1, 2. (a) Kiebhi ki tuejiia kuila, o athu a tena kukala makamba a Nzambi? (b) Ihi i tua-nda di longa mu milongi íii?

TUNDÉ mu kithangana kia tu vuala katé kia ku fuá, tu bhindamena o henda. O athu a bhindamena kukala ni ukamba uambote, ka bhindamena ngó o henda i di londekesa o diiala ni muhatu. Maji o henda ia Jihova, iene i tua bhindamena dingi. Athu avulu ka xikina kuila, o athu a tena kukala ni ukamba uambote ni Nzambi, mukonda ki tu tena ku mu mona, ni kuila, muene o muteni a ioso. Maji etu tuejiia o kidi kia lungu ni maka enhá!

² Bhu kaxi ka Bibidia, tuejiia kuila, o athu exile makamba a Nzambi. Etu tua tokala kukaiela o phangu ia athu enhá. Mukonda diahi? Mukonda o kima kia beta-o-kota ki tu suua ku muenhu uetu, o kukala ni ukamba uambote ni Nzambi. Tua-nda di longa ia lungu ni phangu ia Mbalahamu. (Tanga Tiiaku 2:23.)  Kiebhi muéne kia kituka dikamba dia Nzambi? Mbalahamu ua kexile ni ukamba uambote ni Nzambi, mukonda uexile ni kixikanu kua Nzambi. Mukonda dia kiki, muéne a mu tumbula kala “tata ia oso a xikana Nzambi.” (Loma 4:11) Kioso ki uia ni ku di longa ia lungu ni phangu iê, dibhuidise: ‘Kiebhi ki ngi tena kukaiela o kixikanu kia Mbalahamu ni kusuínisa o ukamba uami ni Jihova?’

3, 4. (a) Jimbulula o kibhidi kia betele kota, kia bhitile ku muenhu ua Mbalahamu. (b) Mukonda diahi Mbalahamu uexile polondo phala kusatela Izake?

³ Xinganeka Mbalahamu ku banda o mulundu, sumbala uala kiá mu 125 ia mivu. ^[1] (Tala ku disukilu dia milongi.) Izake uala ku dima diê, muéne uala ni 25 ia mivu. Izake uambata o jihuinhi, Mbalahamu ua kuata o phoko, ni ima ia mukuá dingi, ia bhindamena phala kubhana o sata ia kuoha. O njila íii ia bhangele Mbalahamu, nange ia bhonzele dingi ku muenhu uê uoso. Maji ki i bhonzele mukonda dia ku kuka kiá, kana. Muéne ua kexile hanji ni nguzu iavulu. O njila ienioió ia bhonzele, mukonda Jihova ua mu bhingile phala kusatela mon’ê!—Dimatekenu 22:1-8.

⁴ Nange kiki, kiene o kibhidi kia betele kota, kia bhiti ku muenhu ua Mbalahamu. Saí athu a zuela kuila, Nzambi ua bhangele kia iibha, mu kubhinga kua Mbalahamu phala kusatela mon’ê. O athu amukuá, a zuela kuila, Mbalahamu ua kexile polondo phala kubhanga kiki, mukonda ka zolele mon’ê. Kuma o athu a zuela o ima íii kala ni kixikanu, ene kejiia se ihi ilombolola o kixikanu kia kidi, kejiia ué o ima i tena kubhanga o muthu uala ni kixikanu kia kidi. (1 Kolindo 2:14-16) Maji Mbalahamu kexile mu belesela ngó Nzambi sé kuxinganeka. Muéne ua kexile mu belesela mukonda uexile ni kixikanu kia kidi. Muéne uejidile kuila, Jihova keji mu bhinga kubhanga kima kieji mu bhekela malamba ku muenhu uê uoso. Mbalahamu uejidile kuila, mu kulondekesa o kubelesela, Jihova ueji mu besoala, ni mon’ê ua kazola. Ihi ia kuatekesa Mbalahamu kukala ni kixikanu kia suína? O kuijiia o kidi, ni ima ia bhitile ku muenhu uê.

5. Nange kiebhi Mbalahamu kia di longo ia lungu ni Jihova? O kuijiia kuku, kua mu bhangesa ku divua kiebhi?

 ⁵ Kuijiia o kidi. Mbalahamu ua kulu, amu mbanza ia Ule. O athu oso mu mbanza katé muéne ni tat’ê, akexile mu bheza jinzambi ja makutu. (Josuué 24:2) Mu kiki, kiebhi Mbalahamu kia di longo ia lungu ni Jihova? O Bibidia ilondekesa kuila, Seme, mon’â Noué uexile ndandu ia Mbalahamu. Kioso Mbalahamu kia kexile ni 150 a mivu, Seme ua kexile hanji ku muenhu. Seme uexile diiala dia kixikanu kia dikota, nange muéne ua zuela ia lungu ni Jihova ku jindandu jê. Ki tuejiia ni kidi kioso, maji nange kiene Mbalahamu kia di longo ia lungu ni Jihova. O ima ia di longo Mbalahamu ia mu bhangesa kuzola Jihova, ni kukala ni kixikanu kia kolo.

6, 7. Kiebhi o izulukutu ia bhitile ku muenhu ua Mbalahamu, ia suínisa o kixikanu kiê?

⁶ O ima ia bhiti ku muenhu uê. Kiebhi o ima ia bhitile ku muenhu ua Mbalahamu ia suínisa o kixikanu kiê kua Jihova? Saí athu a zuela kuila, o ima i tu banza i tula ku muxima uetu, anga o muthu u bhanga ima phala kulondekesa o ixinganeku iê. O ima ia di longo ia lungu ni Nzambi, ia tula ku muxima ua Mbalahamu, kiki, kia mu bhangesa kuxila kiavulu “Jihova, Nzambi Suke-ku, ua’vu o diulu ni ixi.” (Dimatekenu 14:22) O Bibidia ixana o kuxila kuku, kala ‘uôma ua Nzambi.’ (Jihebeleu 5:7) Phala kukala ni ukamba uambote ni Nzambi tua tokala kuzola Nzambi. (Jisálamu 25:14) O kídifua kiki, kiene kia suínisa Mbalahamu kubelesela Jihova.

⁷ Nzambi ua tangele Mbalahamu ni Sala, phala kuxisa o inzo iâ mu mbanza ia Ule, phala kuia mu tunga ku ixi iéngi. Ene kexile dingi minzangala, ene eji tunga mu jibalaka ku muenhu uâ uoso. Sumbala Mbalahamu uejidile kuila, ueji bhita mu iluezu iavulu, maji né kiki, muéne ua kexile polondo phala kubelesela Jihova. Mukonda dia kubelesela kuê, Nzambi ua mu besoala ni ku mu langa. Mu kifika, kioso Sala muhatu ua Mbalahamu, kia mu ambatele, anga Mbalahamu u kala mu kiluezu kia ku mu jibha, Jihova ua lange Mbalahamu ni Sala mu veji javulu. (Dimatekenu 12:10-20; 20:2-7, 10-12, 17, 18) O izulukutu íii, ia suínisa dingi o kixikanu kia Mbalahamu.

8. Kiebhi o kukala ni kuijiia kua kidi, ku tu kuatekesa kusuínisa o ukamba uetu ni Jihova?

⁸ O kuila tu tena kukala makamba a Jihova? Tu tena! Kala Mbalahamu, etu tua tokala ku di longa ia lungu ni Jihova. Tu tena ué kukala ni kuijiia, ni uhete u tua bhindamena. Lelu tuala dingi ni milongi iavulu, o ia kexile na-iu Mbalahamu, ndenge. (Daniiele 12:4; Loma 11:33) O Bibidia iezala ni  milongi iavulu, ia lungu ni ió “ua’vu o diulu ni ixi.” O ima i tu di longa, i tu bhangesa kuzola Jihova, ni ku mu xila ni muxima uoso. O henda íii, ni kuxila, ku tu suínisa ku mu belesela. Kioso ki tu bhanga kiki, tu tena kumona kiebhi muéne kia tu langa ni kia tu besoala. Mu kumona o ima íii, o kixikanu kietu ki suína dingi. Kiki ki tu kuatekesa kukala polondo phala kudibhana ni ibhidi ia mukuá. Se tu bheza Jihova ni muxima uoso, tua-nda zediua ku muenhu, tua-nda kala ni kutululuka, ni kusanguluka kua kidi. (Jisálamu 34:8; Jisabhu 10:22) Se tu kolokota mu ku di longa ia lungu ni Jihova, o ukamba uetu ni muéne ua-nda suína dingi.

9, 10. (a) Ihi ia bhingi phala kusuínisa o ukamba uetu ni akuetu? (b) Ihi ilondekesa kuila, Mbalahamu ua kexile mu bhana valolo ni kukolesa o ukamba uê ni Jihova?

⁹ O ukamba uambote ni muthu, ua difu ni jimbongo jala ni valolo iavulu. (Tanga Jisabhu 17:17.) Ki u difu ni kitutu kia te kalu iavulu, kio bhange phala ku fuamesa ngó o inzo. Mu veji dia kiki, o ukamba uambote ua difu ni kitulu ki bhindamena menha, phala ku buingita kiambote. Mbalahamu ua bhanene valolo iavulu ku ukamba uê ni Jihova, mukonda dia kiki, ua suínisa o ukamba uê ni muéne. Kiebhi muéne kia bhange kiki?

¹⁰ Mbalahamu ua kolokota kuzola Nzambi, ni ku mu belesela. Mu kifika, kioso muéne kiendele mu ixi ia Kanana kumoxi ni muiji uê ni jiselevende jê, muéne ua suluka mu kuehela Jihova ku muendesa, kioso kia mesenene kubatula maka oso-oso. Mu kubhita muvu umoxi, ande dia Izake ku mu vuala, kioso Mbalahamu kia kexile ni 99 dia mivu, Jihova ua tumina Mbalahamu kusaia o maiala oso akexile mu dibhata diê. O kuila Mbalahamu ua kexile ni phata, mba ua soto jindunge jengi, phala ku dituna kubhanga o kima kia mu tumine Jihova? Kana, muéne ua kexile ni kidielelu kua Jihova, anga u mu belesela mu “kizuua kienhokio.”​—Dimatekenu 17:10-14,  23.

11. Mukonda diahi Mbalahamu ua thandanganhele ni jimbanza ja Sodoma ni Ngomola, ni kiebhi Jihova kia mu kuatekesa?

¹¹ Kuma Mbalahamu ua kexile mu belesela katé muene ni ima iofele ia mu tumine Jihova, o ukamba uâ ua dibandekesa dingi. Muéne ua divu kuma, u tena kubhinga kima kioso kioso kua Jihova, kala o ku mu bhinga phala ku mu jimbuluila kiambote o ima. Mu kifika, Mbalahamu ua thandanganhele kioso kia mu tangela kua Jihova kuila, ueji buika o jimbanza ja Sodoma ni Ngomola. Mukonda diahi? Muéne ua kexile ni uôma mukonda ua kexile mu banza kuila, Nzambi ueji buika o athu ambote kumoxi ni athu a iibha. Nange ua thandanganhele ni muebhu’ê Lote ni muiji uê, mukonda a tungile mu mbanza ia Sodoma. Mbalahamu ua dielele kua Jihova, o “Mufundixi u fundisa ioso mu ngongo.” Mu kiki, ni kulenduka kuoso, muéne ua zuela ni Jihova ia lungu ni ima ia  kexile ku mu thandanganhesa. Jihova ua londekesa o muanhu kua kamba diê, anga u mu bhangesa kumona kuila, Muéne mukua henda. Jihova ua mu tangela kuila, kioso kia fundisa o athu ni ku a buika, muéne u sota o athu oso ambote, anga u a bhulula.​—Dimatekenu 18:22-33.

12, 13. (a) Kiebhi o kuijiia ni izulukutu ia bhitile ku muenhu ua Mbalahamu, ia mu kuatekesa mu ithangana ia mukuá? (b) Ihi ilondekesa kuila, Mbalahamu ua dielele kua Jihova?

¹² Tu tena kumona kuila o kuijiia kua kidi, ni izulukutu ioso ia bhitile ku muenhu uê, ia kuatekesa Mbalahamu kukolesa o ukamba uê ni Jihova. Mu kiki, mu kubhita thembu, kioso Jihova kia bhingi kua Mbalahamu phala kusatela mon’ê, muéne uejidile ni kidi kioso kuila, Jihova uexile mukua muanhu, muthu ua tenene ku mu dielela, ni mukua kulanga o jiselevende jê. Mbalahamu uejidile ni kidi kioso kuila, Jihova ka kitukile muthu ua iibha! Mukonda diahi tu tena kuzuela kiki?

¹³ Ande dia kubanda ku mulundu, Mbalahamu uambe ku jiselevende jê: “Xalenu bhabha ni bulu, eme ni mona tuie bhaná; o ki tua kà zubha kubheza tu vutuke, tu mi sange.” (Dimatekenu 22:5) Ihi ia kexile mu lombolola o izuelu ia Mbalahamu? Mu kuzuela kuila ueji vutuka kumoxi ni Izake, o kuila muéne ua kexile mu tanga makutu, sumbala ua kijidile kuila ueji mu bhana kala sata? Kana. O Bibidia izuela kuila, Mbalahamu uejidile ni kidi kioso kuma, Jihova ua kexile ni kutena kua kufukununa Izake. (Tanga Jihebeleu 11:19.) Mbalahamu uejidile kuila, Jihova muéne ua a bhanene o kutena kua kuvuala mon’a, sumbala muéne ni Sala a kukile kiá. (Jihebeleu 11:11, 12, 18) Mu kiki, muéne ua mono kuila, sé-ku kima ki tena kufidisa Jihova kubhanga o ima ia mesena. Mu kidi, Mbalahamu kejidile o izulukutu ieji bhita mu kizuua kieniókio. Maji muéne ua dielele kuila, se kiexile mu vondadi iê, Jihova ueji fukununa mon’ê Izake, phala kukumbidila o ikanenu iê ioso. Mukonda dia kiki, Mbalahamu a mu ixana “tata ia oso a xikana Nzambi.”

14. Ibhidi iahi i u dibhana na-iu mu sidivisu ia Jihova? Kiebhi o phangu ia Mbalahamu i tena ku u kuatekesa?

¹⁴ Sumbala Jihova kene mu tu tuma kusatela o tuana tuetu, maji muéne u tu tuma kubelesela o itumu iê. Saí ithangana, nange ki tu tendela se mukonda diahi a tu bhana o itumu íii, mba nange ki tu bhonza kiavulu ku i belesela. O kuila u divua ué kiki? Saí iá, kia a bhonza kuboka. Mukonda dia jisonhi, nange ki a bhonza kuzuela ni athu a kambe o kuijiia. Amukuá ala ni uôma ua ku a mona kala asonhi ku salu mba bhu xikola. (Makatukilu 23:2; 1 Tesalonika 2:2) Kioso kia ku bhinga phala kubhanga kima kia bhonzo, xinganeka mu kixikanu ni kusuína kua londekesa Mbalahamu. Kioso ki tu xinganeka mu phangu ia maiala ni ahatu a fiiele, tu kala ni vondadi ia kukaiela o phangu iâ, phala kuzukama dingi kua Kamba dietu, Jihova.​—Jihebeleu 12:1, 2.

15. Mukonda diahi tu tena kuxikina kuila, Mbalahamu ka diela mukonda dia kubelesela Jihova ni ufiiele uoso?

¹⁵ O kuila Mbalahamu ua diela mukonda dia kubelesela Jihova? O Bibidia izuela kuila, Mbalahamu “[uafu] kiá ku uadiakimi uavulu, ua kuka kiá, ua kukidila muene, mivu ia mu kumu.” (Dimatekenu 25:8) Kioso kia tenesa 175 kia mivu, muéne ua kexile mu xinganeka mu ima ia bhitile ku muenhu uê, ni kusanguluka. Mukonda diahi? Mukonda o ukamba uê ni Jihova, uexile o kima kia betele kota ku muenhu uê. Maji kioso ki tuívua kuila, Mbalahamu ua “kukidila muene, mivu ia mu kumu,” ki kilombolola kuila, muéne ka mesenene dingi kukala ku muenhu ku mundu uobhe.

16. Iebhi o ima iambote ia-nda mona Mbalahamu mu Palaízu?

¹⁶ O Bibidia izuela kuila, Mbalahamu “ua kingile dibhata di kala ni madisesa ma nangenena, o mesene iê ni mutungi muène Nzambi.” (Jihebeleu 11:10) Mbalahamu ua dielele kuila, saí kizuua muéne ueji mona o mbanza íii, o Utuminu ua Nzambi, kutumina o ixi ioso. Kiene muene kia-nda bhanga! Xinganeka o kisangusangu kia Mbalahamu, kioso kia-nda tunga mu palaízu mu ixi, ni kusuínisa dingi o ukamba uê ni Nzambi. Muéne ua-nda sanguluka mu kuijiia kuila, o phangu iê ia kuxikana ia kuatekesa o jiselevende ja Nzambi mu midi ni jimidi ja mivu! Mu Palaízu, muéne ua-nda mona kuila, o sata ia bhanene ku Mulundu ua Modiia, ia lombolola kima kia dikota. (Jihebeleu 11:19) Muéne ua-nda mona kiebhi o ndolo ivu kioso kia kexile polondo phala kusatela mon’ê Izake, ia kuatekesa mazunda ni mazunda a athu a fiiele kutendela o ndolo ievu Jihova, kioso kia bhana Mon’ê Jezú Kristu, kala sata ia kukula phala kubhulula o athu. (Nzuá 3:16) O phangu ia Mbalahamu i tu kuatekesa kubhana dingi valolo ku sata ia kukula, o kima kia beta kota kia bhange Nzambi phala kulondekesa o henda iê!

17. Ihi i ua tokala kubhanga, ni ihi i tua-nda di longa mu milongi ia-nda kaiela?

¹⁷ Kala muthu mudietu ua tokala ku di suínisa phala kukaiela o kixikanu kia Mbalahamu. Kala kia bhitile ni muéne, tua bhingi ué kuijiia o ima ni ku dibhana ni ibhidi ku muenhu uetu, phala kusuína. Kioso ki tuia ni ku di longa o kidi kia lungu ni Jihova ni ku mu belesela, tua-nda mona kiebhi muéne kia tu besoala ni ku tu langa. (Tanga Jihebeleu 6:10-12.) Jihova a kale Kamba dietu katé ku hádia ni hádia! Mu milongi ia kaiela, tua-nda di longa dingi phangu jitatu ja athu a fiiele, a kituka makamba ambote a Nzambi.