1, 2. (a) Ihi i bhangesa o Jimbangi ja Jihova, ku di tungula bhu kaxi ka jingeleja ja mukuá? (b) Ihi i tua-nda di longa mu milongi íii, ni milongi ia-nda kaiela?

ITHANGANA ioso, o athu ebhula o Jimbangi ja Jihova: “O mutuameni uenu nanhi?” Ene a bhanga o kibhudisu kiki, mukonda jingeleja javulu, jala ni mutuameni ua diiala mba ua muhatu. Maji etu tu sanguluka mu ku tambuijila kuila, o Mutuameni uetu ki muthu mu xitu, kana. O Mutuameni uetu, Jezú Kristu! Muene u belesela Tat’ê Jihova, o Mutuameni uê.—Matesu 23:10.

² Lelu, kuene ue kibuka kia maiala, kia mu kuendesa o mundu ua Nzambi mu ixi. O kibuka kiki, o ‘kimbadi kia fiiele.’ (Matesu 24:45) Maji kiebhi ki tuejiia kuila, Jihova muéne ua mu tuendesa bhu kaxi ka Mon’ê? Mu milongi iii ni ia-nda kaiela, tua-nda di longa ima itatu i tu bhangesa kuxikina kuila, Jihova muéne ua mu tuendesa. Sumbala Jihova uene mu sola athu mu ixi phala kuendesa o mundu uê, tua-nda mona ni kidi kioso kuila, tundé ukulu, Jihova muéne o Mutuameni ua mundu uê.—Izaia 58:11.

3. Ihi ia kuatekesa Mozé kuendesa o mundu ua Izalaiele?

³ O nzumbi ikola ia bhana kutena ku athu a solo Nzambi.  Nzambi ua solo Mozé, phala kuendesa o mundu ua Izalaiele. Ihi ia mu kuatekesa kubhanga o kikalakalu kiki kia dikota? Jihova ua bhana o ‘nzumbi ikola’ kua Mozé. (Tanga Izaia 63:11-14.) Mu kidi, Jihova muéne ua kexile mu kuendesa o mundu uê, mukonda ua kexile mu kuatekesa Mozé bhu kaxi ka nzumbi ikola.

4. Ihi ia londekesa kuila, Mozé ua kexile ni nzumbi ikola ia Nzambi? (Tala o foto ia dianga.)

⁴ O kuila o athu a mono kuila, Mozé ua kexile ni nzumbi ikola ia Nzambi? Sé phata, ene a mono! O nzumbi ikola ia Jihova, ia bhana kua Mozé, o kutena kua kubhanga madiuanu, ni kuijiidisa o dijina dia Nzambi kua Falaó, o nguvulu ionene ia Ijitu. (Makatukilu 7:1-3) O nzumbi ikola, ia kuatekesa ue Mozé kukala mutuameni ua henda, ni muanhu. Muene ka difuile ni atuameni a jixi jamukuá, akexile mu londekesa o luímbi, ni ku bhangesa o athu ku tala hadi! (Makatukilu 5:2, 6-9) Tu tena kumona kuila, Jihova muéne ua solele Mozé, phala kuendesa o mundu Uê.

5. A nanhi dingi a tambula o nzumbi ikola ia Jihova, phala kuendesa o mundu uê?

⁵ A nanhi dingi a tambula o nzumbi ikola ia Jihova, phala kuendesa o mundu uê? O Bibidia i zuela: “Jozuué, mon’a Nune-phe, anga uizala ni nzumbi ia unjimu.” (Matendelelu 34:9) “Nzumbi ia Jihova phe i tula kua Ngidiione.” (Afundixi 6:34) “Nzumbi ia Jihova anga [i] tula ni nguzu ku thandu dia Davidi.” (1 Samuuele 16:13) O maiala oso iá, a dielele ku nzumbi ikola ia Nzambi, phala kua kuatekesa kubhanga o ima ieji lembua ku i bhanga mu nguzu iâ. (Josuué 11:16, 17; Afundixi 7:7, 22; 1 Samuuele 17:37, 50) Sé phata, Jihova muéne ua a bhana o kutena kua kubhanga ima ia dikota. Mu kiki, muéne ngó ua fuamene ku mu ximana.

6. Mukonda diahi o mundu ua Izalaiele ua tokalele kuxila o maiala a solele Nzambi?

⁶ Ihi ia tokalele kubhanga o mundu ua Izalaiele, mu kumona kuila, Nzambi ua bhanene o nzumbi ikola kua Mozé, Josuué, Ngidiione, ni Davidi? Ene a tokalele kua xila. Kioso o athu a mateka kulongolola Mozé, Jihova uebhula: “Mbambe bhebhi bhu suka kifuxi kiki, ni ku ngi tènda?” (Dialuilu 14:2, 11) Sé phata, Jihova ua solele o maiala iá, phala kuendesa o mundu Uê. Mu kidi, kioso o athu akexile mu belesela o maiala iá, ene akexile mu xikina Jihova kala Mutuameni uâ.

7. Kiebhi o jianju ja kuatekesa Mozé?

⁷ O jianju ja kuatekesa o athu a solo Nzambi. (Tanga Jihebeleu 1:7, 14.) Nzambi ua kuatekesa Mozé bhu kaxi ka jianju. Kia dianga, anju imoxi ia mu “tukulukila mu kisasa,” anga i mu bhana o kikalakalu kia kubhulula akua Izalaiele, ni kua endesa. (Ikalakalu 7:35) Kia kaiadi, bhu kaxi ka jianju, Nzambi ua bhana Kitumu kua Mozé, phala  kuendesa kiambote o mundu ua Izalaiele. (Ngalásia 3:19) Kia katatu, Jihova ua mu tangela: “Ndeie, u tuamenene o mundu iú, mu ku a bheka kididi kioso ki nga ku tangela; tala-ze anju iami ia-nda ku ku tuamena jinga ku pholo.” (Makatukilu 32:34) O Bibidia ki i zuela kuila, akua Izalaiele a mono anju kubhanga o ima íii. Maji o ukexilu ua Mozé ua kulonga ni kuendesa o mundu, ulondekesa kuila, o jianju ja mu kuatekesa.

8. Kiebhi o jianju ja kuatekesa Josuué ni Izekiia?

⁸ A nanhi dingi a a kuatekesa ku jianju? O Bibidia i zuela kuila, o “kilâmba kia ifuxi ia Jihova,” mba anju, ia kuatekesa Josuué kutolola akua Kanana. (Josuué 5:13-15; 6:2, 21) Kioso Sobha Izekiia kia kexile mu kuendesa o mundu ua Nzambi, o kifuxi kia akua Asídia kia mesenene kubuikisa o mbanza ia Jeluzaleme. Mu usuku umoxi, ‘o anju ia Jihova ia buikisa hama ni makuinhi nake ni kitanu kia jimidi ja maiala.’—2 Jisobha 19:35.

9. Sumbala o atuameni a solele Nzambi exile akua ituxi, ihi ia tokelele kubhanga o mundu ua Izalaiele?

⁹ O jianju, ja iuka. Maji o maiala akexile mu kuatekesa, exile akua ituxi. Mu kifika, sai kithangana, Mozé ka ximana Jihova. (Dialuilu 20:12) Kioso o akua Ngibiione kia mesenene ku ta kikutu ni Josuué, muene ka soto kuijiia o vondadi ia Nzambi. (Josuué 9:14, 15) Saí kithangana, Izekiia ua londekesa o ukumbu. (2 Malunda 32:25, 26) Sumbala o maiala iá exile akua ituxi, o akua Izalaiele a tokalele kua belesela. O akua Izalaiele ejiidile kuila, Jihova ua kexile mu kuatekesa o maiala iá bhu kaxi ka jianju. Sé phata, Jihova ua kexile mu kuendesa o mundu uê.

10. Kiebhi Mozé kia londekesa kuila, ua kexile mu belesela o Kitumu kia Nzambi?

¹⁰ O Mak’â Nzambi akexile mu kuendesa o athu a a solele kua Nzambi. O Bibidia i tumbula o kitumu kia bhanene kua akua Izalaiele, kala ‘Kitumu kia Mozé.’ (1 Jisobha 2:3) Maji o Bibidia ilondekesa kuila, Jihova muéne ua a bhanene o Kitumu kua akua Izalaiele. Mozé ua tokalele ue kubelesela o kitumu kiki. (2 Malunda 34:14) Mu kifika, kioso Jihova kia mu jimbuluila kiebhi kia tokalele kutunga o balaka, ‘Mozé ua bhange o ima ioso ia mu tumu Jihova.’—Makatukilu 40:1-16.

11, 12. (a) Ihi ia tokalele kubhanga Josuué ni jisobha ja kexile mu kuendesa o mundu ua Nzambi? (b) Kiebhi o Mak’â Nzambi endesa o maiala akexile ku pholo?

¹¹ Kioso kia solo Josuué phala kukala ku pholo, muene ua kexile ni Mikanda Ikola ia Nzambi. Mu kiki, Jihova ua mu tangela, uixi: “U kala mu ku [di tanga ni ku] di banza jinga mu muanha ni mu usuku, mbebhu uijiie kubhanga ima ioso ni muanu kala kia i soneka muenhómo.” (Josuué 1:8) O jisobha j’endesa o mundu ua Nzambi, a tokalele ue kutanga o Kitumu izuua ioso, kubhanga kopia ia kitumu, ni kubelesela ‘o izuelu ioso ia kitumu kiki.’—Tanga Matendelelu 17:18-20.

¹² Kiebhi o Mak’â Nzambi endesa o maiala akexile ku pholo? Xinganeka mu phangu ia Sobha Joziia. Kioso kia sange o Kitumu kia Mozé, o mukuatekexi ua Joziia, ua mateka ku mu tangela o kitumu. * (Tala ku luiji.) O Bibidia i zuela: “Kioso kia zubha kuívua o maka a divulu dia Kitumu, ua tandula izuatu iê.” O Mak’â Nzambi a suinisa Joziia kubula  o iteka ioso mu ixi, ni kusokejeka o ima phala kubhanga fesa ionene ia Phasu. Ka bhangele-ko fesa ionene, kala íii. (2 Jisobha 22:11; 23:1-23) Kuma Joziia ni atuameni a mukua a fiiele, a belesele o Mak’â Nzambi, ene akexile polondo phala kulungulula o itumu ia kexile mu bhana ku mundu ua Nzambi. O itumu ia ubhe, ia kuatekesa o mundu ua Nzambi ku mu belesela.

13. Kiebhi o atuameni a mundu ua Nzambi, a di tunguile bhu kaxi ka atuameni a ifuxi iéngi?

¹³ O atuameni a ifuxi iéngi, akexile mu dielela o unjimu ua athu, phala kuendesa o mundu uâ. Mu kifika, o kifuxi kia Kanana ni atuameni’â, akexile mu bhanga ima ia iibha. O maiala akexile mu zeka ni jiphange jâ ja ahatu, ni maiala ni akuâ. O ahatu akexile mu zeka ni ahatu ni akuâ, amukuá akexile mu zeka ni iama, akexile mu kuoha o an’a kala sata, ni kubheza iteka. (Ijila 18:6, 21-25) Mu maka a lungu ni kuzela, o akua Babilonha ni akua Ijitu, kexile ni itumu imoxi ni ia mundu ua Nzambi. (Dialuilu 19:13) Maji o mundu ua Nzambi ua tenene kumona kiebhi o atuameni’â a fiiele, akexile mu kua suinisa kuzela mu ubhezelu uâ, kuzelesa o mikutu iâ, ni ku dituna o ufusa. Sé phata, Jihova ua kexile mu kua endesa.

14. Mukonda diahi Jihova ua bazela o atuameni amukuá?

¹⁴ Sai jisobha ja mundu ua Nzambi, kexile mu kaiela o itumu ia Nzambi. O jisobha jojo ja kambele o ufiiele, a ditunine kukaiela o itendelesu ia nzumbi ikola ia Nzambi, o jianju jê, ni Maka mê. Sai bhabha, Jihova ua bazela. Maji mu ithangana ia mukuá, muene ua tambula o ungana, anga u u bhana athu engi. (1 Samuuele 13:13, 14) Mu kubhita thembu, Jihova ua solo mutuameni ua iuka.

15. (a) Ihi ia zuela o jipolofeta, ia lungu ni mutuameni ua iuka? (b) Nanhi uexile o mutuameni iú ua iuka?

¹⁵ Mivu iavulu ku dima, Jihova ua kanena kuila, ueji sola mutuameni ua iuka, phala kuendesa o mundu uê. Mu kifika, Mozé ua tangela akua Izalaiele, uixi: “Jihova Nzambi ié ua kà ku balumuina polofeta momué, mu’axaxe ka’phange jé, mukua n’eme; muenhó muene kiá mua kà mu ivua.” (Matendelelu 18:15) Izaia ua zuela kuila, o Muthu iú ueji kala ‘kilôlo mba mutuameni.’ (Izaia 55:4) Daniiele ua zuela ia lungu ni uijilu ua Mexiia, o Mutuameni. (Daniiele 9:25) Mu kusuka-ku, Jezú Kristu ua zuela kuila, muene ‘Mutuameni’ ua mundu ua Nzambi. (Tanga Matesu 23:10.) O maxibulu a Jezú a mu kaiela ni vondadi ioso. Ene a xikinine kuila, Jihova muéne ua mu solele. (John 6:68, 69) Ihi ia a bhangesa kuxikina kuila, Jezú Kristu uexile o muthu a mu solele kua Jihova, phala kuendesa o mundu uê?

16. Ihi i londekesa kuila, Jezú ua kexile ni nzumbi ikola ia Nzambi?

¹⁶ O nzumbi ikola ia kuatekesa Jezú. Kioso Nzuá kia batizala Jezú, ua mono “ku diulu kua jikuka, ni nzumbi iedi kala diembe, iala mu tuluka ku thandu diê.” Mu kubhita kithangana, o nzumbi ia muendesa mu kikangalakata. (Marku 1:10-12) Kioso Jezú kiexile mu bhanga mu ixi, o nzumbi ikola ia Nzambi ia mu bhana o kutena kua kulonga  o athu, ni kubhanga madiuanu. (Ikalakalu 10:38) O nzumbi ikola ia kuatekesa ue Jezú kulondekesa o idifua kala o henda, o kisangusangu, ni kixikanu kia kolo. (Nzuá 15:9; Jihebeleu 12:2) Sé-ku mutuameni uéngi ua londekesa kuila, ua kexile ni nzumbi ikola ia Nzambi, kala kia londekesa Jezú. Sé phata, Jihova ua solele Jezú, phala kukala Mutuameni ua mundu uê.

17. Kiebhi o jianju ja kukuatekesa Jezú?

¹⁷ O jianju ja kuatekesa Jezú. Mu ku bhita kithangana, kioso kia batizala Jezú, ‘o jianju jeza, anga ji kala ku mu sidivila.’ (Matesu 4:11) Kioso ki kua kambele ngó jiola phala kufuá, ‘kua tukuluka anju ia tundu ku diulu, hé i mu suinisa.’ (Luka 22:43) Jezú uejiidile kuila, se kua bhingile, Jihova ueji tumikisa jianju phala ku mu kuatekesa.—Matesu 26:53.

18, 19. Kiebhi ki tuejiia kuila, Jezú ua kexile mu kaiela o Mak’â Nzambi?

¹⁸ O Mak’â Nzambi, endesa Jezú. Tundé kia mateka o ukunji uê, katé kiafu, Jezú ua kaiela o milongi ia Mikanda Ikola. Né muene kioso kia kexile mu fua, muene ua tumbula o ikanenu ia lungu ni Mexiia. (Matesu 4:4; 27:46; Luka 23:46) Maji o atuameni a jingeleja mu izuua ienióio, ka difuile ni Jezú. Né muene se a monene kuila, o ijila iâ ki i difuile ni milongi ia Mak’â Nzambi, ene akexile mu kaiela o ijila iâ. Mu kuzuela ia lungu ni atuameni iá, Jezú ua tumbula o izuelu ia Mak’â Nzambi, uixi: “Athu iá a ngi xila ni mizumbu iâ; mixima iâ-phe ia ngi kala kualebha. A ngi bheza-phe ngó makutu, ni kulonga ijila ia tumu ngó athu, kala Nzambi muène ua i tumu.” (Matesu 15:7-9) Jihova ka tena ku sola o maiala a dituna kukaiela  o Mak’â mê, phala kuendesa o mundu uê.

¹⁹ Jezú ua longo ue o athu bhu kaxi ka Mak’â Nzambi. Kioso kia mu tendala ku atuameni a jingeleja, mu ku mu bhanga ibhuidisu, Jezú ua a tambuijila. Maji ka di zangeleka ni unjimu uê. Mu veji dia kiki, muene ua longo o athu bhu kaxi ka Mikanda Ikola. (Matesu 22:33-40) Hinu Jezú ua di zangeleka mu ku tangela o athu o ima ia lungu ni muenhu uê ku diulu, mba ima ia lungu ni ibhangelu ia ngongo. Kuma ua zolele o Mak’â Nzambi, muene ua mesenene kuila, o athu ejiia kiambote o Mak’â Nzambi.—Luka 24:32, 45.

20. (a) Kiebhi Jezú kia bhana kijingu kua Jihova? (b) Kiebhi o ukexilu ua Jezú, ki u difuile ni ukexilu ua Helode?

²⁰ Sumbala o athu a diuanene ni ulongelu ua Jezú, ithangana ioso, Jezú ua bhana o kijingu kiki kua Jihova, o Mesene iê. (Luka 4:22) Kioso o diiala dia mvuama kia fikisa kubhana kijingu kua Jezú mu ku muixana, “Mesene ia Mbote,” Jezú ua londekesa o kulenduka mu kuzuela: “Eie u ng’ila kiebhi [Mesene] iambote? Sai ngó umoxi uala mbote, muène Nzambi.” (Marku 10:17, 18) Maji mu kubhita nake dia mivu, Helode Ngilipa ia dianga, ua kituka mutuameni ua Judeia. Muene ka di fuile ni Jezú! Sai kizuua, Helode ua zuata, anga u di lumbila ijingu ia ungana. Kioso o athu kia mu mono, ni ku muívua, a di kola: “Iú mu zuela, Nzambi, ki muthu kana!” Helode ua zolele kutambula kijingu. Maji ihi ia bhiti? “Mu kithangan’okio, anju ia Ngana ia mu kuama, mukonda ua [kambele] kujingisa Nzambi; anga u diua ku mabhuka, u zubhidisa.” (Ikalakalu 12:21-23) Tu tena kumona kuila, Jihova ka solele Helode phala kukala mutuameni ua mundu uê. Maji Jezú ua londekesa kuila, Nzambi muéne ua mu solele, mukonda ithangana ioso, muene ua kexile mu jingisa Jihova kala Mutuameni ua Dikota, ua mundu Uê.

21. Ihi i tua-nda di longa mu milongi ia-nda kaiela?

²¹ Jihova ua mesena kuila, Jezú u kala o Mutuameni uetu katé ku hádia ni hádia. Kioso kia fukunuka, Jezú ua tangela o maxibulu mê, uixi: ‘O kutena kuoso a ngi bhana-ku eme, ni mu diulu, ni mu ixi.’ Muene uambe dingi: “Talenu, eme-muène ngà kala ni enu izuua ioso, katé ku dizubhilu dia mundu.” (Matesu 28:18-20) Maji kiebhi Jezú kia tena kuendesa o mundu ua Nzambi mu ixi, se muene muthu mu nzumbi ku diulu? A nanhi eji kua sola kua Jihova, phala ku kala akunji a Jezú mu ixi? Kiebhi o Jikidistá eji kuijiia o akunji a Nzambi mu ixi? O milongi ia-nda kaiela, ia-nda tambuijila o ibhuidisu íii.