1. Mabesá ebhi u tua-nda tambula mukonda dia sata ia kukula?

O SATA ia kukula ia Jezú, i tu bhekela mabesá avulu. Mu kifika, o ujitu ua sata ia kukula, i jikula o njila phala o an’â Adá a belesela Nzambi, ku bhanga mbandu ku muiji uê ku hádia. O dibesá dia mukuá, o kukala ni kuzediua ku muenhu katé ku hádia ni hádia. O sata ia kukula, ia lungu ue ni maka amukuá ala ni valolo ia dikota phala oso ala ku diulu, ni mu ixi.—Jihebeleu 1:8, 9.

2. (a) Iebhi o ima itatu ia tumbula Jezú mu musambu uê? (Tala o foto ia dianga.) (b) Ihi i tua-nda di longa mu milongi iii?

² Kioso kua kambele mivu iiadi phala kufua, Jezú ua longo o maxibulu mê kusamba kiki: “Tata ietu uene mu diulu, dijina dié a dixile. Utuminu ué uize. Vondadi ié a i bhange bhoxi, kala kiala ku i bhanga ku diulu.” (Matesu 6:9, 10) Tua-nda di longa, kiebhi o sata i kuatekesa kuzelesa o dijina dia Jihova, ia lungu ni Utuminu ua Nzambi, ni kikumbidilu kia vondadi ia Nzambi.

3. O dijina dia Jihova di londekesa ihi? Kiebhi Satanaji kia xidisa o dijina dia Jihova?

³ Kia dianga, Jezú ua sambe phala o dijina dia Nzambi a di xile, mba a di mone kala dijina di kola. O dijina dia Jihova di londekesa se Jihova nanhi. Muéne o muthu ua beta kukala ni kutena mu ngongo ioso. Muéne o Muthu ua beta o kuiuka. Jezú uambe kuila, Jihova “Tata Ukôla.” (Nzuá 17:11) Kuma Jihova muthu ukôla, o ima ioso i bhanga muene, ni itumu iê ioso, ikola ue. Maji mu jaludim ia Edene, Satanaji ua londekesa kuila, Nzambi kexile ni ujitu ua kubhana itumu ku athu. Muene ua tange makutu a lungu ni Jihova, iú ua xidisa o dijina dia Nzambi.—Dimatekenu 3:1-5.

4. Kiebhi Jezú kia zelesa o dijina dia Nzambi?

⁴ Maji Jezú ua zolele kiavulu o dijina dia Jihova. Mukonda dia kiki, muene ua bhange ioso phala kuzelesa o dijina didi. (Nzuá 17:25, 26) Kiebhi kia bhange kiki? Bhu kaxi ka uendelu ni ulongelu ué. Jezú ua kuatekesa o athu kumona kuila, o itumu ia Jihova ia iuka. Muene ua a londekesa kuila, o ima ioso i tu tumina Jihova phala o mbote ietu. (Tanga Jisálamu 40:8-10.) Né muene kioso Satanaji kia mu zukutisa katé kiafu, Jezú ua kolokota mu ufiiele uê. Muene ua londekesa kuila, o muthu ua iuka, u tena kubelesela Jihova mu ithangana ioso.

5. Ihi i tua tokala kubhanga phala ku zelesa o dijina dia Jihova?

⁵ Ihi i tua tokala kubhanga phala ku zelesa o dijina dia Jihova? Tua tokala ku kala ni uendelu uambote. Jihova ua mesena kuila, tu kala tu athu a zele. (Tanga 1 Phetele 1:15, 16.)Kiki kilondekesa kuila, etu tu bheza ngó muene, ni ku mu belesela ni muxima uoso. Né muene kioso kia tu zukutisa, tu bhanga ioso phala kubelesela o milongi i tu bhana Jihova. Kioso ki tu belesela o itendelesu ia Jihova, tu ximana o dijina diê. (Matesu 5:14-16) Tu londekesa kuila, Jihova uala ni itumu iambote, ni kuila Satanaji mukua makutu. Etu tu akua ituxi, mukonda dia kiki, tua-nda lueza. Maji se tu lueza, tua tokala kudiela, ni kubhanga ioso, phala ki tu bhange dingi o ima i xidisa o dijina dia Jihova.—Jisálamu 79:9.

6. Sumbala tu akua ituxi, mukonda diahi Jihova u tu mona kala tu athu a iuka?

⁶ Sumbala tu akua ituxi, Jihova u tena ku tu mona kala tu athu a iuka. Mukonda diahi? Jihova ua-nda loloka o ituxi ietu se tu londekesa kixikanu mu sata ia kukula. Kioso tu di bhakula kua muene, tu bhanga mbandu ku muiji ua Jihova. O Jikidistá a a undu, an’â Jihova, o “jimbudi ja mukuá,” makamba mê. (Nzuá 10:16; Loma 5:1, 2; Tiiaku 2:21-25) Mu kiki, né muene lelu, o sata ia kukula i tu kuatekesa kukala ni ukamba uambote ni Tat’etu, ni ku zelesa o dijina diê.

7. Ima iahi ia-nda bhita mukonda dia Sata ia kukula?

⁷ Mu musambu ua longele ku maxibulu mê, Jezú uambe: “Utuminu ué uize.” Kiebhi o sata ia kukula ia lungu ni Utuminu ua Nzambi? Jezú ni 144.000 a Jikidistá a a undu a tundu mu ixi, ene a bhanga mbandu ia Utuminu ua Nzambi. O sata ia kukula, i bhangesa o athu enhá kufukunuka phala kuia ku diulu. (Dijingunuinu 5:9, 10; 14:1) Ene a-nda tumina o ixi kumoxi ni Jezú mu midi ia mivu. Mu kithangana kieniókio, bhu kaxi ka Utuminu, Jihova ua-nda bhangesa o ixi kukala palaízu, ni ku kuatekesa o athu kukala athu a iuka. O jiselevende ja Jihova, ku diulu ni mu ixi, a-nda kala muiji umoxi ngó. (Dijingunuinu 5:13; 20:6) Jezú ua-nda buikisa  Satanaji ni kuzubha o maka oso a bheka muene.—Dimatekenu 3:15.

8. (a) Kiebhi Jezú kia kuatekesa o maxibulu mê kumona o valolo ia Utuminu ua Nzambi? (b) Kiebhi ki tu tena kukuatekesa o Utuminu ua Nzambi lelu?

⁸ Kiebhi Jezú kia kuatekesa o maxibulu mê kumona o valolo ia Utuminu ua Nzambi? Kioso kia zubha ku mu batizala, muene ua mateka kuboka o “Njimbu Iambote ia Utuminu ua Nzambi” ku athu. (Luka 4:43) Muene ua tangela ue o maxibulu mê, phala kuboka ‘katé ku maxokololo ma jixi.’ (Ikalakalu 1:6-8) Lelu, bhu kaxi ka kikalakalu kia kuboka, o athu a tena ku di longa ia lungu ni sata ia kukula, ni kutambula o mabesá bhu kaxi ka Utuminu ua Nzambi. Tu londekesa kuila, tu bhana valolo ku Utuminu ua Nzambi, mu ku kuatekesa o Jikidistá a a undu kuboka o njimbu iambote ku mundu uoso.—Matesu 24:14; 25:40.

9. Mukonda diahi tu tena kudielela kuila, Jihova ua-nda kumbidila o vondadi iê ia lungu ni athu?

⁹ Ihi ia mesenene kuzuela Jezú, kioso kiambe kuila, “vondadi ié a i bhange bhoxi?” Kioso Jihova kia kanena kima, kiene ki bhita muene. (Izaia 55:11) O kubhukumuka kua Satanaji, ki kua fidisa Jihova kukumbidila o vondadi iê. Iebhi iexile o vondadi ia Jihova phala o ixi? Muene ua mesenene kuila, o ixi izala ni an’a iuka a Adá ni Eva. (Dimatekenu 1:28) Se Adá ni Eva a fuile sé kuvuala ana, o vondadi mba kikanenu kia Jihova kia lungu ni kuizalesa o ixi ni tuana tua Adá ni Eva, ki ieji di kumbidila. Mu kiki, Jihova uehela Adá ni Eva kuvuala ana. O sata ia kukula, i kuatekesa o athu oso ala ni kixikanu, kukala ni kidielelu kia kukala athu a iuka, ni kutambula o muenhu ua kalelaku. Jihova ua zolo kiavulu o athu. Mukonda dia kiki, muene ua mesena ku tu bhana o muenhu uambote ua mesenene ku tu bhana ku dimatekenu.

10. Mu ukexilu uebhi o sata ia kukula, dibesá phala o athu afu kiá?

¹⁰ Ihi i tuamba ia lungu ni mazunda a athu afu sé kuijiia Jihova? Jihova ua mesena kuila, o athu a kala ku muenhu. Mu kiki, muene ua-nda fukununa o athu oso afu kiá. O Sata ia kukula, i bhangesa o athu afu, kuvutuka dingi ku muenhu. Mu kusuluka, ene a-nda tena ku di longa ia lungu ni Jihova, ni kukala ni muenhu ua kalelaku. (Ikalakalu 24:15) Jihova muéne o Fixi ia muenhu. Kioso Jihova kia-nda fukununa o athu, muene ua-nda kala Tata iâ. (Jisálamu 36:9) Mu musambu ua longele ku maxibulu mê, Jezú uambe kuila, Jihova muéne “Tata ietu uene mu diulu.” (Matesu 6:9) Jihova ua bhana kua Jezú, o kikalakalu kia dikota kia ku fukununa o athu. Jezú uambe: “Eme ngi difukunukinu ni muenhu.”—Nzuá 6:40, 44; 11:25.

11. Ihi ia mesenene Jihova phala o athu?

¹¹ Jezú uambe: “Kuma uoso u bhanga vondadi ia Nzambi, muène phange iami ia diiala, muène phange iami ia muhatu, muène mam’etu.” (Marku 3:35) Nzambi ua mesena kuila, o athu a ifuxi ioso, ni madiembu moso, ni madimi moso, a kala jiselevende jê. Ene a a tumbula kala ‘mundu uavulu ka tena ku u tanga!’ Ene a londekesa o kixikanu mu sata ia kukula. A mesena ue kubelesela Nzambi. Ene a mu ximana mu kuzuela: “O kubhuluka kuetu ku tunda kua Nzambi ietu ua xikama bhu kiandu, ni kua Kambudi!”—Dijingunuinu 7:9, 10.

12. Ihi tua di longo mu musambu ua Jezú?

 ¹² Bhu kaxi ka musambu ua longele Jezú ku maxibulu mê, tua di longo ima iavulu ia lungu ni Jihova, ni vondadi iê phala o athu. Kia dianga, tua tokala kubhanga ioso phala kuzelesa o dijina dia Jihova, ni ku mu ximana. (Izaia 8:13) O sata ia kukula, i tu bhana o kidielelu kia kubhuluka ku hádia. Iene i ximanesa ue o dijina dia Nzambi. Mu kidi, o dijina dia Jezú dilombolola kuila, “Jihova Muéne o Mubhuludi.” Kaiadi, bhu kaxi ka Utuminu uê, o athu a belesela a-nda katula mbote mu sata ia kukula, mukonda Jihova ua-nda kua besoala. Katatu, tu dielela kuila, sé-ku kima ki tena kufidisa Jihova ku kumbidila o vondadi iê.—Jisálamu 135:6; Izaia 46:9, 10.

13. Kioso ki tu di batizala tu londekesa ihi?

¹³ Tu tena kulondekesa kuila, tu sakidila kiavulu o ujitu ua sata ia kukula, kioso ki tu di bhakula kua Jihova ni ku di batizala. Mu kubhanga kiki, tu londekesa kuila, tuala ni kixikanu ku sata ia kukula, ni kuila, “tu athu angene a Ngana.” (Loma 14:8) Kioso kia tu batizala, tu bhinga kua Jihova phala ku tu bhana “kitongoluelu kia zele.” (1 Phetele 3:21) Jihova u tu tambuijila bhu kaxi ka sata ia kukula. Tuejiia ni kidi kioso kuila, Jihova ua-nda tu bhana o ima ioso ia tu kanena.—Loma 8:32.

14. Mukonda diahi Jihova u tu tumina kuzola o athu?

¹⁴ O ima ioso i bhanga Jihova, muene u i bhanga mukonda dia henda iê ia dikota. Muene ua mesena kuila, o athu oso a mu bheza a kaiela o phangu iê ni ku dizola mudiâ. (1 Nzuá 4:8-11) Kioso ki tu zola o athu, tu londekesa kuila, tua mesena, kukala tu an’â Tat’etu mu diulu. (Matesu 5:43-48) O itumu iiadi ia beta kota ienii: Kia dianga, o kuzola Jihova. Kaiiadi, kuzola akuetu. (Matesu 22:37-40) Tu londekesa o henda ietu ku athu, mu ku a bokela o njimbu iambote ia Utuminu ua Nzambi. Se tu belesela o kitumu kia Jihova kia kuzola akuetu, benge-benge o jiphange, o henda ietu kua muéne ia-nda “tenena.”—1 Nzuá 4:12, 20.

15. (a) Mabesá ebhi a tu bhana Jihova lelu? (b) Mabesá ebhi u tua-nda tambula ku hádia?

¹⁵ Mukonda dia kixikanu kietu mu sata ia kukula, Jihova u tu loloka o ituxi ietu. (Tanga Ikalakalu 3:19-21.) Kala ki tua mono ku dima, bhu kaxi ka sata ia kukula, Jihova u sola athu mu ixi, phala kukala an’ê ku diulu. Athu iá, o Jikidistá a a undu. (Loma 8:15-17) Muene uixana o “jimbudi ja mukuá,” phala kubhanga mbandu ku muiji uê mu ixi. Kioso kia-nda kala athu a iuka, kua-nda bhita o polova ia sukina. Se a kolokota mu ufiiele uâ kua Jihova, muene ua-nda kua sola ue kala an’ê. (Loma 8:20, 21; Dijingunuinu 20:7-9) Jihova ua-nda zola o tuana tuê tuoso. O sata ia kukula, ia-nda suluka ni kubheka mabesá avulu. (Jihebeleu 9:12) Jihova muéne ua tu bhana o ujitu iú. Sé-ku muthu u tena ku tu tambula o ujitu ua tu bhana muene.

16. O sata ia Jezú i tu bhulula ku ihi?

¹⁶ O athu a diela o ituxi, a tena kubhanga mbandu ia muiji ua Jihova. Diabhu ka tena kubhanga kima ki tu fidisa kutambula o dibesá didi. Jezú uafu “lumoxi-elêle.” O sata ia kukula io fute bhu lumoxi ngó. (Jihebeleu 9:24-26) Adá ua tu bhekela o kalunga, maji o sata ia Jezú i tu bhulula ku kalunga mukonda, ia-nda tu bhekela muenhu ua kalelaku. Mu kiki o sata ia kukula, i tena ku tu bhulula ku mundu ua Satanaji, ni ku uôma ua kufua.—Jihebeleu 2:14, 15.

17. Ihi i u tena ku kubhanga phala ku londekesa kuila, u sakidila o henda ia Jihova?

¹⁷ O ikanenu ia Nzambi ia-nda di kumbidila. O itumu ia ibhangelu ia Jihova ki iene mu lunguluka. Jihova ka lunguluka. Muene ua-nda kumbidila o ima ia kanene. (Malakiia 3:6) Jihova ka tu bhana ngó o muenhu, muene u tu bhana ima iavulu. Muene ua tu zolo. O Bibidia i zuela: ‘Etu ue tuejiia o henda ia Nzambi ia tu kuatela, etu tua i xikana. Nzambi henda.’ (1 Nzuá 4:16) O ikanenu iê i di kumbidila mu ithangana ioso. Kua kambe ngó bhofele, o ixi ia-nda kala palaízu ia iuka. Athu oso a-nda kaiela o idifua ia Jihova, ni ku di zola mudiâ. Mu ku suluka o jiselevende jê joso ku diulu, ni mu ixi a-nda dikola: “Ni diximanu, ni fuma, ni ungana, ni kuijiia, ni kisakidilu, ni ujitu, ni ukota, ni uzonda, uangene ua Nzambi ietu katé ku hádia ni hádia! Amén!”—Dijingunuinu 7:12.