1, 2. (a) Ihi ia tu tangela Jihova? (b) Kikanenu kiahi ki tu sanga mu divulu dia Izaia 46:10, 11 ni 55:11?

O VELUSU ia dianga ia Bibidia, i zuela: “Mu dimatekenu Nzambi ua [bhange] diulu ni ixi.” (Dimatekenu 1:1) Sumbala o velusu iii ki i zuela kiavulu, maji o izuelu íii, iala ni valolo ia dikota. Ku ima ioso ia bhange Nzambi mu ngongo, etu tu mona ngó ima iofele. Ki tu tendela kiambote o ima kala o dibinza, o mukengeji, ni nguzu i sunga o ima bhoxi. (Ndongixi 3:11) Maji Jihova ua tu tangela o vondadi iê phala o ixi, ni athu. Muene ua bhange o athu mu kidifuanganu kiê. Muene ua mesenene kuila, o athu mu ixi a zediua ku muenhu. (Dimatekenu 1:26) Ene eji kala an’ê, muene ueji kala Tat’â.

² Tua mono kuila, tundé mu kibatulu kia katatu kia divulu dia Dimatekenu, sai muthu ua mesenene kufidisa o vondadi ia Jihova. (Dimatekenu 3:1-7) Maji Jihova u tena kubatula o maka oso a moneka. Sé-ku muthu u tena ku mu fidisa. (Izaia 46:10, 11; 55:11) Tu tena kudielela kuila, o vondadi ia Jihova ia-nda dikumbidila mu kithangana kia tokala!

3. (a) Milongi iebhi i tu kuatekesa kutendela o njimbu ia Bibidia? (b) Mukonda diahi tua-nda di longa o milongi íii? (c) Ibhuidisu iebhi i tua-nda tambuijila mu milongi iii?

 ³ Sé phata, etu tuejiia o vondadi ia Jihova phala o ixi ni athu. Tuejiia ue o kikalakalu kiene mu bhanga Jezú, phala kukumbidila o vondadi ia Nzambi. O milongi iii i tu kuatekesa kutendela o njimbu ia Bibidia. Nange íii, iene o ima i tua dianga kuijiia kioso ki tua mateka ku di longa o Mak’â Nzambi. Lelu, etu tua mesena kukuatekesa akuetu kuijiia o kidi kiki. Etu tuala ni ujitu ua kubhanga o kima kiki ku muvu iú, benge benge mu kithangana ki tua-nda kuixana o athu phala kuia mu Lembalasa ia kufua kua Kristu. (Luka 22:19, 20) Se ene aia mu fesa íii ia dikota, a-nda kuijiia dingi ia lungu ni vondadi ia Nzambi. Mu kienhiki, kiki kiene o kithangana kia kuxinganeka mu ima i tu tena kuibhuidisa o athu, phala kua suinisa kuia mu fesa íii. Mu milongi íii, tua-nda tambuijila ibhuidisu itatu: Ihi ia mesenene Nzambi phala o ixi ni athu? Ihi ia bhiti? Mukonda diahi o sata ia kukula ia Jezú, iene o sabhi ia jikula o dibhitu, phala o vondadi ia Nzambi i di kumbidile?

4. Kiebhi o ibhangelu ia mu “tumbula o fuma ia Nzambi?”

⁴ Jihova muéne o mubhangi ua ima ioso. O ibhangelu iê i bhangesa ku mu xila kiavulu. O ima ioso ia bhange, ima ia madiuanu. (Dimatekenu 1:31; Jelemiia 10:12) Ihi i tu di longa kioso ki tu mona o kuuabha kua ima ia bhange, ni ukexilu ua sokejeka o ima íii? Tu di longa kuila, o ima ioso ia bhange Jihova, ki kale iofele mba ia makota, iene ioso phala o mbote ietu. Kia mukuá, kioso ki u xinganeka ia lungu ni celula ia muthu, u mona o kabuetele a mu vuala kindala, mba u mona o dikumbi dia muia k’ualunga, kiebhi ki u divua? Tu diuana mu kumona o ima íii, mukonda Jihova ua tu bhange ni kutena kua kuijiia o ima ia uabha.—Tanga Jisálamu 19:1; 104:24.

5. Ihi ia bhange Jihova, phala o ibhangelu iê ioso iende kiambote?

⁵ Jihova ua xindi jimbambe phala o ibhangelu iê ioso. Muene ua bhange itumu phala o athu, ni ibhangelu ia mukuá. Muene ua bhange o itumu íii, phala o ima ioso mu ngongo iende kiambote. (Jisálamu 19:7-9) O ima ioso mu ngongo, iala ni kididi kiê, ni kikalakalu kiê. Mu kifika, o nguzu i sunga o ima bhoxi, i kuatekesa o ima kukala mu ixi. Iene i bhangesa ue o musanza ua kalunga, kukala mu ididi iê. Sé o nguzu íii, o ima mu ixi ki ieji kala ni muenhu. O jimbambe ja xindi Jihova phala o ibhangelu, ji kuatekesa o ima mu ngongo ku di sokejeka kiambote. O ima íii, ilondekesa o vondadi iê phala o ixi ni athu. Tua tokala kukuatekesa akuetu kuijiia o Mubhangi uetu, ni ima ia madiuanu ia bhange mu ngongo.—Dijingunuinu 4:11.   

6, 7. Maujitu ebhi a bhana Jihova kua Adá ni Eva?

⁶ Jihova ua mesenene kuila, o athu a tunga mu ixi katé ku hádia ni hádia. (Dimatekenu 1:28; Jisálamu 37:29) Kuma Nzambi mukuá kubhana, muene ua bhana maujitu avulu kua Adá ni Eva. (Tanga Tiiaku 1:17.) Jihova ua a bhana o ufolo ua kusola, o kutena kua kuxinganeka, kuzola, ni kubhanga o ukamba ni akuâ. Jihova ua zuela ni Adá, anga u mu longa kubhanga o ima iambote. Adá ua di longo ue kiebhi kia tokalele kulanga o muenhu uê, o iama, ni ixi. (Dimatekenu  2:15-17, 19, 20) Jihova ua bhana kua Adá ni Eva, o kutena kua kulola, kukuata, kumona, ni ku nuha o ima iambote ia bhangele phala ene. Ni maujitu iâ, ene eji tena kukala mu inzo iâ ia iuka, ni kuzediua ku muenhu. Adá ni Eva, akexile ni ikalakalu iavulu phala kubhanga. Maji o ikalakalu ioso ia uabhele. Ene eji di longa ni kuijiia ima ia ubhe, katé ku hádia ni hádia.

⁷ Ihi dingi ia mesenene Nzambi? Jihova ua bhana kua Adá ni Eva, o ujitu ua kuvuala ana a iuka. O an’â, eji di vualula ue katé kieji kuizalesa o ixi ioso ni athu. Jihova ua mesenene kuila, o jitata ji zola o tuana tuâ, kala kia zolele muene o tuana tuê tua dianga mu ixi, Adá ni Eva. Muene ua bhana ku athu o ixi, ni ima ioso ia uabha iala-mu. Muene ua mesenene kuila, ene a tunga mu ixi, katé ku hádia ni hádia.—Jisálamu 115:16.

8. Mukonda diahi Nzambi ua bhana kua Adá ni Eva, o kijila ki tu sanga mu divulu dia Dimatekenu 2:16, 17?

⁸ Mu dimatekenu, o ima ki i bhiti kala kia mesenene Jihova. Mukonda diahi? Jihova ua bhana kitumu kiofele kua Adá ni Eva. Jihova ua a bhana o kitumu kiki, phala kua kuatekesa kuijiia o mbambe iâ. Muene uambe: “Ku mixi ioso mu díbhia u die-ku kioso ki ua mesena; maji ku muxi-phe ua kuijiia kiauabha ni kiaiibha kana kudia-ku; mukonda o kizuua ki ua kà dia-ku, ijiia na-kiu kuma ua kà fua muene.” (Dimatekenu 2:16, 17) O kijila kiki, ki ki kolele ku ki tendela. Ki ku bhonzele ue kubelesela o kijila kiki, mukonda mu díbhia muexile mixi iavulu phala kudia.

9, 10. (a) Kiebhi Satanaji kia tatela Jihova? (b) Ihi ia solo kubhanga Adá ni Eva? (Tala o foto ia dianga.)

⁹ Satanaji, o Diabhu, ua bhangesa o nhoka kunganala Eva, ni ku bhukumukina Tat’ê Jihova. (Tanga Dimatekenu 3:1-5; Dijingunuinu 12:9) Satanaji ua mesenene kulondekesa kuila, Nzambi ua kexile mu fidisa o an’ê kudia “ku mixi ioso ia díbhia.” Mu kidi, muene ua kexile mu zuela: ‘Ua mu zuela kuila, eie ku tena kubhanga o ima i ua mesena?’ Mu kusuluka, muene ua mu tangela: “Ki mua-nda kufua.” Muene ua kexile mu ta makutu. Muene ua mesenene ue kubhangesa Eva kuxikina kuila, muene ka bhingile kubelesela o itendelesu ia Nzambi. Satanaji ua zuela: “Nzambi ua k’ijiia kuma kizuua ki mu dia-ku, mua-nda kutona mesu.” Satanaji ua tatela Jihova mu kuzuela kuila, muene ka mesenene kuila, ene a dia o kibundu, mukonda se a ki dile, ene eji kala jinjimu. Ku disukilu, muene ua te dingi o makutu iá: “Mu sokela ni Nzambi, mu ijiia kiauabha ni kiaiibha.”

¹⁰ Adá ni Eva, a tokalele kusola o kima kieji bhanga. Ene eji belesela Nzambi, inga eji kuívua o nhoka? Ene a solo kubhukumukina Nzambi. A ditunu Tat’â Jihova, mu ku dibunda kumoxi ni Satanaji. Mu kubhanga kiki, ene a bhana dikunda kua Nzambi. Mukonda dia kiki, Jihova kexile mu a langa dingi.—Dimatekenu 3:6-13.

11. Mukonda diahi kioso Adá ni Eva kia te kituxi, Jihova ka a talela ngó?

¹¹ Kioso Adá ni Eva kia bhukumukina o kitumu kia Nzambi, ene a texi o kuiuka kuâ. Ene a kituka ue jinguma ja Nzambi, mukonda muene ua zembe o kuiibha. O Bibidia i zuela kuila, ‘mesu mê a zele kiavulu. Muene ka tena kumona ima iaiibha.’ (Habakuke  1:13) Se Jihova ka bhangele kima, mukonda dia kituxi kia tele Adá ni Eva, o kutululuka kua ibhangelu iê ku diulu ni mu ixi, kueji kala mu iluezu. Ki kale o jianju mba o athu, ene oso eji dibhuidisa se a tokalele kudielela mu izuelu ia Jihova mba kana. Maji Jihova fiiele. Mukonda dia kiki, muene u kumbidila o itumu iê. (Jisálamu 119:142) Sumbala Adá ni Eva akexile ni ufolo ua kusola, ene ka tena kulenga o ibhidi ioso ia moneka mukonda dia kubhukumukina Jihova. Mu kubhita thembu, ene afu, iá a vutuka ku mavu kua tundile.—Dimatekenu 3:19.

12. Ihi ia bhiti ni an’â Adá?

¹² Kioso Adá ni Eva a di ku kibundu, Jihova ka a xikina dingi ku muiji uê. Muene ua a kaie mu jaludim ia Edene. Ene ka tokalele kuvutuka-ku dingi. (Dimatekenu 3:23, 24) Jihova ua ehela ku dibhana ni ibhidi iejila mu ima ia solele. (Tanga Matendelelu 32:4, 5.) Mukonda dia kiki, ene ka tenene dingi kukaiela o idifua ia Jihova ni kuiuka kuoso. Adá ua texi o mabesá oso a tokalele kua muene ni an’ê. O an’ê eji lundula ngó o ukexilu ua xitu, o kituxi, ni kalunga. (Loma 5:12) Adá ua a katula o ujitu ua kukala ku muenhu katé ku hádia ni hádia. Adá ni Eva keji vuala an’a iuka. O an’ê keji vuala an’a iuka. Satanaji ua bhangesa Adá ni Eva kubhukumukina Nzambi. Muene uene mu bhanga ue ioso phala kunganala o athu lelu.—Nzuá 8:44.

13. Ihi ia mesenene Jihova phala o athu?

¹³ Jihova ua zolele hanji o athu. Sumbala Adá ni Eva a ditunine Jihova, muene ua mesenene hanji kuila, o athu a kala ni ukamba uambote ni muene. Muene ka mesenene kuila, bhu fua mona. (2 Phetele 3:9) Mu kienhiki, Nzambi ua iudika o ima ni lusolo luoso, phala kua kuatekesa kubhanga dingi o ukamba ni muene. Kiebhi kieji bhanga o kima kiki, sé kulungulula o itumu iê? Tua-nda di longa o maka enhá.

14. (a) Kala ki tanga o divulu dia Nzuá 3:16, ihi ia bhange Nzambi phala kubhulula o athu ku kituxi ni kalunga? (b) Ihi i tu tena kulonga o athu?

¹⁴ Tanga Nzuá 3:16. Athu avulu u tuixana phala o fesa ia Lembalasa, ejiia o izuelu ia velusu íii. Maji kiebhi o sata ia kukula ia Jezú, i kuatekesa kutambula o muenhu ua kalela-ku? Tuala ni ujitu ua kukuatekesa o athu kuijiia o kitambuijilu kia kibhuidisu kiki, kioso ki tua-nda kua ixana phala kuia mu fesa ia Lembalasa, kioso ki tua-nda kala nau mu fesa ia Lembalasa, ni kioso ki tua-nda kua kunda dingi. Se ene a tendela kiambote o milongi ia lungu ni sata ia kukula, a-nda mona kuila, Jihova ua a zolo kiavulu, ni kuila, muene njimu. Ihi i tu tena kua longa ia lungu ni sata ia kukula?

15. Mukonda diahi Jezú ka di fuile ni Adá?

¹⁵ Jihova ua bhana diiala dia iuka, diexile  ni kutena kua kubhana o muenhu uê kala sata ia kukula. O diiala didi, ua tokalele kulondekesa o ufiiele uê kua Jihova. Muene ua tokalele kukala polondo phala kubhana o muenhu uê, phala kubhulula o athu. (Loma 5:17-19) Tundé ku diulu, Jihova ua tumikisa Jezú mu ixi. Muene uexile o muthu a diangele ku mu bhanga kua Nzambi. (Nzuá 1:14) Mu kiki, Jezú uexile muthu ua iuka, kala kiexile Adá. Maji Jezú ka bhange kala kia bhangele Adá. Mu veji dia kiki, muene ua bhange o ima ioso ia tokalele kubhanga o muthu ua iuka, kala kia mesenene Jihova. Né muene kioso kia dibhana ni jitendasá ja makota, muene ka bhukumukina né ngó kitumu kia Nzambi.

16. Mukonda diahi o sata ia kukula, ujitu ua dikota?

¹⁶ Kuma Jezú uafu ni kuiuka kuê, muene ua tena kubhulula o athu ku kituxi ni kalunga. Muene ua bhange o ima ioso ia tokalele kubhanga Adá. Jezú uexile muthu ua iuka. Muene ua belesela Nzambi ni ufiiele uoso. (1 Timote 2:6) Muene uafu bhu kididi kietu. Mukonda dia sata iê, o maiala, ni ahatu oso, ni tuana tuoso, ala ni kidielelu kia kukala ku muenhu katé ku hádia ni hádia. (Matesu 20:28) O sata ia kukula, iene o sabhi i jikula o dibhitu, phala o vondadi ia Nzambi ku di kumbidila.—2 Kolindo 1:19, 20.

17. Ihi ia-nda bhita ni athu mukonda dia sata ia kukula?

¹⁷ Phala kukula o athu, Jihova ua bhana kima kia dikota. (1 Phetele 1:19) Kuma tuala ni valolo iavulu bhu pholo iê, muene ua kexile polondo phala ku bhana Mon’ê, phala  kufua bhu kididi kietu. (1 Nzuá 4:9, 10) Mu kiki, mu veji dia Adá kukala tat’etu, Jezú muéne ua kituka tat’etu. (1 Kolindo 15:45) Jezú ka tu bhana ngó o kidielelu kia kutambula o muenhu ua kalela-ku. Muene ua tu bhana ue o ujitu ua kubhanga dingi mbandu ku muiji ua Nzambi ku hádia. Bhu kaxi ka sata ia kukula, o athu a-nda kala dingi athu a iuka. Jihova ua-nda kua xikina dingi ku muiji uê, sé kulungulula o itumu iê muéne. Xinganeka o kisangusangu ki tua-nda kala na-kiu, kioso o athu a londekesa o ufiiele uâ kua Jihova, a-nda kituka athu a iuka! Ku disukilu, o athu oso ku diulu ni mu ixi, a-nda kala muiji umoxi ngó. Etu enioso tua-nda kala an’â Nzambi.—Loma 8:21.

18. Kithangana kiebhi Jihova ua-nda ‘tumina ku thandu dia ima ioso’?

¹⁸ Sumbala o jitata jetu ja dianga a ditunu Jihova, muene ua suluka ni kuzola o athu, anga u a bhana o sata ia kukula. Sumbala tu akua ituxi, Satanaji ka tena ku tu fidisa kulondekesa o ufiiele uetu kua Jihova. Bhu kaxi ka sata ia kukula, Jihova ua-nda tu kuatekesa kukala athu a iuka. Xinganeka kiebhi ki tua-nda kala, kioso o athu a xikana Jezú a-nda tambula o muenhu ua kalela-ku! (Nzuá 6:40) Kuma Tat’etu njimu, mukuâ henda, muene ua-nda kumbidila o vondadi iê, ni kukuatekesa o athu kukala athu a iuka. Mu kubhanga kiki, Jihova ua-nda tena ku ‘tumina ku thandu dia ima ioso, sé mbambe.’—1 Kolindo 15:28.

19. (a) Se tu sakidila muéne o sata ia kukula, ihi i tua-nda bhanga? (Tala o kaxa “ Tu Kolokote mu Kusota o Athu a Mesena Kuijiia Nzambi.”) (b) Ihi i tua-nda di longa mu milongi ia-nda kaiela?

¹⁹ Se tu sakidila muéne o sata íii, tua-nda bhanga ioso phala kuboka o njimbu ia lungu ni ujitu iú ku akuetu. O athu a bhingi kuijiia kuila, bhu kaxi ka sata íii, Jihova u bhana ku athu oso, o ujitu ua kukala ku muenhu, katé ku hádia ni hádia. Maji o sata ia kukula, i bheka dingi mabesá a mukuá. Iene i batula o maka oso a mateka Satanaji mu jaludim ia Edene. Mu milongi ia-nda kaiela, tua-nda mona kiebhi o sata ia kukula, i batula o maka enhá.