1. Ihi i ku xikinisa kuila, o Mak’â Nzambi ala ni kutena? (Tala o foto ia dianga.)

O MUNDU ua Jihova uejiia kuila, o maka mê, o njimbu iê phala o athu, “kima kia muenhu, ki ala ni kutena.” (Jihebeleu 4:12) Tuene mu mona o kutena kua Bibidia ku muenhu uetu ni ku muenhu ua akuetu. Ande dia kukala Jimbangi ja Jihova, sai athu exile mii, exile mu kunua jidroga, mba exile jindumbu. A mukuá akexile ni fuma ku mundu, mba exile jimvuama. Maji né kiki, akexile mu divua kuila, kua kambele kima ku muenhu uâ. (Ndongixi 2:3-11) Tu sanguluka mu kuijiia kuila, sai athu kexile ni kidielelu ku muenhu uâ, lelu a zediua mukonda, ala kiá ni kidielelu. Mu Mulangidi tuene mu sanga-mu misoso ia athu, mu mbandu “O Bibidia i Lungulula o Ukexilu ua Athu.” Né muene kioso kia kituka Jikidistá, athu a tokala hanji ku di suinisa phala kukolesa dingi o ukamba uâ ni Jihova, bhu kaxi ka kikuatekesu kia Bibidia.

2. Mu hama ia dianga, kiebhi o kutena kua Mak’â Nzambi kua kuatekesa o athu?

² Mu kiki, ki tu diuana mu kumona kuila, athu avulu a  lungulula o ukexilu uâ, kioso kia dilonga o kidi kia Nzambi. O jiphange jetu ku hama ia dianga, exile Jikidistá a a undu, a lunguluile ue o ukexilu uâ. (Tanga 1 Kolindo 6:9-11.) Kioso Phaulu kia zuela ia lungu ni ió ka-nda bhingana ku Utuminu ua Nzambi, muene uambe dingi: “Enu amoxi-mu, kiene ki mua kexile.” O Mak’â Nzambi ni nzumbi ikola, ia a kuatekesa kulungulula o ukexilu uâ. Maji, né muene kioso kia kituka Jikidistá, sai mudiâ a tele kituxi kia dikota. Mukonda dia kiki, kexile dingi ni ukamba uambote ni Jihova. Mu kifika, o Bibidia iamba ia lungu ni phange a mu undile, a tokalele ku mu kaia mu kilunga. Mu kubhita thembu, muene ua lungulula o ukexilu, anga ua vutuka mu kilunga. (1 Kolindo 5:1-5; 2 Kolindo 2:5-8) Kima kiambote kuijiia kuila, o jiphange jene mu lungulula o ukexilu uâ, mukonda dia kutena kua Mak’â Nzambi.

3. Ihi i tua-nda dilonga mu milongi íii?

³ O Mak’â Nzambi ala ni kutena kua dikota. Kuma Jihova ua tu bhana nau, tua bhingi kubhanga ioso phala kukalakala kiambote nau. (2 Timote 2:15) O milongi íii, ia-nda zuela kiebhi ki tu tena kulondekesa o kutena kua Bibidia (1) ku muenhu uetu, (2) mu sidivisu ia kuboka, ni (3) kioso ki tu bhanga madiskursu mu iônge. O ima i tua-nda dilonga, ia-nda tu kuatekesa kulondekesa o henda ni kisakidilu kietu, kua Tat’etu ia diulu, ió u tu longa phala o mbote ietu.​—Izaia 48:17.

4. (a) Ihi i tu tena kubhanga phala o Mak’â Nzambi ku tu kuatekesa? (b) Kithangana kiahi eie u bhanga o kitangelu kié kia Bibidia?

⁴ Tua bhingi kutanga izuua ioso o Mak’â Nzambi, phala a tene kubhilula o ixinganeku ietu. Tu bhanga ioso phala ku a tanga mu kizuua ni kizuua. (Josuué 1:8) Tuala ni ikalakalu iavulu, kidi muene, maji ki tua tokala kuehela kima ku tu fidisa kutanga o Bibidia, né muene o salu ietu. (Tanga Efezo 5:15, 16.) O Bibidia tu tena ku i tanga mu kamene ka selu, ku tádidi mba mu usuku. Tu xikina mu izuelu ia mukua jisalamu, ua soneka uixi: “Ngonge ié ku ngi uabhela kuahi! Ngi i xinganeka kumbi dioso dia kambàmba.”​—Jisálamu 119:97.

5, 6. (a) Mukonda diahi tua bhingi kuxinganeka? (b) Kiebhi ki tu tena o kuxinganeka kioso ki tua mu tanga o Bibidia? (c) Kiebhi o kutanga ni kuxinganeka mu Bibidia ku tu kuatekesa?

⁵ Maji, o kutanga ngó o Bibidia ki ki soko. Tua bhingi kuxinganeka ni muxima uoso, mu ima tua dilongo. (Jisálamu 1:1-3) Kiene kiua ki tua-nda tena kukaiela o kuijiia kua Bibidia ku muenhu uetu. Mu ioso iii, kioso ki tu tanga o Bibidia né muene mu mutelembe, tua mesena kuila iene i bhixila muene ku muxima.

⁶ Kiebhi ki tu tena kuxinganeka mu Mak’â Nzambi? Kioso ki tu tanga o Bibidia, tua bhingi ku palala ka kithangana, phala ku dibhuidisa: Maka iá a ngi longa ihi ia lungu ni Jihova? Kiebhi ki ngi tena  kukumbidila ku muenhu uami? Ihi i nga bhingi kulungulula ku muenhu uami? Se tu xinganeka mu Mak’â Nzambi, ni kusamba mu ima ioso i tua dilongo, tua-nda i kumbidila ku muenhu uetu. Mu suluka, tua-nda mona o kutena kua Mak’â Nzambi ku muenhu uetu.​—2 Kolindo 10:4, 5.

7. Kiebhi ki tu tena kuboka kiambote ni Bibidia?

⁷ Kioso ki tu boka ni kulonga, tua bhingi kutanga o Bibidia. Sai phange uambe: “Se uexile mu boka ni Jihova nzo ni inzo, o kuila ueji zuela ithangana ioso sé-ku mu uehela o kuzuela?” Kioso ki tu tanga o Bibidia ni muthu, tua mu kuehela Jihova kuzuela n’ê. O izuelu ia Bibidia iala dingi ni kutena, o izuelu ietu ndenge. (1 Tesalonika 2:13) Kioso ki tu kala mu sidivisu ia kuboka, kima kiambote kutanga o Bibidia ithangana ioso.

8. Mukonda diahi tua bhingi kujimbulula kiambote o jivelusu ja Bibidia mu sidivisu ia kuboka?

⁸ Maji, ki ki soko kutanga velusu imoxi ni mukua dibhata. Athu avulu kejiia se mbote iebhi iala na-iu o Bibidia ku muenhu uâ. Kiki kia bhiti ku hama ia dianga. Mu izuua ietu tuene mu ki mona ue. (Loma 10:2) Ki tu tena kubanza kuila, o mukua dibhata ua tendela o velusu i tua tange. O mbandu i tua mesena kuila, o mukua dibhata u i tendela, tua bhingi ku i kujimbulula. Se tu bhanga kiki, tua-nda kua kuatekesa. Mu kiki, o Mak’â Nzambi a tena kutula ku mixima ia athu u tuene mua bokela.​—Tanga Luka 24:32.

9. Kiebhi ki tu tena kubhangesa o athu kuxila o Mak’â Nzambi ande dia ku a tanga? Bhana phangu.

⁹ O ima i tu zuela ande dia kutanga o Bibidia, i tena kukuatekesa o mukua dibhata kuxila o Bibidia. Mu kifika, tu tena kuzuela: “Tala ihi ia zuela o Mubhangi uetu ia lungu ni maka enhá.” Mba se tua mu zuela ni muthu ki Kidistá, tu tena kuzuela: “Tala ihi ia zuela o Mikanda Ikola.” Maji, se tu sanga muthu ka uabhela kuzuela ia lungu ni Nzambi, tu tena ku muibhudisa: “O kuila ua tangele kiá o izuelu íii i’okulu?” Se tu lembalala kuila, kala muthu uala ni ixinganeku iê, tua-nda bhanga ioso i tu tena phala kupelepalala kiambote o izuelu ietu ia kumateka.​—1 Kolindo 9:22, 23.

10. (a) Ihi ia bhiti ni phange imoxi? (b) Kiebhi ki uene mu mona o kutena kua Mak’â Nzambi mu sidivisu ia kuboka?

¹⁰ Aboki avulu a mono kuila, kioso ki tu tanga o Bibidia ni athu mu sidivisu ia kuboka, tu tena kukatula mbote javulu. Mu kifika, sai phange ua kundu muadiakimi uene mu tanga kiá madivulu metu mu mivu iavulu. Sai kizuua, mu veji dia kubhana ngó o Mulangidi, o phange ietu ua tange n’ê velusu imoxi mu Bibidia. Phang’ietu ua tange o divulu dia 2 Kolindo 1:3, 4, diamba: “Tata ia jihenda, Nzambi ió athu oso kuene mú tambula o dikuatekesu . . . mukua ku tu kuatekesa mu hadi ietu ioso.” O izuelu íii, ia tula ku muxima ua  muadiakimi, muene ua bhingi ku muboki phala kutanga dingi o velusu. Mu kiki, o muadiakimi ua zuela kuila, muene ni muhatu uê a bhingile kua konda o malamba. Mukonda dia velusu íii, muene ua mesenene kuijiia dingi ia lungu ni Bibidia. Kutanga o Bibidia mu sidivisu ia kuboka, kikuatekesu kia dikota!​—Ikalakalu 19:20.

11. Kikalakalu kiahi kiala na-kiu o jiphange jene mu bhanga madiskursu?

¹¹ Tua uabhela kiavulu kuia mu iônge mu kilunga, ni mu iônge ia makota. Kubheza Jihova, kiene ki tu bhangesa kuiza mu iônge iii. Tuene mu katula mbote mu ima i tu dilonga. Mukonda dia kiki, o jiphange a bhanga o madiskursu, ala ni ujitu ni kikalakalu kia dikota. (Tiiaku 3:1) Ioso ia longa ia bhingi i tunda mu Bibidia. Se uene mu bhanga kiá madiskursu, kiebhi ki u tena ku bhixidisa o maka a Nzambi mu mixima ia jingivuidi jé?

12. Kiebhi o mulongexi kia tena kulondekesa kuila, o ima ia mu zuela ia tundu mu Bibidia?

¹² Mu madiskursu oso, o Bibidia iene ia tokala ku kala ku pholo. (Nzuá 7:16) Mu kiki, kua bhingi ku dilanga, mu ukexilu ua ku bhanga o madiskursu, ni ku bhanga ifika, phala ki u di fumanese eie, maji o Bibidia iene ia tokala ku kala ku pholo. Lembalala  kuila, kutanga iala mu Bibidia, ki kiene kimoxi ni kulonga iala mu Bibidia. Mu kidi, se u tanga jivelusu javulu, jiphange ka-nda tena ku lembalala joso. Mu kiki-phe, sola kiambote o jivelusu ji ua mesena kutanga. Xisa ue kithangana phala ku ji jimbulula, ni ku londekesa o mbote iê. (Nehemiia 8:8) Se u tambula diskursu, u di pelepalala kiambote, tokuesa ue kiambote o ji velusu ji ua-nda tanga. Sota kuijiia kiebhi o ji velusu mu mukanda ja lungu ni diambu dia diskursu. Mu suluka, lombolola o disukilu dia diskursu bhu kaxi ka jivelusu ji ua dilongo. (U sanga itendelesu iambote mu divulu Beneficie-se da Escola do Ministério Teocrático, mu milongi ia 21 ndu 23.) O kia beta kota, bhinga kikuatekesu kua Jihova, phala u tene ku longa o ibanzelu ié iala mu Bibidia.​—Tanga Ejidala 7:10; Jisabhu 3:13, 14.

13. (a) Ihi ia bhange phange ia muhatu kioso kiévu o kitangelu kia velusu ia Bibidia? (b) Kiebhi ki uene mu katula mbote mu iônge, kioso ki uívua o kitangelu kia Bibidia?

¹³ Sai phange ku ixi ia Austrália, mu undenge uê, ua tale hadi iavulu. Né muene kioso kia dilongo o kidi, kia mu bhonzele hanji ku xikina kuila Jihova ua mu zolele. Sai kizuua, uevu velusu ia Bibidia mu kiônge ia mu bhixila muene ku muxima. Muene ua xinganeka mu velusu iii, anga u tokuesa. Mu ku tokuesa ua sange ji velusu ja mukuá ja Bibidia ja mu kuatekesa kiavulu.  Mu kiki, kexile dingi ni phata ia kuila Jihova ua mu zolo. * (Tala ku luiji.) O kuila sai kizuua uevu ki lomboluelu kia velusu, ki kale mu kiônge mu kilunga mba kiônge kia dikota, kia ku bhixila ue ku muxima?​—Nehemiia 8:12.

14. Kiebhi ki tu tena kulondekesa kuila, tu zola ni kubhana valolo ku Mak’â Jihova?

¹⁴ Tu sakidila kiavulu Jihova mu ku tu bhana o Mak’a mê, o Bibidia. Muene ua kanena kuila o Mak’a mê eji xalela-ku, iu ua ki kumbidila. (1 Phetele 1:24, 25) Mu ioso iii, tua mesena ku tanga o Bibidia izuua ioso, sé kufula, ku kumbidila ioso i tu dilonga ku muenhu uetu, ni ku kuatekesa akuetu. Kioso ki tu ia ni ku bhanga kiki, tua mu londekesa kuila tua zolo o Bibidia ni kuila tu i bhana valolo. Tu londekesa ue kuila, tua zolo Jihova Nzambi, ua tu bhana-iu.