O ima iamukuá ia zuela Phaulu, i tu kuatekesa kutendela kuila, muéne ua kexile mu zuela ia lungu ni ikanenu ia Nzambi, io tange mu Bibidia.

Tuene mu tumbula o divulu dia Jihebeleu 4:12 mu madivulu metu, phala kulondekesa kuila, o Bibidia iala ni kutena kua kulungulula o mienhu ia athu. Kiki kidi. Maji, kima kiambote kutendela o kima kia kexile mu zuela Phaulu, kioso kia soneka o izuelu mu divulu dia Jihebeleu 4:12. Muéne ua kexile mu suínisa o Jikidistá akua Jihebeleu kubhanga o vondadi ia Nzambi. O vondadi ia Nzambi, io sonekene mu Mikanda Ikola. Phaulu ua bhana o phangu ia akua Izalaiele, kioso Nzambi kia a bhulula ku Ijitu. Ene akexile ni kidielelu kia kuia mu “ixi i kunguluka lete ni uiki,” ia a kanene Nzambi, mueji nhoha ni kidi kioso.​—Makatukilu 3:8; Matendelelu 12:9, 10.

Kiene kia mesenene Nzambi. Maji mukonda dia kukamba kixikanu, o akua Izalaiele a ditunu o itendelesu ia Jihova. Mukonda dia kiki, athu avulu bhu kaxi kâ, ka bokona mu dinhohenu dia Nzambi. (Dialuilu 14:30; Josuué 14:6-10) Maji Phaulu ua zuela kuila, o ‘kikanenu kia kubokona mu dinhohenu dia Nzambi,’ kieji dikumbidila hanji. (Jihebeleu 3:16-19; 4:1) Sé phata, o ‘kikanenu’ kiki kia lungu ni vondadi ia Nzambi, io tange mu Bibidia. Kála kia bhangele o Jikidistá akua Jihebeleu, etu ué tu tena kutanga o vondadi ia Nzambi mu Bibidia, ni ku i kumbidila. Phala kulondekesa kuila, o kikanenu kiki, kiala mu Mikanda Ikola, Phaulu ua tumbula o izuelu mu divulu dia Dimatekenu 2:2 ni divulu dia Jisálamu 95:11.

Tu sanguluka mu kuijiia kuila, o ‘kikanenu kia kubokona mu dinhohenu dia Nzambi,’ kiala hanji ni valolo. Tua dielela ni muxima uoso kuila, o maka a zuela o Bibidia a lungu ni kubokona mu dinhohenu dia Nzambi, a-nda dikumbidila. Mukonda dia kiki, tuene mu bhanga nguzu phala kubokona-mu. Ki tuene mu bhanga kiki, mu kukaiela o Kitumu Kia Mozé, mba kubhanga ngó ima, phala ku tu xikina kua Jihova. Tuene mu kolokota mu kubhanga o vondadi ia Nzambi ni kisangusangu kioso, mukonda dia kixikanu kietu kua muéne. Athu avulu ku mundu, a mateka ué ku di longa o Bibidia, phala kuijiia o vondadi ia Nzambi. O kubhanga kiki, kuene mua kuatekesa kulungulula o ukexilu ua muenhu uâ, kukala ni kixikanu, ni ku di batizala. Sé phata, o ukexilu uâ, ulondekesa kuila, o ‘kizuelu kia Nzambi kima kia muenhu, kiala ni kutena.’ O maka a zuela Nzambi mu Bibidia a lungu ni vondadi iê, ene mu tu kuatekesa kiá kiavulu ku muenhu. Maji né kiki, o maka iá, a-nda suluka ni kulondekesa kutena ku muenhu uetu.