Se kiki kiexile kidi, xinganeka kiebhi kieji kala o muenhu uetu. Mu kifika mon’â phang’etu ua di nhenga. O tata ua luuala kiavulu. Ua dibhuidisa: “O kuila Jihova ua monene kiá o hádia, iú ua mono kuila, eme ni kazola kami, tueji tena ku dibhana ni maka enhá?” Ku mundu iú, avulu mudietu ene mu dibhana ni ibhidi. O kuila tua tokala kuxikina kuma, Jihova uejiia kiá o ima ioso ia-nda bhita ku muenhu uetu?

O divulu dia 1 Kolindo 10:13, di londekesa kuila, mu Bibidia ki muala ibanzelu ia kuila, Jihova uejiia kiá o ibhidi i tu tena kutolola, ni ibhidi i tua-nda dibhana na-iu. Mukonda diahi tu zuela kiki? Mukonda dia ima i uana i tua-nda mona.

Kia dianga, Jihova ua bhana ku athu o ufolo ua kusola. Muene ua mesena kuila, etu tu sola o ima i tua-nda bhanga. (Matendelelu 30:19, 20; Josuué 24:15) Se tu sola kubhanga ima ia uabhela Jihova, tua-nda tena kudielela kuila, muene ua-nda tuendesa. (Jisabhu 16:9) Maji kioso ki tu sola kubhanga ima iaiibha, tua-nda bhongolola i tua kunu. (Ngalásia 6:7) Kienhiki, se Jihova ua solele o ibhidi i tu dibhana na-iu, o kuila tueji kala ni ufolo ua kusola?

Kaiadi, Jihova ka tu lange mu “ibatu ni jithembu.” (Ndongixi 9:11) O muthu u tena kubhita mu kiluezu, mukonda dia kukala bhu kididi ni ola ki i tokala. Jezú ua zuela ia lungu ni kiluezu kia jibha 18 dia athu, kioso kia a lundumukina o sabhalalu. Muene ua lombolola kiambote kuila, Nzambi ki muene ua a bhangesa kufua. (Luka 13:1-5) Mu kiki, ki tu tokala kubanza kuila, kioso ki ku bhita kiluezu, Nzambi u sola o muthu ua-nda fua, mba o muthu ua-nda bhuluka.

Katatu, kala muthu mudietu ua tokala kukala fiiele kua Jihova. Satanaji uambe kuila, o jiselevende ja Jihova, a mu sidivila ngó mukonda dia ima iene mu a bhana. Satanaji uambe dingi kuila, ki tua-nda londekesa o ufiiele kua Jihova, se tu di bhana ni ibhidi. (Jobe 1:9-11; 2:4; Dijingunuinu 12:10) Se Jihova ua tu fidisile ku di bhana ni ibhidi, kieji moneka kala, o ima ia zuela Satanaji ia kidi.

Kauana, Jihova ka sota kuijiia o ima i tua-nda dibhana na-iu. Sé phata, Jihova u tena kuijiia o ima ia-nda bhita ku hádia. (Izaia 46:10) Maji o Bibidia i longa kuila, muene ka sota kuijiia o ima ioso ia-nda bhita. (Dimatekenu 18:20, 21; 22:12) Jihova muthu ua henda, ua iuka, mukonda dia kiki, muene u tuehela kusola o ima i tua mesena.—Matendelelu 32:4; 2 Kolindo 3:17.

Mu kiki-phe, ihi ia mesenene kuzuela Phaulu kioso kiambe kuila, muene ka-nda kuehela “ku mi diangula kia tundu o nguzu ienu?” Mu velusu íii, Phaulu uexile mu jimbulula o ima i bhanga Jihova mu kithangana kia ibhidi, kana ande dia kubhita o ibhidi. * (Tala ku luiji.) Se tu dielela kua Jihova, muene ua-nda tu kuatekesa ku dibhana ni kibhidi kioso-kioso ku muenhu. (Jisálamu 55:22) Tua-nda mona ima iiadi ia bhangesa Phaulu kuzuela kiki.

O kima kia dianga, o ibhidi i tuene mu di bhana na-iu, ‘iene imoxi ni iene mu luua na-iu akuetu.’ Kuma tuala hanji ku mundu ua Satanaji, tua-nda dibhana ni ima ia bhonzo, nange katé muéne ni iluezu. Maji se tu dielela kua Jihova, tua-nda tena ku dibhana ni ibhidi ia dikota, ni  kukala fiiele. (1 Phetele 5:8, 9) Ku dimatekenu dia divulu dia 1 Kolindo kibatulu 10, Phaulu ua soneka ia lungu ni jipolova ja dibhana na-iu akuá Izalaiele mu kikangalakata. (1 Kolindo 10:6-11) Ió a dielele kua Jihova, a tolola o ibhidi ienióio. Maji sai iá, ka belesela Jihova. Ene ka kolokota mu ufiiele uâ, mukonda ka dielele kua muene.

O kima kia kaiiadi, “Nzambi u kumbidila o kizuelu kiê.” Kiki kilombolola ihi? Kioso ki tu xinganeka kiebhi Jihova kia lange o jiselevende jê, tu mona kuila, muene u langa ‘ió a mu zola, aluka o ijila iê.’ (Matendelelu 7:9) Tu dilonga kuila, Jihova u kumbidila o ikanenu iê, ithangana ioso. (Josuué 23:14) Tu tena kudielela kuila, (1) Jihova ka-nda kuehela kuila, kibhidi kioso-kioso ki bhonza kiavulu, anga ki tu tena ku dibhana na-kiu, (2) muene ua-nda bhana o “ditundilu dia kutena kubhita.”

Kiebhi Jihova kia bhana o “ditundilu dia kutena kubhita,” kua ió a mu dielela? Sé phata, muene u tena kukatula o polova mba kibhidi. Maji lembalala kuila, Phaulu uambe kuila, Jihova ua-nda “mi bhana nguzu phala mu tene kubhalakata, ni ditundilu dia kutena kubhita.” Kienhiki, sai ithangana, Jihova u tu bhana o ditundilu mu ku tu bhana nguzu, phala kukolokota mu ufiiele uetu. Tu mone kiebhi muene kia bhanga kiki.

• Jihova “mukua ku tu kuatekesa mu hadi ietu ioso.” (2 Kolindo 1:3, 4) Muene u tena kutululukisa o kilunji kietu, o muxima, ni ixinganeku ietu bhu kaxi ka Bibidia, o nzumbi ikola, ni kimbadi kia fiiele.—Matesu 24:45; Nzuá 14:16; Loma 15:4.

• Jihova u tena ku tuendesa bhu kaxi ka nzumbi ikola. (Nzuá 14:26) O nzumbi ikola i tena ku tu kuatekesa kulembalala misoso ia Bibidia, ni itumu i tu kuatekesa kusola kiambote.

• Jihova u tena ku tu kuatekesa bhu kaxi ka jianju jê.—Jihebeleu 1:14.

• Jihova u tena ku tu kuatekesa ue bhu kaxi ka jiphange jetu ja mala ni ja ahatu. Ene a tena ku tu suinisa bhu kaxi ka ima ia zuela, ni ia bhanga.—Kolose 4:11.

Ihi i tua di longo mu izuelu ia Phaulu mu divulu dia 1 Kolindo 10:13? Jihova ka solo o ibhidi i tua-nda dibhana na-iu. Maji tuejiia kuila, se tu dielela kua Jihova, tua-nda dibhana ni kibhidi kioso-kioso. Tuejiia kuila, ithangana ioso, Jihova ua-nda tu bhana o ditundilu, phala tu kolokote mu ufiiele uetu kua muene.