1-3. (a) Mukonda diahi tu dielela kuila, tu tena kukala makamba a Nzambi? (b) Ihi i tua-nda di longa mu milongi íii?

MU BIBIDIA, Mbalahamu a mu ixana kamba dia Nzambi mu veji jitatu. (2 Malunda 20:7; Izaia 41:8; Tiiaku 2:23) Muene ngó o muthu a mu ixanene kala kamba dia Nzambi. O kuila kiki kilombolola kuila, Mbalahamu muene ngó ua tena kukala kamba dia Jihova? Kana. O Bibidia ilondekesa kuila, etu enioso tu tena kukala tu makamba a Jihova.

² Mu Mak’â Nzambi, muala misoso iavulu ia lungu ni maiala ni ahatu a fiiele. O athu enhá a belesele Jihova, a mu dielele, iá a kitukile makamba mê. (Tanga Jisálamu 25:14.) Ene a bhangele mbandu ia “kifuxi kionéne kia jimbangi javulu,” kia tumbula Phaulu. Athu iá exile makamba a Nzambi.​—Jihebeleu 12:1

³ Tua-nda di longa phangu ia athu kitatu exile makamba a Jihova, a a tange mu Bibidia: (1) Lute, uexile mutudi ua fiiele mu ixi ia Mouabhe, (2) Ezekiia, uexile sobha ia fiiele mu ixi ia Judá, ni (3) Madiia, manh’â Jezú. Ihi i tu tena ku di longa  mu ukexilu ua athu iá ku kituka makamba a Nzambi?

4, 5. Kibhidi kiebhi kia dibhana na-kiu Lute, ni mukonda diahi kia bhonzele? (Tala o foto ia dianga.)

⁴ Nouemi ni jimbalakaji jê, Lute ni Olofa, akexile mu kuenda njila ia lebha, tundé mu ixi ia Mouabhe, katé mu ixi ia Izalaiele. Mu kaxi ka njila, Olofa ua banze kuvutuka ku dibhata diê mu ixi ia Mouabhe. Maji Nouemi ua mesenene kuvutuka ku ixi iê kua mu vualela mu Izalaiele. Ihi-phe ia bhange Lute? Muéne ua tokalele kubatula mak’â bhonzele. O kuila muéne ueji vutuka ku ixi ia Mouabhe, phala kukala kumoxi ni muiji uê, inga ueji kala kumoxi ni ukouê Nouemi ni kubhanga njila katé mu mbanza ia Beleme?​—Lute 1:1-8, 14.

⁵ O muiji ua Lute ua kexile mu ixi ia Mouabhe. Muéne ueji vutuka ku muiji uê, phala ku mu dikila o ibhindamu iê. Lute uejidile kiambote o athu, o dimi, ni ijila ia ixi ia Mouabhe. Nouemi keji kanena kubhana kua Lute o ima ioso íii mu ixi ia Beleme. Nouemi ua kexile ni uôma ua kuila, keji sanga munumi mba inzo phala muéne. Mu kiki, Nouemi ua mu tangela phala kuvutuka ku ixi ia Mouabhe. Kala ki tua tange kia, Olofa ua “vutuka ku kifuxi kiê ni ku nzambi jê.” (Lute 1:9-15) Maji, Lute ka xikina kuvutuka ku mundu uê ni ku jinzambi jê ja makutu.

6. (a) Kiebhi Lute ua solele ni unjimu? (b) Mukonda diahi Bouaji uambele kuila, Lute ua lengela moxi a mabhabha a Jihova mu kusota kididi kia kukala?

⁶ Nange Lute ua di longele ia lungu ni Jihova bhu kaxi ka munumi’ê mba Nouemi. Muéne ua di longele kuila, Jihova kexile kala o jinzambi ja Mouabhe. Lute ua zolele Jihova, muéne uejidile kuila, ua tokalele ku mu zola ni ku mu bheza. Mu kiki, Lute ua solele ni unjimu. Muéne uambe kua Nouemi: “O mundu ué u kala mundu uami, Nzambi ié Nzambi iami.” (Lute 1:16) O mixima ietu i fulujuka kioso ki tu xinganeka mu henda ia londekesele Lute kua Nouemi. Maji o kima kia beta o kota o henda ia Lute kua Jihova. Katé muéne Bouaji ua sangulukile ni henda íii, anga u mu ximana mukonda dia kulengela ‘moxi dia mabhabha a Jihova mu kusota kididi kia kukala.’ (Tanga Lute 2:12.) Nange o izuelu íii ia Bouaji, i tu lembalesa o ukexilu ua mon’a njila kusota kididi kia kondama bhu kaxi ka mabhabha a jitata. (Jisálamu 36:7; 91:1-4) Kiene kimoxi ué, Jihova ua lange Lute, ni ku mu bhana mabesá, mukonda dia kixikanu kiê. Lute nuka ua diela kusidivila Jihova.

7. Nange ihi i tena kukuatekesa ió ala ni uôma ua kubhakula o mienhu iâ kua Jihova?

⁷ Athu avulu a di longa ia lungu ni Jihova, maji ka mu dielela. Ene ala ni uôma ua kubhakula o mienhu iâ kua muéne, ni kua batizala. Se kiene ué ki u divua, banza se mukonda diahi u divua kiki. Etu enioso tu bheza kikale o nzambi ia makutu mba Nzambi ia kidi. (Josuué 24:15) O kusola kusidivila Nzambi ia kidi, kiene o kima kia tokala. Kioso ki u bhakula o muenhu uê kua Jihova, kiki kilondekesa kuila, eie uala ni kixikanu kia kuila, muéne ua-nda kulanga. Muéne ua-nda ku suínisa ku mu sidivila, né muéne ni ibhidi ioso ioso i moneka. Kiene o kima kia bhangele Nzambi kua Lute.

8. Jimbulula o musoso ua Ezekiia.

⁸ O musoso ua Ezekiia ki u difu ni musoso ua Lute. Ezekiia ua bhangele mbandu ia  kifuxi kia kanene kubelesela o itumu ia Nzambi. Maji, ko athu oso akua Izalaiele, a kolokotele mu ufiiele uâ. O Sobha Akaji, tata ia Ezekiia, uexile muthu ua iibha. Muéne ka kexile mu xila o tembulu ia Nzambi, mukonda dia kiki, uexana athu phala kubheza o jinzambi jamukuá. Akaji ua tumu ué kuoha o jiphange ja Ezekiia, phala ku a satela ku nzambi ia makutu. Sé phata, Ezekiia ua dibhanene ni ibhidi iavulu mu undenge uê!​—2  Jisobha 16:2-4, 10-17; 2 Malunda 28:1-3.

9, 10. (a) Nange mukonda diahi Ezekiia ueji kala ni njinda ia Jihova? (b) Mukonda diahi ki tu tokala kutatela Nzambi? (c) Mukonda diahi ki tu tokala kubanza kuila, o musoso ua muiji uetu u bhangesa kukala tu athu ambote mba a iibha?

⁹ O phangu ia iibha ia xisa Akaji, ieji bhangesa mon’ê Ezekiia kukala ni njinda ia Jihova. Lelu, saí athu a di bhanene ni ibhidi iavulu, maji o ibhidi íii, ki i sokela ni ia bhitile na-iu Ezekiia. Maji né kiki, o athu enhá a mona kuma, a tokala ‘kutatela Jihova’ mba o kilunga kiê. (Jisabhu 19:3) A mukuá a banza kuila, o ima ia iibha ia bhangele o jitata jâ, mba o miji iâ, i tena ku a bhangesa kubhanga ué o ima ia iibha ia bhangele ene. (Izekiiele 18:2, 3) O kuila o ibanzelu íii kidi muéne?

¹⁰ O muenhu ua Ezekiia ulondekesa kuila, o kibanzelu kiki ki kidi! Ki bhuala kima ki tu bhangesa kutatela Jihova. Muéne ka bhange o athu phala kutala o hadi. (Jobe 34:10) Tuejiia kuila, o ima i longa o jitata kua an’â i tena ku a suínisa kubhanga ima iambote, mba ima ia iibha. (Jisabhu 22:6; Kolose 3:21) Maji kiki, ki kilombolola kuila, o musoso ua muiji uetu u tu bhangesa kukala muthu uambote mba muthu ua iibha. Mukonda diahi? Mukonda Jihova ua tu bhana o ufôlo ua kusola. Kiki kilombolola kuila, tu tena kusola kubhanga o ima iambote mba o ima ia iibha. (Matendelelu 30:19) Kiebhi Ezekiia kia katula mbote ku ujitu iú?

11. Ihi ia bhangesa Ezekiia kukala sobha iambote ia Judá?

¹¹ Sumbala tat’ê uexile sobha ia iibha mu Judá, maji Ezekiia ua kituka sobha iambote. (Tanga 2 Jisobha 18:5, 6.) Muéne ka kaiela o phangu ia iibha ia tat’ê. Mu veji dia kiki, muéne ua solo kuívua o jipolofeta ja Jihova kála Izaia, Mikeia, ni Hozeia. Muéne  ua xikina o itendelesu iâ, anga ua i kumbidila. Kiki kia mu bhangesa kubatula maka avulu a bheka tat’ê. Muéne ua zelesa o tembulu, iú ua bhingi kua Nzambi phala kuloloka o ituxi ia mundu. Muéne ua buikile ué o iteka mu ixi ioso. (2 Malunda 29:1-11, 18-24; 31:1) Mu kubhita kithangana, kioso Sinakedibhi, sobha ia Asídia kia kondoloka o mbanza ia Jeluzaleme, Ezekiia ua londekesele kusuína ni kixikanu kia kolo. Muéne ua dielele kua Jihova, anga ua suínisa ué o mundu uê. (2 Malunda 32:7, 8) Saí ithangana, Ezekiia ua kexile mu dizangeleka, maji kioso Jihova kia mu bazela, muéne ua xikina ni muxima uoso. (2 Malunda 32:24-26) Sé phata, Ezekiia phangu iambote phala ku i kaiela. Muéne kehela kuila, o musoso ua muiji uê, u mu bhangesa kukala muthu ua iibha. Mu veji dia kiki, muéne ua londekesa kuila, uexile kamba dia Jihova.

12. Kála Ezekiia, kiebhi athu avulu lelu a londekesa kuila, makamba a Jihova?

¹² Lelu, o ku iibha ku mundu kuene mu dibandekesa dingi, o athu ka londekesa o henda. Mukonda dia kiki, an’a avulu ene mu a sasa sé o jitata. (2 Timote 3:1-5) Sumbala Jikidistá javulu a tundu mu miji iavulu, né kiki, ene a solo kukala makamba a Jihova. Kála Ezekiia, ene a xikina ni kidi kioso kuila, o musoso ua muiji, ki u bhangesa kuijiia se ua-nda kala muthu uahi ku hádia. Nzambi ua tu bhana o ufôlo ua kusola. O ujitu iú, u tu bhangesa ku mu sidivila ni ku mu ximana, kala kia bhangele Ezekiia.

13, 14. Nange mukonda diahi o kikalakalu kia tambula Madiia kia bhonzele, maji kiebhi muéne kia vutuila kioso kiévu o izuelu ia anju Ngabidiiele?

¹³ Mu kubhita mivu iavulu, kioso kia bhiti o izuua ia Ezekiia, kuexile muhatu ua tululuka a mu ixanene Madiia. Muéne uexile ni ukamba ua katunda ni Jihova. Mukonda dia kiki, ua tambula kikalakalu kia dikota. Muéne ueji vuala o Mon’a Nzambi ni ku mu sasa! Jihova ua zolele kiavulu Madiia, iú ua mu dielele, phala ku mu bhana o ujitu iú ua katunda. Maji kiebhi muéne kia divu, kioso kiévu mu veji ia dianga kuila, ueji vuala o Mon’a Nzambi?

¹⁴ Tuene mu zuela kiavulu ia lungu ni ujitu iú ua katunda ua tambula Madiia. Maji ibhidi iahi ia bhiti na-iu Madiia, kioso kiévu o njimbu íii? Mu kifika, o anju Ngabidiiele ua mu tangela kuila, sê kuzeka ni diiala, ueji kuimita. Maji, o anju Ngabidiiele ka jimbulula ku muiji ni jivizinhu jê, kiebhi kieji kuimita. Ihi ieji banza ene? Kiebhi kieji londekesa kua Zuze kuila, uexile muhatu ua fiiele, ka zekele ni diiala? Muéne ueji tambula ué konda ni kusasa o Mon’a Nzambi! Ki tuejiia o ima ioso ia bhangesa Madiia kuthandanganha, maji tuejiia o ima ia bhangele  muéne, kioso o anju Ngabidiiele kia zubha kuzuela né. Muéne uambe: “Eme’ami’ú, ngi mubhika ua [Jihova]! Ki ngi bhite, Ngana kala ki ua ki zuela.”​—Luka 1:26-38.

15. Mukonda diahi o kixikanu kia Madiia ki tu bhangesa kudiuana?

¹⁵ O kixikanu kia Madiia ki tu bhangesa kudiuana! Muéne ua kexile polondo, phala kubhanga kima kioso kioso kieji mu bhinga kála mubhika. Muéne ua dielele kuila, Jihova ueji mu langa ni ku mu fikidila. Kiebhi Madiia kia kexile ni kixikanu kiki kia kolo? Ka tu vuala ni kixikanu. Maji se tu suína kukala ni kixikanu ni kubhinga kua Nzambi phala kubesoala o nguzu ietu, tu tena kukala ni kixikanu. (Ngalásia 5:22; Efezo 2:8) Madiia ua bhange ioso phala kukolesa o kixikanu kiê. Kiebhi ki tuejiia? Tu mone kiebhi muéne kiévu ni ihi ia zuela kioso kiévu o maka iá.

16. Ihi ilondekesa kuila, Madiia uevuidile kiambote?

¹⁶ Madiia uevuidila kiambote. O Bibidia i zuela kuila, tua tokala ‘ku lenguluka mu kuívua, ni ku kokoloka o kutema.’ (Tiiaku 1:19) Madiia uevuidile kiambote. O Bibidia ilondekesa kuila, muéne uévu ni muanhu uoso o ima ia mu tangele, benge benge o ima ia di longele ia lungu ni Jihova. Muéne ua katula kithangana phala kuxinganeka o ima íii. Tu tena kumona kiki, mu kithangana kia vuala Jezú. Mu kithangana kieniókio, o abhidi a mu tangela o njimbu ia a tudile o anju. Mu kubhita kithangana, kioso Jezú kia kexile ni 12 kia mivu, muéne ua zuela kima kia bhangesa Madiia kudiuana. Mu izulukutu íii iiadi, Madiia uévu, ua lembalala ni kuila, ua banze ni muanhu mu ima ioso iévu.​—Tanga Luka 2:16-19, 49, 51.

17. Mbote iahi i tu katula mu ukexilu ua kuzuela ua Madiia?

¹⁷ Ihi ia zuela Madiia kioso kiévu o maka. O Bibidia ki i tu tangela kiavulu ihi ia zuela Madiia. O izuelu iê, tu i sanga mu divulu dia Luka 1:46-55. O izuelu íii ilondekesa kuila, Madiia uejidile kiambote o Mikanda ia Hebalaiku. Kiebhi? O izuelu ia Madiia ia difuile ni izuelu ia musambu ua Hana, manh’â Samuuele. (1 Samuuele 2:1-10) Nange Madiia ua tumbula o Mikanda Ikola mu 20 a ji veji. Sé phata, muéne ua uabhele kuzuela o ima ia di longele kua Kamba diê Jihova.

18. Kiebhi ki tu tena kukaiela o kixikanu kia Madiia?

¹⁸ Kála Madiia, saí ithangana, nange tu banza kuila, ki bhonza kukumbidila o kikalakalu kia tu bhana Jihova. Tu kaiela o phangu iê, mu kuxikina o kikalakalu ni kulenduka kuoso, ni kudielela kuila, Jihova ua-nda tu kuatekesa. Tu tena ué kukaiela o kixikanu kia Madiia kioso ki tuívua Jihova ni kuxinganeka o ima i tu di longa ia lungu ni muéne ni ikanenu iê. Mu kusuluka, tua tokala kuzuela ni kisangusangu ku akuetu o ima i tua di longo.​—Jisálamu 77:11, 12; Luka 8:18; Loma 10:15.

19. Mbote iahi i tu tena kukingila, kioso ki tuia ni kukaiela o phangu ia athu a kixikanu a a tange mu Bibidia?

¹⁹ Sé phata, Lute, Ezekiia ni Madiia exile makamba a Jihova, kála Mbalahamu. Ene a bhanga mbandu ku “kifuxi kionéne kia jimbangi javulu,” exile ué makamba a Nzambi. Tu kolokotenu phala kukaiela o phangu íii ia kixikanu. (Jihebeleu 6:11, 12) Se tu bhanga kiki, tu tena kukingila ni muanhu uoso phala kukala ni ukamba uambote ni Jihova, katé ku hádia ni hádia!