1, 2. (a) Ihi i tena kubhita se muthu ka tena kuditumina o jihânji? (b) Mukonda diahi tua bhingi kuijiia o maka a lungu ni kuditumina o jihânji, benge-benge mu izuua ietu?

JIHOVA u tena ku tu kuatekesa kukala ni kidifua kia kuditumina o jihânji. (Ngalásia 5:22, 23) Jihova u londekesa o kidifua kiki, mu ukexilu ua iuka, maji etu ki tu tena ku ki londekesa mu ukexilu iú, mukonda tu akuâ ituxi. O kukamba ku di tumina jihânji, ku tena ku bhekesa maka avulu ku muthu. Mukonda dia kukamba kuditumina mba kulanga o jihânji, athu avulu a lembua kubhanga o ima ia beta-o-kota ku muenhu uâ, a mukuá ka ditundu kiambote mu xikola, mba nange a kala ni maka avulu ku salu. Kukamba kuditumina jihânji, kuene mu bhangesa ue o athu kubhanga o usuéia, ku di ta mu uhôlua, kuxinga akuâ, ku di senga, ku di ta mu makongo avulu, ku a ta mu kangolonda, ni kuimita mu undenge, ni kukala ni mauhaxi a bhonzo.​—Jisálamu 34:11-14.

² O athu ka ditumina mba ka langa o jihânji jâ, a di bhekela maka. Ene a thandanganhesa ue akuâ. Lelu tuene mu mona athu avulu kala ni ukexilu ua kuditumina o jihânji. Maji ki tu bhingi kudiuana mu kumona o ima iii, mukonda o  Mak’â Nzambi a tu tangela kuila mu “izuua isukidila-ku” o athu keji kala ni ukexilu iú.​—2 Timote 3:1-3.

3. Mukonda diahi tua bhingi kuditumina o jihânji?

³ Mukonda diahi tua bhingi kulanga mba kuditumina o jihânji? Mukonda dia ima iiadi. Kia dianga, o muthu u ditumina o jihânji, ka kala ni maka avulu ku muenhu. O muthu uala ni ukexilu iú, u dibhana kiambote ni akuâ, ka kala ni njinda, hele mba kikote. Kia kaiadi, phala kukala Kamba dia Nzambi, tua tokala kulenga o jitendasá ni kutolola o jihânji jetu jaiibha. Adá ni Eva ka bhange kiki. (Dimatekenu 3:6) Kala kia bhitile ni ene, lelu athu avulu ala ni ibhidi ku muenhu, mukonda dia kukamba kulanga o jihânji jâ.

4. Kiebhi kuijiia kuila, Jihova ua tuijiia kiambote, kia tena kukuatekesa o muthu ua mesena kutolola o jihânji jaiibha?

⁴ Jihova uejiia kuila, tu akuâ ituxi, ni kuila, sai ithangana, ki tu bhonza kuditumina o jihânji. Maji muene u tu kuatekesa. (1 Jisobha 8:46-50) Kuma muene Dikamba dia henda, u suinisa o athu ka tena kulanga jihânji ni ibanzelu iâ. Mu milongi iii, tua-nda dilonga kiebhi Jihova kia dibhana ni maka. Tua-nda mona ue o phangu iambote ia jiselevende ja Nzambi ja kexile ni ukexilu ua kuditumina o jihânji. Tua-nda mona ue o ima ia bhiti ni ió a kambele kulondekesa o kidifua kiki.

5, 6. Kiebhi Jihova kia batula o maka a lungu ni kulokalala kua Satanaji?

⁵ O ukexilu ua Jihova ua kudibhana ni maka, ua iuka, mukonda muene ue muthu ua iuka. (Matendelelu 32:4) Maji, etu tu akua ituxi. Né kiki, tua bhingi kusuluka kudilonga o phangu ia Jihova ia kudibhana ni maka, ni ku mu kaiela. Se tu bhanga kiki, tua-nda kuijiia ihi i tu tena o kubhanga kioso ki tu bhita ni ima i tu luualesa. Tu mone kiebhi Jihova kia di bhanene kiambote ni maka.

⁶ Xinganeka ihi ia bhange Jihova kioso Satanaji kia mu xonguene mu jaludim ia Edene. O kulokalala kua Satanaji, kua bhangesa o jianju ja Jihova kukala ni njinda. Nange kioso ki u banza mu hadi iene mu bheka Satanaji, kiene ue ki u divua. Maji Jihova njinda ki ia mu kuatele. Muene ua di bhanene kiambote ni maka enhó. Jihova ua kokolokele mu kuthathamana, iú ua bhana kithangana. (Makatukilu 34:6; Jobe 2:2-6) Mukonda diahi? Mukonda Jihova ka mesena kuila, kufua muthu, né ngó umoxi, maji ua mesena kuma, athu oso eza mu kudiela.​—2 Phetele 3:9.

7. Ihi i tu longa o phangu ia Jihova?

⁷ O phangu ia Jihova i tu longa kuila, ande dia kuzuela mba kubhanga kima kioso-kioso, tua tokala kuxinganeka. Mu kiki, ande dia kusola kima, xinganeka hanji. Samba kua Jihova, mu bhinge unjimu phala kuzuela mba kubhanga o kima kia tokala. (Jisálamu 141:3) Kioso ki tu luuala mba tu kala ni njinda, ki ki bhonzo kubhanga ima  iaiibha. Mukonda dia kiki, athu avulu a diela kioso kia xinganeka mu ima ia zuela mba ia bhange.​—Jisabhu 14:29; 15:28; 19:2.

8. (a) Kuebhi ku tu tena kusanga phangu jambote ja athu a di tumine o jihânji? (b) Ihi ia kuatekesa Zuze kulenga o muhatu ua Potifale? (Tala o foto ia dianga.)

⁸ Phangu iebhi i tu sanga mu Bibidia, ilondekesa o valolo ia kuditumina mba kulanga o jihânji jetu? Tala o phangu ia mon’a Jakobo, a mu ixanene Zuze. Kioso kia kexile mu sidivila kubhata dia Potifale, o kabhitangu ka masoladi a Falaó, muene ua lengele o tendasá. O muhatu ua Potifale, ua mesenene kuzeka ni Zuze mukonda ua muene kuila, Zuze uexile “muthu ua uabha o pholo ni mukutu.” Ihi ia kuatekesa Zuze kulenga o tendasá? Nange muene ua xinganeka mu ibhidi ijila mu kuta o kituxi. Mukonda dia kiki, kioso o muhatu kia mu sungu, muene ua lenge. Zuze uambe: “Ngi tena kiebhi kubhanga kuiibha kuos’uku ni kuta kituxi kua Nzambi?”​—Dimatekenu 39:6, 9; tanga Jisabhu 1:10.

9. Ihi i u tena kubhanga phala kulenga o jitendasá?

⁹ O phangu ia Zuze i tu longa ihi? I tu longa kudituna o jitendasá ji tena ku tu bhangesa kuxibhaka Nzambi. Sai athu ande dia kukala Jimbangi ja Jihova exile jihôlua, akua jimvunda, akua kubuakula makanha ni jidroga, mba jindumbu. Sai bhabha, né muene kioso kia a batizala, a dibhana hanji ni jitendasá jiji. Se uene mu dibhana ni maka enhá, xinganeka kiebhi kia-nda kala o ukamba ué ni Jihova, se u mu xibhaka mu kubhanga dingi o ima iii iaiibha. Eie u tena kubanza mu ima i tena ku kubhangesa ku di ta mu ima iii, ni kubhanga ioso phala kulenga o kiluezu. (Jisálamu 26:4, 5; Jisabhu 22:3) Kioso ki u dibhana ni tendasá, samba kua Nzambi, bhinga kua Jihova phala ku ku kuatekesa kulanga mba kutolola o jihânji jé.

10, 11. (a) Tendasá iebhi iene mu bhita na-iu o minzangala mu xikola? (b) Ihi i tena kukuatekesa o minzangala kudituna o jitendasá?

¹⁰ O ia bhiti ni Zuze, iene mu bhita ue ni minzangala iavulu a mu sidivila Jihova lelu. Tu mone ia bhiti ni kilumba a mu ixana Kimberly. O jikoleka jê ja kexile ni ukexilu ua kubhanga undumbu ku disukilu dia semana. Kia Sekunda a kala mu zuela ia lungu ni ima ia bhangele ku disukilu dia semana. Kuma kexile mu bhanga o ima ienióio, Kimberly kexile ni ima ia kuzuela. Muene uambe kuila, ua kexile mu “divua ubheka.” O jikoleka jê a kexile mu mu xonguena mukonda dia kukamba saí. Maji muene ua mono kuila, uexile unjimu kudituna o ima ienioió. Kimberly uejidile kuila, o jihânji ja kubhanga o undumbu, ji vula dingi mu unzangala. (2 Timote 2:22) Kioso o jikoleka, kia kexile ku mu ibhuidisa, se uexile hanji muzeletete, muene ua kexile mu a jimbulula se mukonda diahi uexile hanji muzeletete. Tu sanguluka kiavulu mu kumona o minzangala kudituna o jitendasá ja  kubhanga o undumbu. Jihova u sanguluka ue kiavulu!

¹¹ O Bibidia i tu tangela ue ia lungu ni athu, abu ku mubhetu ua undumbu. Iene ilondekesa ue o ibhidi ijila mu kukamba kutolola o jihânji jetu jaiibha. Se ua mu dibhana ni maka a difu ni a Kimberly, xinganeka mu phangu ia munzangala ua kambele kilunji, a mu tange mu divulu dia Jisabhu 7. Xinganeka ue mu phangu ia Aminone ni mu ibhidi iejila mu ku xibhaka kuâ. (2 Samuuele 13:1, 2, 10-15, 28-32) O jitata a tena ku kuatekesa o tuana tuâ kuditumina jihânji, mu ku dilonga o misoso iii, mu kizuua kia ubhezelu ku muiji.

12. (a) Mukonda diahi Zuze ka di londekesa kioso kiexile bhu pholo ia jiphange jê kumoxi ni athu éngi? (b) Mu ithangana iebhi, tua tokala kulanga o jihânji jetu?

¹² Mu kithangana kia mukuá, Zuze ua lange dingi o jihânji jê. Kia bhiti kioso o jiphange jê, endele mu ixi ia Ijitu kusumba kudia. Kuma ua mesenene kuijiia se a lunguluile o ukexilu uâ, Zuze ka a tangela kuila uexile phangi’â. Kioso kia mesenene kudila, muene ua tundu bhu pholo ia jiphange jê, iú uai ku hota phala kudila. (Dimatekenu 43:30, 31; 45:1) Se phange u tu luualesa, kukaiela o phangu ia Zuze, kua-nda tu kuatekesa kukamba kuzuela, mba kubhanga kima ki tena ku tu bhangesa kudiela. (Jisabhu 16:32; 17:27) Mba nange eie uala ni ndandu a mu kaie mu kilunga. Se kiki kia mu bhita n’eie, ua bhingi kulanga kiambote jihânji jé, phala ku dilunge ni muthu muenhú. Kiki ki bhonza muene. Maji o kulembalala kuila, ua mu kaiela o phangu ia Jihova, ni kubelesela o itumu iê, ku tena ku kubhangesa kulenga o jitendasá.

13. Ima iahi i tu longa o musoso ua Sobha Davidi?

¹³ Tu katula ue phangu ku musoso ua Sobha Davidi. Kioso Saúlu ni Simei kia mu bhangele ima iaiibha, Davidi kexile ni njinda. Muene ka soto ue ndunge phala ku a jibha. (1 Samuuele 26:9-11; 2 Samuuele 16:5-10) Maji, Davidi ka tumine o jihânji mu ithangana ioso. Tuejiia kiki, mukonda dia kituxi kia tele ni Bate-Seba ni kioso kia mesenene kujibha Nabale mukonda dia kixonguenu kiê. (1 Samuuele 25:10-13; 2 Samuuele 11:2-4) Tu tena kudilonga ima iavulu ku musoso ua Davidi. Kia dianga, o tufunga mba athu ala ku pholo mu kilunga kia Nzambi, a bhingi kulanga kiambote o jihânji ni ibanzelu iâ. Kia kaiiadi, sé-ku muthu ua tokala kudizangeleka ni kubanza kuila, muene nuka ua-nda dibhala mu nzumbi, ni kuta kituxi.​—1 Kolindo 10:12.

14. Tendasá iebhi ia bhiti na-iu phang’ietu? Mukonda diahi tua bhingi kutululuka kioso ki tu bhita mu tendasá kála íii?

¹⁴ Ihi i u tena o kubhanga phala ku di tumina o jihânji? Tala ia bhiti ni Luiji. Sai muendexi ua phupu ku dikalu diê. Sumbala o muendexi ua dikalu diéngi muene ua landukile anga u phupa ku dikalu dia Luiji, muene ua mateka o kudikola, anga ua mesenene  kubhânga ni Luiji. Luiji ua sambe kua Jihova phala kutululuka, iú ua mesenene ue kutululukisa o muendexi uéngi. Maji, muene ua sulukile mu kudikola. Luiji ua katula o kijimbuete kia dikalu dia muendexi uéngi, iú uai. Né kiki o muendexi uia ni kudikola. Mu semana ia kaiela, kioso Luiji kiexile mu boka ua kundu muhatu m’onzo iê. O diiala dia muhatu muenhó diexile o muendexi ua mukuá! Mu kumona Luiji, o diiala ua divu kiaiibha, iú ua bhingi muloloki, mukonda dia ima ia bhitile. Muene uexile polondo phala kuiudika o dikalu dia Luiji. Muene ua xikinine ue kudilonga o Bibidia, anga ua sulukile mu kudilonga. Mukonda dia kiki, Luiji ua mono kuila, ua bhange kiambote mu kubatâma kioso kia bhiti o kiluezu. Muene ua mono ue kuila, se ua thathamene ue, nange o diiala dia mukuá keji xikina kudilonga o Bibidia.​—Tanga 2 Kolindo 6:3, 4.

15, 16. Kiebhi o kudilonga o Bibidia ku tena kukuatekesa eie ni muiji ué kuditumina o jihânji?

¹⁵ O kudilonga o Bibidia izuua ioso kua-nda tu kuatekesa kuditumina o jihânji. Kima kiambote kulembalala ia zuela Nzambi kua Josuué, Nzambi ua mu tangela uixi: “Divulu  didi, dia ngonge, ki di bhue mu kanu; kota u kala mu ku di banza jinga mu muanha ni mu usuku, mbebhu uijiie kubhanga ima ioso ni muanu kala kia i soneka muenhómo; kuma hé kiene ki u bhanga, uendelu ué u kala ua kubhanduluka, o kuenda kué ku kala kua madimu.” (Josuué 1:8) Maji kiebhi o kudilonga o Bibidia ku tena ku kukuatekesa ku ditumina jihânji?

¹⁶ Tua mono kiá kuila, mu Bibidia tu sanga-mu phangu i tu londekesa o mbote i tu katula mu kulanga mba kuditumina o jihânji, ni ibhidi ijila mu kukamba ku ji tumina. Jihova ua tumu kusoneka o maka oso iâ, phala o mbote ietu. (Loma 15:4) Kima kiambote, kudilonga ni kuxinganeka mu misoso iii, ubheka mba ku muiji. Sota kuijiia kiebhi o musoso ua lungu n’eie ni muiji ué. Bhinga o kikuatekesu kia Jihova phala ku kumbidila o milongi ia Maka mê. Se ua mono kuila, kua ku kambe hanji kulanga mba kuditumina o jihânji jê, kana kukala ni mangonha, bhanga kima phala kutolola o ukexilu iú. Samba kua Jihova, ni u mone kiebhi ki u tena kukala ni kidifua kia kuditumina o jihânji. (Tiiaku 1:5) Tokuesa mu madivulu metu, phala kusanga o itendelesu ia-nda ku kuatekesa.

17. Kiebhi o jitata kia tena kukuatekesa o tuana tuâ kuditumina o jihânji?

¹⁷ Kiebhi ki u tena ku kuatekesa o tuana tué kuditumina o jihânji? O jitata ejiia kuila, o tuana ka vuala ni kidifua kiki. Mukonda dia kiki, o jitata a tokala kulonga o idifua iambote ku tuana tuâ, bhu kaxi ka phangu iâ. (Efezo 6:4) Se u mona kuila, o tuana tué ka tena kuditumina jihânji, sota kumona se mua mu bhana phangu iambote ia lungu ni maka enhá. U tena kubhana phangu iambote, mu kubhanga jinga o sidivisu ia kuboka, kuia mu iônge semana joso, ni kubhanga o ubhezelu ku muiji semana joso. Kana kukala ni uôma ua kudituna ima i ku bhinga o tuana, se u mona kuila kiene kia fuama ku ki bhanga. Jihova ua tele jimbambe phala Adá ni Eva. O jimbambe jenhojo, jeji ku a bhangesa kuxila o ungana ua Jihova. Kiene ue kimoxi, kioso o jitata a longa o tuana tuâ, ni ku a bhana phangu iambote, o tuana a-nda xila o ungana ua jitata. Kubhanga kiki, kua-nda ku a kuatekesa kulanga mba kuditumina o jihânji. Longa o tuana tué kuzola Jihova, ni kuxila o itumu iê. Kiki kiene o kima kia beta-o-kota ki u tena o kubhanga phala ene.​—Tanga Jisabhu 1:5, 7, 8.

18. Mukonda diahi tua bhingi kusola kiambote o makamba metu?

¹⁸ Tua bhingi ue ku dilanga mu kusola o makamba metu. Se o makamba mé, a zola Jihova, ene a-nda ku kuatekesa kusuua jimbambe jambote ku muenhu, ni kulenga o jitendasá. (Jisabhu 13:20) Phangu iâ iambote, ia-nda ku suinisa ue kuditumina jihânji kala ene. Mukonda dia kiki, o uendelu ué uambote ua-nda ku a suinisa kiavulu. O kuditumina o jihânji kua-nda tu kuatekesa kukala ni ukamba uambote ni Nzambi, kuzediua ku muenhu, ni kusanguluka kumoxi ni athu u tua zolo.