Atangi a Madivulu Metu Ebhula
O kuila o Kidistá ua tokala kukala ni uta phala kudilanga ku jibandi?
Mu kusola o ukexilu ua kudilanga, o Jikidistá a kaiela o ijila ia Bibidia. O ijila ia Bibidia ilondekesa kuila, kituxi o Kidistá kukala ni uta, phala kudilanga ku jibandi. Xinganeka mu milongi ia kaiela:
Jihova u mona o muenhu ua athu kala kima kikôla. O mukuá jisalamu Davidi, ua soneka ia lungu ni Jihova: “Ko kué kuene kuala o [kito] kia muenhu.” (Jisálamu 36:9) Mu kiki, se o Kidistá u mesena ku di langa, mba kulanga o jimbote jê, muene ua tokala kubhanga ioso, phala ka kale ni kikuma kia manhinga. Kiki kilombolola kuila, muene ka tokala kukala ni kikuma kia kubhubhisa manhinga.—Matendelelu 22:8; Jisálamu 51:14.
Tuejiia kuila, kima kioso-kioso ki tu kuata phala ku dilanga ku jibandi, ki tena kujibha. Maji se muthu u kala ni uta, u tena kujibha ni lusolo, né muene se ka ki bhange mu luelu. * (Tala ku luiji.) O muthu uala ni njinda, se u mona uta, o njinda iê i tena ku di bandekesa dingi. Mu kiki bhu tena kufua muthu.
M’usuku ande dia kufua, Jezú ua tumina o maxibulu mê kuambata jixibhata. Maji o jixibhata jenhojo, ki jexile phala kudilanga kana. (Luka 22:36, 38) Mu veji dia kiki, Jezú ua mesenene ku a longa disá dia dikota: O akaiedi’ê, ka tokalele kubhânga, né muene se o jinguma jexile ni mauta. (Luka 22:52) Kioso Phetele kia batuile o ditui dia selevende ia mukunji ua dikota ni xibhata, Jezú ua tangela Phetele, uixi: “Fomeka dingi o xibhata ié mu kizu.” Mu kusuluka, Jezú ua bhana kitendelesu, kiene mu kaiela o Jikidistá katé mu izuua ietu. Muene uambe: “Oso a katula xibhata, a kà fua ku xibhata.”—Matesu 26:51, 52.
Kala kio kanene mu divulu dia Mikeia 4:3, o mundu ua Nzambi o ‘jixibhata jâ a ji sulu kiá matemu phala kudima, o mifula iâ a i bhange jimvo.’ O athu ejiia kuila, o Jikidistá ja kidi a sota o paze mba kutululuka. Ene a kaiela o itumu ia bhana Nzambi bhu kaxi ka poxolo Phaulu, kia kukamba “ku vutuila muthu uoso-uoso phulu mu phulu,” maji a sota kukala “ku paze ni athu oso.” (Loma 12:17, 18) Sumbala Phaulu ua bhiti mu ima ia bhonzo kála mu “[iluezu] ia mii,” muene ka sotele kuxibhaka o itumu ia Bibidia, phala ku di langa. (2 Kolindo 11:26) Mu veji dia kiki, muene ua dielelele kua Nzambi, uejidile kuila, o itendelesu ia Bibidia ia beta-o-kota “o mata a ita ndenge.”—Ndongixi 9:18.
O Jikidistá ejiia kuila, o muenhu ua beta-o-kota, o jimbote ndenge. Tuejiia kuila, o “muenhu ua muthu ki u tundu mu umvuama uê ua kuvula o jimbongo.” (Luka 12:15) Mu kiki, se tua soto kuzuela ni bandi mba muii mu ukexilu uambote, maji ka mu tu bhana mátui, tua tokala kukaiela o kitendelesu kia Jezú, kioso kiambe: “O dilebhu kana kubhânga na-diu.” Kiki kilombolola kuila, tu muehela kuambata o ima ia mesena. (Matesu 5:39, 40; Luka 6:29) * (Tala ku luiji.) Mu kidi, tua tokala kubhanga ioso, phala ki tu di te mu iluezu ia jibandi mba ia mii. Se tu kaiela o kitendelesu kia Bibidia kia lungu ni kudituna o “izala mu ima ioso iene ku muenhu,” nange o jibandi ki ja-nda kuiza mu tu nhana. (1 Nzuá 2:16) Kima kiambote ue se o jivizinhu jetu ejiia kuila, tu Jimbangi ja Jihova ni kuila, tu akuâ kutululuka.—Jisabhu 18:10.
O Jikidistá a xila o kitongoluelu kia akuâ. (Loma 14:21) Sai jiphange, nange a tena kudivua kiaiibha, mu kuijiia kuila sai phange uala ni uta phala kudilanga ku mii. Nange o jinguvulu ji tuehela kukala ni uta phala kudilanga, maji mukonda dia henda ietu ku jiphange jetu, ki tu mesena kubhanga kima kioso-kioso ki tena ku a bhangesa kudibhala, mba kudivua kiaiibha.—1 Kolindo 10:32, 33; 13:4, 5.
O Jikidistá a tokala kubhana phangu iambote ku akuâ. (2 Kolindo 4:2; 1 Phetele 5:2, 3) Se phange u kala ni uta phala ku dilanga, o tufunga a tokala ku mu bhana itendelesu ia tokala bhu kaxi ka Bibidia. Se muene ka xikina o itendelesu, anga u kala muene ni uta, muene ki phangu iambote. Mu kiki, ka tokala kukala ni ujitu mba ikalakalu mu kilunga. Kiene ue kimoxi, ni phange u kalakala ni uta mu sidivisu iê. Kima kiambote se muene u sota salu iengi. *—Tala ku luiji.
O kidistá muene ua tokala kusola kiebhi kia-nda di langa, kulanga o muiji uê, o jimbote, ni kuebhi kua-nda kalakala. Maji mu kusola o ima iii, ua tokala kutokuesa kiambote o milongi ia Bibidia. O Nzambi ietu ia unjimu, ua tu bhana ijila ia tokala, mukonda ua tu zolo. Mukonda dia kiki, o Jikidistá jala ni ukamba uambote ni Jihova, ka sota kukala ni uta, phala kudilanga. Ene ejiia kuila, se a dielela kua Nzambi, ni kukaiela o ijila ia Bibidia ku mienhu iâ, a-nda kala ni kukondama kua kidi, katé ku hádia ni hádia.—Jisálamu 97:10; Jisabhu 1:33; 2:6, 7.
Mu kithangana kia hadi ia dikota, o Jikidistá ka-nda zoka, maji a-nda dielela kua Jihova
^ kax. 3 O Kidistá u tena kusola kukala ni uta phala kutomba iama phala kudia, mba phala kudilanga ku iama ia mixitu. Se o muthu ka mu tomba, ua tokala kubhaka kiambote o uta, ni kukatula-mu o jibala. Sai jixi, o jinguvulu kehela o athu kukala ni mauta, mba nange o jinguvulu ji bhana itumu ia lungu ni kukalakala ni mauta. Mu ididi iii, o Jikidistá a tokala kubelesela o itumu ia jinguvulu.—Loma 13:1.
^ kax. 6 Phala kuijiia dingi ia lungu ni kiebhi ki tu tena ku di langa ku kiluezu kia athu a jijidika akuâ kuzeka nau, tanga o milongi “Como evitar o estupro” mu Despertai! 8 de Março de 1993.
^ kax. 2 Phala kuijiia dingi ia lungu ni salu i bhinga kukuata mauta, tanga A Sentinela 1 de Novembro de 2005, página 31; ni 15 de Julho de 1983, páginas 25-26.
