valolo. Eie ua-nda sanga milongi iavulu ia lungu ni maka enhá mu milongi íii, ni ia-nda kaiela.

13. Kiebhi ki u tena kuijiia se ua solo ku u batizala mu vondadi iê?

¹³ Phala kuijiia se ua mesena muene ku u batizala, eie ua tokala kutonginina kiambote o ukexilu uê ua kusamba. O kuila eie u samba kua Jihova mu ithangana ioso? Ihi i uene mu tumbula mu musambu uê? O itambuijilu iê mu ibhuidisu íii, i tena kulondekesa kiebhi kiala o ukamba uê ni Jihova. (Jisálamu 25:4) Jihova u tambuijila dingi o misambu ietu bhu kaxi ka Bibidia. Mu kiki, o ukexilu ua mukuá ua kumona se uala ni ukamba uambote ni Jihova, ni kuila, u mu sidivila ni muxima uoso, o kutonginina kiambote se kiebhi kiala o ukexilu uê ua ku di longa o Mak’â Nzambi. (Josuué 1:8) Dibhuidise: ‘O kuila ngene mu di longa o Bibidia semana joso? O kuila phala kubhanga o ubhezelu uetu ku muiji, ene mu ngi jijidika?’ O itambuijilu iê, ku ibhuidisu íii, ia-nda ku kuatekesa kuijiia se ua solo ku u batizala mu vondadi iê mba kana.

14. Jimbulula se kiebhi o ku di bhakula, ki kiene kimoxi ni batizu.

¹⁴ Saí minzangala, nange kejiia se ihi ilombolola o ku dibhakula. Nange kejiia ué o dilomboluelu dia batizu. A mukuá, nange a zuela kuila, a di bhakula kiá kua Jihova, maji kala luua polondo phala ku a batizala. O kuila kiki, ki tena kubhita? O muthu u di bhakula kua Nzambi bhu kaxi ka musambu, u kanena kusidivila Jihova katé ku hádia ni hádia. Kioso kia kubatizala, eie ulondekesa ku athu oso kuila, ua dibhakula kua Jihova. Mu kiki, ande dia ku u batizala, eie ua tokala kuijiia, se ihi ilombolola o ku di bhakula kua Nzambi.

15. Ihi ilombolola o ku dibhakula kua Nzambi?

¹⁵ Kioso ki u bhakula o muenhu uê kua Jihova, u mu tangela kuila, ua tokala kua muéne. Eie u mu kanena ku ta o sidivisu iê ku pholo, ku muenhu uê uoso. (Tanga Matesu 16:24.) Kiki kikanenu kia dikota, ki tu bhanga kua Nzambi! (Matesu 5:33) Mu kiki, kiebhi ki ulondekesa kuila, eie uejiia kuila, kuala ku muenhu phala kubhanga dingi o vondadi iê, maji o vondadi ia Jihova?​—Loma 14:8.

16, 17. (a) Jimbulula se ihi ilombolola o ku dituna kubhanga o vondadi ietu. (b) Mu kidi, ihi izuela o muthu u dibhakula kua Nzambi?

¹⁶ Tu mone o phangu íii. Xinganeka kuila, kamba diê ua ku bhana dikalu. Muéne u kubhana o mikanda ioso ia dikalu, anga u ku tangela: “O dikalu didi phala eie.” Maji muéne u zuela: “O jisabhi ja-nda kala n’eme. Eme nga-nda kuendesa o dikalu.” Kiebhi ki ueji divua? Ihi i ueji banza ia lungu ni dikamba dia kubhana o dikalu?

¹⁷ Kioso muthu kia bhakula o muenhu uê kua Jihova, muéne u zuela kua Nzambi: “Nga mu kubhana o muenhu uami. Eme nga ku tokala.” Jihova u kinga kuila, o muthu u kumbidila o kikanenu kiê. Maji, ihi i tuamba, se muthu iú u mateka kuxibhaka Jihova, mu ku tangesa muthu ki Mbangi ia Jihova? Mba se muthu u xikina  salu, i mu bhangesa kukamba kithangana kia kuboka, mba kufonga mu iônge ithangana ioso? Mu kidi, o muthu iú, ka mu kumbidila o kikanenu kia bhangele kua Jihova. Kia difu ni kubhaka o jisabhi ja dikalu. Kioso ki tu dibhakula kua Jihova, tu mu tangela: “Muenhu uami ki u ngi tokala dingi, maji ua ku tokala eie.” Mukonda dia kiki, tua-nda bhanga ngó o kima kia mesena Jihova, né muene se ki tua ki uabhela. Mu kiki, tu kaiele o phangu ia Jezú, uambe: “Eme nga tuluka mu diulu, kana mu kubhanga o vondadi iami, maji mu kubhanga vondadi ia ió uoso ua ngi tumu.”​—Nzuá 6:38.

18, 19. (a) Kiebhi o izuelu ia Rose ni Christopher, ilondekesa kuila, o batizu i bheka mabesá? (b) Ihi i u banza ia lungu ni ujitu ua batizu?

¹⁸ Mu kidi, o batizu kima kia dikota. Ujitu ua dikota ku di bhakula kua Jihova, ni ku tu batizala. O minzangala a zolo Jihova, ejiia kiambote se ihi ilombolola o ku dibhakula kua Nzambi, ka kala ni uôma ua ku dibhakula kua Nzambi ni ku a batizala. Ene ka diela mu kusola ku dibhakula. O kilumba Rose, a mu batizala kindala, uambe: “Eme nga zolo Jihova, sé-ku kikalakalu kieji ngi bhangesa kusanguluka, kála o sidivisu ia Nzambi. O kima ki nga beta-o-kota kusola ni unjimu ku muenhu uami, o batizu.”

¹⁹ Ihi ia bhiti ni munzangala Christopher, tua mu tange mu dimatekenu dia milongi íii? Ihi ia zuela muéne, ia lungu ni kusola ku mu batizala kioso kiexile ni 12 kia mivu? Muéne uambe kuila, ua sanguluka kiavulu, mukonda dia kusola kubhanga kiki. Muéne ua mateka kusidivila kala muboki ua thembu ioso, kioso kiexile ni 17 dia mivu, o kioso kia tenesa 18 dia mivu a mu bhana o ujitu ua kukala múkuatekexi ua tufunga. Lelu, muéne ua mu kalakala ku Betele. Muéne uambe: “Nga bhange kiambote mu kusola ku ngi batizala. Ku muenhu uami uoso, ngene mu sanguluka kiavulu mu kusidivila Jihova mu kilunga kiê.” Kiebhi ki ua tokala o ku di pelepalala, se ua mesena ku u batizala? O milongi ia-nda kaiela, ia-nda tambuijila o kibhuidisu kiki.