1-3. (a) Nange thembu kuxi kia soneka o Sálamu 147? (b) Mbote jebhi ji tu katula mu kudilonga o Sálamu 147?

TUENE mu ximana dingi o athu a zuela, mba a bhanga ima i tu diuanesa. Mu kiki, sai ima iavulu i tu suinisa kuximana Jihova Nzambi! Tu mu ximana mukonda dia kutena kuê kua dikota, ku tu mona mu ibhangelu iê, tu mu ximana ue mukonda dia henda iê ia dikota, ia tu londekesa mu kubhana Mon’ê kala sata, phala ku tu kula.

² Kioso ki tu tanga o divulu dia Jisálamu 147, tu tena kumona kuila, o musoneki ua mesenene kiavulu kuximana Jihova. Muene ua suinisa ue akuâ kuximana Nzambi.​—Tanga Jisálamu 147:1, 7, 12.

³ Ki tuejiia se nanhi ua soneka o Sálamu 147. Maji nange o musoneki, ua kexile ku muenhu kioso akuâ Izalaiele kia vutuka mu mbanza ia Jeluzaleme, kioso Jihova kia a bhuluile mu Babilonha. (Jisálamu 147:2) O mukuá Jisálamu ua ximana Jihova, mukonda o mundu uê ueji tena kubheza dingi Jihova, mu ixi iâ. Muene ua soneka o ima ieji kua suinisa kuximana Jihova.  Ima iebhi? Ni ihi i tena ku kubhangesa kudikola: “Ximanenu Jihova!”?​—Jisálamu 147:1.

4. Mukonda diahi akua Izalaiele a tolokele o mixima, maji kiebhi kia divuile kioso Sobha Silu kia a bhulula?

⁴ Xinganeka kiebhi kia divuile o akua Izalaiele, kioso kia a kuikile mu ixi ia Babilonha. O akua Babilonha exile mu a xonguena, mu kuzuela: “Tu imbidienu hanji muimbu uoso-uoso ua Ziione.” Maji o Jijudé kexile mu kuimba ni kisangusangu. Ene ka sangulukile, mukonda o mbanza ia Jeluzaleme a i buikile. (Jisálamu 137:1-3, 6) Ene a tolokele o muxima, a bhindamene kikuatekesu. Kala kia kanene o Mak’â Nzambi, Jihova ua kuatekesa o mundu uê. Kiebhi kia bhange kiki? O sobha Silu mukua Pelesa, ua tolola o ixi ia Babilonha. Mu kiki, Silu ua zuela ia lungu ni Jihova: “[Muene] ua ngi tumu ku mu tungila inzu mu Jeluzaleme.” Muene ua zuela dingi ku akuá Izalaiele uixi: “Uoso uala momuenu, ua zuama muene ku kifuxi kiê, a bande, Jihova Nzambi iê a kale ni muene.” (2 Malunda 36:23) O izuelu ia Silu, ia suinisa kiavulu o akua Izalaiele akexile mu ixi ia Babilonha!

5. Ihi iambe o mukua jisálamu ia lungu ni kutena kua Jihova kua ku tu kuatekesa?

⁵ Kála kia bhangele ni kifuxi kioso, Jihova ua suinisa ue muthu ni muthu, ua tokalele ku kifuxi kia Izalaiele. Jihova ka lunguluka. O mukua Jisálamu ua soneka o kima kia bhange Nzambi. Muene uambe: “Akexe ni kikote kia muxima u a saka, hé u a tumba o italákanha ia malamba mâ.” (Jisálamu 147:3) Kioso ki tu kata, mba ki tu kala ni kikote ku muxima, tu tena kudielela ni kidi kioso kuila, Jihova u tu langa. Jihova ua mesena ku tu kuatekesa ni ku tu konda o malamba metu. (Jisálamu 34:18; Izaia 57:15) Muene u tu bhana o unjimu ni nguzu i tu bhindamena, phala tu kolokote mu ibhidi i moneka ku muenhu uetu.​—Tiiaku 1:5.

6. Ihi i tu longa o izuelu iala mu divulu dia Jisálamu 147:4? (Tala o foto ia dianga.)

⁶ Mu kusuluka o mukua jisálamu ua tale ku diulu, iu uambe kuila, Jihova ‘u kuata ji konda dia jithéthembua,’ hé “u j’ixana joso muene mu majina mâ.” (Jisálamu 147:4) O mukua jisálamu ua tenene kumona o jithéthembua, maji kejidile se ja tenene jikuxi. Lelu, o jingijiie, ejiia kuila kuene mazunda ni mazunda a jithéthembua mu kibuka kietu. Nange kuene mazunda ni mazunda a ibuka a jithéthembua! O athu ka tena kuijiia o jithéthembua joso, maji o Mubhangi u tena. Mu kidi, muene ua ji jiia kiambote, iu ua bhana majina ku jithéthembua joso. (1 Kolindo 15:41) Kuma Nzambi uejiia kala théthembua kuebhi ku iala, muene ua ku ijiia ue. Muene uejiia kuebhi ku uala, kiebhi ki u divua, ni ihi i ua bhindamena!

7, 8. (a) Ihi iejiia Jihova ia lungu n’etu? (b) Bhana phangu i londekesa o henda ia Jihova?

⁷ Jihova uejiia ia mu bhita n’eie, muene u tena ku kukuatekesa kubatula o maka mé. (Tanga Jisálamu 147:5.) Nange u mona  kuila, o maka mé avulu, ki ua-nda tena ku dibhana nau. Nzambi uejiia kuebhi ku suka o nguzu ié, muene “u lembalala kuma tuala tu mavu.” (Jisálamu 103:14) Kuma tu akua ituxi, tuene mu lueza mu ithangana iavulu, mukonda dia kiki, tu tena kudivua kiaiibha. Kioso ki tu banza mu ima iaiibha i tua zuela, ku jihanji jetu jaiibha, ni difuba di tua londekesa mukonda dia maujitu a akuetu, tu divua kiaiibha. Jihova kene mu lueza, maji uejiia kiambote kiebhi ki tu divua.​—Izaia 40:28.

⁸ O kuila eie ua mono kiá o kutena kua Jihova ku muenhu ué kioso ki ua kexile mu bhita ni maka? (Izaia 41:10, 13) Kiki kia bhiti ni muboki ua thembu ioso, a mu ixana Kyoko. Kioso kiai mu kilunga kiéngi, muene ua mateka kudivua kiaiibha. Maji kiebhi Kyoko kiejidile kuila Jihova uejidile o maka mê? Mu kilunga kia ubhe mua kexile jiphange javulu, ejiidile kiebhi kiexile mu divua. Muene ua divuile kuila, Jihova ua kexile mu mu tangela: “Nga ku zolo, ki mukonda eie u muboki ua thembu ioso, maji mukonda eie u mon’ami, ua dibhakula ko kuami. Eme nga mesena kuila, u sanguluka mu kukala Mbangi iami!” Kiebhi Jihova kiene mu londekesa kuila, “o kuijiia kuê ki kuene mbambe?”

9, 10. Jihova u tu kuatekesa mu maukexilu ebhi? Bhana phangu.

⁹ Etu enioso tua bhindamena kúdia, izuatu ni inzo. Nange u thandanganha se ua-nda kala ni kúdia kua soko, phala o izuua ku pholo. Maji, Jihova u bhana kúdia kua soko phala athu oso mu ixi, katé muene phala o “an’a ilombelombe kioso ki i dikola kua muene.” (Tanga Jisálamu 147:8, 9.) Se Jihova u dikila o ilombelombe, tu tena kudielela kuila, muene ua-nda tu bhana o ima i tua bhindamena.​—Jisálamu 37:25.

¹⁰ Jihova u tu bhana o ima i tua bhindamena, phala tu kale ni kixikanu kia kolo. Muene u tu bhana ue “o kutululuka kua Nzambi kua somboka o kitongoluelu kioso.” (Filipe 4:6, 7) Sai phange a muixana Mutsuo ni muhatu’ê, a mono o kikuatekesu kia Jihova. Kioso kia bhiti divuua mu ixi ia Japão ku muvu ua 2011, phala kubhuluka, a habe ku thandu dia inzo iâ. Mu kizuua kieniókio, o jimbote jâ, ja diboto. Ene a bhiti usuku mu ditala dia inzo iâ, mu kididi muenhomo mua vundile, mua talalele ue kiavulu. Mu kimene, ene akexile mu sota kima phala kua kolokotesa. Ene a sange ngó, divulu Anuário das Testemunhas de Jeová de 2006. Kioso Mutsuo kia jikula o divulu, muene ua mono o mbandu iambe: “Os maiores tsunamis já registrados.” O mbandu ien’ii ia londekesa kuila, o kitungutu kia’xi, kia bhiti mu ixi ia Sumatra ku muvu ua 2004, kia betele kota mu kubuikisa o ima, o ia bhitile ndenge. Kioso Mutsuo ni muhatu’ê, kiexile mu tanga o musoso iú, a didi. Ene a divuile kuila, Jihova ua a bhanene o kikuatekesu kia bhindamene. Jihova ua a kuatekesa ue mu ukexilu uengi. O jiphange mu jimbanza ja mukuá mu ixi ia Japão, a a tumikisa kúdia ni izuatu. Maji, o kima kia betele kota mu ku a kolokotesa, o kutambula o jiphange akua kukunda o ididi muene mu bhita o mavuua. Mutsuo uambe: “Nga divu kuila, Jihova ua kexile bhuamoxi n’etu, iu ua tu lange muene.” O musoso iú, u tu longa ima iiadi: Kia dianga, Nzambi u tu bhana o ima i tua bhindamena, phala kukolesa o kixikanu kietu. Kia kaiiadi, u dikila o ibhindamu ietu mu xitu.

11. Ihi i tua tokala kubhanga phala kukatula mbote ku kikuatekesu kia Nzambi?

¹¹ Jihova “u zangeleka ió a di tululula.” Muene uala polondo phala ku tu kuatekesa. (Jisálamu 147:6a) Kiebhi ki tu tena ku katula mbote mu kikuatekesu kiê? Tua tokala kukala ni ukamba uambote ni muene. Phala kukala ni ukamba uambote ni Jihova, tua tokala tu kala tu athu a lenduka. (Sofoniia 2:3) O athu a lenduka a dielela kuila, Jihova muéne ua-nda zubha o kuiibha kuoso ni hadi. Mu kiki, Jihova u zola o athu a londekesa o ukexilu iú.

12, 13. (a) Phala kukatula mbote ku kikuatekesu kia Nzambi, ihi i tua tokala kuzemba? (b) Jihova ua uabhela o athu a ukexilu uebhi?

¹² Ihi i bhita ni akua kubhukumuka? O Bibidia i zuela kuila, Nzambi ‘u lundumuna bhoxi o athu abhukumuka.’ (Jisálamu 147:6b) Ki tua-ndala kuila kiki ki bhita n’etu!  Tua mesena kuila Nzambi, u tu londekesa o henda ia kidi. Mu kiki, tua tokala kuzemba ioso ia zembe muene. (Jisálamu 97:10) Mu kifika, etu tua tokala kuzemba o undumbu. Kiki kilondekesa kuila, tua tokala kulenga ioso, katé muene ni kutala o undumbu mu mitelembe. (Jisálamu 119:37; Matesu 5:28) Nange ki bhinga kubhanga nguzu ia dikota, maji se tu bhanga kienhiki, Jihova ua-nda tu besoala.

¹³ Phala kutolola o jihânji jetu ja iibha, tua tokala kudielela kua Jihova, kana mu nguzu ietu. Kioso kia bhanga ita, o athu a dielela mu ‘nguzu ia jikabalu,’ mba mu “inama ia bhebhuluka ia diiala.” (Jisálamu 147:10) O kuila tua tokala kudielela ku athu mba mu nguzu ietu? Mu kidi, etu ki tu tena kubhanga kima mu nguzu ietu. Mukonda dia kiki, tua tokala kusuluka mu kusamba kua Jihova, mu ku mu bhinga kikuatekesu phala kutolola o jihânji jetu jaiibha. Jihova ka-nda bhuila mu kuívua o misambu kala íii. ‘Jihova ua uabhela o athu a mu kala ni uôma, ni athu oso a dielela ku jihenda jê-muène.’ (Jisálamu 147:11) Kuma Jihova muthu ua fiiele, muene ua-nda tu kuatekesa kutolola o jihanji jetu ja iibha.

14. Mukonda diahi o mukua jisálamu ua dielele kua Jihova?

¹⁴ Jihova ua tu kanena kuila, kioso ki tu kala ni maka, ua-nda tu kuatekesa. Kioso akua Izalaiele kia vutuka mu Jeluzaleme, mukua jisalamu ua xinganeka kiebhi Jihova kia a kuatekesa. O mukua jisálamu uembi: “Mukonda muene ua kolesa dingi o jitalanga ja mabhitu mé; an’é moxi dié ua a bhana kuzediua. Muene ua ku bhana o kutululuka katé kua suku o mbambe ié.” (Jisálamu 147:13, 14) O mukua jisálamu ua kexile ni kidielelu mukonda, Jihova ua kexile mu langa o mabhitu a mbanza. Kiki kia mu bhele kidielelu kia kuila, Jihova ueji langa o mundu uê.

15. Sai ithangana, kiebhi ki tu divua mukonda dia ibhidi ietu?

¹⁵ Sai ithangana, tu thandanganha mukonda dia ibhidi i tua mu bhita na-iu, maji Jihova u tena ku tu bhana unjimu phala kudibhana na-iu. O mukua jisálamu uambe kuila, Nzambi “u tubhula o ngonge iê mu ngongo;  kizuelu kiê kienda muene lusolo.” O mukua jisálamu ua tumbula o mufuke, o matadi a mvula ni mbundu, iú uebhula: “O ku mbàmbi iê, nanhi u tena kuimana-ku?” Mu suluka muene uambe kuila, Jihova ‘u tuma dingi kizuelu kiê, anga ene a sengumuka.’ (Jisálamu 147:15-18) Nzambi ietu uejiia o ima ioso, u tena kubhanga kima kioso-kioso, u kondoloka o matadi a nvula ni mufuke. Kiki kilondekesa kuila, muene u tena ku tu kuatekesa ku di bhana ni maka oso-oso a moneka.

16, 17. (a) Kiebhi Jihova kia tu kuatekesa bhu kaxi ka Maka mê? (b) Bhana phangu ilondekesa kiebhi o Mak’â Nzambi kia tu kuatekesa mu kithangana kia tokala.

¹⁶ Lelu Jihova uene mu tu endesa bhu kaxi ka Maka mê, o Bibidia. O mukua Jisálamu uambe kuila Jihova o “kizuelu kiê kienda muene lusolo,” phala ku tu kuatekesa. Nzambi u tu kuatekesa ni lusolo mu kithangana kia tokala. Xinganeka kiebhi ki uene mu katula mbote ku milongi ia Bibidia, ku madivulu ene mu tu bhana o ‘kimbadi kia fiiele,’ ku JW Broadcasting, jw.org, ku tu funga ni ku jiphange jetu. (Matesu 24:45) O kuila ua tambuile kiá o kikuatekesu kia Jihova mu kithangana kia tokala?

¹⁷ Sai phange ia muhatu a muixana, Simone ua mono kiebhi kia mu kuatekesa ku milongi ia Mak’â Nzambi. Muene ua divuile kala muthu ua kambe valolo, ua banzele kuila Jihova ka mu bhana valolo. Maji kioso kia divuile kienhókio, muene ua kuata kusamba kua Jihova, mu kubhinga kikuatekesu. Muene ua suluka mu ku di longa o Bibidia. Simone uambe: “Mu ibhidi i nga bhiti, nga divu kuila, Jihova ua kexile mu ngi kuatekesa ni ku ng’endesa.” Kutanga o Mak’â Nzambi kia mu kuatekesa kukala ni ibanzelu iambote ia lungu ni Jihova.

18. Mukonda diahi, eie u fika kuila, Jihova uala ku mbandu ié? Mukonda diahi tua tokala ‘kuximana Ji-hova’?

¹⁸ O mukua jisálamu uejidile kuila, mu ifuxi ioso mu ixi, Jihova ua solele o muiji ua Izalaiele phala kukala mundu uê. Ene exile o kifuxi kia tambuile o “Maka” ni “ijila” ia Nzambi. (Tanga Jisálamu 147:19, 20.) Lelu, tuala ni ujitu ua dikota ua ku tuixana mu dijina dia Nzambi. Tu sakidila kiavulu mu ku muijiia, tuala ni Maka mê phala ku tuendesa, tu tena ku mu zukama dingi kala kamba dietu dia kazola. Kala o musoneki ua Sálamu 147, etu tua tokala ‘kuximana Jihova,’ ni kusuinisa akuetu ku mu ximana ue.