1. Ihi ia zuela Jihova kua Mozé? Mukonda diahi kima kiambote kuijiia o maka enhá?

SAI kizuua, Nzambi bhu kaxi ka kisuma ua zuela ni Mozé, ia lungu ni dijina Diê, ni idifua Iê. Jihova ka zuela kua Mozé ia lungu ni kutena ni unjimu uê. Mu veji dia kiki, ua zuela ia lungu ni henda iê. (Tanga Makatukilu 34:5-7.) Mozé ua mesenene kuijiia, se Jihova ueji mu kuatekesa. Mu kiki, Jihova ua zuela ia lungu ni kidifua kiki, phala kulondekesa kuila, muene ua mesenene kukuatekesa o jiselevende jê. (Makatukilu 33:13) Kiebhi ki u divua mu kuijiia kuila, Jihova ua mesena ku tu kuatekesa? Mu milongi íii, tua-nda dilonga ia lungu ni henda. O henda ilombolola, kutendela kiambote o hadi ia mu tala o muthu, ni kubhanga kima phala ku mu kuatekesa.

2, 3. (a) Ihi ilondekesa kuila, o athu a a vuala ni henda? (b) Mukonda diahi kima kiambote kudilonga o maka a lungu ni henda?

² Jihova ua bhange o athu mu kidifuanganu kiê. Muene mukua henda. Mukonda dia kiki, athu oso, né muene ió kene mu bheza Nzambi, alondekesa henda, a kuatekesa ue akuâ.  (Dimatekenu 1:27) Mu Bibidia, tu sanga-mu phangu javulu ja athu a londekesa henda. Mu kifika, sai kizuua, ahatu aiadi akexile mu zoka ia lungu ni kabuetele kamoxi. Phala kubatula o maka enhá, Solomá ua tumu ku uanuna o kabuetele mu kaxi. O manh’a kabuetele henda ia mu kuatele, muene ua diondele Solomá phala kuehela o muhatu uéngi kuambata o kabuetele. (1 Jisobha 3:23-27) O mon’a Falaó ua londekesele ue o henda. Sai kizuua muene uaile mu ngiji, anga ua sange-mu o kabuetele Mozé, muene uejidile kuila, o kabuetele uexile Hebeleu. Mukonda dia kiki, a tokalele ku mu jibha. Maji, muene ‘henda ia mu kuatele,’ anga u mu sasa kala mon’ê.​—Makatukilu 2:5, 6.

³ Mukonda diahi tua bhingi kudilonga dingi ia lungu ni henda? Mukonda Jihova ua mesena kuila, tu kaiela o phangu iê. (Efezo 5:1) Sumbala a tu bhange phala kulondekesa o henda, maji tu akua ituxi hanji, mukonda dia kiki, sai ithangana ki tu londekesa o henda. Sai bhabha, tu thandanganha dingi n’etu, mu veji dia kuthandanganha ni akuetu. Ihi i tena ku tu kuatekesa kulondekesa dingi o henda? Kia dianga, tua-nda mona kiebhi Jihova ni Jezú kia londekesa o henda. Kia kaiadi, tua-nda mona kiebhi ki tu tena kukaiela o henda ia Nzambi. Tua-nda mona ue se mukonda diahi kima kiambote kulondekesa o henda.

4. (a) Mukonda diahi Jihova ua tumikisa jianju mu mbanza ia Sodoma? (b) Ihi i tu longa o musoso ua muiji ua Lote?

⁴ Mu Bibidia muala misoso iavulu ilondekesa o henda ia Jihova. Mu kifika, xinganeka ia bhitile ni Lote. Lote uexile diiala dia iuka, muene uexile ni ‘kikote ku muxima’ mukonda dia usuéia ua athu a tungile mu mbanza ia Sodoma ni Ngomola. O athu enhó, kexile mu xila Nzambi, mukonda dia kiki Jihova ueji ku a buikisa. (2 Phetele 2:7, 8) Jihova ua tumikisine jianju phala kutangela Lote kuila, ueji buikisa o jimbanza ja Sodoma ni Ngomola, mu kiki, ene a tokalele kuxisa o mbanza. O Bibidia iamba: ‘Kuma Lote ua kexile mu laleka, jianju a mu kuata mu lukuaku, ni mu lukuaku lua muhatu’e, ni mu lukuaku lua an’e a ahatu, kuma Jihova ua a kuatela henda, anga a a bheka ku kanga dia kimbaka kia mbonge.’ (Dimatekenu 19:16) O musoso ua muiji ua Lote, u tu longa kuila, Jihova uejiia kiambote o hadi mba ibhidi iene mu bhita na-iu o jiselevende jê ja fiiele.​—Izaia 63:7-9; Tiiaku 5:11; 2 Phetele 2:9.

5. Kiebhi o Bibidia ki tu longa kulondekesa o henda?

⁵ Jihova u longa o mundu uê kulondekesa o henda. Xinganeka o kitumu kia bhanene ku akuâ Izalaiele. Se muthu ua tele dikongo, muene ua tokalele kubhana o divunga diê ku muthu uavuile o kitadi phala kulondekesa kuila ueji futa o dikongo. (Tanga Makatukilu 22:26, 27.) Maji ku ngoloxi, o muthu uavu o kitadi ua tokalele kuvutuka  phala kubhana o divunga kua ió ua mu di o dikongo, phala muene kukala ni kima kia ku divungina mu usuku. O muthu ua kambe o henda, nange keji xikina kubhana dingi o divunga ku muthu ua mu di o dikongo, maji Jihova ua longo o mundu uê kulondekesa o henda. O kitumu kiki, ki tu longa ihi? Ki tu tokala kutalesa hadi ku jiphange jetu. Mu veji dia kiki, tua tokala kubhanga ioso phala kukuatekesa akuetu a mu dibhana ni ibhidi.​—Kolose 3:12; Tiiaku 2:15, 16; tanga 1 Nzuá 3:17.

6. O henda ia londekesa Jihova ku akua Izalaiele i tu longa ihi?

⁶ Né muene kioso o akua izalaiele kiexile mu xibhaka, Jihova uexile mu a kuatela henda. O Bibidia izuela: “Jihova, Nzambi ia jitata jâ u a tumikisa o kizuelu kiê ku jiphunga jê. U di meneka muene mu ku a tumikisa na-kiu. Mbata jihenda ja mu kuata ja mundu uê ni ja dibhata diê.” (2 Malunda 36:15) Etu tua tokala ue kuzola o athu kejiia luua Jihova, mukonda ene a tena kudiela o ituxi, ni kukala makamba a Nzambi. Jihova ka mesena kuila, kufua muthu mu kithangana kia Alumajedone. (2 Phetele 3:9) Mukonda dia kiki, tua bhingi kuboka o njimbu iambote ku athu oso, ni ku a kuatekesa kukatula mbote ku henda ia Nzambi.

7, 8. Kiebhi o muiji ua Milan kiéza mu kuijiia kuila, Jihova ua a londekesa o henda?

⁷ Lelu, kuene ue ima iavulu ilondekesa kuila, Jihova Nzambi ia henda. Mu kifika, ku mivu 1990, ku ixi ia Bosnia, o athu akexile mu dikuata kiavulu. O muiji ua Milan ua tungile mu ixi ienhóio. Milan uexile hanji mona ndenge, muene uexile ngó ni 12 kia mivu. Milan ni phange iê, ni jitata jê, ni jiphange ja mukuá, akexile mu kuenda njila mu maximbombo phala kuia mu ixi ia Sérvia. Ene akexile muia ku kiônge kia dikota. O jitata ja Milan, eji ku a batizala mu kiônge kieniókio. Kioso kia bhixila ku kontrolo, o xiku dia ngoji uemanesa o dikalu, a tumina o muiji ua Milan kutuluka mukonda dia kikonda kiâ, anga a tumu akuâ kusuluka o njila. Ene a bhiti izuua iiadi, mu kididi kieniókio. Mu kusuka-ku, o kabhitangu ka masoladi ua xindila o xefe iê mu ku mu ibhuidisa se ihi ieji bhanga ni muiji uenhó. Kuma exile ku pholo dia kabhitangu, ene evu kiambote o kitambuijilu. O xefe ia kabhitangu ka masoladi uambe: “U a jibha!”

⁸ Kioso o kabhitangu kiexile mu zuela ni masoladi mê, kiiadi kia athu a zukama ku muiji ua Milan. Ene ambe kuila, exile ue Jimbangi ja Jihova, ni kuila o jiphange exile ku maximbombo a monene ioso ia kexile mu bhita. O maiala aiadi a tangela Milan ni phang’iê phala kusambela mu dikalu mukonda o xiku dia ngoji keji kua bhinga madukumendu. Ene a tangela o jitata ja Milan exi: “Enu ndenu ku hota, anga muenda katé ku sámbua, phala kubhixila ku ixi ia Sérvia.” Milan ua sangulukile, muene kejidile se ueji kuelela mba kudila. O jitata ebhula: “O kuila o masoladi iâ a-nda tuehela muene ku tunda bhabha?” Maji kioso kia mateka kuenda, kiedile kala o masoladi kexile mu a mona. Mu kiki, Milan ua di sange ni jitata jê ku ixi ia Sérvia, anga ai mu kiônge kia dikota. Ene a xikina ni kidi kioso kuila, Jihova ua tambuijila o musambu uâ! O misoso ia Bibidia ilondekesa kuila, sai  ithangana Jihova kene mu langa o jiselevende jê mu ukexilu iú. (Ikalakalu 7:58-60) Maji Milan uambe: “Ngi mona kuila, o jianju ja Jihova ja jikile o mesu a masoladi. Ngi xikina kuila, Jihova ua tu bhulula.​—Jisálamu 97:10.

9. Kiebhi Jezú kia divuile ia lungu ni athu akexile ku mu kaiela? (Tala o foto ia dianga.)

⁹ Jezú ua bhana phangu ia dikota ia lungu ni kulondekesa o henda. Muene ua kexile ni henda ia athu mukonda ene exile “kala jimbudi ja kambe mubidi.” Ihi ia bhange muene? Muene ua “kuata ku a longa ima iavulu.” (Matesu 9:36; tanga Marku 6:34.) Maji o ji Falizeu, kexile akuâ henda, ene ka mesenene kukuatekesa o athu. (Matesu 12:9-14; 23:4; Nzuá 7:49) O kuila u sota kulonga o athu a mesena kuijiia Jihova, kála kia bhangele Jezú?

10, 11. O kuila tua tokala kulondekesa henda mu ithangana ioso? Jimbulula.

¹⁰ Maji sai ithangana, ki tu tokala kulondekesa henda. Tala o musoso ua Sobha Saúlu. Jihova ua mu tangele phala kujibha o athu oso akua Amaleke, ni ibhaku iâ. Maji Saúlu ka jibha Akake, o sobha ia akua Amaleke, nguma ia Jihova. Muene ue ka jibha o ibhaku ioso. Nange Saulu ua banze kuila, ua kexile mu londekesa henda. Maji mu kidi, muene uexile mu bhukumukina o kitumu kia Jihova, mukonda dia kiki, Jihova ua mu ditunu kala Sobha ia kifuxi kia Izalaiele. (1 Samuuele 15:3, 9, 15.) Jihova mufundixi ua iuka, muene u tala o mixima ia athu. Mu kiki muene uejiia o kithangana kia tokala kia kulondekesa o henda. (Kuditenda 2:17; Izekiiele 5:11) Kua kambe ngó bhofele, muene ua-nda fundisa o athu oso kene ku mu belesela. (2 Tesalonika 1:6-10) Mu kithangana kienhókio, Jihova ka-nda kala ni henda ia athu aiibha. Mu veji dia kiki, muene ua-nda ku a buikisa, phala kulondekesa o henda iê ku athu a fiiele.

¹¹ Etu ki tuala ni kutena kua kusola o athu a-nda kua buikisa. Mu veji dia kiki, tua tokala kubhanga ioso, phala ku kuatekesa o athu. Maji kiebhi ki tu tena kulondekesa o henda ietu ku akuetu? Tua-nda dilonga jindunge ja-nda tu kuatekesa.

12. Kiebhi ki u tena kulondekesa henda ku akuenu?

¹² Kuatekesa akuenu izuua ioso. Jihova ua mesena kuila, o Jikidistá alondekesa henda ku jivizinhu ni jiphange jâ. (Nzuá 13:34, 35; 1 Phetele 3:8) O henda ilombolola ue “kutala hadi kumoxi.” O muthu u kala ni henda u mesena kukuatekesa o athu a mu tala hadi. Mu kiki, sota kithangana phala kukuatekesa akuenu, nange mu kua kuatekesa kubhanga kima ku bhata.​—Matesu 7:12.

13. Ihi iene mu bhanga o mundu ua Nzambi kioso ki bhita mavuua?

¹³ Kuatekesa o athu a bhiti ni mavuua. Kioso ki tu mona athu kutala hadi mukonda  dia divuua, tu a londekesa o henda. O Jimbangi ja Jihova a ejiia kiambote mu kukuatekesa o athu mu kithangana kia mavuua. (1 Phetele 2:17) Mu kifika, sai phange ia muhatu, ua tungile mu mbanza mua bhiti kitungutu mu ixi ia Japão, ku muvu 2011. Muene uambe: “Nga divuile kiambote mu kumona athu a tundu jixi jéngi ni ió a tundu mu jimbanza ja mukuá ja ixi ia Japão, kuiudika jinzo ni Ididi ia Ubhezelu.” Muene uambe dingi: “Kiki kia ngi kuatekesa kumona kuila, Jihova ni jiphange, a tu zolo kiavulu. Nga mono ue kuila, o jiphange ku mundu uoso akexile mu tu tumbula mu misambu iâ.”

14. Kiebhi ki u tena kuatekesa o jihaxi ni athu a kuka?

¹⁴ Kuatekesa o jihaxi ni adiakimi a kuka. Kioso ki tu mona athu a tala hadi mukonda dia uhaxi mba ku kuka, tu kala ni henda. Tua mu kinga o kithangana kia-nda suka o hadi iii, kiene ki tuene mu samba phala o Utuminu ua Nzambi uíze. Kioso ki tu ia ni kukinga, tu bhanga ioso i tu tena phala kukuatekesa o jihaxi ni adiakime a kuka kiá. Sai musoneki ua zuela ia lungu ni kithangana kioso manh’â kia kuatele uhaxi ua bhonzo, mu kukuka kuê. Muene uambe kuila, sai kizuua o manh’â ua di xidisa. Kia mateka ku di zelesa a phupu ku dibhitu diê. Kia jikula o dibhitu, ua mono ahatu aiadi, exile Jimbangi ja Jihova a kexile ku mu kunda. Ene a dibhakula phala ku mu kuatekesa. Muene uambe: “Ki kuatesa jisonhi, maji nga mi dióndo, ngi kuatekesie-nu muene.”  Mu kiki, o jiphange a mu kuatekesa ku dizelesa. Mu suluka, a bhange tu xá, ia a mateka kuzuela mudiâ. Mon’ê kia kívu, ua sakidila kiavulu iu uambe uixi: “O Jimbangi ja Jihova ji kumbidila ioso ia longa.” O kuila o henda ié ku jihaxi ni kua ió a kuka i ku bhangesa ku bhanga ioso i u tena phala kua a kuatekesa?​—Filipe 2:3, 4.

15. O sidivisu ia kuboka i kuatekesa kiebhi o athu?

¹⁵ Kuatekesa o athu kuijiia Jihova. O ukexilu ua beta-o-kota ua kuatekesa o athu, o kua longa ia lungu ni Nzambi ni Utuminu uê Ukexilu uengi, o kua kuatekesa kumona o mbote ijila mu kubelesela o itumu ia Jihova. (Izaia 48:17, 18) O sidivisu ia kuboka ukexilu uambote ua kubhana kijingu kua Jihova ni kulondekesa o henda kua akuetu. O kuila u tena kubhanga dingi mu sidivisu ia kuboka?​—1 Timote 2:3, 4.

16. Mbote iahi i tu katula kioso ki tu londekesa o henda?

¹⁶ O jidotolo jene mu zuela kuila, o kulondekesa o henda, kubhangesa kiambote ku mukutu, kukuatekesa ue o muthu kukala ni ukamba uambote ni akuâ. Kioso ki u kuatekesa akuenu a mu tala hadi, ua-nda sanguluka dingi, o kidielelu kia-nda kola, ki ua-nda divua ubheka, maji ua-nda kala ni ukexilu uambote ku muenhu. Sé-ku phata kuila, o kulondekesa o henda kua-nda ku bhekela mbote. (Efezo 4:31, 32) Kioso o henda ietu kia tu suinisa ku kuatekesa akuetu, tu kala ni kitongoluelu kia zele, mu kuijiia kuila, tua bhange o kima ki uabhela Jihova. O henda ia-nda tu kuatekesa kukala jitata jambote, makamba ambote, ni ahetu a kilunji. O muthu uala ni ukexilu ua kulondekesa o henda, a mu kuatela ue henda kioso kia bhindamena kikuatekesu.​—Tanga Matesu 5:7; Luka 6:38.

17. Mukonda diahi ua-ndala kulondekesa o henda?

¹⁷ Tua mono kuila, o kulondekesa o henda ku tu bhekela mbote, maji tu londekesa o henda mukonda tua mesena kukaiela o phangu ia Jihova ni ku mu ximana. Kiki, kiene o kima kia beta-o-kota. Muéne o phangu ia beta-o-kota ia henda. (Jisabhu 14:31) Muene ua tu bhana phangu ia iuka. Mukonda dia kiki, tua tokala kubhanga ioso, phala kulondekesa henda kála ki bhanga Nzambi. Mu kubhanga kiki, tua-nda kala ni ukamba uambote ni jiphange jetu, ni kudibhana kiambote ni athu a tu zukama.​—Ngalásia 6:10; 1 Nzuá 4:16.