• Eji mu sola kwa Nzambi. “Sobha yami nga mu’undu bhu kididi . . . phal’eme ngi ku bhane akwa jixi ku avwa, a kale undundu wé, katé ku maxokololo mu ngongo.”—Jisálamu 2:6, 8.

• Weji tunda ku mwiji wa Sobha Davidi. “A tu vwalela mona, a tu bhana mona wa diyala; . . . O kukala kwa ulamba wenyú, ki kwene mbambe; o kutululuka kwê ki kwene kúbwa; wa tulama bhu kyandu kya Davidi ni ku usobha wê, phala ku u kwatesa bhu kididi.”—Izaya 9:6, 7.

• Eji mu vwalela mu Beleme. “Eye Beleme. . . , mo-mwé mwene mwa kà tunda u ngi kalela Ngana . . . Mwene we a kà mu zangeleka katé ku [maxokololo] kwa suku oxi.”—Mikeya 5:2, 4.

• Eji mu dituna ku athu, eji mu jibha. “Kya kexile a mu ehelela, ki bhwala dingi muthu wa mu suwu. . . . Mwene a mu kwama mukonda dya itondalu yetu, a mu tutujula mukonda dya ikuma yetu.”—Izaya 53:3, 5.

• Eji mu fukununa ni ku mu jingisa. “Eye kuxikina kwehela mwenyu wami ku’alunga. Muthu wé wa mu solo kà kala mu sekumuka . . . O ku lukwaku lwê lwa kudya sayi-ku ima ya vondadi ki i kumu dingi.”—Jisálamu 16:10, 11.

Ku athu oso mu ngongo, kwene ngó muthu umoxi wa fwama kukala Sobha yambote, kala kyotumbule kutunda. O muthu yu Jezú Kidistu. Mu kidi, sayi anju ya zwelele ni Madiya many’a Jezú, mwene wambe: “Nzambi, wa-nda mu bhana o kyandu kya tat’ê, Davidi, . . . O Utuminu wê, ki wa-nda bhwa.”—Luka 1:31-33.

Kyoso kyexile mu ixi Jezú kexile sobha. Mwene wa mu tumina o athu tundé ku dyulu, kala Sobha ya Utuminu wa Nzambi. Mukonda dyahi mwene Sobha yambote? Tu tale ihi ya bhangele Jezú kyoso kyexile mu ixi.

•   Jezú wa zolele o athu. Jezú wa kwatekesa athu avulu, mayala, ahatu, minzangala, adyakime, sumbala kexile ni idifwa imoxi. Amukwa exile jingadyama. (Matesu 9:36; Máluku 10:16) Sayi mukwa dibhute wa mu dyondela: “Ngana, se wa mesena, u tena ku ngi saka,” Jezú wa mu kwatela henda yu wa mu sake.—Máluku 1:40-42.

• Jezú wa tu longo kyebhi ki tu tena kusangulukisa Nzambi. Mwene wambe: “Enu wenu ki mu tena kusidivila Nzambi ni Jimbongo.” Mwene wambe we kwila, twa tokala kutalatala akwetu kala ki twa mesena kwila, a tu talatala. Ku mbandu ya mukwa, mwene wa londekesa we kwila Nzambi ka bhana ngó valolo mu ima i tu bhanga, maji u bhana we valolo mu ixinganeku yetu ni kyebhi ki tu divwa. Phala kuximanesa Nzambi twa bhingi kulanga o ixinganeku ni ibanzelu yetu. (Matesu 5:28; 6:24; 7:12) Mu maka a lungu ni kuzediwa, Jezú wambe kwila, phala kusanga o kuzediwa kwa kidi, twa bhingi kwijiya ihi ya mesena Nzambi kwila tu i bhanga, ni ku i kumbidila.—Luka 11:28.

• Jezú wa longo ihi ilombolola kuzola akwetu. O ibhangelu ni izwelu ya Jezú, yexile ni kutena, yexile mu tula ku mixima ya athu exile mu mwivwa. “O mundu woso wa di wana ni ukexilu wê wa kulonga, mukonda mwene wa a longo ni ungana.” (Matesu 7:28, 29, nwt) Mwene wa a longo: “Zolenu o jinguma jenu.” Ne mwene kyoso kyexile ku taka, mwene wa sambe: “Tata, u a loloka, mukonda ene kejiya o kima kya mu bhanga.”—Matesu 5:44; Luka 23:34, nwt.

Jezú mwene wa fwama kukala Sobha ya ngongo yoso, mukonda wa zolo o athu ni muxima woso. Maji mwene wa-nda mateka kutumina thembu kuxi?