1, 2. Mukonda diahi, Nzambi ua ditunu o ungana ua Saulu? (Tala o foto ia dianga.)

KIOSO Jihova kia solo Saulu phala kukala sobha, Saulu uexile mukua ku di tulula. (1 Samuuele 9:1, 2, 21; 10:20-24) Maji kioso kia kituka sobha, muene ua mateka ku di zangeleka. Sai kithangana, o akua Fidíxia, ai mu luua ita ni akua Izalaiele. O polofeta Samuuele ua tangela Saulu kuila, muene ueji kuíza phala kubhana sata kua Jihova. Maji ande dia Samuuele kubhixila, o akua Izalaiele akexile ni uoma uavulu. Mukonda dia kiki, avulu mudiâ, a xisa Saulu. Mu veji dia kukingila Samuuele, Saulu uoha o sata. Jihova ka sangulukile ni kima kia bhangele Saulu, mukonda muene kexile ni ujitu ua kuoha o sata.​—1 Samuuele 13:5-9.

² Kioso Samuuele kia bhixila, muene ua bazela Saulu, mukonda dia kubhukumukina Jihova. Maji Saulu ua kexile mu banza kuila, o kima kia bhangele, ki kiexile kituxi. Muene ua fikisa ku sueka o kituxi kiê, iú ua tatela akuâ. (1 Samuuele 13:10-14) Tundé o kithangana kieniókio, Saulu ua bhange ima ia mukuá iaiibha. Mukonda dia kiki, Jihova ua mu tambula o ungana. (1 Samuuele 15:22, 23) O muenhu ua Saulu ua mateka kiambote, maji ki u bhu kiambote.​—1 Samuuele 31:1-6.

3. (a) Ihi i banza o athu ia lungu ni ukexilu ua ku di tulula? (b) Ibhuidisu iebhi i tua-nda tambuijila?

 ³ Lelu, athu avulu a banza kuila, se o muthu u kala ni jimbongo javulu ku muenhu, mba salu iambote, ka tena ku di tulula. Ene a londekesa kuila, a beta-o-kota, o akuâ ndenge. Mu kifika, sai diiala dia fuma, uambe: “O ukexilu ua ku di tulula, ki u ngi fuama. Eme ki ngi mesena ue kukala ni ukexilu iú.” Maji mukonda diahi kima kiambote o Kidistá kukala ni ukexilu ua ku di tulula? Ihi ilombolola o ku di tulula? Ihi ilombolola o kukamba o ukexilu ua ku di tulula? Mu milongi íii, tua-nda di longa o itambuijilu ia ibhuidisu íii? Mu milongi ia-nda kaiela, tua-nda mona kiebhi ki tu tena kukolokota mu kulondekesa o ukexilu ua ku di tulula, né muéne se ki bhonza kubhanga kiki.

4. Ihi ilombolola o kubhuma kua izala, mba ukumbu?

⁴ O Bibidia ilondekesa kuila, o muthu ulondekesa o ukumbu, kála ni ukexilu ua ku di tulula. (Tanga Jisabhu 11:2.) Davidi ua dióndo Jihova, uixi: “Selevende ié, Ngana, mu fudise o kubhuma kua izala.” (Jisálamu 19:13) Ihi ilombolola o kubhuma kua izala, mba ukumbu? Ku lombolola kubhanga ima, ki tuala ni ujitu ua ku i bhanga. Nange tu i bhanga mukonda dia kukamba muanhu, mba ku mesena ku di zangeleka. Kuma tu akua ituxi, sai ithangana, tu kala ni ukumbu. Maji kala kia londekesa o phangu ia Sobha Saulu, se tuia ni kubhanga o ima íii, Jihova ka-nda sanguluka. O divulu dia Jisálamu 119:21, di zuela kuila, Jihova ua-nda “bazela akua izala.” Mukonda diahi?

5. Mukonda diahi o kubhanga kima ki tuala ni ujitu ua ku ki bhanga, maka a dikota?

⁵ Kia dianga, kioso ki tu bhanga kima ki tuala ni ujitu ua ku ki bhanga, tu bhukumukina Jihova Nzambi, o Nguvulu ietu. Kia kaiadi, se tu bhanga ima ki tuala ni ujitu ua ku i bhanga, nange tua-nda di kuata ni akuetu. (Jisabhu 13:10) Kia katatu, kioso o athu kia-nda mona kuila tua bhange kima, ki tua kexile ni ujitu ua ku ki bhanga, nange ene a-nda tu mona kala tu ioua. (Luka 14:8, 9) O ima íii, i tu bhangesa kutendela kiambote se mukonda diahi Jihova ua mesena kuila, tu kala ni ukexilu ua ku di tulula.

6, 7. Kiebhi o ukexilu ua ku di tulula ua lungu ni kulenduka?

⁶ O ukexilu ua ku di tulula ua lungu ni kulenduka. O kidistá ua lenduka, ka londekesa ukumbu. Mu veji dia kiki, muene u mona akuâ kala a beta-o-kota, muene ndenge. (Filipe 2:3) Mu kidi, o muthu ua lenduka, uala ue ni ukexilu ua ku di tulula. Muene uejiia kuila, ka tena kubhanga o ima ioso. Kioso kia ta kituxi, muene u xikina ue ni kulenduka kuoso kuila, ua te kituxi. Muene uala polondo phala kuívua, ni kukatula mbote mu ibanzelu ia akuâ. O muthu ua lenduka, u sangulukisa kiavulu o muxima ua Jihova.

⁷ O Bibidia ilondekesa kuila, o muthu uala ni ukexilu ua ku di tulula, ua dijiia kiambote. Muene uejiia ue kuila, sai ima, muene ka tena ku i bhanga, mba kala ni ujitu ua ku i bhanga. O kuijiia o kidi kiki, ku mu kuatekesa ku xila akuâ, ni kua talatala kiambote.

8. Ibanzelu iebhi i tua tokala ku dituna, se tua mesena kulondekesa o ukexilu ua ku di tulula?

 ⁸ Maji né kiki, nange tu mateka kukala ni ukumbu, sé ku kijiia. Kiki ki bhita kiebhi? Nange tu mateka ku divua kala tua beta-o-kota, akuetu ndenge, mukonda etu mba o athu u tuejiia kiambote, ala ni maujitu mu kilunga. (Loma 12:16) Mba nange tu mateka ku ta izuatu, i bhangesa akuetu ku tu mona kala tu athu onene. (1 Timote 2:9, 10) Nange tu mateka ku tangela akuetu, o ima ia tokala kubhanga, ni ima ia tokala ku dituna.​—1 Kolindo 4:6.

9. Mukonda diahi sai athu ala ni ukumbu? Bhana phangu ia Bibidia.

⁹ Se ki tu lange o jihânji jetu jaiibha, tu tena kumateka kulondekesa o ukumbu. Athu avulu ala ni ukumbu, mukonda a mesenene kukala ni fuma, akexile ni difuba dia akuâ, mba ka tena ku langa o njinda iâ. O ima íii, ia bhiti ni athu a tange mu Bibidia, kala Abisalone, Uziia, ni Nabukodonozolo. Jihova ua tangela kuila, ene a tokalele kukala athu a lenduka.​—2 Samuuele 15:1-6; 18:9-17; 2 Malunda 26:16-21; Daniiele 5:18-21.

10. Mukonda diahi ki tu tokala kufundisa akuetu? Bhana phangu ia Bibidia.

¹⁰ Nange kuene ima ia mukuá, i bhangesa o athu kukamba ku londekesa o ukexilu ua ku di tulula. Xinganeka mu phangu ia Abimeleke ni Phetele. (Dimatekenu 20:2-7; Matesu 26:31-35) O kuila o maiala iá, a londekesa o ukumbu? O kuila ene kejiidile o ima ioso? Inga a kexile mu bhanga o ima sé ku banza? Kuma ki tu tena kuijiia o ima iala ku mixima ia akuetu, ki tu tokala kua fundisa.​—Tanga Tiiaku 4:12.

11. Ihi i tua tokala o kuijiia?

¹¹ O muthu uala ni ukexilu ua ku di tulula, uejiia o kididi kiê mu kilunga kia Nzambi. Jihova Nzambi, ki mukuâ kavuanza. Muene ua bhana kikalakalu ku athu oso mu kilunga. Mu kiki, etu enioso tuala ni valolo mu kilunga. Jihova ua bhana maujitu ni mauhete ku athu oso. Muene u tu ehela kusola, kiebhi ki tua-nda kalakala ni maujitu a tu bhana muene. Se tu kala ni ukexilu ua ku di tulula, tua-nda londekesa o maujitu u tua tambula, mu ukexilu u sangulukisa Jihova. (Loma 12:4-8) Tua-nda lembalala ue kuila, Jihova ua mesena kuila, tu kalakala ni maujitu a tu bhana, mu kubhanga ima i mu ximanesa, ni kukuatekesa akuetu.​—Tanga 1 Phetele 4:10.

12, 13. Ihi i tua tokala ku di lembalala, se o kikalakalu kietu mu kilunga kia Jihova ki lunguluka?

¹² Mu kubhita thembu, nange o ima i tu bhanga mu sidivisu ia Jihova, i lunguluka. Mu kifika, xinganeka o ima iavulu ia bhiti ku muenhu ua Jezú. Kia dianga, muene ua kexile ni Tat’ê ku diulu. (Jisabhu 8:22) Mu kusuluka, muene ua kuatekesa Jihova kubhanga o jianju, o ngongo, ni athu. (Kolose 1:16) Mu kubhita thembu, a mu tumikisa mu ixi. A mu vuala kala muthu mu xitu, anga u kula katé kia kituka muadiakimi. (Filipe 2:7) Kioso kiafu, Jezú ua fukunuka, anga u vutuka ku diulu. Ku muvu ua 1914, muene ua mateka kutumina kala Sobha ia Utuminu ua Nzambi. (Jihebeleu 2:9) Ku hádia, kioso kia-nda bhua o Utuminu uê ua midi ia mivu, Jezú ua-nda vutuila o ungana kua Jihova, n’a ‘tumine sé mbambe ku thandu dia ima ioso.’​—1 Kolindo 15:28.

¹³ Nange ima iavulu i lunguluka ku muenhu uetu. Nange o ima i tu sola, i tena ku tu fidisa kubhanga o kikalakalu ki tua kexile mu bhanga mu kilunga. Nange tuexile tu makudi, maji tua solo kukazala. Mba nange tu vuala tuana. Mu kubhita thembu, nange tu sola  kusosolola o ima ku muenhu uetu, phala kubhanga dingi mu sidivisu ia Jihova. Mu ithangana ia mukuá, nange tu bhanga kikalakalu kiéngi mu kilunga, mukonda dia ima i bhita ku muenhu uetu. Nange tu bandekesa o kikalakalu kietu mu kilunga, maji nange ki tu tena kubhanga kiki. Maji ki kale se tu minzangala mba tu adiakimi, se tuala ni sauidi iambote mba kana, Jihova uejiia kiebhi ki tu tena ku mu sidivila kiambote. Muene ka kingila kuila, tu bhanga o ima ia tundu o nguzu ietu. Muene u sanguluka ni kima kiambote kioso-kioso ki tu mu bhangela.​—Jihebeleu 6:10.

14. Kiebhi o ukexilu ua ku di tulula, u tena ku tu kuatekesa kusanguluka ni kikalakalu kioso-kioso ki tu bhana Jihova?

¹⁴ Jezú ua kexile mu sanguluka ni kikalakalu kioso-kioso kia kexile ku mu bhana Jihova. Tua tokala ue kusanguluka ni kikalakalu kia tu bhana mu kilunga. (Jisabhu 8:30, 31) O muthu uala ni ukexilu ua ku di tulula, u sanguluka ni kikalakalu kiê mu kilunga. Muene ka di sokesa ni akuâ. Mu veji dia kiki, muene u bhanga o kikalakalu kiê mu kilunga kia Nzambi, ni kisangusangu. Muene u mona o kikalakalu kiê, kala ujitu ua Jihova. O muthu u di tulula, u xila ue akuâ. Muene u a kuatekesa ni kisangusangu kioso. Muene uejiia kuila, Jihova ua a bhana ue ikalakalu.​—Loma 12:10.

15. Ihi i tu longa o phangu ia Ngidiione?

¹⁵ Ngidiione ua londekesa kiambote o ukexilu ua ku di tulula. Kioso Jihova kia mu bhana o ujitu ua kubhulula o akua Izalaiele bhu maku akua Midiiana, Ngidiione ua zuela: “O kibuka kia vumu dia tat’etu, kiene kiala ndenge mu muiji ua Manasa, o mu bhata dia tat’etu, eme-eme ngala ngi kasule kâ.” (Afundixi 6:15) Maji Ngidiione ua dielele kua Jihova,  anga u xikina o kikalakalu kia mu bhana. Mu kusuluka, Ngidiione ua soto kutendela kiambote o kima kia mesenene Jihova, anga u samba phala ku mu bhinga kikuatekesu. (Afundixi 6:36-40) Ngidiione uexile diiala dia suina, maji muene ua londekesa ue o unjimu, anga u di langa. (Afundixi 6:11, 27) Mu kubhita thembu, o athu a mesenene kuila, Ngidiione u kala nguvulu iâ, maji muene ua ditunu. Kioso kia zubha kubhanga o kikalakalu kia mu bhanene Jihova, muene ua vutuka ku bhata diê.​—Afundixi 8:22, 23, 29.

16, 17. Kiebhi o muthu u di tulula, u tena kukula mu nzumbi?

¹⁶ Se muthu u xikina kikalakalu kia ubhe, mba u mesena kubhanga dingi mu kilunga, ki kilombolola kuila, muene kala ni ukexilu ua ku di tulula. O Bibidia i zuela kuila, kima kiambote o selevende ia Jihova, kukala ni vondadi ia kusidivila dingi o jiphange jê mu kilunga, ni kukula mu nzumbi. (1 Timote 4:13-15) Maji o kuila tua bhingi kutambula kikalakalu kia ubhe mu kilunga, phala kukula mu nzumbi? Kana. Etu enioso tu tena kubhanga nguzu phala kukala ni idifua iambote, ni kubandekesa o uhete ua tu bhana Jihova, phala ku mu sidivila kiambote, ni ku kuatekesa akuetu.

¹⁷ Ande dia kutambula kikalakalu kia ubhe, o muthu u di tulula, u sota kuijiia o ima ia-nda kingila kokué. Muene u samba, anga u mona kiambote se ua-nda tena kukumbidila o kikalakalu kia-nda tambula. O kuila muene ua-nda kala hanji ni kithangana mba nguzu phala kubhanga o ima iamukuá? Se ka-nda tena, o kuila muene ua tokala kuehela akuâ kubhanga o ikalakalu ia mukuá iala na-iu? Mu kuxinganeka mu ima íii, o muthu u di tulula, nange u sola ku dituna o kikalakalu kia ubhe, mukonda ka-nda tena ku ki bhanga kiambote. Se tuala ni ukexilu ua ku di tulula, nange tua-nda bhinga ue kubhanga kiki.

18. (a) Ihi ia tokala kubhanga o muthu u di tulula, kioso kia tambula kikalakalu kia ubhe? (b) Kiebhi o divulu dia Loma 12:3 di tu kuatekesa ku di tulula?

¹⁸ Jihova ua mesena kuila, tuenda ue ‘ni ku di tulula.’ (Mikeia 6:8) Mu kiki, se tu tambula kikalakalu kia ubhe, tua tokala kubhinga o kikuatekesu kiê, kala kia bhangele Ngidiione. Tua tokala kuxinganeka kiambote mu ima i tanga Jihova bhu kaxi ka Bibidia, ni kilunga kiê. Ki tu tokala kujimba kuila, kikalakalu kioso-kioso ki tu bhanga mu kilunga kia Nzambi, ki tua mu ki bhanga mukonda dia ufunu mba uhete uetu. Mu kidi, tua mu ki bhanga, mukonda Jihova mu kulenduka kuê, uala polondo phala ku tu kuatekesa. (Jisálamu 18:35) O muthu u di tulula, ka tokala ku ‘di fika ima ia mu tundu.’​—Tanga Loma 12:3.

19. Mukonda diahi tua tokala kukala ni ukexilu ua ku di tulula?

¹⁹ O muthu u di tulula, uejiia kuila, Jihova muéne ngó ua fuama kutambula o fuma, mukonda muéne o Mubhangi ua ima ioso, ni kuila, muéne o Suke-ku mu ngongo ioso. (Dijingunuinu 4:11) Se tu di tulula, tua-nda sanguluka ni kikalakalu kioso-kioso ki tu bhanga mu kilunga kia Jihova. Tua-nda xila o ibanzelu ia jiphange jetu. Mukonda dia kiki, tua-nda kala ni ukamba uambote mudietu. O muthu u di tulula, u xinganeka kiambote ande dia kubhanga kima. Mu kubhanga kiki, muene u di langa ku ituxi ia dikota. Jihova u sanguluka kiavulu ni athu a londekesa o ukexilu ua ku di tulula. Mu kiki, o mundu ua Nzambi ua tokala kulondekesa o ukexilu ua ku di tulula. Mu milongi ia-nda kaiela, tua-nda mona kiebhi ki tu tena kukolokota mu kulondekesa o ukexilu ua ku di tulula, né muéne se ki bhonza kubhanga kiki.