Poxolo Phaulu uejidile kuila, o jingolokela ja makutu ja Satanaji, kiluezu kia dikota phala o Jikidistá. Maji Jikidistá javulu, ka di langele ku kiluezu kiki. Mu kifika, nange sai Jikidistá mu mbanza ia Kolindo, a fikile kuila, a di langele kiambote mu nzumbi ni kuila, keji tena kua nganala kua Satanaji. (1 Kolindo 10:12) Mukonda dia kiki, Phaulu ua a tendelesa: “Kala Eva kia mu nganalele kuala o nhoka ni makutu mê, eme uami ngala ni hele, sumba ku matelu-matelu, enu uenu ilunji a mi juualesa-iu, n’a mi katule o kubheza Kristu mu kuzela ni kuiuka.”​—2 Kolindo 11:3.

O izuelu ia Phaulu i londekesa kuila ki tu tokala kudielela mu nguzu ietu. Phala kudituna o jingolokela ja makutu ja Satanaji, eie ua tokala kuijiia o kiluezu kia dikota, ni ku di langa ku jingolokela jiji.

Mu milongi íii, o jingolokela ja makutu, izuelu ki ia kidi, phala kunganala athu mba kubhilula o ukexilu uâ ua kubanza, ni ua kubhanga o ima. Sai divulu di zuela ia lungu ni jingolokela, diambe kuila o jingolokela ja makutu, “kima kiaiibha, kima ki ki tokala.” O athu amba kuila, jingolokela ja makutu, izuelu ilombolola, “makutu, ku nganala, ku dinga, kufunhisa o ibanzelu ia athu.”

O jingolokela ja makutu kima kiaiibha, mukonda sé ku kijiia, ji tena kufunhisa o ibanzelu ietu bhofele-bhofele. Tu tena ku ji sokesa ni munza uo nvenenale, ki tu tena ku u mona, né muene kuívua o dizumba diê. O ngijiie a muixana Vance Packard, uambe kuila, o jingolokela ja makutu, ji tena kubhilula o ukexilu uetu  ua kubhanga o ima, “sé etu muene ku kijiia.” O ngijiie ia mukuá, mu divulu diê di zuela ia lungu ni jingolokela, uambe kuila, o jingolokela ja makutu, ja bhangesa o athu kukala ni ukexilu uaiibha kinene kala iama. O ukexilu iú, ua bheka ujibhangânga ua dikota (ua buikisa athu avulu), ita ni izukutisu, mukonda dia kikonda ki’athu mba ngeleja.

Se athu a tena ku tu nganala ni jingolokela ja makutu, Satanaji u tena kubhanga dingi. Satanaji uene mu sota kuijiia kiambote o ukexilu ua athu tundé kia a bhange. Muéne ua mu tumina ‘o mundu uoso,’ mu kiki, u tena kusanzumuna o jingolokela jê, ku mundu uoso. (1 Nzuá 5:19; Nzuá 8:44) Satanaji “ua bhake o ilunji iâ mua vundu.” Mu kiki, bhu kaxi ka jingolokela jê, uene mu ‘nganala o mundu uoso.’ (2 Kolindo 4:4; Dijingunuinu 12:9) Kiebhi ki u tena kudituna o jingolokela jê?

Jezú ua tu bhana ndunge phala kudituna o jingolokela ja makutu, kioso kiambe: “O kidi mua-nda ku k’ijiia, o kidi anga ki mi bhana ufôlo.” (Nzuá 8:31, 32) Mu ita, o disoladi ua tokala kuijiia kuebhi kua tena kusanga o itendelesu ia kidi, mukonda o nguma u tena kumuanga jingolokela ja makutu phala kunganala. Mu kiki, kuebhi ku u tena kusanga itendelesu ia kidi? Jihova ua tu bhana o itendelesu íii, bhu kaxi ka Mak’â mê, o Bibidia. Mu Bibidia, eie u tena kusanga-mu ioso i ua bhindamena, phala kudituna o jingolokela ja makutu ja Satanaji.​—2 Timote 3:16, 17.

Mu kidi, Satanaji uejiia o maka enhá. Mu kiki, muene ua sokejeka o mundu, phala ku tu landukisa ni ku tu zozesa ku di longa o Bibidia. Kana kuehela ku ku nganala ku “jindunge joso ja Diabhu.” (Efezo 6:11) Kana kusanguluka ngó mu kuijiia tu milongi tua Bibidia. Tua tokala ku di longa kiambote phala kukala ni kuijiia kua soko kua lungu ni kidi. (Efezo 3:18) O musoneki ua madivulu, Noam Chomsky, uambe: “Sebhu muthu ua-nda kuzunzumuina o kidi kia Bibidia mu mutué ué. Eie muene ua tokala ku tungununa o kidi.” Mu kiki, sota ‘izuua ioso kutokuesa o Madivulu ma Nzambi.’​—Ikalakalu 17:11.

Satanaji ka-ndala kuila eie u banza kiambote, ni kutendela kiambote o kidi kia Nzambi ki ua mu kuívua. Mukonda diahi? Mukonda, sai divulu di zuela ia lungu ni ukexilu ua athu, diamba kuila, o athu a bhanga o jingolokela ja makutu, “a di tunda kiambote,” se o muthu “a mu zozesa n’a xikina ngó ioso.” Kana kuxikina mu ioso i uivua, sé kuxinganeka kiambote. (Jisabhu  14:15) Nzambi ua tu bhana ‘kilunji kiambote,’ ni ‘ujitu ua kuxinganeka,’ mu kiki, bhu kaxi ka maujitu iá, bhanga ioso phala kusuinisa o kixikanu kié.​—Jisabhu 2:10-15; Loma 12:1, 2.

O masoladi ene mua funhisa ku jingolokela ja makutu, a tena kukala ni uôma, mu kiki ka mesena dingi kuia mu ita. O jingolokela ja makutu, ji tena kua bhangesa kubhânga mudiâ, mba ku di kexila ku masoladi ni akuá. Sai mutuameni ua masoladi a Alemanha uambe kuila, o jingolokela ja makutu, jene ja bhangesa o kutolola o masoladi akua Alemanha mu Ita ia Dianga ia bhiti ku Mundu Uoso. Muene uambe kuila, o athu a a fuinhisa ku jingolokela ja makutu, kala athu a a kuika. Satanaji uene mu bhanga ue kiki, phala o Jikidistá ka diongeke mudiâ. Mu kifika , muene uene mu bheka kavuanza bhu kaxi ka jiphange. Nange ua bhangesa ku banza kuila, o kilunga kia Jihova kiala ni katombo, mba kia mu bhanga ima iaiibha, phala o jiphange a tunda mu kilunga kia Nzambi.

Kana kuehela ku ku nganala! Kaiela o milongi ia Mak’â Nzambi, ni u diongeke kumoxi ni jiphange jé mu kilunga. Mu kifika, o Bibidia i tu suinisa kusuluka “mu di loloka,” ni kulenguluka mu kubatula o maka oso a moneka. (Kolose 3:13, 14; Matesu 5:23, 24) Iene i tu dimuna ue phala ki tu sondoloke mu kilunga. (Jisabhu 18:1) Bhanga ioso phala ku di pelepalala kiambote mu ku tolola o jingolokela jaiibha ja Satanaji. Dibhudise: ‘O kizuua kia ngi xingi ku phang’iami, o kuila, o i nga bhange ia sangulukisa Nzambi, mba Satanaji?​—Ngalásia 5:16-26; Efezo 2:2, 3.

O disoladi dia kambe kukala fiiele ku mutuameni uê, ka-nda bhânga kiambote mu ita. Mu kiki, o jinguma a bhana jingolokela ja makutu, phala ka dielele dingi ku mutuameni uâ. Se o atuameni a ita, a lueza, o jinguma jâ, a-nda kuata o maka enhá phala kuzuela kiki: “Enu ki mu tokala ku a dielela, ki mu a ehele kuila a mi ambata mu divuua!” Kiene ue ki bhanga Satanaji. Muene uene mu zozesa o kidielelu kietu, phala ki tu dielele ku jiphange ja te Jihova ku pholo phala kuendesa o mundu uê.

Kiebhi ki u tena o ku dilanga? Bhanga ioso phala kukala mu kilunga kia Jihova. Suluka mu kukala fiiele ni kukuatekesa o jiphange a mu kuendesa o kilunga kia Jihova, né muene ene akua ituxi. (1 Tesalonika 5:12, 13) O akua  kulungulula o kidi, ni athu a mukuá ene mu nganala, a tena kubhana jingolokela ja makutu ja lungu ni kilunga kia Nzambi. (Tito 1:10) Né muene se o ima ia zuela nange ilondekesa kuila kidi, kana kuehela ku “kulungujuka mu ixinganeku” iê. (2 Tesalonika 2:2) Kaiela o milongi ia bhanene Phaulu kua Timote: “Xikama mu ima ioso i ua di longa jinga,” ni ku di lembalala kuila “o jimesene jé mu kuxikana, a ku longoio.” (2 Timote 3:14, 15) Xinganeka mu ima ioso i londekesa kuila, eie u tena kudielela ku kimbadi kia fiiele, kia te Jihova ku pholo ku hama ia mivu ndenge, phala ku tu longa o kidi.​—Matesu 24:45-47; Jihebeleu 13:7, 17.

Satanaji u tena ue ku ku funhisa mu maukexilu a mukuá. Sai bhabha, muene u tu kuatesa uôma. O divulu di zuela ia lungu ni jingolokela, diamba kuila, o kukuatesa uôma ku athu “ukexilu uokulu ua kubhana jingolokela ja makutu.” Philip M. Taylor, mesene mukua Grã-Bretanha ua soneka kuila, akua Asídia, exile mu kuatesa uôma ku jinguma jâ, phala kua tolola. Satanaji ua-nda bhangesa kuila, o uôma ua athu, ua kufua, ni ua izukutisu, u tu fidisa kusidivila Jihova.​—Izaia 8:12; Jelemiia 42:11; Jihebeleu 2:15.

Kana kuehela Satanaji ku ku kuatesa uôma! Jezú uambe: “Kana ku kala ni uôma ua iá a jibha o mukutu, o ki a zubha ku u jibha, ka tena kubhanga dingi kima.” (Luka 12:4) Dielela ni muxima uoso kuila, Jihova ua-nda suluka mu kukumbidila o kikanenu kiê kia ku langa, mu ku ku bhana “o nguzu i lenda ioso,” ni mu ku kuatekesa kulenga o mibhetu ia Satanaji.​—2 Kolindo 4:7-9; 1 Phetele 3:14.

Mu kidi, kua-nda moneka kithangana, eie ua-nda divua ubheka ni kukala ni uôma. Maji, lembalala o izuelu ia tange Jihova kua Josuué: “Kala u kindanda, u kole kiambote muxima; kana kukala ni uoma, kana kukala ni kekènha; kuma Jihova, Nzambi ié, uala-nê kumoxi kuoso-kuoso ku aia.” (Josuué 1:9) Se u kala ni hele, samba kua Jihova ia lungu ni ima i ku thandanganhesa. Ejiia kuila, “o kutululuka kua Nzambi kua somboka o kitongoluelu kioso kia muthu, kuanda ku mi bateka mixima ni ilunji.” Mu kiki, ua-nda kala ni nguzu phala kudituna o jingolokela ja makutu ja Satanaji.​—Filipe 4:6, 7, 13.

O kuila ua mu lembalala hanji o jingolokela ja makutu ja mukunji ua akua Asídia, Labesaki, kioso kia xonguena o mundu ua Nzambi? Muene ua mesenene kuila, akua Izalaiele eji xikina kuila, sé-ku muthu ueji kua langidila, né muene Jihova. Muene uambe kuila, Jihova ua mu tumine kubuikisa Jeluzaleme. Kiebhi Jihova kia mu vutuila? Jihova uambe: “Ku kale ni uoma mukonda dia maka u uevu ni izuelu ioso ia ngi xonguena na-iu eme kuala abhika a sobha ia Asídia.” (2 Jisobha 18:22-25; 19:6) Mu kusuluka, Jihova ua tumikisa anju ia jibha 185.000 ja masoladi akua Asídia, mu usuku umoxi ngó!​—2 Jisobha 19:35.

O kuila, sai kizuua ua tale kiá filme mua kexile muthu, a kexile mu mu nganala? Nange ua mesenene ku mu tangela: ‘Ku xikiné! Ene a mu ku nganala!’ Kindala, xinganeka kuila, o jianju a mu ku tangela: “Kana kuxikina o makutu a Satanaji!”

Mu kiki, kana kubhana mátui mu makutu a Satanaji. (Jisabhu 26:24, 25) Ívua Jihova, mu dielela mu ioso i u bhanga. (Jisabhu 3:5-7) Muene ua ku zolo, iu ua ku tangela: “Dimuka mon’ami, u tanese o muxima uami.” (Jisabhu 27:11) Se u bhanga kiki, ua-nda tolola o ibanzelu ié iaiibha!