1, 2. (a) Kiebhi kieji kala o muenhu uetu sé Nzambi ka tu bhanene o Bibidia? (b) Ihi i tu kuatekesa kukatula mbote ku Mak’â Nzambi?

KIEBHI kieji kala o muenhu ué se ki bhu kexile Bibidia? Eie ki ueji kala ni kuijiia kua kubatula o maka ni unjimu. Ki ueji kuijiia o kidi kia lungu ni Nzambi, muenhu, mba o ima ia-nda bhita ku hádia. Ki ueji kuijiia ue o ima ia bhangele Jihova phala kukuatekesa o jiselevende jê m’ukulu.

² Tu sanguluka kiavulu, mukonda ki tua mu dibhana ni maka iá. Jihova ua tu bhana o Maka mê, o Bibidia. Muene ua kanena kuila, o njimbu ia Bibidia ia-nda kalela-ku katé ku hádia ni hádia. Poxolo Phetele ua tumbula o izuelu i tu sanga mu divulu dia Izaia 40:8. Sumbala o jivelusu jiji, ji zuela ia lungu ni njimbu ia Nzambi phala o athu, maji tu zuela kuila, ia lungu ue ni Bibidia. (Tanga 1 Phetele 1:24, 25.) Tu katula dingi mbote mu kitangelu kia Bibidia, kioso ki tu i tanga mu dimi di tuejiia kiambote. O athu a zolo o Mak’â Nzambi, ejiia kuila, kiki kidi muene. Mu mivu iavulu, sai athu a bhange ioso phala kulungulula o Bibidia mu madimi  avulu, ni ku ji bhana ku athu, né muene ni ibhidi mba izukutisu iavulu. Jihova ua mesena kuila, “athu oso a bhuluke, eze mu kuijiia o kidi.”​—1 Timote 2:3, 4.

3. Ihi i tua-nda dilonga mu milongi íii? (Tala o foto ia dianga.)

³ Mu milongi iii, tua-nda dilonga kiebhi o Bibidia ki ia xalela-ku, né muene (1) kioso o ukexilu ua kuzuela ua lunguluka, (2) kioso o athu kia mateka o kuzuela dimi diéngi ni (3) kioso o athu kia fidisa kulungulula o Bibidia mu madimi engi. O milongi iii, ia-nda tu kuatekesa kiebhi? Ia-nda tu kuatekesa kubhana dingi valolo mu Bibidia, ni kuzola dingi Jihova mu ku tu bhana o ujitu iú.​—Mikeia 4:2; Loma 15:4.

4. (a) Kiebhi o ukexilu ua madimi kiene mu lunguluka? (b) Kiebhi ki tuejiia kuila, Nzambi ua uabhela madimi moso? Kiebhi ki u divua mu kuijiia o maka enhá?

⁴ Kioso ki bhita mivu, o ukexilu ua kuzuela u lunguluka ue. O ima i tu zuela lelu, i tena kulombolola kima kiéngi ku hádia. O kuila u tena kulembalala kiebhi o dimi dié dia uvualukilu dia lunguluka? Kiki kia bhiti ue ni madimi a xahulu. O dimi dia Hebalaiku ni dia Ngeleku dia kexile mu zuela o athu m’ukulu, ki diene dimoxi dia izuua ietu. Kuma lelu, athu avulu kejiia o dimi dia Hebalaiku ni dia Ngeleku, kua bhingile kulungulula o Bibidia mu madimi a mukuá. Sai athu a banza kuila, a bhingi kuijiia o dimi dia Hebalaiku ni dia Ngeleku diokulu phala kutendela kiambote o Bibidia. Maji, nange ki kia-nda ku a kuatekesa kala kiene mu banza. * (Tala ku luiji.) Tu sanguluka kiavulu mu kuijiia kuila, o Bibidia io lungulule kiá mu 3.000 ja madimi ndenge. Jihova muéne ua mesena kuila, “ku ifuxi ioso, ni madimi” moso athu eza mu kuijiia o kidi kia Maka mê. (Tanga Dijingunuinu 14:6.) Sé phata, o kuijiia o maka enhá ku tu zukamesa dingi kua Jihova, o Nzambi ia jihenda, kene ni kathombo mba katungu.​—Ikalakalu 10:34.

5. Mukonda diahi o Bibidia Versão Rei Jaime iala ni valolo?

⁵ Kuma o madimi a lunguluka, mu kubhita thembu nange o athu ka tendela o izuelu i’okulu. Mu kifika, tala o ima ia bhiti ni Bibidia a ixana Versão Rei Jaime, a i bhange ku muvu ua 1611. O Bibidia íii, ia kuatekesa kiavulu o dimi dia Kingileji. * (Tala ku luiji.) Maji, o dijina dia Jihova di moneka luofele mu Bibidia íii. Mu ididi iavulu ia Mikanda ia Hebalaiku mua kexile o dijina dia Nzambi, mu Bibidia íii i moneka o kizuelu “NGANA” ni isoneku ia makota. Mu kubhita mivu, Jibibidia ja mukuá, ja soneka o kizuelu “NGANA” ni isoneku ia makota, mu jivelusu ja Mikanda ia Ngeleku. Mu kiki, o alunguludi a Bibidia Versão Rei Jaime ejidile kuila, o dijina dia Nzambi di moneka  ue mu Mikanda a beta mu ku ijiia kala Kikutu Kiobhe.

6. Mukonda diahi tu bhana valolo ku Bibidia Tradução do Novo Mundo?

⁶ Kioso o Bibidia Versão Rei Jaime kia moneka, o athu ejidile kiambote o ukexilu ua izuelu ia kexile-mu. Maji mu kubhita thembu, sai izuelu ioio, athu kexile mu i tumbula dingi, mukonda dia kiki, lelu athu kene mu i tendela dingi. Kiki kia bhiti ue ni Jibibidia ja mukuá a ji lungulula mu madimi engi. Tuala ni ujitu ua dikota, ua kukala ni Bibidia a ixana Tradução do Novo Mundo da Bíblia Sagrada, mukonda a isoneka mu ukexilu u tu tena kutendela kiambote. O Bibidia íii, a i lungulula mu 150 a madimi ndenge. Kiki kilombolola kuila, o athu a tena kiá kutanga o Bibidia mu madimi mâ a uvualukilu. O ukexilu ni izuelu i tu sanga mu Bibidia íii, i tu kuatekesa kutendela kiambote o njimbu ia Bibidia, kubhangesa o maka kutula ku muxima uetu. (Jisálamu 119:97) O kima kia beta-o-kota, o Bibidia Tradução do Novo Mundo i tumbula o dijina dia Nzambi mu ididi ioso ia kexile-mu, mu Mikanda iókulu.

7, 8. (a) Mukonda diahi Jijudé javulu ku hama jitatu ja mivu ande dia Kristu, ka tenene kutendela o Mikanda mu dimi dia Hebalaiku? (b) O Bibidia a ixana Septuaginta grega ihi?

⁷ O ibhangelu ia jinguvulu, i fuinhisa ue o madimi. Maji Jihova uene mu bhangesa kuila, o athu a tanga o Bibidia mu madimi mâ. Mu kifika, o 39 a madivulu a dianga a Bibidia, a a soneka ku maiala exile Jijudé. Ene exile ni kikalakalu kia ‘kubhaka o Njimbu ia Nzambi.’ (Loma 3:1, 2) Ene a sonekene o madivulu mu dimi dia Hebalaiku ni Alamaiku. Maji hama jitatu ja mivu ande dia Kristu, Jijudé javulu kexile mu tendela dingi kiambote o dimi dia Hebalaiku. Mukonda diahi? Kioso Xandele dia Dikota kia tolola jixi javulu, o Utuminu ua akuâ Ngeleku ua di sanzumuna. Mukonda dia kiki, mu jixi javulu, o athu akexile mu zuela dingi o dimi dia Ngeleku, mu veji dia kuzuela o madimi mâ a uvualukilu. (Daniiele 8:5-7, 20, 21) Katé muene Jijudé javulu kexile mu tendela kiambote o Bibidia mu dimi dia Hebalaiku. Mu kiki, ihi ia bhange?

⁸ Mu 250 a mivu ande dia Jezú, a lungulula o madivulu atanu a dianga a Bibidia mu dimi dia Ngeleku. Mu kubhita thembu, o madivulu a mukuá exile mu dimi dia Hebalaiku, a a lungulula ue mu dimi dia Ngeleku. O mikanda iii, a iixanene Septuaginta grega. Iene o madivulu a diangele ku i katula mu dimi dia Hebalaiku, phala ku i lungulula mu dimi dia Ngeleku.

9. (a) Kiebhi o Septuaginta grega ni Jibibidia ja mukuá ja bhangesa o athu kutanga o Mak’â Nzambi? (b) Mbandu iebhi ia Bibidia i ua uabhela dingi?

⁹ O mikanda ia Septuaginta grega, ia kuatekesa o Jijudé ni athu amukuá a zuelele o dimi dia Ngeleku, kutendela o Mikanda ia Hebalaiku mba kikutu kiokulu. Xinganeka o kisangusangu kiâ mu kutanga o Mak’â Nzambi mu dimi diâ dia uvualukilu! Mu kubhita thembu, o madivulu a Bibidia a a lungulula mu madimi a mukuá, kala o madimi a Siríaco, o Gótico ni Latim. Mu kiki athu avulu akexile mu tanga o Mak’â Nzambi ni ku a tendela kiambote ni kuzola o milongi ia Bibidia. Tuejiia  kuila, sai madivulu a i uabhelele dingi, kala etu lelu. (Tanga Jisálamu 119:162-165.) Né muene ni ibhangelu ia jinguvulu, ni kulunguluka kua madimi, o Mak’â Nzambi a xalela katé mu izuua ietu.

10. Mu izuua ia John Wycliffe, mukonda diahi o athu ka tenene kutanga o Bibidia?

¹⁰ Mu kubhita mivu iavulu, atuameni a jingeleja a fidisile o athu kutanga o Bibidia. Maji, o maiala a zolele o Mak’â Nzambi, a kolokotele kuuanena o Bibidia ku athu. Mu kifika sai diiala a mu ixanene John Wycliffe, ua tungile mu ixi ia Inglaterra ku mivu ia 1300. Muene ua mesenene kuila, athu oso a tanga o Bibidia. Mu izuua iê, athu avulu mu ixi ia Inglaterra, kexile mu tanga o Mak’â Nzambi mu dimi diâ dia uvualukilu. Mukonda diahi? Mukonda o Bibidia ia tele kalu. A tokalele ku i soneka ni maku. Mu kiki, athu ofele ngó akexile ni Bibidia. Mu ithangana ienióio, athu avulu kejidile ue kutanga. O athu akexile muia mu jingeleja, akexile mu kuívua ngó o njimbu ia Bibidia mu dimi dia Latim. Maji, athu avulu kexile mu tendela dingi o dimi didi. Mu kiki, ihi ia bhange Jihova phala kubhangesa o athu kutanga o Bibidia mu madimi mâ a uvualukilu?​—Jisabhu 2:1-5.

11. Kiebhi o Bibidia ia lungulula Wycliffe ia kuatekesa o athu?

¹¹ Ku muvu ua 1382, John Wycliffe ni athu amukuá a lungulula o Bibidia mu dimi dia Kingileji. O Bibidia ia Wycliffe a ijidile kiambote ku akaiedi’ê. O athu iâ a zolele kiavulu o Bibidia. Ene akexile mu kuendela bhoxi, sanzala ni sanzala mu ixi ia Inglaterra. O akaiedi a Wycliffe akexile mu tula o njimbu ia Bibidia ku athu ni ku a bhana jimbandu ja ji kópia ja Bibidia. O ikalakalu iâ ia bhangesa o athu kuijiia dingi o Bibidia.

12. Kiebhi o atuameni a jingeleja kia divu ni kikalakalu kia Wycliffe?

¹² O atuameni a jingeleja a zembele kiavulu o Bibidia ia Wycliffe, ni akaiedi’ê. Ene a zukutisile o akaiedi’ê, akexile mu kuoha o Jibibidia joso ja Wycliffe ja kexile mu sanga. Né muene kioso Wycliffe kia fuile kiá  ukulu, o atuameni a ngeleja a mu kiti kala muxibhaki mba nguma ia Ngeleja ia Katólika. Ene ai mu kanda o mbila mua mu fundile, a katula o ifuba iê, a i oha, anga a takula o utokua mu ngiji a ixana Swift. Maji né kiki, athu avulu a mesenene kutanga ni kutendela o Mak’â Nzambi. O atuameni a ngeleja ka tenene dingi kufidisa o athu. Mu kubhita mivu, o athu ku Europa ni ku jimbandu jéngi ku mundu, a mateka kulungulula o Bibidia mu madimi engi, ni kubhana ku athu, n’a tene ku i tendela.

13. Ihi i tua tokala o kuijiia? Kiebhi o kuijiia o maka enhá kia suinisa dingi o kixikanu kietu?

¹³ O Bibidia a i bhusu kuala Nzambi. Maji kiki, ki kilombolola kuila muene ua bhusu o maiala a lungulula o Bibidia Septuaginta, ia Wycliffe, Versão Rei Jaime, mba Bibidia ioso-ioso io lungulule ku pholo. Kioso ki tu tonginina o kikalakalu kia kulungulula o Bibidia, tu tendela kuila, o kikanenu kia Nzambi,kia kuila o Maka mê a nangenena ku hádia ni hádia, kia dikumbidila. Kuijiia o kidi kiki, ki tu bhangesa kudielela kuila, ioso ia kanena Nzambi, ku pholo ia-nda di kumbidila.​—Josuué 23:14.

14. Kiebhi o ima ioso i tua dilongo mu milongi íii ia lungu ni Bibidia, i bandekesa o henda ietu kua Nzambi?

¹⁴ Kioso ki tu dilonga kiebhi Jihova kia lange o Maka mê, o kixikanu kietu ki dibandekesa dingi. * (Tala ku luiji.) Ihi ia bhangesa Jihova ku tu bhana divulu diala ni njimbu iii ionene? Mukonda diahi ua bhange ioso phala ku i langa? Jihova ua bhange kiki mukonda ua tu zolo, iu ua mesena o mbote ietu. (Tanga Izaia 48:17, 18.) Mu kuijiia o henda iê ko kuetu, tu zola dingi Jihova, tu mesena ku mu belesela ni muxima uoso.​—1 Nzuá 4:19; 5:3.

15. Ihi i tua-nda dilonga mu milongi ia-nda kaiela?

¹⁵ Tua zolo kiavulu o Mak’â Nzambi, mu kiki, kiebhi ki tu tena kukatula dingi mbote mu kitangelu kietu kia Bibidia? Kiebhi ki tu kuatekesa ió u tu sanga mu sidivisu ia kuboka, kuuabhela ue o Bibidia? Kiebhi o alongexi mu kilunga kia londekesa kuila, ioso ia longa ia tundu mu Bibidia? Tua-nda dilonga o ibhuidisu iii, mu milongi ia-nda kaiela.