MU divulu dia Dimatekenu kibatulu 22, o Bibidia izuela kuila, Nzambi uambe kua Mbalahamu phala kuxa o inzo iê phala kuia mu bhana sata. O velusu iii izuela: “Mbalahamu anga u katula o jihuinhi ja sata ia kuoha, u ji tuika mon’ê Izake; muene anga uambata túbhia ni mukuale anga aia kumoxi kiiadi kiâ.”​—Dimatekenu 22:6.

O Bibidia ki ijimbulula kiambote se kiebhi o athu m’ukulu akexile mu uika o túbhia. O kuila Mbalahamu ni Izake a uika o túbhia tu’ambatele? Sai mukua kujimbulula o Bibidia ua zuela kuila nange o túbhia “ki tueji laleka kiavulu mu njila iê ioso.” Mbalahamu ni mon’ê nange ambatele o ima ioso ia mesenene phala ku uika o túbhia.

Maji sai iá amba kuila, kia bhonzele ku uika o túbhia mu izuua ióio. Kioso kia tenene a kexile mu katula makala a túbhia ku dijiku dio uike kiá ku muthu uéngi. Athu avulu ene mu tokuesa o Bibidia amba kuila, o túbhia tuambata Mbalahamu ua tu katula ku dijiku dia muthu uéngi. Muene nange ua te o makala mu ímbia, mba mu kididi kiéngi kia kexile ni mukolo phala ku kiambata. (Izaia 30:14) Kioso kia bhingile ku uika o túbhia, nange ua kexile mu sokejeka jihuinhi ni makala a uama.